Ayat Alkitab yang Popular daripada Márcos 13

Kongsi

A dequetéquedaté uágome erámi unirisórone ore iji erámi údode jnese jne. Mu uacaba cuchábode u yadode gu. Mu ujetiga uaque gosi chejnápise raja yadode udojo, jé aja dáringárique ducañerájma eruei, mu a jé u jne ujetiga uaque gosi chimate raja dáringai piquetaque jne ome Dupade.

Jecute ãrijínañopísa uaquejode, ga ajusópise uaqueo ga ca oyo uja ujetiga acatecãchoi Dupade ome uaque. Uje que pimo dínique gu ujetiga yise uáguiji yiríringárique.

Mu diga a ore jno uacádi aja deduguéjna cuchábode jne. Mu ca oyópise uacáyugu uaque jne ome uacapesutígo uacaru jne ome udore. Uje Dupade a guẽrapáicho uacarúrigo ome uaque jne ujetiga jĩrique ajnicho uacarúrigo ome ore jne. Mu que cho ujetiga uacaruode udore, mu Dupade Ujopié Espíritu Sánto guẽrapáicho uacaru quitígo ome ore.

Jnumi, jé aja gaté rĩ, a ore chise dáringáringo eyúcho jne. Mu a gusúpusu yuruode jne ujetiga ca chise deruénique to ujetiga ca cha dáringáringo tocachucho jnese.

Mu que pijoguipise deréjnarique, guedé batigárique ore rĩ, ujetiga cuchade udore tocadepísiji. Jé chopome Dupade iroque gateminórone rĩ. Jé chopome Dupade ujnacari uyu rĩ. Mu gusúpusu Dupade uje chiraja dínique ujetiga cuchade udore tocade iji.

Mu a adúchopo jne rĩ pujnoméringo ome pocaningane rĩ iji erámone ujetiga pujnoméone udore tṍraji dajñarenie jne ome uaque. Mu ca uacagutéraque cho jora ome udore gotique. Chamáñaje a isocai jé u uté gu. Mu ca ajosópise jne eti e erámone eruei gãrapiedie jé u udire ome.

Jecute oyo uté ga amíningachó cuchade jnese aja quigode to. Uje que pimópise uacarósõri uyu yiríringárique gu. Jeoga quene dejaque, jeoga dejnínga gatócoro, jeoga dirájnai uje cochagájnane poji, jeoga direjnipe. Jé socaseti uacanínaño mu yiyague uacabai iji uacamótigo ujetiga e ayáyo amíningachó cuchade aja quedéjnane. Que gusu uje yuruode udojo gajnengórone u uaque mu yojningane upo yududisórone uaque jnese to rĩ ujetiga ãrijínañopísa uaquejode gatuaque to.

Uje isocai a jé u jne ujetiga puníningo ore chachai ñane jne ome dajocaningáringo. Jé basa ore asutedie ore pésu dáyipiedie ome pocaningane yúode. Mu a jé isocai tupo jne rĩ ujetiga adúcho jnupe tãrarachugode ujnoméringo iji puníningo uásejnane. Mu a jé jorane upo jne rĩ ujetiga ayoréode chisa dabáningo ujetiga chaguhéningo socárome ore. Mu cuchade udojo cáma cucha gosode u gotique ujetiga socárome ayoréode ore iji erámi ujetiga pésu ore ujuredie.

Mu cuchade udore a ca chise deruénique jne ujetiga jé ca patata yuruode ome ayoréode ore ome ore úringáringo piquetacho iji punirone jnese.

Uje a jiépisi jnanione jne ujetiga ore cho yu iji raque. Enga a ore chojninga: "Uacajnati Crísto uyu." Mu a ore chejna ayorébujnane jne aja re ome daringaquérigo.

Mu uaque ga ajusópise uaqueo ome uacajnéone pocaninga yúode to. Uje diga ore jno uacádi aja ore asutedie jne. Enga a jogadi u jne ujetiga uacagachodi u ujetiga ore chujé uacádode iji judíode ore aquiningaméone. Mu que gusu udore mu dépoji rĩ ujetiga ore chijna uágaja ore eduguéjnapísode. Mu udore quigode u gu uje uacabade u yadode. Mu a piotiguei tu jne ujetiga angoño yadode jne ome eduguéjnane udore ore.

Mu a jé isocai tu ome jnani aringácachoquíode uje a ore chise uaque to jne. Mu a jnanione udore chopise Crísto iji re jne. Jé basa uñéngo a ore chopise Dupade uruode atatasõripísode iji re jne rĩ. Mu a ore pésu dapesute pitijabátigo ome doitígo daringaquéo. Mu ore ipotigádi u jórogu jne ujetiga ore chãra Dupade anguresõripísode uje Dupade ajegaidode u ore.

Mu pujuyaquéode udore quigade ga a jé jogadi tu jne ujetiga diga deréjnaringo chise uaque uje guedé edo a toi jne ga topiéjna. Jé basa guedoside ca chijñanápo uacabai jne rĩ. Mu jé basa ga a jogadi tu jne ujetiga guédodie base uacabáyode iji gaté. Mu jé basa ujórigo cucha iji gaté a ca chajire detotiguérigo ujetiga tãrara iji uacabai.