Evikholwa 8
8
1Saulo naye kawona achi Stefano kolanire okhufwa.
Saulo Anyasa Ekanisa
Olutalo olwo, ekanisa mu Yerusalemu lianja okhuvichira khuvinyasio evikali, vosi vasalanikha mungongo chia Yudea nende Samaria, okhuchusakho avachumwa. 2Avasuviri vasikha Stefano, mana vamukholera amasika amakali. 3Saulo naye kali anatemanga okhusisia ekanisa, kengiranga muwuli enju nakhuulula erwanyi avasacha navakhasi nokhuvayira musiwoo.
Injili Yirwachwa Musamaria
4Khanu avo avali nivasalanikhire vachia wuli awunju niverwacha ekhuwa. 5Filipo kachia mwitookho lia Samaria, mana kerwacha Kristo khuvanju veweneyo. 6Evituma muwulala vachekeresa aka Filipo kavawolera, olu vamuwulira nokhuwona evimanyiro evi kakhola. 7Evisieno viachula muvangi ava viali niviengiramo, nivikhupa enguuku, navangi avali nivafwokoya navaleme vasosa. 8Owusangafu owungi wava mwitookho omwo.
9Khwali nomusacha mulala oyu valanga Simoni owali omulosi mwitookho omwo mana kali awukisie avanju va Samaria, nikelaa achi munju omukhongo. 10Vosi vamuwulira, avatiti navakhongo, nivawola, “Omunju ono njamaani ka Nyasaye akalangwa amakali.” 11Mana vamuchekeresa, sikira khulwa oluono kali kakhavawukia nende owulosi wuwe. 12Nausa olu vasuvira Filipo nga kerwacha amakhuwa malayi okhulondana nende Owami wa Nyasaye nelicha lia Yesu Kristo, vavatiswa, vosi avasacha navakhasi.
13Ata Simoni mwene kasuvira, nolu kavatiswa kachianakana nende Filipo. Nolu kawona evimanyiro nende amangayimwa amakhongo nikakholekha, kesindukha.
14Khanu olu Avachumwa mu Yerusalemu vawulira mbo Samaria yali yinyoye ekhuwa lia Nyasaye, vavachumira Petero nende Yohana, 15avacha vavasavira mbo vave nivanyola Roho Muchwenufu, 16sikira mbo sikalikhoo ata mulala khunivo owali namunyoye tawe, nausa vali vavatisiswe wusa mulicha lia Omwami Yesu. 17Kho vavachakho amakhono kawe mana vanyola Roho Muchwenufu. 18Khanu olu Simoni kawona mbo Roho aanwa okhuvichira khuvachumwa okhucha khuvanju amakhono, kavawa esende, 19nawola, “mbekho sesi amaani kano, mbo wulimunju oyunjakho amakhono anyole Roho Muchwenufu.” 20Petero kamuwolera, “Efesa chichio chisikhe nawe, sikira ewe opara ochi onyala okhukula esianwa sia Nyasaye nachio! 21Sulikho nende siosisiosi mumakhuwa kano tawe, sikira omwoyo kukwo sikwolanire emberi wa Nyasaye ta. 22Khanu yekanira embi chichio chino, mana osave Omwami mbo, nikanyalikha, akhuvere amaparo komwoyo kukwo. 23Esikira mbona mbo oli neuva ekali mana oli musiwoo siembi.” 24Simoni kachipa, “Salirekho khu Omwami, mbo kosikosi akowoye kachanyola ta.”
25Khanu olu vali nivakhachusa owuloli nende okhulomaloma ekhuwa lia Omwami, vakoola Yerusalemu, niverwacha Injili muvikwenyi evingi evia Avasamaria.
Filipo nende Omulate wa Ethiopia
26Engelosi ya Omwami yawolera Filipo, “Yinyokha ochie oluveka lwa Emulambo khumuanda kwikha okhuchula Yerusalemu nikuchia Gaza.” Kuno muanda kwesiangalamwe. 27Kenyokha kachia. Ne, kawukanana nende Omwithopia mulala, omulate, omukhalavani wimiriranga evikhiro lia Kandake, omwami wesikhaye owa Ethopia, kali kachire Yerusalemu okhwinamira Nyasaye. 28Khanu kali akoola ewuwe, nikekhaye mwikorokocho lilie, kali asoma esitau sia Nabii Isaya. 29Roho kawolera Filipo, “Suta aambi nende ekorokocho elio.” 30Filipo kasuta aambi, mana kamuwulira nasoma esitau sia nabii Isaya, kamucheva, “Onamanyirisanga akosoma?” 31Kamuchipa, “Manyirisa njie, okhuchusakho omunju kanjekese?” Kalanga Filipo anine mwikorokocho kekhale naye. 32Khanu luno njoluvaso olu kali nasoma:
“Nga ekondi nilichia musisinjiro
namwe omuwolerefu ngememe nivaliveka owoya,
sikawolakho liosi ta.
33Mukhuambisiwa esoni khukhwe owang'ali siwalondwa ta.
Njanu onyala okhulomaloma khulwiwulo lulwe?
Esikira mbo owulamu wuwe wuchusiswe musialo.”
34Omulate kawolera Filipo, “Njanu oyu nabii alomalomakho, khumwene namwe khumunju wundi?” 35Filipo kamuwolera, nikanja noluvaso luno mana kamuwolera amakhuwa malayi aka Yesu. 36Olu vachianakana khumuanda vola awunju aali namachi, omulate kawola, “Wona, amachi ngakano! Nje sina esinyala siangayira okhuvatiswa?” [37Filipo kamuwolera, “Nusuvira nomwoyo kukwo kwosi onyala okhuvatiswa.” Kachipa, “Suvira mbo Yesu Kristo nje Omwana wa Nyasaye.”] 38Kawolera avatimia ekorokocho vemese, vachia vombi mumachi, Filipo nende omulate oyo, kamuvatisa. 39Olu vachula mumachi, Roho wa Omwami kachusao Filipo, omulate oyo sikamuwonakho nundi ta, mana kachianakana nolukendo lulwe nasangaye. 40Nausa Filipo kanyolekha Azoto, kavicha wuli awunju nikerwacha Injili mumatookho kosi okhwola nga kola Kaisarea.
നിലവിൽ തിരഞ്ഞെടുത്തിരിക്കുന്നു:
Evikholwa 8: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
