Mateo 13

Skꞌaneal Jun Naj Txiom Tiriw

(Marcos 4:1-9; Lucas 8:4-8)

1Jaꞌ yet jun cꞌu tuꞌ, jix eltej Jesús yul na. Jix too ey chotan stiꞌ jaꞌ mar. 2Ecꞌal ebꞌ ánima jix apni scꞌatan Naj, bꞌey eyecꞌ tituꞌ. Yuxan jix octoj yul jun barco, jix ey chotanoj. Jal ebꞌ ánima tuꞌ xin, jix can ebꞌ stiꞌ jaꞌ tuꞌ. 3Ecꞌal kꞌaneal jix yaltej Jesús tet ebꞌ. Wan skꞌaneal yet txꞌoxbꞌanile. Jix yal Naj tet ebꞌ jaxca tiꞌ:

—Ey jun winaj jix eltoj txio tiriw. 4Lalan xion ey ixim, catuꞌ ey wan chi eyqꞌuey can yul bꞌe. Jaxa noꞌ tzꞌiquin jix ecꞌ sicꞌon aoj. 5Ey ixim xin, yibꞌanlaj saam chꞌen jix apni can ixim bꞌey xaxo chꞌan xꞌotxꞌal, catuꞌ eyman jix aol ixim, yutol xaxo chꞌan xꞌotxꞌal. 6Jaꞌ yet jix aol cꞌu xin, eyman jix tajeloj, yutol man naat oj jix eytoj xeꞌ yul txꞌotxꞌ. 7Ey ixim jix apni pax can xol qꞌuix, caw jix chꞌibꞌ cꞌal a teꞌ qꞌuix tuꞌ, catuꞌ jix qꞌueyel ixim. 8Jal pax ixim, jix ey can bꞌey yaax txꞌotxꞌ xin, jaꞌ yet jix yakꞌon sat, ey ixim jolome 100 sbꞌakꞌ jix yakꞌa, ey ixim 70 sbꞌakꞌ jix yakꞌa, ey ixim xin, 30 sbꞌakꞌ jix yakꞌa. 9Jaꞌ wan tzet che yabꞌ tiꞌ, naꞌwejtej sicꞌlebꞌil, ẍi Jesús tet ebꞌ.

Jaꞌ Yopiso Wan Skꞌaneal Chi Yakꞌ Naꞌcha El Tiꞌ

(Marcos 4:1-9; Lucas 8:4-8)

10Jix sjitzontoj sbꞌa ebꞌ scuywom tuꞌ scꞌatan Jesús, catuꞌ jix skꞌanlen ebꞌ tet Naj jaxca tiꞌ:

—¿Tzet yuxan asan yin skꞌaneal txꞌoxbꞌanile chach kꞌanabꞌ tet ebꞌ ánima? ẍi ebꞌ tet Jesús. 11Yuxan jix takꞌwi Jesús tet ebꞌ jaxca tiꞌ:

—Asan ey jex chi txꞌoxle wan tzetyetal cꞌamto mac otajnen yu Dios, yet watxꞌ chi naꞌcha el je yu tzet wal yeoc jun Yaawil Dios. Jal tet wanojxa xin, cꞌam chi akꞌle yotajne el ebꞌ. 12Yutol jaꞌ mac chi yoche chi yotajne eloj, yel xacꞌal oj akꞌle yotajne eloj. Jal mac cꞌam chi yoche chi yotajne el wan tiꞌ xin, ta ey niꞌoj tzet yotaj, oj iꞌle can ecꞌ masanil tet. 13Caxcꞌal asan yin skꞌaneal txꞌoxbꞌanile chin kꞌanabꞌ tet ebꞌ ánima. Cꞌam cꞌal chi naꞌcha yu ebꞌ yutol caxcꞌal chi yil junoj tzetyetal ebꞌ, caw chi can ebꞌ jaxca tol cꞌam tzet chi yil ebꞌ. Yetoj pax oj, caxcꞌal chi yabꞌ ebꞌ, cꞌam niꞌoj chi naꞌcha el yu ebꞌ. 14Yuxan lalan yunen el yin wan ánima tiꞌ tzet jix yal naj Isaías yet peyxa, yet jix yalon jaxca tiꞌ:

Caw yel oj je yabꞌe, caw ma naꞌcha el je yu. Caw yel oj je yilaꞌ, caw ma naꞌcha el je yu tzet oj je yil tuꞌ.

