Рут 1
1
Элималикдин хизан Муавдиз гъягъюб
1Регьбрари гьюкум гъабхурайи вахтари Израилиъ гаш абхъру. Сар кас, чан хпирна кьюр байра хъади, Иудея уьлкейиъ айи Вифлеем шагьриъ яшамиш шулайи. Думу Муав уьлкейиз удучӀвну гъягъюру. 2Думу адмийин ччвур Элималик, хпирин ччвур Науми, хъа баярин ччвурар Махлун ва Килеун вуйи; дурар Иудеяйин Вифлеемдиъ айи Ефрафа тухмиан вуйи. Дурар Муавдиз гъюру ва гьадушваъ гъузру.
3Наумийин жилир Элималик йикӀуру, ва думу чан кьюрид баяр хъади гъузру. 4Дурари чпиз швушварди муаварин шубар хуру. Сариз Урпа кӀуйи, хъа тмунуриз – Рут. Душваъ дурар йицӀуд йисанкьан яшамиш шулу. 5Хъа дугъан кьюрид баярра, Махлунна Килеун, йихуру. Гьамци думу жилирихъна баярихъ мягьрум шулу.
Науми Вифлеемдиз кьяляхъ гъюб
6Наумийиз, РАББИ Чан халкьдин гъайгъушнаъ гъахьну ва дурариз уьл тувну, кӀури, ебхьуру. Думу, чан швушварра хъади, чан ватандиз кьяляхъ хътакуз гьязур шулу.
7Швушварра хъади думу учв яшамиш шулайишвʼан удучӀвуру. Дурар Иудеяйин жилариина кьяляхъ хътакури рякъюъ айиган, 8Наумийи чан швушвариз кӀуру:
– Кьяляхъ хъадакай, гьарсар чан дадайин хулаз гъарахри. Узухъди ва ихь гъийихдарихъди учву фици гъахьнуш, гъит РАББИЙИРА учвуз гьаци ужʼвал апӀри! 9Гъит РАББИЙИ учвуз гьарсариз жвуван жилирин хулаъ бина бихъруси апӀри!
Хъа Наумийи дурариз макарра гъапӀу. Аммаки дурар гьарай гъитӀибккну, гъишу, 10ва дишагьлийири гъапи:
– Ваъ, учу увухъди яв халкьдихьна гъюрча.
11Наумийи кӀуруки:
– Кьяляхъ хъадакай, йиз шубар; гьаз ву ичв узухъди дуфну? Учвуз жилар хьуз узу хъана баяр апӀузахъа?#1:11 БицӀидар дархьиди аьхю чве гъакӀиган, дугъан хпир тмуну чвуччву гъадагъру аьдат айи. 12Кьяляхъ хъадакай, йиз шубар, гъарахай, узу сарун швуваз гъягъюз кьаби гъахьунза. Гьеле узу: «миж кмизук» гъапнийишра, ва гьаму йишван жилирихъди духьну хъа баяр гъапӀнийишра, 13дурар аьхю шайиз, учву ккилигури гъузуб дюз вуйинхъа? Гьаз ву ичв, швуваз дурушри, ккилигури гъузну? Ваъ, йиз шубар, йиз кьисмат учвуз гъагъиб хьибди, фицики РАББИ къаршу духьназуз.
14Дурар, гьарай гъитӀибккну, хъана ишуз хъюгъю. Вушра Урпа чан сижарихъан, макар дапӀну, хътакуру, хъа Рут гъузру.
15Наумийи Рутдиз гъапи:
– Магьа яв хвани чан халкьдихьна ва чан аллагьарихьна#1:15 Гизаф аллагьар айи диндиъ аллагьарикан сар. кьяляхъ хътакну; увура яв хванийин кьяляхъди хъадак.
16Амма Рутди гъапи:
– Уву дитну, узуз хъадак макӀан,
уву наана гъушиш, узура гьадина гъидиза,
уву наан яшамиш шулуш, узура гьадушваъ яшамиш хьидиза;
яв халкь – йиз халкь
ва яв Аллагь йиз Аллагь хьиди;
17уву йикӀрушваъ, узура йикӀиди ва гьадушваъ кивиди;
гьаци дарш, гъит РАББИЙИН хъял узʼин алабхъри –
саб аьжалитӀан узу увхьан жара апӀидар.
18Наумийи, дугъу чахъди гъузуз ижмиди гьял дапӀнайиб дябкъну, сарун дугъʼин маш илипундайи. 19Хъа, Вифлеемдиз гъяйизкьан, кьюридра рякъюъ гъаши. Дурар Вифлеемдиз гъафиган, вари шагьур гьяракатнаъ абхъу. Дишагьлийири гьамци кӀуйи: «Му Науми дайин?» 20Дугъу дурариз гъапи:
– Узуз Науми (кӀваз манир) макӀанай, хъа Мара (кьутӀкьлир) йипай, гьаз гъапиш Къудратлуйи зурба дерд тувунзуз; 21мушвʼан удучӀвруган, вари айзуз, хъа РАББИЙИ ичӀиди кьяляхъ гъапӀунзу. Узуз Науми гьаз пидихъа, РАББИЙИ узухьди гъам зигуз гъитган. Къудратлуйи узу бедбахт гьапӀну!
22Магьа гьамци Науми кьяляхъ гъафи. Дугъахъди Муав уьлкейиан чан швушв муав Рутра гъафи. Дурар Вифлеемдиз, мух убгуз хъюгънайиган, гъафнийи.
Terpilih Sekarang Ini:
Рут 1: ТабГК
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Институт перевода Библии, 2010, 2013, 2016, 2018, 2023