उत्पत्ति 14
14
लूतो खे बन्दी बनाणा
1शिनार प्रदेशो रे राजा अम्रापेल ओर एल्लासार प्रदेशो रे राजा अर्योक ओर एलाम प्रदेशो रे राजा कदोर्लाओमेर ओर गोयीम प्रदेशो रे राजा तिदालो रे दिना रे एड़ा ऊआ 2इने चऊँ राजेया सदोमो रा राजा बेरा, गमोरा रा राजा बिर्शा, अदमा शईरो रा राजा शिनाब, सबोयीम शईरो रा राजा शेमेबेर ओर बेला शईर बी जेसखे सोअर शईर बी बोलोए, इना राजेया रे खलाफ युद्ध कित्तेया। 3इने सबी पाँजो राजेया सिद्दीम नाओं रिया काअटिया रे, जो खारे समुद्रो रे नेड़े ए, इना चऊँ राजेया रे खलाफ युद्ध करने खे एका कित्तेया। 4बारा साला तक तो यो पाँजो राजे कदोर्लाओमेरो रे अधीन रये, पर तेरूए साले तेसरे खलाफ उठे। 5इजी खे चौदुए साले कदोर्लाओमेर ओर तेस साथले राजा आए ओर अशतरोत्कनम शईरो रे रपाई लोका खे ओर हाम शईरो रे जूजिया लोका खे ओर शावेकिर्यातैंम मैदानो रे एमिया लोका खे, 6ओर सेईर नाओं रे पाह्ड़ो पाँदे होरी लोका खे अरांदे ऊए तेसा एल्पारान सुनसाण जगा तक पऊँची गे। 7तेथा ते वापस ऊई की सेयो एन्मिशपातो खे आए, जेतेखे कादेश बी बोलोए ओर अमालेकिया रा सारा देश ओर हसासोन्तामारो रे रणे वाल़े एमोरी लोक बी जीती ले। 8तेबे सदोम, गमोरा, अदमा, सबोयीम ओर बेला, जेतेखे सोअर बी बोलोए, इना शईरा रे राजा सिद्दीम नाओं रिया काअटिया रे तिना चऊँ राजेया साथे युद्ध करने री त्यारी करने खे निकल़े। 9मतलब एलामो रा राजा कदोर्लाओमेर, गोयीमो रा राजा तिदाल, शिनारो रा राजा अम्रापेल ओर एल्लासारो रा राजा अर्योक, इना चऊँ रे खलाफ सेयो पाँजो जणे युद्ध करने खे निकल़े। 10तेबे एड़ा ऊआ कि सिद्दीम नाओं रिया काअटिया रे, जेती लसार माट्टिया रे गड्डे ई गड्डे थे, पर जेबे सदोम ओर गमोरा रे राजा युद्धो ते नठणे लगी रे थे तेबे कुछ लोक तिना गड्डेया बीचे रूड़ीगे ओर जो लोक बचे सेयो पाह्ड़ो पाँदे नठीगे। 11तेबे कदोर्लाओमेर ओर तेस साथले राजे सदोम ओर गमोरा रा सारा तअन ओर खाणे-पीणे रिया चीजा खे लूटी की चलीगे। 12ओर अब्रामो रे पतीजे लूतो खे बी, जो सदोमो रे रओ था, तेसखे बी सारे तअनो समेत लई की चलीगे। 13तेबे तिना बीचा ते एक जणा जो नठी की बची गा था। तिने जाई की इब्री अब्रामो खे समाचार दित्तेया। जो मम्रे रे बड़े डाल़ा बीचे रओ था; से एक एमोरी आदमी था जो एशकोल ओर आनेरो रा पाई था ओर इने सबी लोके अब्रामो साथे एकी दूजे री मताद करने खे वाचा बानी राखी थी।
अब्रामो रा लूतो खे छुड़ाणा
14जेबे अब्रामे ये सुणेया कि तेसरा पतीजा लूत बन्दी बणाईता रा, से आपणे 318 युद्ध करने खे प्रशिक्षण पाये रे लोका खे लई की, जो तेसरे टब्बरो रे पैदा ऊई रे थे, अस्त्र-शस्त्र लई की दानो तक तिना रा पीछा कित्तेया। 15ओर अब्रामे आपणे दासा रे लग-लग चूण्ड बणाई की राथियो खे तिना पाँदे अमला करी की सेयो काईते ओर होबा तक, जो दमिश्को रे उत्तरा रिया तरफा खे ए, तिना रा पीछा कित्तेया। 16ओर से सारे तअनो खे ओर आपणे पतीजे लूत ओर तेसरे तअनो खे ओर जवाणसा खे ओर सबी पाई-बन्दुआ खे वापस ली आया। 17जेबे अब्राम कदोर्लाओमेर ओर तेस साथले राजेया खे जीती की वापस आऊणे लगी रा था, तेबे सदोमो रा राजा शावे नाओं रिया काअटिया रे, जेतेखे राजे री काअटी बी बोलोए, तेस साथे मिलणे आया।
अब्राम ओर मलिकिसिदक
18तेबे शालेमो रा राजा मलिकिसेदेक रोटी ओर शराब ली आया जो परमपरदान परमेशरो रा पुरोईत था। 19ओर तिने अब्रामो खे ये आशीर्वाद दित्तेया, “परमपरदान परमेशर जो सर्ग ओर तरतिया खे बनाणे वाल़ा ए, ताखे आशीष देओ। 20ओर तन्य ए परमपरदान परमेशर, जिने तेरे दुश्मण तेरे वशो रे करीते।” तेबे अब्रामे तेसखे सारी चीजा रा दसुआ इस्सा दित्तेया।
21तेबे सदोमो रे राजे अब्रामो खे बोलेया, “माणूंआ खे तो माखे देई दे ओर तअन आपू गे राख।”
22पर अब्रामे सदोमो रे राजे खे बोलेया, “परमपरदान परमेशर यहोवा जिने सर्ग ओर तरती बणाई राखी, 23आऊँ तेसरी ये कसम खाऊँआ कि जो तेरा ए, तिजी बीचा ते ना तो मां एक सूत या जोड़ेया रे फिथे ओर ना ओर कोई चीज लणी ताकि तूँ एड़ा नि बोली सको कि अब्राम मेरी बजअ ते अमीर बणेया। 24मां आपू खे कुछ नि लणा पर जो कुछ इने जवाने खाई ला रा ओर तिना लोका रा इस्सा जो मां साथे गए थे, मतलब आनेर, एशकोल ओर मम्रे तिना रा मां वापस नि करना इना खे आपणा-आपणा इस्सा लणे दे।”
सध्या निवडलेले:
उत्पत्ति 14: BGH
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
This work is licensed under Creative Commons Attribution-ShareAlike 4.0 License.