15Yutol jaꞌ wan ánima tiꞌ, jix cawxi el snaꞌbꞌal ebꞌ. Jaxca tol majan xiquin ebꞌ yet watxꞌ cꞌam chi yabꞌ ebꞌ bꞌeytet yel. Yetoj pax oj, jaxca tol chi smutzꞌ ey sat ebꞌ, yet watxꞌ cꞌam chi yil ebꞌ bꞌeytet jun yel tuꞌ. Tutun cꞌam niꞌoj chi naꞌcha el yu ebꞌ. Cꞌam chi sqꞌuex sbꞌeybꞌal ebꞌ, yet watxꞌ chin colel ebꞌ an, ẍi Dios yul An Juun tuꞌ.#Isaías 6:9, 10.

16Jal jex xin, watxꞌ je yet, yutol che yil yetoj je sat, catuꞌ che yabꞌen yetoj je txiquin tzetyetal yel. 17Caw yel chi wal ey jex, ecꞌal ebꞌ ẍejabꞌ Dios* yet peyxa, yetoj wanxa ebꞌ watxꞌ sbꞌeybꞌal, jix yoche scꞌul ebꞌ chi yil wan che yil tiꞌ, asan xin, ma yil ebꞌ. Jix yoche pax ebꞌ chi yabꞌ wan che yabꞌ tiꞌ, asan xin, ma yabꞌ ebꞌ.

Tzet Chi Yal Yeloc Apnoj Jun Skꞌaneal Naj Txiom Tiriw

(Marcos 4:13-20; Lucas 8:11-15)

18Abꞌwej tzet chi wal an xin. Oj waltej ey jex tzet chi yal yeloc apnoj jun skꞌaneal naj txiom tiriw tuꞌ. 19Jaꞌ ixim jinat jix eyqꞌuey yul bꞌe, yechel ebꞌ ánima chi abꞌen skꞌane Dios, tzet utbꞌil chi yun yoc Dios Yaawiloj ebꞌ, asan xin, cꞌam chi naꞌcha pax el yu ebꞌ. Chi jul naj diablo scꞌatan ebꞌ xin, catuꞌ chi akꞌle qꞌueytoj wan kꞌane tuꞌ yul scꞌul ebꞌ yu naj diablo. 20Jaꞌ ixim jix apni pax can yibꞌanlaj chꞌen, yechel ebꞌ ánima chi chaꞌon skꞌane Dios yin tzalacꞌulal. 21Caw cꞌam chi techa yu ebꞌ, man mimanoj tiempo chi bꞌeytoj ebꞌ yin skꞌane Dios tuꞌ. Yutol jaꞌ yet chi jul junoj syaꞌilal, ma xin, yet chi yilon syaꞌilal ebꞌ syaꞌiloj skꞌane Dios, yin junoj txolan catuꞌ chi meltzo ebꞌ yintaj junelxa. 22Jaꞌ ixim jix apni pax xol teꞌ qꞌuix, yechel pax junxa bꞌulan ebꞌ chi abꞌen skꞌane Dios. Caw asan cꞌal tzetyetal ey yul yibꞌankꞌinal tiꞌ chi snaꞌ ebꞌ. Chi snaꞌ ebꞌ sbꞌeomal, chi snaꞌ ebꞌ yet smimanil. Yuxan naꞌbꞌacꞌal chi al-le el skꞌane Dios tet ebꞌ. Laan chi yun yeloc apnoj ebꞌ jaxca ixim tiriw cꞌam chi waꞌxi sjolom. 23Jal pax ixim jix eyqꞌuey bꞌey yaax txꞌotxꞌ xin, yechel ebꞌ chi abꞌen skꞌane Dios catuꞌ chi naꞌcha el yu. Jaꞌton ebꞌ tuꞌ laan jaxca ixim jolome ecꞌal sbꞌakꞌ. Ey ebꞌ xin, jaxca ixim jolome cien sbꞌakꞌ. Ey ebꞌ xin, jaxca ixim jolome sesenta sbꞌakꞌ. Ey ebꞌ xin, treinta sbꞌakꞌ chi yakꞌa, ẍi Jesús.

