Ayat Alkitab yang Popular daripada Ixaj 53

Kongsi

He pahte ajpẽn mã me harẽn to hajỹr cakrô, mã nee cute hajỹr nare. Ne pahte me to kên, ne me to ihcupan xà atajê cwỳrjapê ri, cute me hũmre ata caxwỳr. He pahte me ampo kên ton atajê jahpan xà na ri, ma cute me to irô, ne cupê me hĩ to kêanre. Ne cute me to kên xà ita kôt ri, cute me pamã ampo cupa nare na me pahton, mãr cu me pahcarĩcti kam me papa. Ne cute me haxôp xà ata kôt ri, ihhêj ne hacpỹa mã, me pahcaprãr, ne me pahcapẽnti.

Ne pom carà cahàcre hôhti me hamãr catêjê kaj na apu ipa, ne cute amji to ipictor, ita jĩkjê na mã, cu pahte me Pahpãm jõ pry cupan, ne amjia kôt me pajõ pry itajê pynãr. Ne Pahhiti te, pahte me to kên ne me to ihcupan xà atajê jahpan xà na, nee me pahto kên nare, ne ma jũm pê me pahkritxwỳ ata to irô, ne cute apu to kêanre.

Ne me pahte hajỹr cakrô, mã ihtỳj cutea me pahte me amji pupun xà kêanre ata mã amji jõr, ne cutea amji kam me pahte me amji cajpẽr xà kàj xàhti atajê cunea jaxwỳr. Cakrô, cu pahtỳj ajpẽn mã me harẽn to: “Pahpãm ri apu hũmre ita to kên he, ne taa mã ri apu ihcahhy, mã ihkàj xà” hane.

Ne cupê hũmre te amji pupun xà kêanre kam ipa catê, cama hanea ne amehcaca, ne ame curê. Na ri nee hỹrmã me irĩt, ne me hõmpun prãm nare, ne ma amehcaca. Cu nee ajte pahte amji mã me to cati nare.

Mã cute mehkôt harẽn hêj xi xà kêanre to me harẽn, ne to me cumã ihkàj xà catia ton cakrô, mã nee cute amji pytàr xà na me cumã ampo to ihcakôc nare, ne nee amji jahpan xà na mencrôn nare. Ne pom ma carà cahàcre kra curan xà wỳr me to ipa, mã aracri ipa, ita jĩkjê na ri cute mehcuran na, cama amji na me hamãr, mã cute mehcuran. Ne pom me carà cahàcti hôhti hô jakep, mã nee incwỳr nare, ita jĩkjê na mã cute, ne nee amji jahpan xà na cute ame to kên catêjê mãn kên nare.

Ne nee cute ampo to kên nare cakrô, mã Pahhiti te to mehkên catêjê pyràac, ne cumã ihkàj xà ton. Ne pê mam ramã Pahhiti ita ton xà ita na amji kampa, na pê to hane. Ihhêj ne Pahhiti te, jũm te me to ihcupan xà jahpan xà na, cute me hũmre ita curan na me hamãr, mã cute mehcuran cakrô, quê ha ihtỳj hacpỹa mã ihtĩr, ne ihtĩar na apu ipa rohnỳtti mã. Na quê ha ihtỳj jũ caxuw cumã mehkra jàhtôti atajê pupu, ne Pahhiti mã ihkôt pjê kam me hàhtôa to ihkra prãm.

Ne pom pjê incrà kam me ahkêt jakep, mã kam harê ahtwỳ, ne hacpỹa mã kam hitêr ne hapôj, ita jĩkjê na mã, jũm ita te Pahhiti kam mare mã, ampo kên cunea jipôc ri, amji to ipijapar ne ihkà. Ne põ rũm pê hĩ kam, ihhêj ne nee impej nare. Ne ihhêj ne, nee cupê jũm catihti ata nare, ne cupê me pajĩ te hajỹrỹre ata pyràac. Na ri nee ihhêj ne cute amji wỳr me pahto hàhtêp xà caxuw, hirã pê impej ne cati nare.

Cute mehcuran xà mã amji jõrtu. Mã cute me to ihcupan catêjê cahê na cute mehcuran xà ata pê, cute amji mã mehkên ton xà atajê cunea juwahi, ne ihtỳj cute me to ih cupan catêjê cajrẽn. Na quê ha Pahpãm pê Pahhiti itajê cunea jahpan xà na to catia to cati, ne ampeaj kam to carôt tỳj.

Ne cute amji cajpẽr xà kêanre to amji cajpẽr xà ata jakàn pê, quê ha cormã me hàhtôa atajê, cute amji cajpẽr xà kên ata cwỳrjapê cupê Pahpãm kra na me hahkre pej, na quê ha ampeaj kam hũrên me hakry. Ne quê ha cupê Pahpãm mã hàpên catê, ne catyt kam ipa. Na quê ha me hàhtôa ne, cupê mehkritxwỳ ita na me hahkre pej, ne ihtỳj amji mã me to ihhimpej. Ne quê ha taa, cute me to ihcupan xà jahpan xà na, ihkên cunea mã amji gõ, mãr quê Pahhiti me ahna amji capa, quê ihtỳj mempej pêa mã ame ipa.

Ne cute mehpro, ne mehhêj xia to cute me to ihhêj xi, ne mehcukij xà kêanre to mehcukij, ne nee cormã ihkra nare kam mehcuran, mãr quê nee hipêr ita ri me hipôc ri apu ipa nare. Ne me pahkwỳ te me to kên, ne me to ihcupan xà cwỳrjapê ri amehcahhy.

Ne nee apu hàprê to ipa nare, ne nee apu ihhêj xia to ihcakôc to ipa nare cakrô, mã ihtỳj cute me hàhcuran catêjê cahê na me harêt na harkwa cakrô, mã me hakràjti jarêt xàa kam, cute me harêt.