चेलौ के काम 21
21
पौलुस को ऐरूसलेम मै जानो
1बासै बिदा लेकै हमनै अपनो समन्दर को सफर सुरू करो, तौ हम सीदे कोस टापू मै पौंचे, और दूसरे दिन रोदस टापू आए और बहाँ सै फिर पतरा टापू मै पौंचे। 2बहाँ हमकै फिनीके सैहर जानै बारो पानी को जिहाज मिलो और तबई हम बामै बैठ गए। 3जब हमकै कुपरूस टापू दिखाई दओ तौ हम बाकै बाँऐ हात की ओर छोड़कै सीरिया की ओर मुड़ गए कैसेकै सूर सैहर मै जिहाज को सामान उतारनो हो इसताँई हम बी बहाँ उतर गए। 4और बहाँ चेलौ सै मिले जिनके संग हम सात दिनौ तक संग रैहए। तबई उन्नै पबित्तर आत्मा की सायता सै पौलुस सै कैई कै, “तू ऐरूसलेम मै ना जईए।” 5जब हमरो बहाँ सै जानै को बखत आओ, तौ बे अपने टब्बर के संग हमकै बिदा कन्नै के ताँई सैहर के बाहार तक आए, और तबई हमनै समन्दर के किनारे घूंटे टेक कै पिराथना करी। 6और हम एक दूसरे सै बिदा लेकै पानी के जिहाज मै बैठ गए और बे अपने घर की ओर बापस लौहट गए।
7जब हम सूर सैहर सै पानी को सफर पूरो करकै पतुलिमईस सैहर मै पौंचे, और बहाँ के बिसवासी लोगौ कै नमस्कार करकै उनके संग एक दिन रुके। 8#चेलौ 6:5; 8:5दूसरे दिन हम सफर करकै केसरिया मै पौंचे और बहाँ हम फिलिप्पुस के घर गए जो अच्छी खबर को परचार करै हो। बौ ऐरूसलेम की बिसवासिऔ की मंडली के उन सात सेवकौ मै सै एक हो जिसकै काम कन्नै के ताँई छाँटर खाओ हो। 9बाकी चार कुँआरी लौंड़िया हीं जिनकै परमेसर की ओर सै भबिसबानी कन्नै को बरदान मिलो पड़ो हो।
10 #
चेलौ 11:28
भौत दिनौ तक बहाँ रैहनै के बाद यहूदिया सै अगबुस नाम को एक नबी आओ। 11बानै हमरे धौंरे आकै पौलुस को कमर मै बांधनै बारो गमछा लओ और अपने हात-पाँऐ बांधकै कैई कै, “पबित्तर आत्मा नै मैंकै जौ कैई ही कै जिस आदमी को जौ गमछा है, बाकै ऐरूसलेम मै यहूदी लोग ऐंसेई बांधंगे और गैर यहूदी लोगौ कै सौंप दंगे।”
12जब हमनै जौ बात सुनी तौ तबई हमनै और बहाँ के लोगौ नै पौलुस सै बिनती करी कै, तू ऐरूसलेम मै मत जईए। 13पर पौलुस नै उनकै जबाब दओ, “तुम रो रो कै मेरे दिल कै काए दुखाबौ हौ? मैं ऐरूसलेम मै परभु ईसु के नाम सै बंधनै और मरनै के ताँई बी तईयार हौं।”
14जब बानै हमरी जौ बात ना मानी तौ हम जौ कैह कै चुप हो गए कै, “जैसी परभु की इच्छा।”
15कुछ दिनौ के बाद हमनै सामान बांधो और ऐरूसलेम की ओर चल पड़े। 16केसरिया के कुछ चेला बी हमरे संग आए, और बे हमकै कुपरूस के एक आदमी मनासोन के धौंरे लाए जो एक पुरानो चेला हो और हम बाके संग रैहए।
पौलुस को याकूब सै मिलनो
17ऐरूसलेम मै पौंचतेई हमकै बिसवासी लोग मिले और हमकै देक्कै भौत खुस भए। 18और दूसरे दिन पौलुस हमरे संग याकूब सै मिलनै गओ और जहाँ सबई बिसवासिऔ की मंडली के मुखिया बैठै हे। 19तब पौलुस नै उनकै नमस्कार कन्नै के बाद उन सिगरे कामौ के बारे मै बताओ जिसकै परमेसर नै बाकी सेवा के दुआरा गैर यहूदी लोगौ के बीच मै करबाए।
20बाकी बात सुनकै उन्नै परमेसर की बड़ाई करी और बासै कैई कै, “हे भईया पौलुस, तू देख सकै है कै यहूदी लोगौ मै सै कितने हजार लोग हैं जिन्नै बिसवास करो, जो अपने नियम के ताँई बफादार हैं। 21तेरे बारे मै लोग जौ कैबै हैं कै तू गैर यहूदी लोगौ के बीच मै रैहकै यहूदी लोगौ कै जौ सिकाबै है कै, ‘ना तौ मूसा के नियम कै मानिओ और ना बालकौ को खतना करिओ और नाई रीति-रिबाज कै मानिओ।’
22“तौ का करो जाऐ? और बे जौ जरूर सुनंगे कै तू हिंया आओ है। 23इसताँई तू ऐंसो कर जैसो हम तेकै कैबै हैं। हमरे धौंरे चार ऐंसे आदमी हैं जिनौनै कुछ मन्नत माँगर खाई है। 24इन लोगौ के संग जा और सुद्दिकरन के काम मै सामिल हो और उनको खरच देकै बे अपने बार उतर बाँऐ। इसताँई सिगरे लोगौ कै जौ पतो लग जाऐ कै जो तेरे बारे मै बोलै हे बे सिगरी बात झूँटी हैं। पर तू खुद बी नियम कै मानकै बाके हिसाब सै चलिए।
25 #
चेलौ 15:29
“जहाँ तक गैर यहूदी बिसवासी लोगौ की बात है तौ, हमनै बी उनकै चिट्ठी लिखकै भेज दई है कै, ‘तुम ना तौ मूरतिऔं के ऊपर चढ़ाए भए चढ़ाबे कै खइओ, और ना साँस गोट कै मारे भए किसी जनाबर के मांस कै और ना खून कै खइओ, और ना बैबिचार को काम करिओ।’ ”
26दूसरे दिन पौलुस उन लोगौ के संग सुद्दिकरन की एक रीति पूरी कन्नै के बाद बौ मन्दर मै गओ और कैई कै, “सुद्दिकरन के दिन कब पूरे हौंगे और हम्मै सै हर एक के ताँई चढ़ाबो कब चढ़ाओ जागो।”
मन्दर मै पौलुस कै पकड़नो
27जब बे सात दिन पूरे होनै बारे हे तबई एसिया इलाके के यहूदी लोगौ नै पौलुस कै मन्दर मै देखो और तबई उन्नै सिगरे लोगौ कै भड़का कै पौलुस कै पकड़बा दओ। 28तबई बे चिल्लाकै कैललगे कै, “हे ईसराइली लोगौ हमरी सायता करौ, जौ बौई आदमी है, जो सिगरी जघै मै जाकै सबई लोगौ कै नियम के खिलाप, ईसराइली लोगौ के खिलाप और जा मन्दर के खिलाप सिकातो रैहबै है। अब तौ जौ यूनानी लोगौ कै मन्दर मै लाकै जा पबित्तर जघै कै बी असुद्द करै है।” 29#चेलौ 20:4उनौनै जौ ऐंसो इसताँई कैई कै तुरफिमुस नाम को आदमी जो इफिसुस मै रैहनै बारो हो बाकै पौलुस के संग जा सैहर मै देखो इसताँई बे जौ सोचल लगे कै पौलुस बाकै मन्दर मै लिआओ है।
30तबई सिगरे सैहर मै हल्ला मच गओ और लोग चारौ लंग सै भाजकै इखट्टे भए। बे पौलुस कै पकड़कै खचेड़ते भए मन्दर सै बाहार लाए और तबई फाटक बन्द कर दए। 31जब उन्नै पौलुस कै मारनै की कोसिस करी तबई रोमी पलटन के सैनापति कै खबर मिली कै ऐरूसलेम मै लड़ाई हो रई है। 32बानै तबई अपने संग कुछ सूबेदार और सिपाई लेए और भीड़ की ओर भाजो चलो आओ। जब लोगौ नै सैनापति और सिपाईऔं कै देखो, तबई उन्नै पौलुस कै पीटनो छोड़ दओ।
33और तबई सैनापति पौलुस के धौंरे आओ और बाकै पकड़ लओ, और दो साँकर सै बांधनै के बाद हुकम देकै पूँछो, “जौ कौन है, और जानै का करो है?” 34पर भीड़ मै सै कोई कुछ और कोई कुछ कैललगो और जब हल्ला की बजै सै सैनापति कै सच्चाई को पतो ना चलो, तबई बानै पौलुस कै छाबनी मै लेजानै को हुकम दओ। 35जब पौलुस सिड़िऔ के धौंरे पौंचो तबई घुस्साई भीड़ की बजै सै सिपाईऔं कै पौलुस कै ऊपर उठाकै लेजानो पड़ो। 36और लोग चिल्ला-चिल्लाकै कैरए हे कै, “जाकै मार दो।”
37जब पौलुस कै छाबनी मै ले जा रए हे तबई पौलुस नै सैनापति सै कैई कै, “का मैं तेसै कुछ पूँछ सकौ हौं?”
सैनापति नै कैई कै, “का तू यूनानी बोल सकै है? 38का तू मिसरी आदमी ना है जिसनै कुछ दिनौ पैले लड़ाई करी और चार हजार गुन्डेऔ कै बियाबान मै लिआओ?” 39पौलुस नै कैई कै, “मैं किलिकिया मुलक के जानेमाने सैहर तरसुस को रैहनै बारो यहूदी आदमी हौं। मैं चाँहौ हौं कै तू मैंकै इन लोगौ के बीच मै बोलन दे।”
40बासै पूँछ कै पौलुस सिड़ी मै खड़ो हो गओ और भीड़ कै चुप कन्नै को इसारो करो तबई बे चुप हो गए, और पौलुस तबई इबरानी भासा मै बोलो।
सध्या निवडलेले:
चेलौ के काम 21: TKB
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
New Life Compute Institute [NLCI] - CC BY-NC-ND 4.0
