Mateo 22

Skꞌaneal Jun Nupil

1Jix yaltej junxa skꞌaneal tiꞌ Jesús tet ebꞌ. Jix yalon jaxca tiꞌ:

2—Oj waltej ey jex, tzet chi yun yeloc ebꞌ ánima chi oc Naj a Satcan Yaawiloj ebꞌ. Ey jun rey jix yaoc skꞌinal jun scꞌaal yet jix nupi. 3Jix cꞌal ẍaꞌel yich jun kꞌin tuꞌ, catuꞌ jix ẍejontoj ebꞌ ẍejabꞌ too yawten ebꞌ, ebꞌ awtebꞌil xa taꞌa. Ma pax yal scꞌul ebꞌ jix apni bꞌey jun kꞌin tuꞌ. 4Yuxan, jix yalon naj tet wanxa ebꞌ ẍejabꞌ jaxca tiꞌ: “Asiꞌwej, alwej tet ebꞌ awtebꞌil xacꞌaltaꞌ wu tuꞌ an, tol watxꞌ xa ye sloꞌbꞌe ebꞌ tol oj low ebꞌ titiꞌ. Jix wakꞌ akꞌle cam jaycꞌon noꞌ wacax yetoj wan noꞌ caw loꞌtzebꞌil. Caw watxꞌ xa ye masanil, yuxan asiꞌ alwej tet ebꞌ, tol chi tit ebꞌ yin eymanil bꞌey jun nupil tiꞌ,” ẍi naj rey tuꞌ tet ebꞌ. 5Jix too ebꞌ ẍejabꞌ naj tuꞌ yaloni. Ma cꞌaltaꞌ sjije ebꞌ awtebꞌil tuꞌ sjuli. Ey jun tol jix too yil can yawo bꞌey xꞌotxꞌ. Ey junxa jix too yil can xon. 6Jal wanxa ebꞌ xin, jix mitxꞌle can ebꞌ ẍejabꞌ naj rey tuꞌ yu ebꞌ. Jix makꞌle ebꞌ yu ebꞌ, masantaꞌcꞌal jix cam ebꞌ chejabꞌwom tuꞌ yu ebꞌ. 7Jaꞌ yet jix yabꞌen naj rey tuꞌ, caw jix tit sjowal naj. Yuxan jix ẍejtoj wan ebꞌ soldado naj, jix bꞌet akꞌle cam wan ánima tuꞌ, catuꞌ jix nusle tzꞌaꞌ sconobꞌ ebꞌ tuꞌ. 8Jix lawi jun tuꞌ xin, catuꞌ jix yalon tet wanxa ebꞌ ẍejabꞌ jaxca tiꞌ: “Watxꞌ xa ye masanil tzet tꞌinan chi kꞌanle yu jun nupil tiꞌ. Jal ebꞌ awtebꞌil tuꞌ, man smoo oj ebꞌ chi juli. 9Yuxan, asiꞌwej yul-laj calle. Jantaj cꞌal mac che yil yin che chejtej bꞌey jun kꞌin tiꞌ,” ẍi naj tet ebꞌ. 10Jix too wanxa ebꞌ chejabꞌwom tuꞌ yul-laj calle xin. Ecꞌal mactxequel bꞌey jix yal ebꞌ. Ey ebꞌ pena. Ey ebꞌ watxꞌ jix apni ocoj. Jun txolan catuꞌ jix no jun na bꞌey eyoc kꞌin tuꞌ. 11Catuꞌ jix octoj naj rey tuꞌ yul sna, yu yilon ebꞌ jix apni tuꞌ. Jix yilon naj tol ey jun winaj man eyoj oc spichil yet nupil yu naj,#22:11 Jaꞌ yet jun tiempoal tuꞌ chi akꞌle spichil ebꞌ awtebꞌil bꞌey junoj kꞌin yu naj a kꞌin tuꞌ. 12yuxan jix yal naj rey tuꞌ tet naj jaxca tiꞌ: “Jaach wamigo, ¿tzet yuxan comon cꞌal chach octej bꞌey nupil tiꞌ? Ilaꞌ tol man eyoj oc ja pichil yet nupil,” ẍi naj rey tet. Cꞌamxa cꞌal tzet jix yal naj. 13Catuꞌ jix yalon naj rey tuꞌ tet wan ebꞌ smooso eyecꞌ yetoj tituꞌ jaxca tiꞌ: “Kꞌalwej ey yajan jun winaj tiꞌ cꞌal skꞌabꞌ. Catuꞌ che yiꞌon aoj, chi too je kꞌojon can eltoj xol kꞌejkꞌinal. Jaꞌ tituꞌ oj okꞌoj, catuꞌ oj natxꞌatxꞌoj yee yu syaꞌil,” ẍi naj rey tuꞌ. 14Chi yal yeloc apnoj jun skꞌaneal tiꞌ, tol ecꞌal mactxequel awtebꞌil yu Dios, jaywanne pax mac sicꞌbꞌil eloj, ẍi Jesús tet ebꞌ.

Chꞌen Tumin Chi Kꞌanle El Yin Ebꞌ Yu Naj Yaaw

(Marcos 12:13-17; Lucas 20:20-26)

15Jix lawi tuꞌ xin, catuꞌ jix too ebꞌ Fariseo tuꞌ. Jix snaꞌoꞌtanen ebꞌ yin Jesús, yu yakꞌlen yijbꞌan Naj ebꞌ yin spenail yu junoj tzetyetal chi yal Naj, catuꞌ chi yakꞌon queja ebꞌ yaloni. 16Yuxan jix ẍejtoj jaywan scuywom ebꞌ scꞌatan Jesús, yetoj jaywan ebꞌ spartido naj Herodes.#22:16 Jaꞌ ebꞌ spartido Herodes, chi ẍaꞌ scꞌul ebꞌ, tol jacꞌal naj Herodes yetoj yicꞌaal chi oc yaawiloj ebꞌ. Jal ebꞌ Fariseo man laan oj snaꞌbꞌal ebꞌ yetoj ebꞌ tuꞌ. Jix bꞌet yalon ebꞌ jaxca tiꞌ:

—Jaach cuywam kotaj sicꞌlebꞌil tol yel cꞌal cha walaꞌ. Kotaj pax oj, tol yel cꞌal cha wute pax cuywa ja bꞌa yin jun bꞌeybꞌale chi yoche Dios. Catuꞌ jun laan cꞌal cha wute ja cꞌul yin ánima yutol laan cꞌal yeloc apnoj ebꞌ yul ja sat. 17¿Tzet ja chi jaach tiꞌ? Jaꞌ chꞌen tumin chi kꞌanle el ey jon yu naj yaaw bꞌey Roma, ¿ey mi sleyal chi kakꞌa, ma cꞌamaj cha naꞌ? ẍi ebꞌ tet. 18Yotaj xa Jesús tol man watxꞌoj tzet lalan snaꞌon oc ebꞌ yin. Yuxan jix yal Naj tet ebꞌ jaxca tiꞌ:

—Jaex tiꞌ, caw caabꞌ sat jex. ¿Tzet yuxan che yakꞌle jin je yijbꞌan yin spenail? 19Txꞌoxwej chꞌen tumin chi akꞌle tet naj yaaw tuꞌ ey jin an, ẍi Naj tet ebꞌ. Catuꞌ jix xꞌoxon jun denario* chꞌen tumin tuꞌ ebꞌ tet Naj. 20Catuꞌ jix skꞌanlen Naj tet ebꞌ tuꞌ jaxca tiꞌ:

—¿Mac ey yechel sat eyoc yin chꞌen tiꞌ? ¿Mac eyoc sbꞌi yin chꞌen? ẍi Jesús tet ebꞌ.

21—Jaꞌton yechel naj yaaw bꞌey Roma, cꞌal sbꞌi naj, ẍi ebꞌ.

—Akꞌwej tzetyetal yet cꞌaltaꞌ naj yaaw tuꞌ tet xin, jal tzetyetal yet cꞌaltaꞌ Dios, akꞌwej pax tet, ẍi Jesús tet ebꞌ. 22Jaꞌ yet jix yabꞌen ebꞌ wan tuꞌ, tucꞌal jix qꞌueya scꞌul ebꞌ. Catuꞌ jix el ebꞌ scꞌatan Naj.

Jaꞌ Ebꞌ Chi Alon Tol Man Oj Pitzcꞌu A Ebꞌ Camnaj

(Marcos 12:18-27; Lucas 20:27-40)

23Jacꞌal oc yet jun cꞌu tuꞌ, ey wan ebꞌ Saduceo* jix apni scꞌatan Jesús. Jaꞌ ebꞌ chi aloni tol cꞌam chi pitzcꞌu a ebꞌ camnaj. Yuxan jix skꞌanle ebꞌ tet naj jaxca tiꞌ:

24—Jaach cuywam, jix yal can naj Moisés yul An Juun jix stzꞌibꞌe can jaxca tiꞌ: “Ta ey junoj winaj cꞌamto yuninal chi ali, catuꞌ chi cami, sowalil jaꞌ junojxa yuẍtaj chi iꞌon can a yistil, catuꞌ chi el yuninal yetoj ix, jaxca tuꞌ xin, chi yiꞌel yicꞌaal yuẍtaj naj,” ẍi can Moisés tuꞌ.#Deuteronomio 25:5. 25Jaꞌ junel, jaꞌ cu xol tiꞌ jon, ey jujwan winaj, yuẍtaj cꞌal sbꞌa ebꞌ. Jix oc yetbꞌi naj bꞌabꞌel winaj, catuꞌ jix camtoj naj. Cꞌam cꞌal junoj yuninal naj jix elcanoj. Jaꞌ naj tzunan yintaj naj bꞌabꞌel tuꞌ jix iꞌon can ix. 26Jix cam pax naj, jacꞌalaꞌ cꞌam yuninal naj jix elcanoj. Jacꞌalaꞌ queytuꞌ jix yun naj yet yox, masantaꞌcꞌal jix lawi ecꞌ ix ix tuꞌ scꞌatan ebꞌ naj sjujwanil, jacꞌalaꞌ jix yun ebꞌ naj. 27Jix lawi scamtoj ebꞌ naj sjujwanil xin, catuꞌ jix cam pax ix ix tuꞌ. 28Jaꞌ yet oj pitzcꞌu a ebꞌ camnaj tuꞌ xin, ¿mactxequel naj ey yistil ix sicꞌlebꞌil? Yutol jix il-le ix yu ebꞌ naj jujwan tuꞌ, ẍi ebꞌ. 29Catuꞌ jix yalon Jesús tet ebꞌ Saduceo tuꞌ jaxca tiꞌ:

—Jaex tiꞌ, che yakꞌ qꞌueytoj je bꞌa, yutol man je yotaj oj tzet ẍi yul An Juun Tzꞌibꞌebꞌilcanoj. Man pax je yotaj oj jantaj yipal Dios. 30Yutol jaꞌ yet oj pitzcꞌu a ebꞌ camnaj tuꞌ, ma xa yiꞌle sbꞌa ebꞌ tituꞌ. Cꞌam mac oj yatoj scutzꞌin alibꞌeal. Yutol jaxca xa ebꞌ ángel bꞌey satcan oj yun ebꞌ. 31Man tocꞌal je yotaj oj pax oj, tol oj pitzcꞌu pax a ebꞌ camnaj. ¿Tumi cꞌamto che yil yul An Juun Tzꞌibꞌebꞌilcan tuꞌ tzet albꞌilcan yu Dios ey jex, yet chi yal jaxca tiꞌ: 32“Jain ton tiꞌ, sDiosal jin naj Abraham, cꞌal naj Isaac, yetoj cꞌal naj Jacob,” ẍi canoj.#Éxodo 3:6. Yuxan caxcꞌal camnajxa ebꞌ, kotaj, tol man junelne oj jix camel ebꞌ. Yutol kotaj tol jaꞌ Dios man sDiosaloj ebꞌ camnaj, tol sDiosal ebꞌ iquis. Jaxca tuꞌ jix xꞌox Jesús yil ebꞌ tol oj pitzcꞌu a ebꞌ camnaj. 33Jaꞌ yet jix yabꞌen wan tiꞌ ebꞌ ánima, caw jix qꞌueya scꞌul ebꞌ.

Jaꞌton Jun Chejbꞌanil Tiꞌ, Ecꞌbꞌan Yeloc Apnoj

(Marcos 12:28-34)

34Jaꞌ yet jix yabꞌen ebꞌ Fariseo, tol ma skeꞌ spajtzen ebꞌ Saduceo tet Jesús, catuꞌ jix syambꞌa sbꞌa ebꞌ yin. 35Ey jun xol ebꞌ tuꞌ caw cuywam yin sley Moisés. Jix yochen jix yijbꞌan Jesús yin spenail, yuxan jix tzꞌaj skꞌanlen naj tet Naj jaxca tiꞌ:

36—Jaach cuywam, bꞌeytet junoj chejbꞌanil yul sley Moisés ecꞌbꞌan yeloc apnoj yintaj masanil wanojxa? ẍi naj tet Jesús. 37Catuꞌ jix yalon Jesús tet jaxca tiꞌ:

—Camcꞌulnewej Naj Kaawil cu Diosal yin masanil je cꞌul yin masanil je pixan, cꞌal yin masanil je naꞌbꞌal.#Deuteronomio 6:5. 38Jaꞌton jun chejbꞌanile tiꞌ, ecꞌbꞌan yeloc apnoj yintaj masanil. 39Ey junxa txenxa man laan oj yeloc apnoj jaxca jun tiꞌ, tol chi yal jaxca tiꞌ: “Camcꞌulnewej je yet animail, jaxca che yute je camcꞌulnen je bꞌa junjun jex,” ẍi.#Levítico 19:18. 40Ta chi cu jije caabꞌ chejbꞌanile tiꞌ, jaxca tol lalan cu jijen masanil ẍejbꞌanil Dios, cꞌal masanil jantaj tzet tzꞌibꞌebꞌilcan yu ebꞌ ẍejabꞌ Dios, ẍi Jesús tet naj.

Cristo,* Naj Scꞌaal Dios

(Marcos 12:35-37; Lucas 20:41-44)

41Yaman to ecꞌ ebꞌ Fariseo tuꞌ, catuꞌ jix skꞌanlen Jesús tet ebꞌ:

42—¿Tzet ẍi je cꞌul yin Naj Cristo? ¿Mac ey yicꞌaal che naꞌ? ẍi Jesús tet ebꞌ.

—Yicꞌaal naj David, ẍi jun tet Jesús.

43—Jaꞌ naj David tuꞌ, akꞌbꞌil yal yu Santo Espíritu, tzet utbꞌil tol jaꞌ jun Cristo tuꞌ, yaawil naj David yei, jix yal jaxca tiꞌ:

44Jix yal Dios Kaawil tet naj Waawil jaxca tiꞌ: “Eyan chotan bꞌey jin watxꞌ kꞌabꞌ an,#22:44 Jaꞌ mac chi ey chotan bꞌey swatxꞌ skꞌabꞌ junoj mactxequel, chi xꞌoxoꞌ, tol miman yeloc apnoj yul sat. masantaꞌcꞌal oj can ebꞌ ja cajat ja walan wu an,” ẍi Dios tet naj Waawil, ẍi naj David tuꞌ.#Salmos 110:1.

45Queytuꞌ jix yute yalon can naj David, ta jaxca tuꞌ, tzet utbꞌil tol jaꞌ Naj Cristo Yaawil yalaꞌ. Ma skeꞌ asanne oj tol yicꞌaal naj David yei, ẍi Jesús tet ebꞌ. 46Cꞌam junoj ebꞌ jix skeꞌ spajtzen tzet jix yalaꞌ. Yuxan, yet tax cꞌal tuꞌ, cꞌam junoj mactxequel chi stecꞌbꞌa sbꞌa skꞌanlen junojxa tzetyetal tet Jesús.

നിലവിൽ തിരഞ്ഞെടുത്തിരിക്കുന്നു:

Mateo 22: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക