Yohana 3
3
Yesu nende Nikodemu
1Kalio omusacha khu Avafarisayo, elicha lilie mbo Nikodemu, omuchuki wa Avayahudi. 2Oyo kacha khu Yesu esiro ne kamuwolera, “Rabi, khumanyire khuchi oli omwekesi okhuchula khu Nyasaye; sikira awumao yesiyesi onyala okhukhola evimanyiro vino, nichasi Nyasaye ave naye ta.” 3Yesu Kamuchipa, “Ng'aling'ali ekhuwolera, nichasi omunju kewulwe nundi, sianyala okhuwona owami wa Nyasaye ta.” 4Nikodemu kamucheva, “Omunju anyala achie okhwiwulwa nakofuye? Anyala kengira nundi munda mwang'ina ne nundi kewulwe?” 5Yesu Kachipa, “Ng'aling'ali, ekhuwolera, nichasi mulala kewulwe namachi nende Roho, sianyala kengira muwami wa Nyasaye ta. 6Esio esiwulwa nenyama, nyama niyo, ne nasio esiwulwa nende Roho, roho. 7Ocha wuka mbo ekhuwoleye, ‘Okhwola wiwulwe nundi ta.’ 8Embewo yiwuchanga eyiyenya, ne owulira embucha yayo, nausa sumanyanga eyiyichula namwe ewuyichia ta, ne njelukali nende siamulala owiwuywe nende Roho.” 9Nikodemu kamucheva, “Kano kali kachie?” 10Yesu kamuchipa, “Oli omwekesi wa Israeli, ne sumanyire kano tawe? 11Ng'aling'ali ekhuwolera, khulomalomanga khuvikhumanyire, ne khuana owuloli khuvikhuwene, ne simufukirira owuloli wefwe tawe. 12Niva evawoleye evinju viokhusialo ne simusuviye tawe, munyala mwasuvira muchie nivawolera eviomwikulu? 13Awumawo owanina mwikulu nichasi oyo owekha okhuchula mwikulu, Omwana womunju. 14Ne ngalu Musa kakinga enjukha musichimi, nje nga Omwana womunju okhwola akingulwe, 15kho oyo yesi omusuvira kole okhunyola owulamu wa wuli lwosi.”
16Mana Nyasaye kasima esialo kho kaana Omwana wuwe omuterwa, mbo oyo yesiyesi omusuvira achasikha tawe nausa anyole owulamu wa wuli lwosi. 17Sikira Nyasaye kachuma Omwana wuwe musialo, sikacha okhukhalakira esialo ta, nichasi mbo esialo okhuvichira muniye siwoniwe. 18“Yesiyesi osuvira muniye siakhalakirwa tawe, naye oyo ochasuvira akhalakiywe khale, sikira siasuviye mulicha lia Omwana wa Nyasaye yeng'ene tawe. 19Ne sino njesikhalako, mbo owulafu wakhacha musialo, navanju vasima esirima okhuvicha owulafu esikira evikholwa viawe vivi. 20Oyo yesiyesi okhola amavi, aviyira owulafu, ne sianyala kacha muwulafu ta, namwe evikholwa vive vianikhwe. 21Naye oyokhola eviang'ali kachanga muwulafu kho kawonekha wusa mbo evikholwa vivie vikholeywe mu Nyasaye.”
Yesu ni Yohana Omuvatisi
22Kano nikakhawa, Yesu navalondi vave vachia musialo sia Yudea; eyo kamenyakho navo navatisa. 23Yohana kali anavatisanga Ainoni aambi nende Salemu, sikira amachi kali mangi awenao; navanju vacha ne vavatiswa. 24Sikira vali vasiri okhutira Yohana.
25Mana okhuyingana khwanja akachi wavalondi va Yohana nende Avayahudi khumakhuwa kokhusava. 26Ne vacha khu Yohana vamuwolera, “Rabi, oyo oyu wali naye engerekha wa Yordani, oyu wachusira owuloli, ngwono ano, anavatisanga, navanju vosi vanachianga khuniye.” 27Yohana kavachipa, “Awumawo onyala okhunyola siosisiosi nichasi esikaewa okhuchula mwikulu. 28Enywe mwavene munjusira owuloli mbo nawola nji, sinise Kristo tawe, nausa nachumwa emberi wuwe. 29Oyo oli nende omukhana wesiserero, njomusoliri wesiserero, oyo owema ne kamuwulira, asangalanga muno okhuwulira omwoyo kwomwene siserero, khanu owusangafu wange wichuye. 30Okhwola ametekhe nange enditiye.”
Oyo Ochula Mwikulu
31Oyo ochula mwikulu akhira viosi; oyo ochula musialo wesialo, ne alomaloma eviesialo; Oyo ochula mwikulu akhira viosi. 32Achusa owuloli khuvikawona nokhuwulira, nichasi awumao mulala ofukirira owuloli wuwe. 33Oyo ofukirira owuloli wuwe, afukirisa mbo Nyasaye wang'ali. 34Oyo oyu Nyasaye achumire awolanga amakhuwa ka Nyasaye, sikira Nyasaye amuwanga Roho wuwe owuma esikero. 35Papa kasima Omwana, ne kacha evinju viosi mumukhono kukwe. 36Oyo osuvira mu Omwana ali nowulamu wa wuli lwosi, oyo ocharia Omwana sialiwona owulamu ta, nausa echima lia Nyasaye liri khuniye.
നിലവിൽ തിരഞ്ഞെടുത്തിരിക്കുന്നു:
Yohana 3: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
