Mateo 12

Jix Yaltej Jesús Yu Scꞌual Xewilal*

(Marcos 2:23-28; Lucas 6:1-5)

1Jaꞌ yet jun xewbꞌal cꞌu yet ebꞌ Israel, jix ecꞌ Jesús bꞌey jun bꞌe xol wan ixim tiriw yetoj ebꞌ scuywom. Jix tit swail ebꞌ scuywom tuꞌ, yuxan jix yiꞌel jayebꞌ sjolom ixim tiriw ebꞌ, catuꞌ jix sbꞌuchon eltej ixim ebꞌ, catuꞌ chi scꞌuxun ebꞌ. 2Jaꞌ yet jix yilon jaywan ebꞌ Fariseo* jaxca tuꞌ xin, jix yalon ebꞌ tet Jesús jaxca tiꞌ:

—Ilaꞌla, jaꞌ wan ja cuywom tiꞌ, lalan smulna ebꞌ yet scꞌual xewilal tiꞌ, asan xin, ey cu ley tol cꞌam chi cu mulna yet scꞌual xewilal, ẍi ebꞌ tet Jesús.#12:2 Jaꞌ yet chi iꞌle el jayebꞌ sjolom ixim tiriw, catuꞌ chi bꞌuchle eltej ixim, laan jaxca tol chi kꞌuple a tiriw yul sat ebꞌ Israel. Jaꞌ jun tiꞌ ey sleyal tol cꞌam chi yun ebꞌ yet scꞌual xewilal. Jaxca tuꞌ chi yal bꞌey Éxodo 20:8-11. 3Catuꞌ jix yalon Jesús tet ebꞌ jaxca tiꞌ:

—¿Tumi cꞌamto bꞌey che yil yul An Juun Tzꞌibꞌebꞌilcanoj,* bꞌey chi yal tzet jix yun naj David* junel, yet jix tit swail yetoj ebꞌ yetbꞌi? 4Jix octoj yul Kꞌap Na yet Dios, jix sloꞌon ixim pan yet Dios yei, yetoj ebꞌ yetbꞌi naj tuꞌ.#12:4 Jaꞌ jun skꞌaneal tiꞌ chi ilcha bꞌey 1a Samuel 21:1-6. Jaꞌ wan pan tuꞌ, asan ebꞌ yakꞌomal xaambꞌal tet Dios ey sleyal sloꞌoni. Jal naj David yetoj ebꞌ yetbꞌi naj tuꞌ xin, cꞌam sleyal tol chi sloꞌ ebꞌ. 5¿Ma cꞌamto che yil yul sley Moisés* tol jaꞌ ebꞌ yakꞌomal xaambꞌal tet Dios chi akꞌwi servil yul templo tuꞌ yet scꞌual xewilal, cꞌam pax chi oc spenailoj ebꞌ? 6Chi wal ey jex an, tol jaꞌ titiꞌ ey junoj mactxequel yel xacꞌal miman yeloc apnoj yintaj stemplo Dios tuꞌ. 7Ta jix naꞌcha el je yu tzet albꞌilcan yu Dios yul An Juun Tzꞌibꞌebꞌilcan bꞌey chi yal jaxca tiꞌ: “Chi woche tol chi okꞌ je cꞌul yin je yet animail. Man asanne oj xaambꞌal chi woche,” ẍi yul An Juun tuꞌ.#Oseas 6:6. Kꞌinaloj ta chi naꞌcha el jun tuꞌ je yu, cꞌam mi che yakꞌ low yin ebꞌ cꞌam spenail. 8Jain tiꞌ, chi skeꞌ walon tzet chi skeꞌ el kunen yet scꞌual xewilal, yutol Akꞌbꞌil Wopiso yu Dios xol ebꞌ ket animail,* ẍi Jesús tet ebꞌ Fariseo tuꞌ.

