Mirpuri

Text (c) 2021 Noor-e-Kashmir
Audio (p) 2021 Noor-e-Kashmir

دُوئی واری فِر حضرت یُونس کی رب نا اے پیغام لبھا، ”اُس بڑے شہر نینوہ جا، تے اُتھے نیاں لوکاں کی مہاڑا پیغام سݨایاں، جہیڑا میں تُکی دِتا-“ اِس واری حضرت یُونس رب نے حُکم نے مُطابق نینوہ گئے۔ تے نینوہ اِتنا بڑا شہر سی کہ اِس وِچوں لنگݨے واسطے ترَے دیہاڑے لغݨے سݨ- حضرت یُونس پہلی پُوری دیہاڑ شہر وِچ ٹُرݨے رہے، تے فِر لوکاں کی اے پیغام دِتا، ”چالیاں دیہاڑیاں نے اندر اندر نینوہ تَباہ ہوئی جاسی!“
اے گل سُݨی کے نینوہ نے لوکاں اللّٰہ تعالیٰ نے کلام پر اِیمان کِہنی آندا۔ اُنہاں ماتم کرنے واسطے روزہ رکھیا تے نِکیاں بڑیاں ساریاں ماتمی کپڑے لائے۔
جِس ویلے اے گل نینوہ نے بادشاہ تک پُہنچی، تے او اپݨے تَخت پروں اُٹھیا تے شاہی لِباس لہوائی کے ماتمی کپڑے لائے، تے مٹی اپر بہی گیا۔ فِر اُس نینوہ شہر وِچ اے اعلان کِیتا کہ، ”بادشاہ تے اُس نے وزیراں نی طرفوں اے حُکم جاری کِیتا جاݨا کہ کوئی اِنسان ناں کُجھ کھائے تے ناں پیئے! مال ڈنگر تے پیڈاں بکریاں یعنی سارے جانوراں کی وی ناں کجھ کھاݨ دیو تے نہ پیݨ دیو! ہر کوئی ماتمی کپڑے لائے، تے اللّٰہ تعالیٰ اگے فریاد کرے۔ سارے اپݨے بُرے کم چھوڑی شوڑݨ، تے کُسَے اپر ظُلم زیادتی ناں کرݨ۔ کَے پتہ؟ ہوئی سکݨا اللّٰہ تعالیٰ ساڑے اپر رحم کرے تے اپݨا قَہر ناں پہیجے، تانکہ اساں اُس نے عذابے کولوں بچی جاں!“
جِس ویلے اللّٰہ تعالیٰ اُنہاں نی اے حالت تکی کہ اُنہاں لوکاں مَندے کم چھوڑی شوڑَے، تے اُس اپݨا عذاب روکی شوڑیا جیہڑا او نینوہ نے لوکاں اپر پہیجݨے آلا سی، تے اُنہاں لوکاں کی سزا ناں دِتی۔

Dengar یُونس 3