Evikholwa 9
9
Okhukalusanisiwa khwa Saulo
(Evikh. 22.6-16; 26.12-18)
1Evise evio Saulo kali asifucha owululu nachikhirisia okhwicha avalondi va Omwami. Kachia khumukuhani mukhongo 2kasava ebarua chiokhwemanyisia mumasinagogi ka Damasko, mbo nanyolakho yesiyesi olonda engira ya Omwami, ave musacha namwe mukhasi, avatire mana avaleche Yerusalemu. 3Nga kali naliambi okhwola Damasko olueni okhuchula mwikulu lwamwetukha aakali. 4Kakwa aasi mana kawulira omwoyo nikumuwolera, “Saulo, Saulo, sikira sina niwunyasa?” 5Ne Saulo kacheva, “Niwe anu Omwami?” Omwoyo kwamuchipa, “Nise Yesu, oyu onanyasanga. 6Yinyokha ochie mwitookho, vali khukhuwolera esienyekha okhole.” 7Avanju vali nivakenda naye vatang'ala, olu vawulira omwoyo ne sivawona olomaloma ta. 8Saulo kenyokha okhuchula aakali nakwiye, olu kamoka, sikanyala okhuwona esinju ta, vamutira omukhono vamuyira okhwola Damasko. 9Khulwenyinga chitachu kali muofu ne sikanyala okhulia nokhunywa ta.
10Khwali nomulondi mulala Damasko eyo owalangwa Anania. Nyasaye kamuwolera mumalola, “Anania.” Naye kawola achi, “Endiwo Omwami.” 11Omwami kamuwolera, “Yinyokha ochie khumuanda okulangwa mbo Omukololofu, olu wola munju ya Yuda ochevemo omunju ochula Tarso olangwa mbo Saulo, khulwesayino anasalanga, 12mana awene omunju mbo Anania nikacha okhumuchakho omukhono mbo ave nawona nundi.” 13Anania kamuchipa, “Omwami, nakhawulira avanju avangi nivalomaloma khumunju ono, kakhakholera owuvi owungi khuvasuvirwa vavo mu Yerusalemu; 14Mana ali nowunyali okhuchula khu avakuhani vakhongo mbo atire avanju vosi avalanga khulicha lilio.” 15Omwami kamuwolera, “Ewe chia wusa, sikira namuchoola mbo mutumikhire okhwirwacha elicha liange khu Avachali Avayahudi, nende khuvami, nende khu Avaisraeli vosi, 16kho samwene njia okhumwekesa eminyakho ekiachia okhuvichiramo khulwelicha liange.” 17Anania kachia nolu kengira munju eyo, kamuchakho omukhono nokhumuwolera, “Mwana wefwe Saulo, Omwami Yesu okhuwonekheye khumuanda okuwachiyekho kanjumire khwiwe mbo ove nuwona nundi mana wichusiwe Roho Muchwenufu.” 18Evise vienevyo, esinju nga amakakambu siakwa okhuchula khumoni chia Saulo ne kanja okhuwona. Kenyokha kavatiswa, 19mana kalia esiokhulia kanyola amaani.
Kachianakana okhwikhala Damasko navalondi vomwami khunyinga chiolanire.
Saulo Kerwacha Damasko
20Nasiri musinagogi keyama Yesu, nende kafukirira mbo, “Yesu nje Omwana wa Nyasaye.” 21Vosi avawulira vesindukha nivawola, “Ono sinje owechirenge avanju venamira Yesu mu Yerusalemu? Mana nundi kachire ano khulwa esifune esio, mbo atire avanju avo avayire khu avakuhani vakhongo.” 22Nausa Saulo kachianakana okhunyola amaani, mana kachengusa Avayahudi vamenyanga Damasko okhulondana nga kavacheranga awulafu mbo ng'ali Yesu nje Kristo.
23Enyinga ni chiakhavichao enyingi, Avayahudi vakhova okhwicha Saulo, 24nausa Saulo kamala kamanya amaparo kawe. Vekhalanga khusiriwa esiro nesiteche nivamucheka mbo vamwiche, 25nausa esiro silala avalondi vave vamukisa musimwero mana vamuvisiria khwita.
Saulo mu Yerusalemu
26Olu kachia Yerusalemu, katema okhuambana navalondi va Yesu, nichasi vosi vava nowuchi, esikira sivasuvira mbo ng'ali yesi kali mulondi ta. 27Baranaba kamuwukula kamuyira emberi wavachumwa, kavawolera nga Saulo kali nawene Omwami khumuanda nalomalomire naye, nundi nga kali nikerwachire Damasko nawuma owuchi mulicha lia Yesu. 28Kho vaambana vakenda naye mu Yerusalemu, 29niverwacha nowukhumi mulicha lia Omwami. Kalomalomanga nayingania Avayahudi valomalomanga Olugiriki, mana vanja okhutakha okhumwicha. 30Olu avasiefwe vawona vachio, vamuyira Kaisarea okhumusiwula achie Tarso.
31Kho ekanisa liali nomulembe musialo siosi esia Yudea nende Galilaya nende Samaria mana lianja okhweyombakha. Liakenda mukhuria Omwami nokhwimirirwa nende Roho Muchwenufu mana liavalaa.
Petero nali Luda nende Yopa
32Khanu nga Petero kakendanga wuli awunju, kamala kolera avasuvirwa vamenyanga Luda. 33Kanyolayo omunju oyu valanga Ainea, kali kamenya khusitanda emiaka munane nikafwokoya. 34Petero kamuwolera, “Ainea, Yesu Kristo akhuwonia, yinyokha olombe esitanda sisio.” Kenyokha awene nawene. 35Avanju vosi avamenyanga Luda nende Sharoni vamuwona, mana vakoolera Omwami.
36Omulondi wundi kali Yopa oyu valanga vachi Tabitha, (Mulugiriki vachi Dorika, esifune sialio nje Ekhisi). Kakholanga amalayi musialo nokhuyeta avamanani. 37Munyingechio owulwaye wamutira mana kafwa. Voka omuviri kukwe mana vamwalisa musikoro siamukulu. 38Okhuvera mbo Luda siyali aleyi nende Yopa tawe, olu avalondi vawulira vachi Petero ali Luda, vachuma avanju vaviri vachie vamwesaye, “Nusima yichakho eno lwangulwangu.” 39Petero kenyokheramo kachia navo. Olu vola vamuyira musikoro siamukulu. Namulekhwa vosi vema mumbeka nivalira, nende okhwekesa enguo echi Dorika kalomba olu kali navo. 40Petero kavachusa vosi erwanyi mana kasikama kasala. Kho kakalukhana okhulengera omuviri kawola, “Tabitha, yinyokha.” Kamoka, nolu kawona Petero kenyokha kekhala. 41Petero kamutira omukhono kamwinyosa, Kalanga avasuvirwa nende ava namulekhwa mana kamuana nali mulamu. 42Liamanyikhana mu Yopa mwosi mana avanju avangi vasuvira Omwami. 43Petero kekhala Yopa enyinga enyingi nende Simoni, omulombi wevinju viamasero.
നിലവിൽ തിരഞ്ഞെടുത്തിരിക്കുന്നു:
Evikholwa 9: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