Jaꞌ Naj Sicbꞌinaj El Skꞌabꞌ, Jix Waꞌxi Canoj

(Marcos 3:1-6; Lucas 6:6-11)

9Jix lawi jun tuꞌ xin, jix too Jesús catuꞌ jix octoj yul snail sculto ebꞌ Israel tuꞌ. 10Ey jun winaj sicbꞌinaj el jun skꞌabꞌ eyecꞌ tituꞌ. Ey pax ebꞌ chi yoche chi ilcha junoj kꞌane yet watxꞌ chi oc spenailoj Jesús, yuxan jix skꞌanle ebꞌ tet naj jaxca tiꞌ:

—¿Ey sleyal chi akꞌle can waꞌxoj scꞌul junoj yaꞌey yet scꞌual xewilal? ẍi ebꞌ tet Jesús. 11Catuꞌ jix takꞌwi Jesús tuꞌ tet ebꞌ:

—Kꞌinaloj ta ey junoj jex chi too junoj je meꞌ yul junoj jolan yet scꞌual xewilal, ¿tumi cꞌam chi too je yiꞌatej? 12Jal junoj ánima, yel xacꞌal miman yeloc apnoj yintaj junoj noꞌ meꞌ tuꞌ. Yuxan, chi ton skeꞌ kakꞌon junoj watxꞌcꞌulal yet scꞌual xewilal, ẍi Jesús tet ebꞌ. 13Jix lawi yalon jun tuꞌ xin, catuꞌ jix yalon tet naj jaxca tiꞌ:

—Bꞌieltoj ja kꞌabꞌ, ẍi Jesús tet naj.

Jix sbꞌion eltoj skꞌabꞌ naj, catuꞌ jix waꞌxi can jaxca cꞌaltaꞌ junxa skꞌabꞌ naj. 14Jaꞌ yet tuꞌ, jix eltej ebꞌ Fariseo tuꞌ stiꞌ na, catuꞌ jix cꞌoli slatiꞌne sbꞌa ebꞌ yin Jesús tuꞌ yu tzet utbꞌil chi yun yakꞌle cam Naj yu ebꞌ.

Yin Eyojto Jix Kꞌanabꞌ Dios Yin Jesucristo

15Jaꞌ yet jix yotajnen el Jesús tzet lalan snaꞌon oc ebꞌ yin xin, catuꞌ jix tooi. Ecꞌal ebꞌ ánima jix tzajlo yintaj Naj, catuꞌ jantaj ebꞌ yaꞌey xol ebꞌ, jix waꞌxi can scꞌul ebꞌ yu Naj. 16Catuꞌ jix yalon Naj tet ebꞌ jaxca tiꞌ:

—Cꞌam junoj mac bꞌey che yalaꞌ mactxequel jix akꞌon waꞌxoj je cꞌul, ẍi Jesús tet ebꞌ. 17Jaxca tuꞌ jix yute yalon tet ebꞌ tuꞌ, yet watxꞌ chi yun tzet albꞌilcan yu naj ẍejabꞌ Dios, naj chi yij Isaías yet peyxa, yet jix stzꞌibꞌen can tzet jix yal Dios tet, tol jix yal jaxca tiꞌ:

18Jaꞌton jun jin chejabꞌ sicꞌbꞌil el wu tiꞌ an.

Miman jin camcꞌulal yin Naj an. Caw chin tzala yetoj. Oj waoc Wespíritu yin Naj. Catuꞌ oj yalon el snan xol ebꞌ man Israeloj, tol oj naꞌle oc yin ebꞌ yin sjichanil.

19Cꞌam bꞌey oj yakꞌ jowal. Cꞌam bꞌey oj a yaw. Cꞌam mac oj abꞌen yalon el Naj yul-laj calle.

20Ey ebꞌ caw okꞌbꞌal scꞌul, jaxca junoj teꞌ aa cꞌuun spajchai. Ma xin, jaxca junoj tzejtebꞌal tuxa chi tani, queytuꞌ ebꞌ. Asan xin, jaꞌ oj colon ebꞌ, man oj yakꞌ low yin ebꞌ. Queyton tuꞌ oj yunne masantaꞌcꞌal oj oc can Naj yin Yaawilal. Jaꞌ yet oj yakꞌon Yaawilal tuꞌ, yin sjichanil oj yakꞌa.

