उत्पत्ति 15
15
अब्रामो साथे परमेशरो री वाचा
1कुछ बखतो ते बाद यहोवे रा ये वचन दर्शणो रे जरीये अब्रामो गे पऊँचेया, “ओ अब्राम, डर नि, आँऊ ई तेरा साअरा ए ओर मां ताखे बऊत बड़ा ईनाम देणा।”
2पर अब्रामे बोलेया, “ओ परमेशर यहोवा! एबे तां माखे क्या देणा कि मेरा पला ऊई जाओ? कऊँकि आँऊ तो बिना बच्चेया ते रईगा ओर मेरे कअरो रा बारिस ये दमिश्क शईरो रा एलीएजेर ऊणा।” 3ओर अब्रामे बोलेया, “तैं तो माखे ल्वाद नि दित्ती, इजी खे एबे मेरे कअरे पैदा ऊआ रा एक दास मेरा बारिस ऊणा।”
4तेबे यहोवे रा ये वचन फेर अब्रामो गे पऊँचेया, “ये तेरा दास एलीएजेर तेरा बारिस नि ऊणा, तेरा जो आपणा पाऊ ऊणा, सेई तेरा बारिस ऊणा।”
5ओर यहोवे तेसखे बारे लई जाई कि बोलेया, “सर्गो रिया तरफा खे देखी की तारे गिण, क्या तूँ इना खे गिणी सकेया?” कदी पनि! फेर यहोवे तेसखे बोलेया, “तेरा वंश एड़ा ऊणा।”#15:5 रोमी 4:18 6अब्रामे यहोवे पाँदे विश्वास कित्तेया ओर यहोवे से इना गल्ला रे तर्मी ठराया।#15:6 रोमी 4:3
7ओर यहोवे अब्रामो खे बोलेया, “आऊँ सेई यहोवा ए, जो ताखे कसदिया रे शईर ऊरो ते बारे ल्याया, ताकि ताखे एसा जमीना रा अक्क देऊँ।”
8पर अब्रामे बोलेया, “ओ परमेशर यहोवा! माखे किंयाँ पता लगणा कि आऊँ एस प्रदेशो रा अक्कदार ऊणा?”
9तेबे यहोवे तेसखे बोलेया, “मेरिया तँईं तिंऊँ साला री एक बाच्छी ओर तिंऊँ साला री एक बाकरी ओर तिंऊँ साला रा एक खाडू ओर एक कूगी ओर कबूतरो रा एक बच्चा लओ।” 10अब्रामे इना सबी खे लई की तिना रे बीचा ते दो टुकड़े करीते ओर टुकड़े आमणे-सामणे राखी ते, पर चिड़िया रे तिने टुकड़े नि कित्ते। 11जेबे मास खाणे वाल़े पंछी लोथा पाँदे खाणे खे टूटे, तेबे अब्रामे सेयो डवाईते। 12जेबे सूरज डूबणे लगेया, तेबे अब्रामो खे बड़ी-पारी नींज आईगी ओर देखो, बऊत ई डराणे वाल़ा अन्दकूप न्हेरा तेस पाँदे छाईगा।
13तेबे यहोवे अब्रामो खे बोलेया, “तूँ ये पक्का जाणी लओ कि तेरा वंश पराये प्रदेशो दे चार सौ साला तक गुलाम बणी की परदेशी ऊई की रणा ओर तेस प्रदेशो रे लोका तिना खे दु:ख देणा। 14पर मां तेस प्रदेशो खे सजा देणी जेस प्रदेशो सेयो दास-दासी बणाई की राखणे ओर तिजी ते बाद सेयो तेथा ते बऊत तअन लई की निकल़ी जाणे।#15:14 निर्ग. 12:36 15जेबे तूँ आपणे पूरे बुढ़ापे रे आपणे पितरा साथे शान्तिया रे मिली जाणा, तेबे ताखे माट्टी देणी। 16पर तेरा वंश चौथी पीढ़िया रे फेर एती आऊणा, कऊँकि यबुओ तक एमोरिया रा पापो रा ईसाब पूरा नि ऊईरा।” 17ओर तेबे एड़ा ऊआ कि जेबे सूरज डूबी गा ओर अन्दकूप न्हेरा छाईगा, तेबे एक गीठी, जेते बीचा ते तुआँ निकल़ने लगी रा था ओर एक बल़ी री मशाल दिशी, जो तिना टुकड़ेया बीचा ते ऊई की निकल़ी की जाणे लगी री थी। 18तेसी दिने यहोवे अब्रामो साथे एक वाचा बानी, “एते जमीना पाँदे मिस्र प्रदेशो री नील नदिया ते लई की फरात नाओं री बड़ी नदिया तक जितणा देश ए, 19मतलब, केनी, कनिज्जी, कदमोनी, 20हित्ती, परिज्जी, रपाई, 21एमोरी, कनानी, गिर्गाशी ओर यबूसी जातिया रे लोका रा देश, मैं तेरे वंशो खे देईता रा।”
सध्या निवडलेले:
उत्पत्ति 15: BGH
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
This work is licensed under Creative Commons Attribution-ShareAlike 4.0 License.