1 ಕೊರಿಂಥ 6
6
ಯೇಸುನ ನಂಬ್‍ನಯಿಂಗ ಈ ಲೋಕತ್‍ರ ನ್ಯಾಯಾಸ್ತಾನಕ್ ಪೋಪ ವಿಷಯ
1ನಿಂಗಡಲ್ಲಿ ಒಬ್ಬಂಗ್, ಇಂಞೊಬ್ಬಂಡ ಕೂಡೆ ತಕ್‌ರಾರ್ ಉಂಡೇಂಗಿ, ನಿಂಗಕ್ ತೀರ್ಪ್ ಕ್‍ಟ್ಟ್‌ವಕಾಯಿತ್, ದೇವಡ ಮಕ್ಕಡ ಪಕ್ಕ ಪೋಕತೆ, ದೇವಡ ಮಕ್ಕ ಅಲ್ಲತಯಿಂಗಡ ಪಕ್ಕ ಪೋಪಕ್ ನಿಂಗಕ್ ಎಚ್ಚಕ್ ದೈರ್ಯ? 2ಆಕೀರ್ ದಿವಸತ್‍ಲ್ ದೇವಡ ಮಕ್ಕ ಈ ಲೋಕತ್‍ನ ನ್ಯಾಯತೀರ್ಪ್ ಮಾಡ್‌ವಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ನಿಂಗಡಗುಂಡ್ ಈ ಲೋಕಕ್ ನ್ಯಾಯತೀರ್ಪ್ ಕ್‍ಟ್ಟ್‌ವಕ್ ಇಪ್ಪಕ, ಈ ಚೆರಿಯ ಚೆರಿಯ ವಿಷಯತ್‍ನ ನಿಂಗ ನಿಂಗಳೇ ಸರಿ ಮಾಡ್‌ವಕ್ ಕಯ್ಯುಲೆಯಾ? 3ದೇವದೂತಂಗಳ ಸಹ ನಂಗ ತೀರ್ಪ್ ಮಾಡ್‌ವಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ಅನ್ನನಾಚೇಂಗಿ ಈ ಬದ್‍ಕ್‍ರ ವಿಷಯತ್ ಬಪ್ಪ ಚೆರಿಯ ಚೆರಿಯ ತಕ್‌ರಾರ್‍ನ ತೀರ್ಪ್ ಮಾಡ್‌ವಕ್ ನಿಂಗಕ್ ಕಂಡಿತವಾಯಿತ್ ಕಯ್ಯು. 4ನಿಂಗಕ್ ಎಂತಾಚೇಂಗಿ ತಕ್‌ರಾರ್ ಇಂಜತೇಂಗಿ, ನಿಂಗ ಸಬೇಲ್ ಕಮ್ಮಿಯಾಯಿತ್ ಕಾಂಬಯಿಂಗಳ, ನಿಂಗಕ್ ತೀರ್ಪ್ ಕೊಡ್‍ಪಕ್ ನೇಮಿಚಿಡೀಂದ್ ನಾನ್ ಎಣ್ಣಂಡುವಾ? 5ನಿಂಗಳ ಞಾಣ ಪಡ್‍ತ್‍ವಕಾಯಿತ್ ನಾನ್ ಇದ್‍ನ ಎಣ್ಣ್‌ವಿ. ಇಂತ ವಿಷಯತ್‍ನ ಸರಿಯಾಯಿತ್ ತೀರ್ಪ್ ಮಾಡ್‌ವಕ್ ನಿಂಗಡ ಸಬೇಲ್ ಒರ್ ಬುದ್ದಿವಂತಂವೊ ಸಹ ಇಲ್ಲೆಯಾ? 6ಅದ್ಂಡ ಬದ್‍ಲ್ ಯೇಸುನ ನಂಬ್‍ನ ಒರ್ ಅಣ್ಣತಮ್ಮಣನ ಇಂಞೊರ್ ಯೇಸುನ ನಂಬ್‍ನ ಅಣ್ಣತಮ್ಮಣಂಗಕ್ ವಿರೋದವಾಯಿತ್ ದೇವಡ ಮಕ್ಕಳಾಯಿತ್ ಇಲ್ಲತಯಿಂಗಡ ಮಿಂಞತ್‍ ಜಗಳ ಮಾಡ್‍ವಿರಲ್ಲ.
7ನಿಂಗ ಒಬ್ಬಂಗ್ ವಿರೋದವಾಯಿತ್ ಪುಕಾರ್ ಕೊಡ್‍ಪಕಲೆ, ನಿಂಗ ಚೋತ್ ಪೋಯಿತುಳ್ಳಿರ. ನಿಂಗಕ್ ವಿರೋದವಾಯಿತ್ ಅನ್ಯಾಯ ಮಾಡ್‌ವಯಿಂಗಳ ನಿಂಗ ಎನ್ನಂಗ್ ಸಯಿಸುಲೆ? ನಿಂಗಳ ವಂಚನೆ ಮಾಡ್‌ವಯಿಂಗಕ್ ನಿಂಗ ಎನ್ನಂಗ್ ಬುಟ್ಟ್ ಕೊಡ್‍ತಂಡಿಲ್ಲೆ? 8ಆಂಡ ಬದ್‍ಲ್, ನಿಂಗಳೇ ಯೇಸುನ ನಂಬ್‍ನ ಆತ್ಮೀಯ ಅಣ್ಣತಮ್ಮಣಂಗಕ್ ಅನ್ಯಾಯ ಮಾಡಿಯಂಡ್, ಒಬ್ಬನ ಒಬ್ಬ ವಂಚನೆ ಮಾಡಿಯಂಡುಳ್ಳಿರ.
9ಅನೀತಿ ಮಾಡ್‌ವಯಿಂಗ ದೇವಡ ರಾಜ್ಯಕ್ ಬಾದ್ಯತೆ ಉಳ್ಳಯಿಂಗಳಾಯಿತ್ ಇಪ್ಪುಲೇಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ನಿಂಗ ಮೋಸ ಪೋಕತಿ; ಕಳ್ಳ ಸಂಬಂದ ಉಳ್ಳಯಿಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವ ಆಣಾಳ್‌ಂಗ, ಆಣ್-ಆಣ್, ಪೊಣ್ಣಾಳ್-ಪೊಣ್ಣಾಳ್ ವ್ಯಬಿಚಾರ ಮಾಡ್‌ವಯಿಂಗ, 10ಕಳ್ಳಂಗ, ಅತಿ ಆಸೆ ಉಳ್ಳಯಿಂಗ, ಕುಡ್‍ಕಂಗ, ತಪ್ಪಿಲ್ಲತದ್‍ನ ತಪ್ಪ್‍ೕಂದ್ ಎಣ್ಣ್‌ವಯಿಂಗ, ಲೂಟಿಕಾರಂಗ, ಈಂಗ ದಾರೂ ದೇವಡ ರಾಜ್ಯಕ್ ಬಾದ್ಯತೆ ಉಳ್ಳಯಿಂಗಳಾಯಿತ್ ಇಪ್ಪುಲೆ. 11ನಿಂಗಡಲ್ಲಿ ಚೆನ್ನ ಜನ ಇನ್ನನೆ ಇಂಜಿರ. ಆಚೇಂಗಿಯು, ದೇವ ಇಕ್ಕ ನಿಂಗಳ ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲು, ನಂಗಡ ದೇವಡ ಆತ್ಮತ್ಂಜಲು ಕತ್ತಿತ್, ಪವಿತ್ರವಾನಯಿಂಗಳಾಯಿತು, ನೀತಿವಂತಯಿಂಗಳಾಯಿತು ಮಾಡ್‍ಚಿ.
ವ್ಯಬಿಚಾರ ಪಾಪತ್ಂಜ ಓಡಿ ಪೋಪದ್
12ಈ ಲೋಕತ್‍ಲ್ ಎಲ್ಲಾನ ಅನುಬವಿಚಿಡುವಕ್ ನಾಕ್ ಅನುಮತಿ ಉಂಡ್, ಆಚೇಂಗಿ ಎಲ್ಲಾ ನಾಕ್ ಪ್ರಯೋಜನ ಆಪುಲೆ. ಎಲ್ಲಾನ ಮಾಡ್‌ವಕ್ ನಾಕ್ ಅದಿಕಾರ ಉಂಡ್, ಆಚೇಂಗಿಯು ಒಂದಾಂಗ್ ಸಹ ನಾನ್ ಗುಲಾಮನಾಯಿತ್‌ಪ್ಪುಲೆ. 13ನಿಂಗ ಕೆಲಕಾಯಿತ್ ಕೂಳ್, ಕೂಳ್‍ಕಾಯಿತ್ ಕೆಲಾಂದ್ ಎಣ್ಣುವಿರ, ಅದ್ ನೇರ್. ಆಚೇಂಗಿಯು, ದೇವ ಅದ್ ದಂಡನೂ ಪಾಳ್ ಮಾಡ್‌ವ. ಆನಗುಂಡ್ ನಿಂಗ, ಈ ತಡಿನ ಲೈಂಗಿಕ ಕುಶಿಕಾಯಿತ್‍ೕಂದ್‌ ಎಣ್ಣ್‌ವಕ್ ಕಯ್ಯುಲೆ. ಅದ್ ಒಡೆಯಂಗಾಯಿತ್ ಮಾಡ್‍ನದ್, ಒಡೆಯ ನಂಗಡ ತಡಿಕ್ ಜವಾಬ್ದಾರನಾಯಿತ್ ಉಂಡ್. 14ದೇವ ಒಡೆಯನ, ಚಾವ್‍ಯಿಂಜ ಎಪ್ಪ್‌ಚಿಟ್ಟನೆಕೆ, ನಂಗಡ ತಡೀನ ಸಹ ಅದೇ ಶಕ್ತಿಲ್ ಎಪ್ಪುವ.
15ನಿಂಗಡ ತಡಿ ಕ್ರಿಸ್ತಂಡ ತಡೀರ ಬಾಗವಾಯಿತುಂಡ್‍ೕಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ಅಕ್ಕ ನಾನ್, ಅದ್‍ನ ಎಡ್‍ತಂಡ್ ಪೋಯಿತ್ ವ್ಯಬಿಚಾರಿಯಡ ತಡಿಕ್ ಬಾಗವಾಯಿತ್ ಕೂಟ್‍ವಕಯ್ಯುವ? ಕಯ್ಯುಲೆ! 16ವ್ಯಬಿಚಾರಿಯಡ ಕೂಡೆ ಕೂಡ್‍ವಂವೊ, ಅವಡ ಕೂಡೆ ಒರೇ ತಡಿಯಾಯಿತ್ ಇಪ್ಪಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ದಂಡಾಳು ಒರೇ ತಡಿಯಾಯಿತ್‌ಪ್ಪಾಂದ್ ದೇವಡ ವಾಕ್ಯತ್‍ಲ್ ಎಣ್ಣಿತುಂಡಲ್ಲ?#6.16 ಆದ್ಯ ಪುಸ್ತಕ 2.24 17ಆಚೇಂಗಿ ಒರ್ ಮನುಷ್ಯ ಕ್ರಿಸ್ತಂಡ ಕೂಡೆ ಕೂಡ್‌ನಕ, ಅಂವೊ ಕ್ರಿಸ್ತಂಡ ಆತ್ಮತ್‍ರ ಕೂಡೆ ಒಂದಾಯಿತ್‌ಪ್ಪ.
18ಲೈಂಗಿಕ ಪಾಪತ್ಂಜ ಓಡಿ ಪೋಯಿ! ಒರ್ ಮನುಷ್ಯ ಮಾಡ್‌ವ ಬೋರೆ ಏದ್ ಪಾಪವು ಅಂವೊಂಡ ತಡಿಕ್ ಪೊರಮೆ ಆಯಿತಿಪ್ಪ, ಆಚೇಂಗಿ ಲೈಂಗಿಕ ಪಾಪ ಮಾಡ್‌ವಂವೊ ತಾಂಡ ಸ್ವಂತ ತಡಿಕ್ ವಿರೋದವಾಯಿತ್ ಪಾಪ ಮಾಡ್‌ವ. 19ನಿಂಗಡ ತಡಿ ಪವಿತ್ರಾತ್ಮ ವಾಸ ಮಾಡ್‌ವ ಆಲಯವಾಯಿತ್ ಉಂಡ್‍ೕಂದು, ಪವಿತ್ರಾತ್ಮತ್‍ನ ನಿಂಗಕ್ ದೇವ ಕೊಡ್‍ತತ್‍ೕಂದು ನಿಂಗಕ್ ಗೊತ್ತ್‌ಲ್ಲೆಯಾ? ಆನಗುಂಡ್ ನಿಂಗ ನಿಂಗಕ್ ಸ್ವಂತ ಅಲ್ಲ. 20ದೇವ ನಿಂಗಳ ಬಲ್ಯ ಕ್ರಯ ಕೊಡ್‌ತಿತ್ ಎಡ್‍ತ್‍ಚಿ, ಆನಗುಂಡ್ ನಿಂಗಡ ತಡಿಯಿಂಜ ದೇವನ ಮಹಿಮೆಪಡ್‍ತಂಡು.
Terpilih Sekarang Ini:
1 ಕೊರಿಂಥ 6: ಕೊಡವ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2017, New Life Literature (NLL)