21Catuꞌ jaꞌ oj aon oc yipoj scꞌul masanil ebꞌ conobꞌlaj, ẍi Dios yul An Juun Tzꞌibꞌebꞌilcanoj.#Isaías 42:1-4.

Jaꞌ Ebꞌ Jix Aloni Tol Junoj Pena Espíritu Eyoc Yin Jesús

(Marcos 3:19-30; Lucas 11:14-23; 12:10)

22Ey jun winaj jix iꞌletej scꞌatan Jesús, tol cꞌam chi skeꞌ yilwi, cꞌam chi skeꞌ pax skꞌanabꞌi, yutol ey jun pena espíritu eyoc yin. Jix waꞌxi can scꞌul yu Jesús. Yuxan jix ilwi can aoj, catuꞌ jix kꞌanabꞌ pax aoj. 23Masanil ebꞌ ánima jix ilon jun tuꞌ, jix qꞌueya scꞌul ebꞌ catuꞌ jix yalon ebꞌ jaxca tiꞌ:

—¿Jam jun yicꞌaal naj David* echbꞌanebꞌil sjul ku tiꞌ? ẍi ebꞌ. 24Jal yet jix yabꞌen ebꞌ Fariseo jun tiꞌ, jix yalon ebꞌ jaxca tiꞌ:

—Chi taꞌ skeꞌ yiꞌon el pena espíritu jun winaj tiꞌ yin ánima, yutol jaꞌ syaawil ebꞌ pena espíritu tuꞌ eyoc yin naj, jun chi yij Beelzebú, ẍi ebꞌ. 25Jix yotajne el Naj Jesús tzet chi snaꞌ ebꞌ, yuxan jix yal tet ebꞌ jaxca tiꞌ:

—Kꞌinaloj ey junoj miman conobꞌ bꞌey chi poꞌocha ebꞌ yaaw, catuꞌ chi yakꞌlen a jowal ebꞌ. Chi lawi ey jun conobꞌ tuꞌ yu. Kꞌinaloj ey junoj conobꞌ, ma xin junoj nail ánima chi poꞌocha yu jowal, chi lawi eyoj. 26Queyton tuꞌ, yeoc naj Satanás, ta chi poꞌocha yetoj yet pena espíritual, ¿tzet utbꞌil oj cancan naj yin yopiso? 27Jain tiꞌ, che yalaꞌ tol yu yipal naj Beelzebú chi wiꞌ can el ebꞌ pena espíritu tuꞌ. Ta yel taꞌ che yalaꞌ, ¿mac pax txequel eyoc yetoj ebꞌ je cuywom yet chi yiꞌon el ebꞌ pena espíritu yin ebꞌ tuꞌ? Yuxan jaꞌton ebꞌ je cuywom tuꞌ chi txꞌoxon eloj tol man jichanoj je naꞌoni. 28Jain tiꞌ asan yu yipal Yespíritu Dios chi wiꞌ can el ebꞌ pena espíritu tuꞌ yin ebꞌ ánima tiꞌ. Jaꞌton yin jun tiꞌ chi txeclo eloj tol jix ẍaꞌel yich yakꞌon Yaawil Dios je xol. 29Kꞌinaloj ta ey junoj winaj caw ey yip. Toj ey junoj mactxequel comon cꞌal oj skeꞌ yoc elkꞌan yul sna naj. Asan ta chi akꞌcha eyqꞌuey naj catuꞌ chi pixle ey naj bꞌian, jam yet tuꞌ chi skeꞌ yelkꞌanele eltoj yul sna naj tuꞌ. 30Jaꞌ ebꞌ man wetoj eyocoj, chi jowi oc ebꞌ win an. Jaꞌ ebꞌ cꞌam chi yambꞌan oc ebꞌ wetoj an, jaꞌton ebꞌ chi akꞌon sajlem cantoj. 31Yuxan chi wal ey jex an, tol yal cꞌal tzet penail chi yal ánima cꞌal chi el yuneni, oj akꞌle mimancꞌulal yin yu Dios. Jal pax mac chi bꞌuchon Naj Santo Espíritu xin, cꞌamxa cꞌal mimancꞌulal yin ebꞌ. 32Ta ey junoj mactxequel chi alon junoj tzetyetal pena win an, jain Akꞌbꞌil Wopiso yu Dios xol ebꞌ ket animail tiꞌ,* oj akꞌle mimancꞌulal yin ebꞌ. Jal mactxequel chi yal bꞌuchwal kꞌane yin Naj Santo Espíritu, cꞌam cꞌal bꞌakꞌin oj akꞌle mimancꞌulal yibꞌan ebꞌ. Manaj yet jun tiempoal tiꞌ, catuꞌ manaj yet eyojto tuꞌ.

