Mateo 23

Spenail Ebꞌ Fariseo Yetoj Ebꞌ Cuywam Yin Sley Moisés

(Marcos 12:38-40; Lucas 11:37-54; 20:45-47)

1Jix lawi jun tuꞌ xin, catuꞌ jix yalon Jesús tet ebꞌ ánima cꞌal tet ebꞌ scuywom jaxca tiꞌ:

2—Jaꞌ ebꞌ cuywam yin sley Moisés yetoj ebꞌ Fariseo, ey ton yopiso ebꞌ scuywa yin sley Moisés. 3Yuxan, jijewej yal cꞌal tzet chi yal ebꞌ catuꞌ che bꞌeybꞌalneni. Jal pax sbꞌeybꞌal ebꞌ xin, manche je bꞌeybꞌalne. Yutol jaꞌ tzet chi yal ebꞌ, toj chi sbꞌeybꞌalne ebꞌ. 4Jaꞌ wan chejbꞌanil chi yakꞌ ebꞌ, laan jaxca junoj ijatz cꞌam chi laccha ku. Chi syambꞌa ebꞌ, catuꞌ chi yakꞌon ebꞌ kijaꞌ. Jal ebꞌ xin, toj chi yoche ebꞌ chi oc lacan yin niꞌoj. Queytuꞌ chi yute yakꞌon ebꞌ kij wan chejbꞌanil caw yaꞌtaj. 5Asan yu chi yoche ebꞌ tol watxꞌ ebꞌ yul sat ánima, yuxan chi yaon oc ebꞌ wan tzetyetal watxꞌ yili yin. Ey wan tzꞌuum txꞌuye ye bꞌey tzꞌibꞌebꞌil oc niꞌoj skꞌane cu Mam Dios, chi yaoc ebꞌ yin skꞌabꞌ yetoj yin spalan. Mimej txꞌuye chi yute oc ebꞌ. Chi yaon oc jolquiẍtaj pichile ebꞌ, jolquiẍtaj stiꞌlaj.#23:5 Ey wan niẍtej txꞌuye tzꞌuum chi yij filacteria. Jaꞌ yul ebꞌ tuꞌ ey janicꞌ sley Moisés. Chi spixoc ebꞌ wan txꞌuye tuꞌ yin spalan, cꞌal yin sqꞌuexan kꞌabꞌ ebꞌ. Miman pax chi yute stiꞌlaj spichil ebꞌ. Jaxca tiꞌ chi yute xꞌoxon el sbꞌa ebꞌ Fariseo, tol naꞌan Dios yu ebꞌ. 6Jaꞌ bꞌey chi oc mimej loꞌo, asan bꞌey caw watxꞌ chi ey chotan ebꞌ. Yetoj pax bꞌey snail sculto ebꞌ, asan bꞌey chi ey chotan ebꞌ mimej winaj chi ey chotan ebꞌ. 7Jaꞌ yet chi ecꞌ ebꞌ yul-laj calle, caw chi tzala ebꞌ yet chi yiꞌon ey sbꞌa ánima tet ebꞌ. Caw chi tzala ebꞌ yet chi al-le oc ebꞌ cuywawomal. 8Jal jex, jaex tiꞌ xin, manche jex tzalai ta chex al-le oc cuywawomal, yutol junne je cuyumal, jaꞌton Cristo.* Jal jex xin, je yuẍtaj je bꞌa, je yanabꞌ je bꞌa je masanil. 9Cꞌam junoj mactxequel bꞌey yul yibꞌankꞌinal tiꞌ chi skeꞌ comon cꞌal che yaloc je mamoj. Yutol junne je Mam, jaꞌton Naj ey bꞌey satcan. 10Cꞌam ojabꞌ chex tzalai yet chex al-le yaawil, yutol junne je Yaawil, jaꞌton Cristo.* 11Yal cꞌal mac bꞌejan cꞌal scꞌul yoc yakꞌomaloj servil je xol, jaꞌton jun tuꞌ yel miman yeloc apnoj. 12Yal cꞌal mac chi yiꞌa can sbꞌa, oj utele yin yeynajil. Jal ebꞌ chi yiꞌeytej sbꞌa, jaꞌton ebꞌ tuꞌ oj iꞌle aoj. 13Jaꞌ jaex, cuywam jex yin sley Moisés tiꞌ xin, yetoj jex jaex Fariseo jex tiꞌ, caw okꞌbꞌal jex cꞌule. Caabꞌ sat jex. Ilaꞌ che tenoc tucan ebꞌ ánima chi yoche chi oc Dios Yaawiloj. Ma jex oc jaex tiꞌ, catuꞌ cꞌam che chaꞌ pax oc ebꞌ chi yoche chi oqui. 14/Jex cuywam yin sley Moisés cꞌal jex Fariseo, caw okꞌbꞌal jex cꞌule. Caabꞌ sat jex. Ilaꞌ che yiꞌcan ecꞌ sna ebꞌ ix camnajxa yichamil. Chi lawi tuꞌ caw miman che yute yajan je txa, tzet utbꞌil oj chi snaꞌ ánima tol cꞌam je