Jɔshua 9
9
Gibiɔnnim’ yɔhim Jɔshua
1Nanim’ bɛn zaa daa be Jɔɔdɛn Mɔɣili wulinluhili polo zoya zuɣu tinsi ni mini zolɔna ni tinsi din zaa daa ʒi n-tabi Mɛditirɛniɛn Teeku zaŋ labi Lɛbanɔn polo la daa wum Izraɛlnim’ nasara dibu maa yɛla. Nanim’ maa n-daa nyɛ: Hitinim’ naa mini Amɔrinim’ naa ni Keenanim’ naa ni Pɛrizinim’ naa ni Hivinim’ naa ni Jɛbusinim’ naa. 2Bɛna n-daa laɣim naai noli ni bɛ tuhi Jɔshua mini Izraɛlnima.
3Amaa Gibiɔnnim’ ni daa wum Jɔshua ni niŋ Jɛriko mini Ai shɛm la zuɣu. 4Ka bɛ daa woligi n-kpuɣi yɛŋkiŋkabina soli. Bɛ daa bola bindira niŋ bɔto kura din chahi ka bɛ liɣiliɣi li ni n-zaŋ pa bunsi zuɣu; ka zaŋ wain kol’ kura din chahi ka bɛ liɣiliɣi li pahi; 5ka zaŋ namda kura din chahi ka bɛ shɛnshe li piri; ka zaŋ binyɛr’ chɛra ye, ka bɛ bindira zaa kul kuui mili ka kpe yue. 6Ka bɛ daa chaŋ Jɔshua sani Giligal sansani la ni nti yɛl’ o mini Izraɛlnima. “Ti yila tiŋgbɔn shɛli din be katiŋ’ na ni ti mini ya ti lo tab’ alikauli.”
7 #
Yibu 23.32; 34.12; Zal 7.2 Amaa ka Izraɛlnim’ daa bɔhi Hivinim’ maa, “Wula ka ti mini ya ni tooi lo tab’ alikauli? Dama di pa shɛli ka yi kul bela yomayoma kpe.”
8Ka bɛ yɛli Jɔshua, “Ti nyɛla a daba.” Ka Jɔshua bɔhi ba, “Banima n-lee nyɛn ya? Ka ya ka yi lee yina?”
9Ka bɛ yɛl’ o, “Ti yila tiŋgbɔn shɛli din be katiŋ’ na. Yawɛ ŋun nyɛ yi Naawuni la yuli duya pam. Ti pun wum o yɛla; ka wum o ni daa tum shɛlikam zaa Ijipti la yɛla; 10#Kal 21.21-35 ka lan wum o ni daa niŋ Amɔrinim’ nanima ayi la shɛlikam zaa Jɔɔdɛn Mɔɣili duli wulimpuhili polo la. Nanima ayi maa n-nyɛ Hɛshibɔn naa Sihɔn mini Bashan naa Ogi ŋun daa be Ashitarɔt la. 11Ti kpamba mini ti tiŋgbɔŋ maa nim’ zaa daa yɛlimi, “Bomiya bindira niŋ yi nuu ni n-gbaai soli chaŋ ti nya ba yɛli ba, ‘Ti nyɛla yi daba, ka chɛ m-bɔri ni ti mini ya lo tab’ alikauli.’ 12Nyam’ ti bɔrɔbɔro, di daa na kul tulimi ka ti zaŋ li yi yiŋ’ na ti ni daa yiɣisina dahin’ shɛli ni ti ti diri sol’ ni, amaa nyam’ di ni kuui ka kpe yue shɛm pumpɔŋɔ. 13Wain kola ŋɔ daa nyɛla zaɣ’ pala ka ti yi yiŋ’ na, ka nyam’ di ni chahi shɛm. Ka ti binyɛra ŋɔ mini ti namda ŋɔ gba chahila so’ wɔɣinli maa chandi ni.”
14Ka Izraɛlnim’ daa deei bɛ bindira maa shɛli di, ka bi suhi Yawɛ n-niŋ o saawara di zuɣu. 15Ka Jɔshua daa chɛ ka o mini ba naai noli, ka o lo ba alikauli ni bɛ ku ku ba. Ka Izraɛl kpamba gba daa lo ba alikauli ni bɛ ni ʒe alikauli maa nyaaŋa.
16Izraɛlnim’ ni daa lo Gibiɔnnim’ alikauli maa nyaaŋa daba ata dali ka bɛ ti wum ni Gibiɔnnim’ maa nyɛla bɛ ʒiʒiinitaba, ka bɛ mini ba kul bela luɣ’ yini. 17Ka Izraɛlnim’ daa yiɣisi n-gbaai chandi, zaŋ chaŋ daba ata dali ka bɛ paai Gibiɔnnim’ ni daa be tin’ shɛŋa maa ni. Bɛ tinsi maa n-nyɛ Gibiɔn mini Chɛfira ni Bɛrɔt ni Kiriatijiarim. 18Amaa ka Izraɛlnim’ daa bi ku ba Izraɛl kpamba ni daa pun po Yawɛ ŋun nyɛ Izraɛlnim’ Naawuni, ka lo ba alikauli shɛl’ la zuɣu. Di saha ka Izraɛlnim’ maa daa ŋumdi bɛ kparima ni n-niŋdi bɛ kpamba maa. 19Amaa ka Izraɛl kpamba maa zaa daa yɛli Izraɛlnim’ maa zaa, “Ti pun pola Yawɛ ŋun nyɛ Izraɛlnim’ Naawuni ŋɔ ka lo ba alikauli maa, dinzuɣu ti ku tooi niŋ ba shɛli pumpɔŋɔ. 20Di kpala talahi ni ti chɛ ba ti ni lo ba alikauli shɛli maa zuɣu; di yi pa lala, ti ni nya tibidarigibo.” 21Ka kpamba maa daa lan yɛli ba, “Chɛliya ba, amaa ka bɛ lee kabiri dari ka ŋɔŋdi kom tiri Izraɛlnim’ zaa.” Kpamba maa ni daa yɛli shɛm m-bala.
22Ka Jɔshua daa chɛ ka bɛ boli Gibiɔnnim’ maa na ka o ti bɔhi ba. “Bɔ n-niŋ ka yi yɔhim ti yɛli, ‘Ti mini ya shee wɔɣ’ pam.’, ka kul bela ti sani kpe ŋɔ? 23Dinzuɣu Naawuni noli ni din ya; ka yi ni shɛb’ kul ni nyɛla daba sahakam; ka kabiri dari, ka ŋɔŋdi kom niŋdi n Naawuni jɛmbu duu.”
24Ka bɛ garigi yɛli Jɔshua, “Din chɛ ka tinim’ bɛn nyɛ a daba ŋɔ niŋ lala maa nyɛla, ti pun wum ka biɛhiŋ kani ni Yawɛ ŋun nyɛ yi Naawuni ŋɔ daa yɛli Musa ni o zaŋ tiŋgbɔŋ ŋɔ zaa tin ya; ka ni ku ninvuɣ’ shɛb’ bɛn zaa be di ni; ka ti ni zɔri dabiɛm ti nyɛviya zuɣu zaŋ chaŋ yi sani la zuɣu ka ti niŋ lala maa. 25Ka pumpɔŋɔ ti bela yi nuu ni; niŋmiya ti yi ni nya ka di simdi ni yi niŋ ti shɛm.” 26Lala ka Jɔshua daa niŋ tiligi Gibiɔnnim’ maa Izraɛlnim’ nuu ni, ka bɛ bi ku ba. 27Amaa ka Jɔshua daa lee chɛ ka bɛ leei dakabiriba ni kɔŋɔŋdiba dindali maa. Ka bɛ kabiri dari ka ŋɔŋdi kom tiri Izraɛlnima, ka niŋdi lala tahiri Yawɛ sara maligu bimbini gba gbini. Ka bɛ na kul niŋdi lala luɣ’ shɛlikam Yawɛ ni pii leeg’ o jɛmbu shee hal ni zuŋɔ.
Red Letter Dagbani Bible © Bible Society of Ghana, 2011