Jaꞌ Cu Bꞌeybꞌal Chi Txeclonen Eloj Tzetyetal Ey Yin Cu Pixan

(Lucas 6:43-45)

33Kꞌinaloj ta ey teꞌ teꞌ watxꞌ, cꞌam sat pena chi yakꞌa. Jacꞌalaꞌ, pax teꞌ teꞌ pena, cꞌam pax sat teꞌ watxꞌ chi yakꞌa. Yu sat junjun teꞌ chi yakꞌa, yuxan chi kotajne el tzet teꞌal teꞌ teꞌ tuꞌ. 34Jaex tiꞌ, laan jex jaxca noꞌ labꞌa. Pena jex. Yuxan ¿tumi ey niꞌoj tzetyetal watxꞌ chi skeꞌ je yaloni? Yutol jaꞌ tzet ey bꞌey cu pixan, jaꞌ chi kalaꞌ. 35Jaꞌ mac watxꞌ snaꞌbꞌal, watxꞌ tzet chi yalaꞌ, yutol asan tzet watxꞌ ey bꞌey spixan ebꞌ. Jal pax ebꞌ pena snaꞌbꞌal xin, pena pax tzet chi yalaꞌ, yutol asan tzet pena ey bꞌey spixan ebꞌ. 36Chi wal ey jex, tol jaꞌ yet oj jul jun cꞌual chi naꞌle oc kin, oj naꞌle oc yin masanil ánima yu masanil wan kꞌane cꞌam tzet chi oqui jix yal ebꞌ. 37Jaꞌ Dios oj naꞌon oc je yin yu tzet che yalaꞌ. Jaꞌ yet tuꞌ oj al-leoj, ta oj oc tzet jix je yal tuꞌ je penailoj, ma cꞌamaj, ẍi Jesucristo.

Ebꞌ Jix Kꞌanon Junoj Milagro Yilaꞌ

(Marcos 8:12; Lucas 11:29-32)

38Ey wan ebꞌ cuywam yin sley Moisés* cꞌal wan ebꞌ Fariseo jix alon tet Jesús jaxca tiꞌ:

—Jaach cuywam, chi koche cha txꞌox jun milagro* kilaꞌ, ẍi ebꞌ tet Jesús. 39Yuxan jix yal Jesús tet ebꞌ jaxca tiꞌ:

—Jaꞌ jaex yet jun tiempoal tiꞌ, caw pena jex, manaj yin Dios che yaoc je cꞌul. Tucꞌal che kꞌan milagro je yilaꞌ, junoj tzet chi txꞌoxon el yipal Dios. Asan jun milagro oj txꞌoxle ey jex, jaꞌton junoj jaxca jun txꞌoxbꞌil yu Dios yin jun ẍejabꞌ chi yij Jonás. 40Jaꞌ naj Jonás tuꞌ, oxebꞌ cꞌu, oxebꞌ akꞌbꞌal ey eytoj naj yul scꞌul jun noꞌ miman pescado.#Jonás 1:17. Jaxca jix yun naj Jonás tuꞌ, jaxca tuꞌ oj wun an, jain Akꞌbꞌil Wopiso yu Dios xol ebꞌ ket animail tiꞌ. Oxebꞌ cꞌu, oxebꞌ akꞌbꞌal oj jin eytoj yul txꞌotxꞌ. 41Jaꞌ yet jix ecꞌ yalon el skꞌaneal Dios naj Jonás tuꞌ tet ebꞌ a Nínive, jix snaꞌ sbꞌa scꞌul ebꞌ. Jal tinaniꞌ ecꞌbꞌan jin yintaj naj Jonás tuꞌ an, toj yu jun tuꞌ, yuxan chi snaꞌ sbꞌa je cꞌul. Yuxan jaꞌ yet oj jul jun cꞌual yet chi naꞌle oc je yin, oj a waan ebꞌ a Nínive tuꞌ, jaꞌ ebꞌ oj alon a je penail. 42Ilaꞌ pax jun ix yaaw bꞌey Sur yet peyxa tuꞌ. Caw naat titnaj ix, Jix julecꞌ ix yabꞌ tzet chi yal naj Salomón* yutol miman sjelanil naj. Jal tinaniꞌ, ecꞌbꞌan jin yintaj naj Salomón tuꞌ, tzet yu cꞌam chi jul ebꞌ ánima yabꞌ tzet chi wal an. Yuxan jaꞌ yet oj jul jun cꞌual yet chi naꞌle oc je yin, oj a waan ix tuꞌ, catuꞌ oj yalon a je penail ix.

Skꞌaneal Jun Pena Espíritu Chi Meltzotoj Bꞌey Ey Taꞌa

(Lucas 11:24-26)

43Kꞌinaloj ta ey junoj pena espíritu chi el yin junoj ánima tinaniꞌ. Chi lawi tuꞌ xin, chi ecꞌ bꞌey masanil tajin lugarlaj. Chi seyon ecꞌ bꞌey watxꞌ chi xew niꞌoj. Cꞌam cꞌal chi ilcha bꞌey watxꞌ chi eeyi. Yuxan chi snaꞌ jaxca tiꞌ: 44“Oj jin meltzo bꞌey ey jin taꞌa bꞌey jix jin tita,” ẍi. Jaꞌ yet chi apni, chi yilon oc spixan naj tuꞌ, laan jaxca junoj na qꞌuisbꞌilxa, caw watxꞌ yili. 45Yuxan chi too yiꞌtej jujwanojxa yet pena espíritu ecꞌbꞌanxa spenail yintaj. Catuꞌ chi swaꞌnen xacꞌal ey sbꞌa ebꞌ yin spixan naj. Yuxan, yel xacꞌal pena chi yun yeloc naj yintaj yet sbꞌabꞌelal. Jaxca ton jun winaj tuꞌ, queyton tuꞌ oj yun yetex xacꞌal el snaꞌbꞌal ebꞌ ánima tiꞌ, ẍi Jesús tet ebꞌ.

Xutx Jesús Yetoj Ebꞌ Yuẍtaj Naj

(Marcos 3:31-35; Lucas 8:19-21)

46Lalanto yalon Jesús tet ebꞌ ánima, catuꞌ jix apni xutx Naj yetoj ebꞌ yuẍtaj Naj. Jix apni ebꞌ stiꞌ na. Jix yoche ebꞌ chi kꞌanabꞌ yetoj Naj. 47Yuxan ey jun mactxequel jix alon tet Jesús jaxca tiꞌ:

—Eyecꞌ ja txutx yetoj ebꞌ ja wuẍtaj stiꞌ na, tol chi yoche ebꞌ chi kꞌanabꞌ ja wetoj, ẍi tet Jesús. 48Jix takꞌwi Jesús tuꞌ tet naj jaxca tiꞌ:

—¿Mactxequel jin txutx tuꞌ, mactxequel ebꞌ wuẍtaj tuꞌ cha naꞌ? ẍi Jesús tet naj. 49Catuꞌ jix xꞌoxon oc ebꞌ scuywom tuꞌ tet naj, jix yalon jaxca tiꞌ:

—Jaꞌton ebꞌ tiꞌ jaxca jin txutx yei, jaꞌton ebꞌ tiꞌ jaxca wuẍtaj yei. 50Yutol yal cꞌal mactxequel chi jijen jaxca chi yoche jin Mam bꞌey satcan, jaꞌton ebꞌ tuꞌ jaxca tol wuẍtaj an, jaxca tol wanabꞌ an, jaxca tol jin txutx an, ẍi Jesús tuꞌ.

നിലവിൽ തിരഞ്ഞെടുത്തിരിക്കുന്നു:

Mateo 12: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക