रोमियो 4
4
अब्राहम विश्वासै ला धर्मी ठहराईया
1अबै असै यहूदी भूंणेरै नातै अपड़ै पूर्वज अब्राहमेरै बारै मझ कितु बोलि सकतै? सैक्या कुनि कारणै धर्मी गिणियां। 2केईनी कि अगर अब्राहम तेसेरै कंमै ला धर्मी भूंता बंणाईयोरा, ता ऐ तेसेरै तेईनी घमण्ड कांनेरी गल भूंणी थी; पण सैक्या अपड़ै कंमा केरै बारै मझ परमेश्वरेरै सांमणै घमण्ड ना करि सकता। 3पवित्र शास्त्र कितु बोलता? ऐक्यु कि, “परमेश्वरै जै बौलु अब्राहमै तेत पन विश्वास केया, जां तेसेरै विश्वासेरी वजहि ला परमेश्वरै सैक्या धर्मी मनि करि ग्रहण केया।” 4जै कंम काता तेसनी मजदूरी दान समझि करि ना, पण तेसैरा हक समझि करि मेईंती। 5जै परमेश्वरा सिंउ तेसेरै काबिल ठहरांणैरै तेईनी कंम ना काता, पण जै पापिया मैहणुवंनी धर्मी ठहराणै बाऐ परमेश्वरा पनि विश्वास काता तेसैरा विश्वास तेसेरै तेईनी धार्मिकता गिणी गांहथा। 6ऐहियें-चारै, राजै दाऊदै लिखोरू आ, कि जैस मैहणु परमेश्वर कंमै बिना धर्मी बणांता; तेसनी आशीष बि दींता।
7“धन्य अत्तै सैक्यै, जेन्हैरै पाप माफ भुवै,
जां जेन्हैरै पाप बिसरी छडै।
8धन्य आ सैक्या मैहणु जेसेरै पापा केरा हिसाब परमेश्वर ना रखता।”
9ता ऐ धन्य वचन, क्या खतना क्यौरै मैहणुवां केरै तेईनी अत्तै, या जैन्हैं खतना ना क्यौरा तेन्हैरै तेईनी बि? असै सैहै बोलतै अत्तै जै पवित्र शास्त्र बोलता, अब्राहमै परमेश्वरा पन विश्वास केया, जां तेसेरै विश्वासेरी वजहि सिंउ परमेश्वरै सैक्या धर्मी ठहरा। 10ता अब्राहम केख्णी धर्मी गिणियां? क्या जेख्णी तेसैरा खतना भौरा थ्या या जेख्णी तेसैरा खतना ना थ्या भौरा? खतनेरी अवस्थाय मझ ना पण खतना रहित अवस्थाय मझ ऐ परमेश्वरै सैक्या धर्मी ठहरा। 11परमेश्वरै सैक्या पेहिलै स्वीकार करि लियौरा थ्या जां सैक्या तेख्णी-ऐ धर्मी घोषित करि दितौरा थ्या, जेख्णी हालै-तेईनी तेसैरा खतना बि ना थ्या भौरा। खतना कांनेरा मतलब अब्राहमा स्वीकार कांना सिंउ आ। ऐठणीरै तेईनी सैक्या तैन्हांं मैहणुवां केरा आत्मिक पिता आ, जै विश्वास कातै, पण तेन्हैरा खतना ना भौरा। सैक्यै अपड़ै विश्वासै ला धर्मी मनियुंतै; 12जां अब्राहम खतना क्यौरा केरा बि आत्मिक पिता बंणा, जां तैन्हांं केरा बि आत्मिक पिता आ, जै परमेश्वरा पन विश्वास करि-करि असेड़ै पूर्वज अब्राहम सैयि जीवन जींतै; जां जेतिया विश्वास अब्राहमै खतना कांना किना पेहिलै लुहाऔरा थ्या।
विश्वासै ला वायदा कांना
13परमेश्वरै अब्राहम जां तेसेरै वंशजा सिंउ वायदा क्यौरा कि तैस तैन्हांंनि ऐक्या संसार दींणा। ऐ वायदा ऐठणीरै तेईनी ना केईथ्या कि अब्राहमै व्यवस्थायरा पालन केया, पण परमेश्वरा मझ तेसेरै विश्वासै ला सैक्या धर्मी घोषित करिया। 14केईनी कि अगर अब्राहमनि जां तेसेरै वंशजनी ऐ वायदा व्यवस्था मनणै ला मैआ, ता विश्वास कांना बेकार भुआ जां वायदा कांनेरा कोई मतलब-ऐ ना भुआ। 15परमेश्वर तैस पन गुस्सै भूंता, जै व्यवस्था पूरी तरह सिंउ ना मनता, जां अगर कोई व्यवस्था ना, ता तैठि व्यवस्थायरा कोई उल्लंघन बि ना।
16ऐठणीरै तेईनी मैहणुवंनी विश्वासै ला परमेश्वरैरा वायदा मैआ। ऐहीं ऐठणीरै तेईनी भूं, ताकि वायदा अनुग्रह भूंणै ला पूरा भुईया। तां अब्राहमेरी सारी आउलादिनी सैक्या वायदा मेईं सकता। ऐ सिर्फ तैन्हांं केरै तेईनी ना, जै मूसेरी व्यवस्थाईरै आधीन रींहथै, पण हर अक तैस मैहणुरै तेईनी आ, जै अब्राहमा सैयि विश्वास करि-करि जीवन जींता जां जै सभनियां केरा पूर्वज आ। 17जिहीं पवित्र शास्त्रा मझ लिखोरू आ; कि “मीं तु बड़िया जातिया केरा पिता बणा।” परमेश्वरेरी नजरी मझ अब्राहम असैड़ा पूर्वज आ। तेनी तैस परमेश्वरा पन विश्वास केया, जै मुड़दा मैहणुवां बि दुबारे जींतैरी दींता, जां जै गलै अत्तिऐ ना, तेन्हैरू नाँ ऐहीं लींता, जिहीं मनि ल्या सैकेई अत्ति।
18-19परमेश्वरै अब्राहमा सिंउ बौलु कि तेसेरै बड़ै वंशज भूंणै, पण अब्राहमै तकाउ कि आउलाद पेईदा कांनेरै तेईनी सैक्या बड़ा बुढ़ा थ्या, केईनी कि सैक्या लगभग शाउवा सालैरा भौ थ्या गियौरा। सारा बि अबै बच्चै ना जंमि सकींथी। तांबि अब्राहमा पता थ्या कि तेन्हैरा शरीर मोरी दशाय मझ थ्या, सैक्या बड़ा मैहणुवां केरा बब ना बंणी सकता, फिरी बि सैक्या अपड़ै विश्वासा मझ कमजौर ना भुआ। सैक्या विश्वास काता रिय्हा जां तेनी आशा कांनी ना छडि। 20जां ना ऐ अविश्वासी भौ करि परमेश्वरेरै वायदै पन शक केया, पण विश्वासा मझ मजबूत भौ करि परमेश्वरेरी महिमा की, 21तैस पूरा विश्वास थ्या कि परमेश्वरै जै वायदा क्यौरा थ्या, तैस सै पूरा कांनेरै तेईनी सामर्थी आ। 22तेसेरै विश्वास कांनेरी वजहि ला परमेश्वरै सैक्या धर्मिरै रूपा मझ ग्रहण केया। 23जां ऐ वचन, कि “विश्वासै ला परमेश्वरै सैक्या धर्मिरै रूपा मझ ग्रहण क्यौरा थ्या” ना कि सिर्फ अब्राहमेरै तेईनी लिखा; 24पण असेड़ै तेईनी बि आ कि अगर असै परमेश्वरा पन विश्वास कातै, जेनि असैड़ा प्रभु यीशु मसीह मौरा मझां जींतैरा, ता असै बि विश्वासेरी वजहि ला धर्मी मनि गांहणै। 25यीशु मसीह असेड़ै पापा केरी वजहि ला पकड़वाईया जां परमेश्वरै असै ऐपु सैयि धर्मी बंणाणेरै तेईनी सैक्या फिरी दुबारे जींतैरा।
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.