चेलौ के काम 22
22
भीड़ मै पौलुस को परचार
1“हे भईयौ, और बुजरगौं, अब जो मैं कैरओ हौं बाकै सुनौ।”
2जब उन्नै पौलुस कै इबरानी भासा मै बोलते भए सुनो तौ बे और बी जादा सान्त हो गए, और बानै कैई कै,
3 #
चेलौ 5:34–39
“मैं तौ एक यहूदी आदमी हौं जो किलिकिया के तरसुस मै पैदा भओ, पलो और ऐरूसलेम मै गमलीएल के धौंरे पढ़ो और अपने बापदादौं के नियमौ कै अच्छे सै सीको। मैं बी परमेसर को ऐंसो भक्त हौं जैसे तुम अब हौ। 4#चेलौ 8:3; 26:9–11ईसु कै माननै बारे लोगौ कै मैंनै ऐंसो सताओ कै का आदमी और का बईयरैं दौनौ कै जेल मै डार दओ और कुछ कै मरवा दओ। 5और जा बात के गभा बड़ो पुजारी और तुमरे सिगरे मुखिया हैं। मैंनै उनसै दमिसक के यहूदी भईयौ के ताँई चिट्ठी लिखबाई कै मैं बहाँ के ऐंसे लोगौ कै बन्दी बनाकै ऐरूसलेम मै लाकै सजा दौं।
पौलुस को मन कैसे बदलो
(चेलौ के काम 9:1–19; 26:12–18)
6“जब मैं दुफैर के बखत दमिसक सैहर के धौंरे पौंचो, तौ ऐंसो भओ कै एकदम सैई आसमान सै जोती आई और मेरे चारौ लंग चमकी। 7और मैं धरती मै गिर गओ, और तबई मैंकै एक अबाज सुनाई दई, ‘हे साऊल, हे साऊल, तू मैंकै काए सताबै है?’
8“तबई मैंनै जबाब दओ, ‘हे परभु, तू कौन है?’
“बानै मैंसै कैई कै, ‘मैं बौई नासरत को ईसु हौं जिसकै तू सता रओ है।’ 9जो लोग मेरे संग हे उन्नै बी बा जोती कै देखो पर जो मैंसै बात करै हो बाकी अबाज ना समज पाए।
10“तबई मैंनै बासै पूँछी कै, ‘हे परभु मैं का करौं?’
“तौ परभु नै मैंसै कैई कै, ‘खड़ो हो और दमिसक मै जा, तेकै मैं बहाँ सबई कुछ बता दंगो जिसके ताँई तेकै छाँटो गओ है।’ 11और बा जोती की चमक की बजै सै मैं अन्धो हो गओ और मेरे साती मेरो हात पकड़कै मैंकै दमिसक मै लाए।
12“बहाँ मूसा के नियम कै माननै बारो हननियाह नाम को एक भक्त आदमी हो। बाकी बहाँ के यहूदी लोगौ मै अच्छी इज्जत ही। 13बौ मेरे धौंरे आओ और मेरे सामने खड़े होकै बानै कैई कै, ‘भईया साऊल, तू फिर सै देख।’ तबई मेरी आँख खुल गंई और मैंनै बाकै देखो।
14“तबई बानै मैंसै कैई कै, ‘हमरे बापदादौं के परमेसर नै तेकै इसताँई छाँटो है कै तू बाकी इच्छा जानै और बा धरमी कै देखै और बाकी बात सुनै। 15कैसेकै तू बाकी ओर सै सिगरे लोगौ के सामने उन बातौं को गभा होगो जो तैनै देखी और सुनी हैं। 16अब देर काए करै है? उठ, और जल संस्कार ले और परभु के नाम सै पिराथना करकै अपने पापौं कै धो दे।’
17“जब मैं फिर ऐरूसलेम मै आकै मन्दर मै पिराथना कर रओ हो तौ तबई मैंनै आत्मा मै दरसन देखो। 18और बा दरसन मै परभु मैंकै कैरओ हो कै, ‘जल्दी कर और तुरन्त ऐरूसलेम सै चलो जा, कैसेकै मेरे बारे मै जो तू गभाई देगो बाकै जे लोग मानंगे ना।’
19“मैंनै कैई, ‘हे परभु, बे लोग तौ मेरे बारे मै जौ जानै हैं कै मैं तेरे ऊपर बिसवास कन्नै बारे लोगौ कै जेल मै डारै हो और उनकै पीटनै के ताँई यहूदी पिराथना घर मै जावै हो। 20#चेलौ 7:58जब तेरे गभा सितेफनुस कै जान सै मारो हो तौ मैं बी बाके धौंरे खड़ो हो और जिनौनै बाकै मारो हो उनके लत्तौ की रखबारी मैंनै करी ही।’
21“परभु नै मैंसै कैई कै, ‘तू जा, कैसेकै मैं तेकै गैर यहूदी लोगौ के धौंरे दूर-दूर तक भेजंगो।’ ”
22हिंया तक तौ सबई लोग पौलुस की बातौं कै धियान सै सुनते रैहए पर तबई उन्नै जोर सै चिल्लानो सुरू कर दओ कै, “जा आदमी कै मार दो, कैसेकै जाकै जिन्दो रैहनै को कोई हक ना है।”
23जब बे चिल्लाते रैहए, और अपने लत्तौ कै लिकारकै फैंकते रैहए और धूदर ऊपर उड़ाल लगे, 24तबई सैनापति नै हुकम दओ कै पौलुस कै छाबनी के भीतर ले जाकै कोड़ा मारौ और पूँछ कै पतो लगाऔ कै यहूदी लोग जाके बिरोद मै काए ऐंसे चिल्ला रए हैं।
25जब बे बाकै मारनै के ताँई रस्सी सै बांध रए हे तबई पौलुस नै अपने धौंरे खड़े बा सूबेदार सै कैई कै, “का जौ सई है कै तू एक रोमी आदमी कै जिसके ऊपर इलजाम साबित ना भओ होए, कोड़ा मारै?”
26जौ बात सुनकै सूबेदार सैनापति के धौंरे गओ और कैई कै, “तू जौ का कर रओ है? जौ तौ रोमी आदमी है।”
27तबई सैनापति नै पौलुस के धौंरे आकै बासै पूँछी, “मैंकै बता, का तू रोम को रैहनै बारो है?”
पौलुस नै कैई, “हाँ।”
28जौ बात सुनकै सैनापति नै कैई, “मैंनै रोमी होनै के ताँई भौस्से पैसा देए हैं।”
पौलुस नै कैई, “पर मैं तौ जलम सैई रोमी हौं।”
29तबई जो लोग बासै पूँछताँछ कर रए हे बे तुरन्त बाके धौंरे सै हट गए और सैनापति बी जौ बात जानकै कै बौ रोमी आदमी है, तौ बौ डर गओ कै मैंनै एक रोमी आदमी कै बंधी बनबाओ है।
बड़ी सभा मै पौलुस
30अगले दिन सच्चाई को पतो लगानै के ताँई कै पौलुस के ऊपर यहूदी लोगौ नै इलजाम काए लगाए हैं, सैनापति नै पौलुस कै रिहा कर दओ और मुक्ख पुजारिऔं, और यहूदी लोगौ कै इखट्टे होनै को हुकम दओ और पौलुस कै उनके सामने लाकै खड़ो करो।
सध्या निवडलेले:
चेलौ के काम 22: TKB
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
New Life Compute Institute [NLCI] - CC BY-NC-ND 4.0