penail. Jaꞌton yu wan tuꞌ, yuxan caw miman syaꞌtajil oj je chaꞌ./ 15Jex cuywam yin sley Moisés, cꞌal jex Fariseo, caw okꞌbꞌal jex cꞌule, caabꞌ sat jex. Chilan je yecꞌ yul-laj yibꞌankꞌinal tiꞌ yetoj yibꞌan jaꞌ mar, yu ecꞌ je monten oc junoj mactxequel je yetoj yin je cuybꞌanil. Jaꞌ ebꞌ che yakꞌ ganar yoc tuꞌ, tucꞌal chi etex el snaꞌbꞌal ebꞌ yu je cuybꞌanil tuꞌ. Yel xacꞌal pena chi eloc ebꞌ je cuywom tuꞌ je yintaj. 16Jaex tiꞌ, laan jex jaxca junoj mactxequel cꞌam chi skeꞌ yilwi, chi tzꞌaj squetztoj junojxa mactxequel. Caw okꞌbꞌal jex cꞌule, yutol je chi jaxca tiꞌ: “Ta ey junoj mactxequel chi sloctej sbꞌi stemplo Dios yet chi yakꞌon stiꞌ, man caw sowalil oj chi yun stiꞌ tuꞌ, yutol cꞌam caw yeloc apnoj jun stemplo Dios tuꞌ. Jal ta jaꞌ sbꞌi chꞌen oro saꞌbꞌeal bꞌey stemplo Dios chi sloctej xin, sowalil chi yakꞌ yun tzet jix yal tuꞌ xin,” je chi. 17Yuxan, caw cꞌam je naꞌbꞌal. Jaxca tol cꞌam chi skeꞌ je yilwi niꞌoj. ¿Bꞌeytet junoj yel miman yeloc apnoj che naꞌ? ¿Jam chꞌen oro tuꞌ xꞌojli, ma jaꞌ stemplo Dios tuꞌ? Jaꞌ chꞌen oro saꞌbꞌeal tuꞌ, asan yutol yet stemplo Dios chꞌen, yuxan yet Dios yei. 18Che yalon pax jaxca tiꞌ: “Ta ey jun mactxequel chi sloctej sbꞌi smeẍail xaambꞌal bꞌey chi atoj xaambꞌal yet chi yakꞌon stiꞌ, man caw sowalil oj chi yun stiꞌ tuꞌ. Jal ta jaꞌ xaambꞌal bꞌatxan atoj yibꞌan tuꞌ chi sloctej sbꞌi, caw sowalil chi yakꞌ yun tzet jix yal tuꞌ xin,” je chi. 19Yuxan, caw cꞌam je naꞌbꞌal. Jaxca tol cꞌam chi skeꞌ je yilwi niꞌoj. ¿Bꞌeytet junoj yel miman yeloc apnoj che naꞌ? ¿Jam xaambꞌal tuꞌ, ma jaꞌ jun smeẍail bꞌey chi atoj bꞌatxan tuꞌ? Jaꞌ jun xaambꞌal tuꞌ, yutol eyxa atoj yibꞌan meẍa tuꞌ yuxan yet Dios yei. 20Yuxan, ta ey mac chi sloctej sbꞌi jun meẍa bꞌey chi atoj xaambꞌal tuꞌ, man asanne oj jun tuꞌ lalan slocontej sbꞌi. Lalan pax slocontej sbꞌi masanil tzet bꞌatxan atoj yibꞌan pax oj. 21Jacꞌalaꞌ mac chi sloctej sbꞌi stemplo Dios, man asanne oj templo tuꞌ lalan slocontej sbꞌi, lalan pax slocontej sbꞌi Dios yetoj, yutol asan Dios ey yet. 22Ta ey mac chi sloctej sbꞌi satcan, chi yal yeloc apnoj tol lalan slocontej sbꞌi sdespacho cu Mam Dios, lalan slocon pax tej sbꞌi Dios, yutol jaꞌ bꞌey satcan eyecꞌoj. 23Jex cuywam yin sley Moisés cꞌal jex Fariseo, caw okꞌbꞌal jex cꞌule. Caabꞌ sat jex. Che yakꞌ sdiezmoal an alawen, an aniẍ, cꞌal an comino. Jal pax wan ẍejbꞌanil Dios miman yeloc apnoj, toj che jije. Jaꞌton wan chejbꞌanile tiꞌ chi aloni, tol sowalil watxꞌ ojabꞌ chi kute cu bꞌa, chi okꞌ cu cꞌul yin ket animail, catuꞌ chi kaon oc cu cꞌul yin Dios. Ilaꞌ tol cꞌam pax yeloc apnoj wan tiꞌ yul je sat. Caw sowalil tol che jije wan tiꞌ, catuꞌ che jijen pax wanxa tuꞌ. 24Jaex tiꞌ, laan jex jaxca junoj mac cꞌam chi skeꞌ yilwi, chi tzꞌaj squetztoj junojxa mactxequel. Laan jex jaxca junoj mactxequel chi yiꞌatej junoj noꞌ yaliẍ us chi too xol sloꞌbꞌe, jal junoj noꞌ camello chi tukꞌle eytoj. Quey jex tuꞌ, yutol chex xiw tet wan chejbꞌanile man mimanoj yeloc apnoj. Jal wan chejbꞌanile caw miman yeloc apnoj xin, cꞌam che jije. 25Jex cuywam yin sley Moisés cꞌal jex Fariseo, caw okꞌbꞌal jex cꞌule. Caabꞌ sat jex. Jaex tiꞌ, laan jex jaxca junoj mactxequel asan yinlaj vaso cꞌal yinlaj plato chi xꞌaeloj. Jal pax yul, nonaj el yu elkꞌan cꞌal yu spenail. 26Jaex Fariseo jex tiꞌ, jaxca tol cꞌam chi skeꞌ je yilon niꞌoj. Bꞌabꞌel che sajbꞌane yul jun je vaso tuꞌ. Ta queytuꞌ che yute, tol saj yul, saj pax oj yun can yinlaj yul sat Dios. Chi yal yeloc apnoj tol cꞌam tzet pena je yin. 27Jex cuywam yin sley Moisés cꞌal jex Fariseo, okꞌbꞌal jex cꞌule. Caw caabꞌ sat jex. Laan jex jaxca junoj spantion junoj camnaj watxꞌ yili, saj xacꞌal wejinaj. Jal pax yul, nonaj el yu sbꞌajil camom, cꞌal yu tzet man watxꞌoj. 28Quey jex ton tuꞌ xin, yutol jaꞌ yul sat ebꞌ ánima watxꞌ che yute je bꞌa. Caw caabꞌ sat jex yul je cꞌul, catuꞌ caw ey je penail. 29Jex cuywam yin sley Moisés cꞌal jex Fariseo, okꞌbꞌal jex cꞌule. Caw caabꞌ sat jex. Jaex tiꞌ chi bꞌet je waꞌnen a spantion ebꞌ ẍejabꞌ Dios, cꞌal spantion ebꞌ watxꞌ cꞌal jix el yuneni. 30Catuꞌ che yalon pax oj: “Kꞌinaloj ta ey jon xa yet jix ecꞌ ebꞌ kichmam yet peyxa tuꞌ, ma mi cu oc yetoj ebꞌ jix makꞌon cam wan ebꞌ ẍejabꞌ Dios,” je chi. 31Jaꞌ yet che yalon jaxca tuꞌ, che txꞌoxeloj tol yicꞌaal jex ebꞌ jix makꞌon cam ebꞌ ẍejabꞌ Dios tuꞌ. 32Jaꞌ tzet jix ẍaꞌel yich ebꞌ je yichmam tuꞌ yuneni, jaꞌ lalan je yakꞌon lawoj. 33Jaex tiꞌ, caw jelan jex yin spenail jaxca junoj noꞌ labꞌa. ¿Tzet oj je yute je colon el je bꞌa yul skꞌabꞌ jun syaꞌtajilal bꞌey infierno? 34Abꞌwej. Oj jin chejtoj wan ebꞌ ẍejabꞌ Dios ey jex, cꞌal wan ebꞌ jelan yin yet Dios yetoj wan ebꞌ cuywam. Ey ebꞌ oj je yakꞌ camoj, oj je yaoc ebꞌ yin culus. Ey ebꞌ, tol oj je makꞌ yul-laj snail bꞌey che yakꞌ culto. Oj je yujte ecꞌ ebꞌ bꞌey conobꞌlaj. 35Ey ánima cꞌam junoj spenail tol smoo scam yu, jix makꞌle pax cam ebꞌ. Jaꞌton masanil ebꞌ yet tax cꞌal scamichal naj Abel, naj cꞌam junoj spenail tol smoo scam yu, masantaꞌcꞌal scamichal naj Zacarías, scꞌaal naj Berequías, oj ale oc ebꞌ je penailoj. Jaꞌ naj Zacarías tuꞌ, jaꞌton naj camnaj yu je yichmam snan xol stemplo Dios yetoj smeẍail xaambꞌal.#23:35 Jaꞌ naj bꞌabꞌel winaj makꞌbꞌil cam yu yet animail, jaꞌton naj Abel. Chi kil skꞌaneal bꞌey Génesis 4:1-8. Jaꞌ naj Zacarías, jaꞌton chi kil skꞌaneal bꞌey 2a Crónicas 24:21. 36Caw yel chi wal ey jex, jaꞌ scamichal masanil ebꞌ tuꞌ, oj akꞌle spenailoj ebꞌ ánima eyecꞌ tinaniꞌ.

Scuscꞌulal Jesús Yu Ebꞌ A Jerusalén

(Lucas 13:34-35)

37Jaꞌ jaex tiꞌ, jex a Jerusalén. Che makꞌ cam ebꞌ ẍejabꞌ Dios, cꞌal wanxa ebꞌ chejbꞌiltej yu Dios je nan je xol che kꞌojchꞌenne cam ebꞌ. Ecꞌal el chi woche jix jex wawtetej ey jin tiꞌ an, jaxca junoj noꞌ caẍlan chi skꞌuttetej yuneꞌ, catuꞌ chi smooni, ma pax yal je cꞌul. 38Abꞌwej, jaꞌ jun je na tiꞌ, oj cancan yin tzꞌininial.#23:38 Yet chi yal, “jun je na tiꞌ,” chi yal yeloc apnoj, conobꞌ Jerusalén. 39Chi wal ey jex, cꞌamxa bꞌey oj je yil win an masantaꞌcꞌal yet oj je yalon jaxca tiꞌ: “Kalwej watxꞌ kꞌane tet naj chi juli, jaꞌton naj chejbꞌiltej yu Naj Kaawil,” je chi, ẍi Jesús tet ebꞌ.#Salmos 118:26.

നിലവിൽ തിരഞ്ഞെടുത്തിരിക്കുന്നു:

Mateo 23: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക