Uluk 22
22
Ujudas a bọng le u ndyeb Ujeso za
(Mat 26:1-5; Mak 14:1-2; Jọn 11:45-53)
1Kunyọng kuma fel kpee-kpee le be shi kipam ashi be zi ibred angi i mbwee ye, ashi be ko le kipam agbele-gyọng. 2Bekandi bishang Unim le bitisha Iten be maa shel bendi-utung bema. He ashina be maa kee kukwo ahwu be kwu Ujeso gwu he kundyel.
3Usu bibibi a ma kpe kung lityam Ujudas angwu be mbee ko le Iskariyọt, angwu a ma yi he liwu bendi-utung Ujeso bendi lihwo le be befee. 4Ujudas a le hwaa le bekandi bishang Unim le bekandi bendi abe be kang Ushọm Unim, he u kọng ha abe gbe le kitaa u be ndyeb Ujeso zi ha abe. 5Be ma fel le igọ, be ke-e ukyeb le be ba ka he unde. 6Ujudas a bọng, u fel kee kukwo ahwu u kwu Ujeso ke be he bendi be ngye gbe le shi ye.
Lizi umbee-likel
(Mat 26:17-25; Mak 14:12-21; Jọn 13:21-30)
7Ha he kunyọng ahwu be ma zi ibred angi i mbwee ye ana, liti li ha fel angi be gwu inwaa itia kipam agbele-gyọng. 8Ujeso a sọm Ipita le Ujọn gye he igye. A de be le, “Ma le kam li kipam agbele-gyọng he li zi.”
9Be bii he le, “He kung wo kee le li le kwu shi kipam agbele-gyọng?”
10A de be le, “Ma gyo, nya ana ma gye he lifung-ushu, ma la kpee le ungikye ken angwu a so kiki umbwo. Ma pwọm he gye he usha-ale angwu u gye. 11Ma le de ugyang usha-ale le ukandi a bii le ushọm angwu kung nyin ufe le bendi-utung bema be be kwu shi kipam agbele-gyọng? 12Nyin u tyung amen kipo ashi ki dyam he ushọm kusi ashi be kam biwọm ndọ ha. Ma le shi lizi ndọ ha.”
13Be bo le nde biwọm puu nya ana Ujeso a de be. Be shi lizi angi be zi he kipam agbele-gyọng.
14Kunyọng ku fel ha, Ujeso a bel kwu ko utung ha bebwaa-kisọm bema abe lihwo le be befee he be zi lizi. 15A de be le, “Mi yi le kigyọ kaang le mi za kipam agbele-gyọng utung ha amen ma ukpọng mi ha kpe kingie. 16Mi da amen le, mi tem ba sha kipam ashin ye kpam atan-lengi kipam kimen i a fe sho he kiteng kusu Unim.”
17Ujeso a ha kung ugba-ala kwu he kubwo pee Unim. A de le, “Ma kpe ngwo teng ke bende. 18Mi da amen le kung le ha kunyin, mi tem ngwa udung agbe ukwan uvine angwun ye kpam kiteng kusu Unim ki gbe be.”
19A kung ibred kwu he abwo, mbee pee Unim. A kung ibred bun ibun-ibun ke be. U de be le, “Ashin na ki yi agwo agi angi mi bun ke he kuhwo kumen. Ma gye kushu shi ashi mi shi i he men ma wel gbe le mi.”
20Be zi lizi puu, a kung ugba-ala kutyo ke be kitaa ken. U de be le, “Ugba-ala angwun u yi azu afufe he anung agi angi mi wu ke men a. 21Ma gyo! Undi angwu a ndyeb mi zi u yi nyin he itebul utung ha ami. 22Mi Unwaa undi-gye, mi hwa na Unim a kọng a. Ukpọ ki ba kwa kibibi ka undi angwu a ndyeb mi zi.” 23Be keb bende abi-ale le ayang he liwu libel u nya be shi kimen i?
24Bendi-utung Ujeso be ha keb be kin undi angwu u be kwu ukandi hwo puu he liwu libel. 25Ujeso a de be le, “Besu bendi abe be yi Ijuus a ye be tyung ikeb ha bendi bebel, be ko kuhwobel le bedim bendi bemen ana. 26Ukpọ men ma yi kitaa ana a ye. Men ufe, undi angwu u yi ukandi hwo puu u kwu na unwa-ani na. Undi angwu u yi atie-lishi umen u kwu na ubọyi. 27Undi angwu u yi kwu ko u zi lizi befe le undi angwu u kung lizi ke-e, angwu kung a dyam hwo? Undi angwu a kwu ko-a. Ukpọ mi yi utung ha amen na undi angwu u kung lizi ke na. 28Ma ngyọ kwu utung ha ami he kunyọng ahwu mi kpe bingie. 29Nya ana Atyagi a ke-m ikeb le mi nde gbe le kiteng kusu, na mi ọ titi mi ke men kitaa ikeb imen ana. 30Men ma ba za bizizi, ma ngwo bingwu-ngwo utung ha ami he kiteng kusu kigi. Ma be kwu he bidem kusu maa ashi Izwel angi lihwo le ngi afee ushe.”
31Ujeso a kung ko Ipita angwu be mbee ko le Usaimọn, u de-e le, “usu bibibi a kpe ikeb le he u gil amen puu na undi-utia u puu iwit. 32Ukpọ mi kọng ha Unim ka-a wo Usaimọn, le wo tyang abọng-ale ye. He kunyọng ahwu wo tem be hwaa le mi, wo fe bebwaa-naa ingie.”
33Ipita a kung de-e le, “Ada, mi kam le mi gya igaadye ọ, mi hwo ọ utung ha awo.”
34Ujeso a de-e le, “Ipita, mi da-a le kunyin wo swan kugbe kakie le wo ngye-m ye ma ukpọng kigia ukwuo ki ha ko.”
Ujeso a kọng gbe le ibam unde le ibam lizi le usukwagya
35Ujeso a kung bii abe nya puu le, “He kunyọng ahwu mi ma sọm amen gye he igye faale ibam unde, le ibam lizi, le ikwob abee, kiwọm ki ma baa amen ha a?”
Be fan he le, “Kiwọm ken ọ ki ma baa li ye.”
36Ujeso a de be le, “Kanaa-anaa i ufe angwu u yi le ibam unde ọ, ibam lizi ọ, u kung abi. Undi angwu u yi le usukwagya ye u waa aliga ama ndyeb zi he u ndyeb usukwagya. 37Ma ngye dang le ashi be ma fee he kushia Unim le-iti le, ‘Be bo he fe he liwu bendi-biban,’#22:37 Azaya 53:12 ki ba sha fa-m. Kiwọm ashi be ma fee gbe le mi ki ndu sha.”
38Bendi-utung bema be de-e le, “Ada, nde isukwagya i yi ifee.”
A de be le, “Angina i kpe.”
Ujeso a kọng ha Unim he ukwel angwu be ko le Olif
(Mat 26:36-46; Mak 14:32-42)
39Ujeso a kung bo gye he ukwel angwu be ko le Olif nya ana u sha shi. Bendi-utung bema be gbe utung he ahe. 40A le wu ha, a de be le, “Ma kọng ha Unim he men ma mbu he ugil-ale ye.” 41A gbe tyang abe le likwob na hang undi u maa kukọ ku le mbu. A bel tim anung he itang keb akọng-ale ha Unim. 42A de le, “Atyagi, gbe ki yi he ugim ugang a, kung kingie ashin le ha ami. Ki shi na mi kee a ye, ukpọ ki shi na wo kee a.” [ 43Udengel Unim abe le he lifung-atabe be hwaa le he, u fe-e ingie. 44Ujeso a maa fel kọng ha Unim kaang likọye a ma yi le kutọ he lityam kaang. Kushi ahwu ku maa nung le he ahe kuhwo wu he itang ku ma yi na anung.]
45A bo kinaa le he kipi u kọng ha Unim le hwaa le bendi-utung bema. A nde be be mbu kunde, be ma yi le kimbwee kaang. 46A bii abe le: “Ma mbwa kunde a? Ma bo kinaa kọng ha Unim he men ma mbu he ugil-ale ye.”
Be kwu Ujeso
(Mat 26:47-56; Mak 14:43-50; Jọn 18:3-11)
47Nya ana Ujeso a maa so-i kọng ashin, bendi gbam be be. Ujudas angwu a ma yi he liwu bendi-utung bema abe lihwo le be befee a ma teng abe. A be gbe le hwaa le Ujeso he u gaa he le uko. 48Ujeso a bii he le, “Ujudas, wo gaa mi tyung kitaa le wo ndyeb imi Unwaa undi-gye zi a?”
49Bendi-utung bema abe be teng be nde ashi ki la shi, be bii Ujeso le, “Ada, li kpi undi isukwagya ityan a?” 50Undi-utung Ujeso ken a kung usukwagya kpi shia ubọyi ken kutyung ahwu lizen. Ubọyi umen ana a maa sha Usu bekandi bishang Unim aki.
51Ujeso a de le, “Taa!” A kung kubwo tyọ ungikye angwuna ha he kibaa kutyung, u mbee he.
52Ujeso a kọng ha bekandi bishang Unim le bekandi bendi abe be kang Ushọm Unim le bekandi kubọng abe be be he be be kwu-e. A de le, “Mi yi uzi a, ma be le ma kwa-m le isukwagya le ikwan he abwo a? 53Mi maa kwa utung ha amen he Ushọm Unim mbee ati, ukpọ ma ma kwu-m ye. Kunyọng ahwun ku fel kumen a, nyọng ahwu Usu bibibi, usu kifufeb, u tyung ikeb ima.”
Ipita a swan Ujeso
(Mat 26:57-58, 69-75; Mak 14:53-54, 66-72; Jọn 18:12-18, 25-27)
54Bendi abena be kwu Ujeso gye le he he ushọm Usu bekandi bishang Unim. Ipita a maa fel tan pwọm he le ha item kigbe-kigbe. 55Be ma hwee kinde he kudyan usha-ale. Ipita a le kwu u gwee kinde ha utung ha bendi. 56Unwa-asul angwu u shi aki ha a nde Ipita kwu gwaa ha kinde. A naa nde-e kpọ, kung kọng le, “Ungikye angwun ọ titi a ma yi utung ha Ujeso.”
57Ipita a de le, “Unwa-asul, mi ngye-e ọ ye.”
58He kanwaa kunyọng zang ungikye ususo a nde-e, a de le, “Wo ọ titi wo yi he liwu bendi-utung bema.”
Ipita a de le, “Dia. Mi a ye.”
59Awa ken a gbe, ungikye ususo a kwel fe-e le, “Ki yi kigyang a le ungikye angwun a ma yi utung ha Ujeso a, likọye ufe ọ titi u ba le he Ugalili a.”
60Ipita a de le, “Mi ha ngye angwu wo kọng ana ọ ye.” Nya ana a maa so-i kọng ashin, kigia ukwuo ki ko. 61Ujeso a bel ashi nde Ipita kpọ. Ipita a wel igie angi Atyam a de-e le nyin u swan kugbe kakie le a ngye-e ye ma ukpọng kigia ukwuo ki ha ko. 62Ipita a gbe le ha le kii kaang.
Bendi abe be kang be nyan Ujeso
(Mat 26:67-68; Mak 14:65)
63Bengikye abe be maa kang Ujeso be nyan he, be kpam he, 64be kung kihwọm bwọ he he ashi, be tim he bishwia. Be de-e le u tye ugie shob undi angwu a kpam he. 65Be kọng biwọm gbam bia he.
Be te le Ujeso le hwaa le Upalet le Uherod
(Mat 26:59-66; Mak 14:55-64; Jọn 18:19-24)
66Ashi a taa, bekandi kubọng le abe be shang Unim le bitisha Iten be le kpee ukem. Be te le Ujeso le hwaa le be. 67Be kung bii le, “Wo yi Ukristi a? Fan li.”
A fan abe le, “mi de men ọ, ma bọng ye. 68Gbe mi bii amen kibibi ọ, ma fan mi ashi ye. 69Ukpọ kung le he kunyọng kumen i gye kushu, mi Unwaa undi-gye, mi kwa he kubwo lizen Unim angwu u yi le ikeb puu.”
70Befe be bii he le, “Ashin ki ze le wo yi Unwaa Unim a?”
A fan abe le, “Ma kọng ha del-del.”
71Be de le, “Li tem kee ushada ye. Bel-agyang li gyo ashi ki be le he ahe ungwu.”
നിലവിൽ തിരഞ്ഞെടുത്തിരിക്കുന്നു:
Uluk 22: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