Skꞌaneal An Tiriw Chꞌim Xol Ixim Tiriw

24Jix yaltej Jesús junxa skꞌaneal tiꞌ tet ebꞌ scuywom, jix yal jaxca tiꞌ:

—Oj waltej ey jex tzet yeoc yet eyoc Dios Yaawiloj. Kꞌinaloj ta ey junoj winaj chi txiwi watxꞌ jinat tiriw bꞌey junoj txꞌotxꞌ. 25Jaꞌ yet lalan swey naj, catuꞌ chi jul mac chi jowi oc yin naj, catuꞌ chi jul xiontoj an tiriw chꞌim xol stiriw naj tuꞌ. 26Jaꞌ yet oj poꞌo ixim tiriw tuꞌ, catuꞌ chi txeclo el an chꞌim tiriw tuꞌ xol. 27Yuxan chi too al-le yu ebꞌ smooso tet naj a awo tuꞌ, chi yalon ebꞌ jaxca tiꞌ: “Jaꞌ ixim ja jinat jix bꞌet ja txiey sat ja txꞌotxꞌ, ¿tzet yuxan ey wan an chꞌim tiriw xol xin?” ẍi ebꞌ tet naj. 28“Tejan jaꞌ junoj ebꞌ chi jowi oc win jix bꞌet txiontoj xol,” ẍi naj tet ebꞌ. “¿Chim yal ja cꞌul chi too cu tokꞌatej an chꞌim tiriw tuꞌ xol ixim tiriw?” ẍi ebꞌ tet naj. 29“Cꞌamaj, yutol jaꞌ yet chi tokꞌle a an chꞌim tiriw tuꞌ, chi tit ixim tiriw yetoj. 30Yel watxꞌ chi cancan jaxca tuꞌ, masantaꞌcꞌal yet chi cꞌuple a ixim tiriw tuꞌ. Catuꞌ oj walon tet ebꞌ chi mulna tuꞌ tol chi sicꞌle can el an yu ebꞌ. Yin stopanil oj yute ebꞌ, catuꞌ oj yakꞌon tzꞌaꞌ ebꞌ. Oj lawoj tuꞌ xin, catuꞌ oj yiꞌontoj ixim tiriw tuꞌ ebꞌ bꞌey jin cꞌuanbꞌal an,” ẍi naj, ẍi Jesús tet ebꞌ.

Skꞌaneal An Sbꞌakꞌ Mostaza

(Marcos 4:30-32; Lucas 13:18-19)

31Jix lawi jun tuꞌ xin, catuꞌ jix yalontej junxa skꞌaneal Jesús tiꞌ:

—Oj waltej ey jex tzet utbꞌil chi yun ẍꞌibꞌ sbꞌisil ebꞌ ánima chi oc Dios Yaawiloj. Laan chi yun jaxca junoj jinat mostaza chi yaw junoj ánima sat xꞌotxꞌ. 32Jaꞌ an yinatil mostaza tuꞌ, yaliẍ yintaj masanil jinat. Jaxa wal yet chi chꞌibꞌi, yel miman chi yun yintaj wanojxa awo kocꞌtaj cꞌal chi kawaꞌ. Mimej chi yun ẍꞌibꞌaoj jaxca teꞌ teꞌ mimejtaj, catuꞌ chi jul noꞌ tzꞌiquin yin skꞌabꞌlaj, chi swaꞌnen sweyubꞌ noꞌ tituꞌ, ẍi Jesucristo tet ebꞌ. 33Jix yalon pax Jesús junxa skꞌaneal tiꞌ:

—Oj waltoj junxa skꞌaneal tiꞌ ey jex, tzet utbꞌil chi yun ẍꞌibꞌ sbꞌisil ebꞌ ánima chi oc yalan Yaawil a satcan. Jaꞌ jun tuꞌ, laan jaxca niꞌoj yich pan chi yaeytoj ix ix xol oxebꞌoj echbꞌal jarina. Yu niꞌoj yich pan tuꞌ, chi chꞌibꞌa masanil ixim, ẍi Jesús.

Jaꞌ Tzet Yuxan Jix Kꞌanabꞌ Naj Jesús Yin Txꞌoxbꞌanile Kꞌaneal

(Marcos 4:33-34)

34Jaꞌ yet jix kꞌanabꞌ el Jesús snan xol ebꞌ ánima tuꞌ, yin txꞌoxbꞌanile kꞌaneal cꞌal jix kꞌanabꞌ tet ebꞌ, 35yet watxꞌ chi yun tzet albꞌilcan yu jun ẍejabꞌ Dios yet peyxa, yet jix stzꞌibꞌen can jaxca tiꞌ:

Yin txꞌoxbꞌanile kꞌaneal oj wute kꞌanabꞌ jin bꞌa tet ánima. Oj wal wan tzetyetal cꞌam mactxequel otajnen yet tax cꞌal jix waꞌxi can yul yibꞌankꞌinal tiꞌ, ẍi yul An Juun Tzꞌibꞌebꞌilcan tuꞌ.#Salmos 78:2.

Jaꞌ Tzet Chi Yal Yeloc Apnoj An Chꞌim Tiriw Tuꞌ

36Jix yalontoj sbꞌa Naj Jesús tuꞌ tet ebꞌ ánima tuꞌ xin, catuꞌ jix octoj yul na. Catuꞌ jix oc pax toj ebꞌ scuywom Naj yetoj, catuꞌ jix yalon ebꞌ tet Naj jaxca tiꞌ:

—Jaꞌ skꞌaneal an chꞌim tiriw jix ja walaꞌ, al ey jon, tzet chi yal yeloc apnoj, ẍi ebꞌ tet Naj. 37Catuꞌ jix yalon Jesús tuꞌ tet ebꞌ jaxca tiꞌ:

—Jaꞌ naj chi txion watxꞌ tiriw tuꞌ, wechel ton jain Akꞌbꞌil Wopiso yu Dios xol ebꞌ ket animail tiꞌ* an. 38Jaꞌ txꞌotxꞌ txꞌotxꞌ bꞌey jix oc awo tuꞌ, yechel yul yibꞌankꞌinal tiꞌ. Jaꞌ ixim jinat watxꞌ tuꞌ, yechel ton ebꞌ eyxa oc yalan Yaawil a satcan. Jaꞌ an chꞌim tiriw tuꞌ, yechel ton ebꞌ yet diablo. 39Jaꞌ jun chi jowi oc yin naj a txꞌotxꞌ tuꞌ, yechel ton naj diablo. Jaꞌ yet stiempoal syambꞌale ixim tiriw tuꞌ, yechel ton yet oj lawoj yul yibꞌankꞌinal tiꞌ. Jaꞌ ebꞌ chi mulna yet chi cꞌuple a tiriw tuꞌ, yechel ebꞌ ángel. 40Jaxca chi yun sicꞌle el an chꞌim tiriw tuꞌ, catuꞌ chi too an tzꞌaꞌoj, queytuꞌ oj yun ebꞌ ánima yet oj lawoj yul yibꞌankꞌinal tiꞌ. 41Jain Akꞌbꞌil Wopiso yu Dios xol ebꞌ ket animail tiꞌ an, oj jin chejtej ebꞌ wángel, oj ecꞌ yambꞌale a masanil ebꞌ yu ebꞌ chi akꞌon somcha snaꞌbꞌal yet animail yetoj pax ebꞌ pena tzet chi el yuneni. Oj ecꞌ iꞌle el ebꞌ bꞌey oj wakꞌ Yaawilal. 42Catuꞌ oj kꞌojletoj ebꞌ bꞌey jun lugar caw jow kꞌakꞌ. Oj okꞌ ebꞌ tituꞌ, catuꞌ oj natxꞌatxꞌoj yee ebꞌ yu syaꞌil. 43Jal ebꞌ watxꞌ sbꞌeybꞌal xin, jaxca yili cꞌu queytuꞌ oj yun yili ebꞌ yalan Yaawil Naj Yaaw a satcan. Naꞌwejtej wan tzet che yabꞌ tiꞌ sicꞌlebꞌil.

Skꞌaneal Jun Tzetyetal Mujbꞌil

44Jaꞌ ebꞌ chi oc yalan Yaawil Naj a satcan, laan ebꞌ jaxca junoj tzetyetal miman stool mujbꞌil yul txꞌotxꞌ. Chi ilcha yu junoj winaj, catuꞌ chi smujon can junelxa bꞌey cꞌaltaꞌ ey tuꞌ. Yin cꞌal tzalacꞌulal chi too xoncan el masanil stzettaj yetal naj, catuꞌ jix smanon el jun txꞌotxꞌ bꞌey mujan jun bꞌeomal tuꞌ.

Skꞌaneal Jun Chꞌen, Perla Sbꞌi

45Jaꞌ yet eyoc ebꞌ ánima yalan Yaawil Naj a satcan, laan jaxca junoj txonwom, chi ecꞌ seyon wan chꞌen tol caw ey stool, perla sbꞌi. 46Jaꞌ yet chi ilcha junoj caw watxꞌ, chi xoncan el masanil stzettaj yetal, catuꞌ chi smanon el jun perla tuꞌ.

Skꞌaneal Jun Txim Mitxꞌbꞌal Pescado

47Oj waltej junxa skꞌaneal tiꞌ ey jex an, yu tzet utbꞌil oj yun yeloc ebꞌ yalan Yaawil Naj a satcan. Kꞌinaloj ey junoj txim mitxꞌbꞌal pescado chi ale eytoj xol jaꞌ. Tool cꞌal yiꞌon atej masanil tujanil noꞌ pescado. 48Jaꞌ yet chi no txꞌan xin, chi yiꞌon atej txꞌan ebꞌ mitxꞌom pescado tuꞌ stiꞌ jaꞌ, catuꞌ chi ey chotan ebꞌ yiꞌon el noꞌ watxꞌ chi scꞌubꞌantoj ebꞌ yul xuc. Catuꞌ chi skꞌojon can el noꞌ pena ebꞌ tuꞌ. 49Queyton tuꞌ oj yun yeloc ebꞌ ánima yet oj lawoj jun yul yibꞌankꞌinal tiꞌ. Oj tit ebꞌ ángel yu yiꞌon el ebꞌ pena tuꞌ xol ebꞌ watxꞌ. 50Catuꞌ oj skꞌojon cantoj ebꞌ pena ebꞌ tuꞌ yul jun lugar jaxca jorna bꞌey xol kꞌakꞌ. Jaꞌ tituꞌ oj okꞌ ebꞌ, oj natxꞌatxꞌoj yee ebꞌ yu syaꞌil, ẍi Jesucristo tet ebꞌ.

Yopiso Ebꞌ Scuywom Jesús

51Jix lawi tuꞌ xin, catuꞌ jix skꞌanlen Jesús tet ebꞌ scuywom jaxca tiꞌ:

—¿Chim naꞌcha el masanil wan tiꞌ je yu? ẍi naj tet ebꞌ.

—Jaꞌton Mamin, chi naꞌcha el ku jon, ẍi ebꞌ tet Jesús. 52Jaex tiꞌ, cuybꞌil jex xa yin tzet chi yun yeloc ebꞌ ánima yet eyoc Yaaw a satcan Yaawiloj ebꞌ. Yuxan chi skeꞌ je yakꞌon cuyle wan acꞌ cꞌal wan icham cuybꞌanile. Jaxca chi yun junoj naj yaaw na, chi skeꞌ yiꞌon el wan tzetyetal acꞌ cꞌal wan icham bꞌey yul scꞌuanbꞌal, ẍi Jesús tet ebꞌ.

Yet Eyecꞌ Jesús Bꞌey Nazaret

(Marcos 6:1-6; Lucas 4:16-30)

53Jaꞌ yet jix lawi yalontej wan cuybꞌanile tiꞌ Jesús, chi yal yin wan txꞌoxbꞌanile kꞌaneal, catuꞌ jix too Naj. 54Jix apni Naj bꞌey sconobꞌ, jaꞌton Nazaret. Jix octoj yul snail sculto ebꞌ Israel, jix cꞌoli scuywa snan xol ebꞌ yul na tuꞌ, catuꞌ jix yalon ebꞌ jaxca tiꞌ:

—¿Bꞌeytuꞌ jix scuyoc sjelanil jun winaj tiꞌ? ¿Tzet la chi yun skeꞌon yunen wan milagro tiꞌ yu? 55Jaꞌ jun Naj tiꞌ, jaꞌton scꞌaal naj josom teꞌ tiꞌ. Jaꞌ ix xutx Naj, jaꞌton ix María. Kotaj pax ebꞌ yuẍtaj Naj, naj Jacobo, José, Simón yetoj Judas. 56Yetoj pax ebꞌ yanabꞌ naj, eecꞌ ebꞌ cu xol tiꞌ. Yuxan, ¿bꞌey mi jix tzꞌaj bꞌet yiꞌ sjelanil Naj tiꞌ? ẍi ebꞌ. 57Yuxan, tucꞌal jix somcha a scꞌul ebꞌ yin Naj, yuxan jix yal tet ebꞌ jaxca tiꞌ:

—Ey cꞌaltaꞌ yeloc apnoj ebꞌ ẍejabꞌ Dios yul sat masanil ánima. Asan yul sat ebꞌ yet conobꞌ ebꞌ, cꞌal yul sat ebꞌ junne sna yetoj ebꞌ, cꞌam ton yeloc apnoj ebꞌ, ẍi Jesús. 58Jayebꞌne milagro jix el yunen Jesús bꞌey sconobꞌ tuꞌ, yutol ma yaoc scꞌul ebꞌ yin Naj.

നിലവിൽ തിരഞ്ഞെടുത്തിരിക്കുന്നു:

Mateo 13: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക