रोमियो 3
3
1शायद अगर कोई पुछिया, कि यहूदियनी होरनियां जातिया किना किछ जादा फायदा, जां खतना कांनेरा कितु फायदा? 2हाँ! अक यहूदी भूंणेरै बड़ै फायदै अत्तै। सभनियां जादी जरूरी गल ऐ आ कि परमेश्वरै अपड़ा संदेश यहूदी मैहणुवां केरै हवालै केया। 3अगर किछ यहूदी परमेश्वरेरै तेईनी विश्वास योग्य ना थ्यै, तां कितु भूं? ता क्या ऐठणीरा मतलब ऐ आ कि परमेश्वरै जै तैन्हांं सिंउ वायदै क्यौरै थ्यै, ता क्या सैक्यै तैस पूरै ना कांने? 4ना! बिल्कुल बि ना! बेशक हर अक मैहणु झूठा निकोहिया, तांबि सच्चा ता परमेश्वरै निकूंणा; जिहीं कि पवित्र शास्त्र परमेश्वरेरै बारै मझ बोलता,
“जेनि ला तु अपड़ि गलै मझ धर्मी बंणिया
जां न्याय कातै टैंमा तु जीत हासिल करिया।”
5ऐठणीरै तेईनी अगर असेड़ै बुरै कंम परमेश्वरेरी धार्मिकता लुहाईया ता असै क्या बोलि सकतै? ता क्या परमेश्वरैरा गुस्सा कांना जां असुनि सजा दींणी गलत आ ऐ ता आंउ मैहणुवां केरै नियम अनुसार बोलता। 6ना! बिल्कुल ना! अगर परमेश्वर असु यहूदिया केरा न्याय कांना मझ सही ना, ता सैक्या संसारेरै मैहणुवां केरा न्याय किहीं करि सकता? 7किछ मैहणु बोलि सकतै कि अगर मिंडै झूठ बोलणै ला परमेश्वरेरी सच्चाई प्रकट भूंती जां तेसनी जादी महिमा मेईंती ता, सैक्या किहीं मिंडा न्याय करि सकता जां मूं एकि पापी मैहणुरै रूपा मझ दोषी ठहराय सकता? 8किछ मैहणु ऐ बोलि करि असु पन ऐ दोष लांतै कि असुवें बौलु, कि “ऐईछा असै बुरू कातै जेनि ला अच्छु भुईया।” जिहीं कि किछ मैहणु असेड़ै बारै मझ निंदा कातै बोलतै कि असै ऐहै शिख्रांतै। पण जै मिंडै बारै मझ ऐतेई गलै कातै ऐतियै मैहणु सजायरै हकदार अत्तै।
कौ मैहणु बि धर्मी ना
9ता क्या असै यहूदी मैहणु होरनियां मैहणुवां किना अच्छै अत्तै? ना! बिल्कुल ना! केईनी कि असुवें शुणां छडोरू आ कि बेशक कोई यहूदी भुईया या होरी जातिरा भुईया, सारै पापेरी शक्तिरै वशा मझ अत्तै। 10जिहीं कि पवित्र शास्त्रा मझ लिखोरू आ;
कि परमेश्वरेरी नजरी मझ कौ बि धर्मी ना, अक बि ना।
11ऐतिया अक बि मैहणु ना, जै सही मझ समझता भुईया कि क्या सही आ;
कौ बि परमेश्वरा जांणना ना चांहथा।
12तैन्हैं परमेश्वरा पन विश्वास कांना छडि दितौरा, हर कोई परमेश्वरेरै तेईनी बेकार भौ गियौरा;
कोई बि भलाई कांनार ना, अक बि ना।
13तेन्हैरै मुँह उघड़ोरियै कब्रिया सैयि अत्तै, जैत किना ऐईड़ी मुस्क ऐईंती।
केईनी कि जै गलै सै बोलतै सै गंदी अत्ति।
सैक्यै अपड़ि गलै मैहणुवंनी धोखा दींणैरै तेईनी बोलतै
जां जै किछ सैक्यै बोलतै सैक्यु कीड़ेरै जैहरा सैयि जांन लींणार भूंतु।
14जां तेन्हैरी गलै श्राप जां कड़वाहटि ला भरोरी भूंती।
15सैक्यै खून कांनेरै तेईनी जल्दबाजी कातै।
16सैक्यै जेठि बि गांहथै बुराई जां दुख-ऐ दींतै।
17सैक्यै शांति सिंउ बेशणा ना चांहथै।
18तैन्हांं मझ परमेश्वरैरा डर ना।
19असु पता कि, व्यवस्था जै किछ शुणांती, सैक्यु तैन्हांं मैहणुवंनी शुणांती जै व्यवस्थायरै आधीन अत्तै, ताकि मैहणुवां बहानै बंणाणा किना रौकि सकिया, जां संसारेरै सारै मैहणु परमेश्वरेरै सांमणै दोषी बणियां। 20केईनी कि व्यवस्थायरा पालन कांने ला कोई बि मैहणु धर्मी ना भूंणा, पण मूसेरी व्यवस्था असुनि लुहाती कि असै पापी अत्तै।
विश्वास कांने ला परमेश्वरेरी धार्मिकता
21पण अबै मूसेरी व्यवस्थायरै सारा नियमा केरा पालन कांने बगैर-ऐ परमेश्वर असु ऐपु सिंउ सही बंणा दींता, बड़ै पेहिलै किना व्यवस्थाय मझ जां भविष्यवक्ता केरी किताबि मझ ऐ लिखोरू आ कि किहीं असै परमेश्वरेरै द्वारा धर्मी बंणाईंयोरै अत्तै। 22मतलब असै जेख्णी यीशु मसीह पन विश्वास कातै ता परमेश्वर असु धर्मी बंणा दींता। केईनी कि परमेश्वर सभनियां सिंउ अक सैयि बर्ताव काता; 23ऐठणीरै तेईनी कि सभनियें पाप क्यौरा जां तेन्हैरै बोलै तैस महिमा तेईनी ना पुजियु, जै परमेश्वर दींता। 24पण परमेश्वरै अपड़ै अनुग्रह ला यीशु मसीहरै द्वारा असै, असेड़ै पापा केरी सजाय किना बचाय जां असेड़ै किछ कांने बगैर-ऐ परमेश्वरै असै धर्मी बंणाय। 25-26परमेश्वरै यीशु मसीह असेड़ै पापा केरै तेईनी बलिदान भूंणेरै तेईनी भेईजा। यीशु मसीह अपड़ा खून बहा, ताकि तैस पन विश्वास कांने ला असै परमेश्वरा किनि नीड़ अईछी सकिया। जां परमेश्वरै ऐ ऐठणीरै तेईनी कियु ताकि सै ऐ लुहाय सकिया कि अतीत मझ तेनी सही कियु, जेख्णी तेनी पापियनि माफ कांनेरै तेईनी धीर लुहाथिया। सै ऐ बि बोलता कि परमेश्वर सही आ जेख्णी सै मसीह पन विश्वास कांनारा ग्रहण काता।
27ता क्या ऐतियु किछ आ, जेसेरै बारै मझ असै घमण्ड करि सकिया? ना ऐतियु किछ बि ना। जां ऐठणीरी वजह कितु आ? क्या ऐठणीरी वजह ऐ आ कि असै व्यवस्थायरा पालन कातै? ना! पण ऐ यीशु मसीह पन विश्वास कांनेरी वजहि ला आ। 28ऐठणीरै तेईनी असु पता कि मैहणु व्यवस्था मनणै ला ना पण यीशु मसीह पन विश्वास कांने ला-ऐ धर्मी बंणना। 29परमेश्वर सिर्फ यहूदिया मैहणुवां केरा परमेश्वर ना, पण होरनियां जातिया केरा बि परमेश्वर आ। 30केईनी कि अक्कै परमेश्वर आ, जै खतना क्यौरै यहूदिया बि जां जैन्हैं खतना ना क्यौरा, तैन्हांं होरनियां जातिया केरै मैहणुवां बि विश्वासै ला धर्मी बंणाता। 31ता क्या असै विश्वासै ला व्यवस्था मिटा दींतै? ना! बिल्कुल ना, पण असै ता व्यवस्थायनी तेसैरा सही महत्व दींतै अत्तै।
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.