Uluk 23
23
1Bendi bemen ana puu be bo kinaa te le Ujeso le hwaa le Upalet. 2Be le wu ha, be keb akọng-ale fe Ujeso le, “Li gyo ungikye angwun u hwọ bendi biwọm abi bi yi kpa-kpa ye. U da bendi le be tem tye ukpanda ke Usu ukandi angwu he Urom ye. U de le ufe u yi usu angwu be ko le Ukristi a.”
3Upalet a ha kung bii he le, “Wo yi usu Ijuus a?”
Ujeso a fan he le, “Kitaa ashina na wo kọng.”
4Upalet a kung de bekandi bishang Unim le liwu bendi abena le, a nde kibibi ashi ungikye angwun a shi, he u de le be gwu-e ye.
5Be fel kọng gbe-gyọng le, “Biwọm abi u hwọ bendi na bi be le linaa. A kpi kimen ashin le he Ugalili a mbee Ujudia ana. Kanaa-anaa i a fel ha abel nyin.”
6Upalet a ma gyo ashina gyo-gyo, a kung bii le ungikye angwun u yi undi Ugalili a? 7Be bọng. A ha ngye le Ujeso u ba le ha kigie kimen ashi Uherọd u yi usu ana a. Upalet a de le be te le Ujeso le hwaa le Uherọd angwu a ma yi he Ujeruselem ha kunyọng kumen ana titi.
8Uherọd a nde Ujeso, a fel le igọ kaang likọye a gyo gbe le he. Ki gbe kigbe na a keb u kee le hang a nde-e likọye u yi le lishi andọ-ale le he u nde kikwole-kuhwo ashi Ujeso u shi. 9Uherọd a ma bii Ujeso bibibi gbam, ukpọ Ujeso a ma fan he likpe ken ọ ye. 10Bekandi bishang Unim le bitisha Iten be die te he kushu le naa maa ushe kaang fe Ujeso. 11Uherọd le ishogya ima be nyan Ujeso, be shi-e a fel ilaa-ilaa. Be kung aliga angi a ngbeb kunung kaang shi-e. Uherọd a ha tem le he sọm le hwaa le Upalet. 12Ha he liti limen ana na Uherọd befe le Upalet be ma fel bedim bende. Ki shi le be ma yi bendi-linaa bende a kpam le he item.
13Upalet a ma ko bekandi bishang Unim le abe he kubọng le bendi abe be teng be he kiteng ken. 14A de be le, “Ma be le ungikye angwun hwaa le mi le u hwọ bendi biwọm abi bi yi kpa-kpa a ye. Mi shun likọng lima he ashi amen puu, mi nde le a zi libi he biwọm abi ma de le a shi ana ye. 15Uherọd ọ a nde le a zi libi ye, fe na a tem le he sọm hwaa le bel. Ma ngye le ungikye angwun a shi kiwọm ashi ki yi le be gwu-e ye. 16Mi da undi u kpam he, mi tyang he abwo he u gye.” [17He kunyọng kuyang-ayang ahwu be shi kipam agbele-gyọng Upalet u shaa tyang undi igaadye ken abwo angwu bendi Ijuus be waa le u tyang he.]
18Liwu bendi anyin li keb aga-ale utung-utung le, “Gwu-e, waa Ubarabas hwan tyang abwo.” 19Be ma fe Ubarabas he igaadye he kuhwo linaa le undi angwu be ma gwu nya he kubọng.
20Upalet a kee le u tyang Ujeso a abwo. A ha mbee kọng ha abe kitaa ken. 21Ukpọ be mbee gaa de-e le, “Maa gwu-e bee he kikpakpa.”
22Upalet a mbee bii abe kugbe ahwu lekie le, “Kibang kibibi ashi a shi? Mi nde kibibi ashi ashinyọng mi gwu-e ye. Mi da undi le u kpam he, mi tyang he abwo he u gye.”
23Be gye kushu mbee lingbam libel puu gaa kaang le be maa Ujeso bee he kikpakpa. Be gaa nya-nya-nya kigegaa kibel ki kpo hwo Usu. 24Upalet a tang ushe Ujeso na be kee. 25Undi angwu be waa, a tyang he abwo. Undi umen i na be ma fe-e he igaadye he kuhwo linaa le undi angwu be ma gwu ha. A kung Ujeso ufe ke be le be shi-e ashi be kee.
Be maa Ujeso bee he kikpakpa
(Mat 27:32-44; Mak 15:21-32; Jọn 19:17-27)
26Be kpe Ujeso gbe le he. Be le kpee le ungikye angwu be ko le Usaimọn. A ma yi undi kubọng Usairen a. A maa ba le he libeb, u nda ashi gya he usha-ale. Be kwu-e kung kikpakpa so-e le u so pwọm Ujeso. 27Bendi be ma tye kwuo pwọm he. Bengingye abe be ma yi ha liwu limen ana be maa kya, be mbwee kaang he kuhwo kuma. 28Ujeso a bel ashi nde be. A de be le, “Bengingye abe le he Ujeruselem, ma ki-m mi a ye. Ma ki kuhwo-men le bebwaa-men hwan, 29likọye kunyọng ku ba le ha ahwu bendi be fel be de le, ‘Bengye-ukwọm le abe be wa hwan ngye ye, be ke bebwaa abi ye le, kukwun ku yi ke men.’ 30Kunyọng kumen ana na
“ ‘Bendi be fel be de ikwel le, “ma mbu shi li.”
Be de bigugo le, “ma ndyel li.” ’#23:30 Uhosia 10:8
31Gbe bendi be shi biwọm abin nyọng ukwan u yi ukwun, ki nya ba kwa na a nyọng u ngwọm?”
32Be ma be le bendi befee abe be bia Iten le be gwu utung ha Ujeso. 33Be ma be fel he kiteng ashi be ko le kiteng kikpukpo lishi, be ha kung Ujeso maa bee he kikpakpa. Be kung bendi abe be bia Iten befee ana, maa angwu ken bee he kikpakpa le he ahe kubwo lizen, be maa angwel le he ahe limbel. 34Ujeso a de le, “Atyagi, tyang ke be, be ngye ashi be shi ye a.” Ishogya i kung inditen ima hwọ ke bende gbe he ububo-ububo atyele.
35Bendi be ma naa nde na bekandi Ijuus be nyan Ujeso le, “A kpan bendi, gbe u yi Ukristi, Undi-likpan angwu Unim a waa sọm a, u kpan kuhwo-ma.”
36Ishogya ọ i ma nyan he. I die le kimia kutyo ke-e. 37I de-e le gbe u yi Usu Ijuus a, u kpan kuhwo-ma.
38Be ma fee fe-e ha kusi kikpakpa le, “Angwun na u yi Usu Ijuus.”
39Undi angwu ken angwu be maa bee utung he ahe a keb u fel kọng bia he le, “Wo tem yi Ukristi a ye a? Kpan kuhwo-gang, wo kpan li bel ọ titi.”
40Angwel a ben he le, “Wo shel Unim ọ ye a? Gbe li kpe kingie a ken a. 41Bel ufe, kityan ki yi del-del likọye li kpa kingie he kiwọm ashi li shi a. Ukpọ ufe a shi kiwọm ki ban ye.”
42A de Ujeso le, “Ukandi, wel mi he kunyọng ahwu wo ngwee he kiteng kusu kigang.”
43Ujeso a de-e le, “Kigyang-kigyang, mi ka-a ukyeb le kunyin wo kwa utung ha ami he Uparadais.”
Lihwu Ujeso
(Mat 27:45-56; Mak 15:33-41; Jọn 19:28-30)
44He libwee kudyan lishi, kifufeb ki ma kpam nim libwee, gye kpen he kubọng kumen ana kpam le kwọm he inde-ikie le ishu likwu-lukwu. 45Nya ana libwee li ma gye kifufeb, kihwọm kikandi ashi be ma tye tang kipo he Ushọm Unim ki ma gie bigie bifee. 46Ujeso a kung kaang kọng le, “Atyagi, mi kung kunyọng kugi fa-a ha abwo.”#23:46 Agyam 31:5 A kung hwo.
47Ukandi ishogya a nde ashi ki shi. A pee Unim, u de le ungikye umen i u yi undi ununung a kigyang. 48He kunyọng ahwu bendi abe be sho ha be nde inde, be nde ashi ki shi, be so abwo he lishi tem gye he usha-ale. 49Bendi gbam abe be ma ngye Ujeso le bengingye abe be ma fe utung he ahe le he Ugalili be ma naa kigbe-kigbe, be nda biwọm bimen i.
Angyele Ujeso
(Mat 27:57-61; Mak 15:42-47; Jọn 19:38-42)
50Ki ma yi le ungikye ken angwu be ko le Ujosef. A ma yi he liwu bikem ukoto. A ma yi undi ununung, u shi kpa-kpa. 51U shi lishi Ijuus angi be ko le Alimatia. Ma na a ma yi he liwu bendi abe be ma tim lihwu Ujeso ọ, a ma bọng azu agyang ye. A ma ndọ lishi kiteng kusu Unim. 52He kunyọng ahwu Ujeso a hwo, Ujosef a le hwaa le Upalet tim he anung le u kung likwọm Ujeso ke-e. Upalet a bọng. 53Ujosef a le shul likwọm Ujeso le ha kikpakpa, kung kihwọm kifung ashi ki ngbeb kunung, nii Ujeso te le he le ngi he likwun angi be ma tem he kukọ. Be ma wa ngi undi ha he likwun limen ana ngye ye. 54Liti limen ana na be kam nyọng liti-uwel Ijuus angi li ma ndu kpi.
55Bengingye abe be ma be utung ha Ujeso le he Ugalili, be ma pwọm Ujosef le nde likwun, be mbee nde kitaa be ngi-e. 56Be ha tem gye he ushu le shi behwu abe be nung nyin he be le gbaa he. He liti-uwel Ijuus be sho kunyọng nya ana Iten ibel i kọng.
നിലവിൽ തിരഞ്ഞെടുത്തിരിക്കുന്നു:
Uluk 23: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
