Ujọn 8
8
1[Ukpọ Ujeso a gye he ukwel angwu be ko le Olif.
2Ashi a taa nya le-iti-le-iti, a tem gye he Ushọm Unim, bendi be gbọng sho fe-e kel-kel, abel kwu ko, u fel hwọ abe biwọm. 3Bitisha Iten, le abe Iferesis, be ma be le ungye-libee angwu be kwu-e he kiban agbele ipel, be kpe-e le naa abe he kushu. 4Be ma kung de Ujeso le, “Itisha, li kwu ungingye angwun he kiban agbele ipel ha ungikye angwu u yi ukye-ma a ye. 5He kushia Iten, Umosis a fee ha le, gbe undi a shi kitete kiwọm ashin, li maa akọ gwu-e. Kibang ki yi ugim ugang he likọng anyin?” 6Be kọng ashin kee kukwo ahwu be kwu-e, gbe a kọng pwel a.
Ujeso a keb, u fel fee udyọng-bwo he itang. 7Be gye kushu bii he bibibi kpam a bo kinaa, u de be le, “He liwu limen, undi angwu u yi faale kiban, ufe ukpi-kikwu kung kukọ maa he.” 8A mbee keb, u fee udyọng-bwo he itang.
9Nyọng be gyo igie angina, be gbe le ha he kuken-kuken kpi le ha bekandi. Ujeso ufe-ufe na a ma teng naa ha le angwu ungingye naa he le he kushu. 10Ujeso a bo kinaa, kung bii he le, “Ungingye, abe be i la gwa-a ana be yi kung a? Ki yi le undi angwu a tem maa ushe le be gwa-a ye a?”
11A fan Ujeso le, “Ukandi, ki yi le undi ye.”
“Ujeso a kung de-e le, mi ọ mi gwa-a ye. Ndu gye, tem shi kiban ye.”]
Agyo-ale de bende he kuhwo ipọng Ujeso
12Ujeso a mbee kọng ha bendi le, “Mi na mi yi kikung-gboo ke igye anyin. Undi uyang-yang angwu a pwọm mi, u tan he kifufeb ye, u kwa le kikung-gboo ashi ki ke bendi likpan.”
13Bendi Iferesis be de-e le, “Wo naa kuhwo-gang ushada, ushada ugang u yi kigyang a ye.”
14Ujeso a fan abe le, “Mi naa ushada gba le kuhwo-gi, ushada ugi u shi kigyang likọye mi ngye he kipi mi be, mi mbee ngye he kipi mi tem gye. Men ma ngye he kipi mi be ọ, nyọng ma ngye he kipi mi gye ọ ye. 15Men bendi igye anyin, ma maa undi ushe he ugim undi-gye a, mi ufe mi be mi maa undi ushe a ye. 16Ma mi maa undi ushe ọ, ugi u kwa kigyang, likọye mi yi ututeb ye. Bel le Atyagi angwu a sọm mi be he igye anyin na li maa. 17Men ma nde he kushia Iten imen, be fee ha le, gbe bendi befee be naa ushada he kiwọm ken, ha kiwọm ashi ha ki yi kigyang a. 18Ma nde, mi naa kuhwo-gi ushada, Atyagi angwu a sọm mi ọ u naa ushada ugi le mi kọng kigyang.”
19Be bii he le, “Atia ugyang u yi kung a?”
Ujeso a fan le, “Ma ngye-m ye, ma ngye Atyagi ọ ye. Ki i yi le ma ngye-m, ha ma ngye Atyagi ọ titi.” 20Ujeso a ma kọng igie angina nyọng a maa hwọ bendi biwọm he Ushọm Unim, u shi kwu gwaa he kipi be fe unde. Undi a ma kwu-e ye, likọye kunyọng kuma ku ma wa fel ye.
Agyo-ale de bende he kuhwo undi angwu Ujeso u yi
21Ujeso a de be le, “Mi ndu gya, ma ba shun mi kaa. Nyọng ma hwo, biban bimen bi ba kel amen he abwo. Ma ba kwa le ikeb le ma gya he kipi mi gye ye.”
22Ashin na ki shi Ijuus i bii he le, “U ba gwa kuhwo-ma a? Ashina na ki shi-e u kọng le ‘He kipi mi gye, ma ba ba ha mbee ye a?’ ”
23Ujeso a fan abe le, “Men ma yi ke igye anyin a, ukpọ mi yi ke igye anyin a ye. Ushu umen u yi igye anyin a, ukpọ ushu ugi u yi igye anyin a ye, u yi he lifung-atabe a. 24Mi be de men le ma ba hwa he biban bimen. Gbe ma bọng le mi yi undi-likpan a ye, ma hwa he biban bimen kigyang na fọng.”
25Be bii Ujeso le, “Ayang u yi a wo?”
A de be le, “Mi yi undi angwu kung le he ukpi-kikwu mi de men le mi yi a. 26Men ma zi libi he biwọm gbam abi hang mi nya de le ma nim. Ukpọ mi mbee bwan da amen le Atyagi angwu a sọm mi u yi kigyang. Mi da igye biwọm abi a tyung mi a.”
27Ki ma nung abe le u kọng ha abe gba le Unim Atyam a ye. 28He ashina Ujeso a kung de be le, “Nyọng ma be kung imi Unwaa undi-gye ndọ he kusi, na ma ha be ngye le mi yi undi angwu mi de men le mi yi a, ma mbee ngye le mi sha kiwọm he ikeb igi a ye, mi kọng ashi Atyagi a tyung mi a. 29Angwu a sọm mi u yi utung ha ami, u tyang mi ututeb ye, likọye mbee kunyọng puu mi sha ashi ki nyin he.” 30Bendi gbam abe be gyo igie angi Ujeso a kọng ana, be bọng he ahe.
Agyo-ale de bende gbe le angwu u yi atyam bendi-linaa Ujeso
31Ujeso a ha kung kọng ha Ijuus angi i bọng he ahe le, “Gbe ma gye kushu ke igie igi ife, ha ma yi bendi-utung begi a kigyang. 32Ma ba ngya kigyang, ma kigyang ki ba sha amen ma kwa pọ.”
33Bendi besuso be fan he le, “Bel li yi igia Ebraham a, li ma be yi ifee undi uyang-yang ọ ngye ye. Ki shi na a, wo be de le li ba fel pọ?”
34Ujeso a kung de be le, “Ma ngye dang le undi uyang-yang angwu u shi kiban u yi ufee kiban a. 35Ufee u kwa he ushu atyam ngyọ igye ye; unwaa na u kwu he ushu atyam ngyọ igye. 36Gbe mi Unwaa Unim, mi fem amen le he lifee, ma fel pọ na a fọng. 37Mi ngye le ma yi igia Ebraham a. Ma na ọ, ma kee kukwo ahwu ma gwu-m, likọye ma bọng igie igi ye. 38Mi da amen ashi mi nde le he kipi Atyagi a, ukpọ men ma sha abi umen atyamen a de men a.”
39Be de-e le, “Bel ufe, Ebraham na u yi atya-tyan.” Ujeso a fan abe le, “Ma kwu igia Ebraham a kigyang, hang ma sha na Ebraham a ma shi. 40Ukpọ ma fel kam le ma gwa-m, mi undi angwu mi de men kigyang ashi mi gyo le ha Unim. Ebraham a ma shi kitete kiwọm ashina ye. 41Ma sha likpe bya atyamen a.”
Be de-e le, “Atya-tyan u yi ken a, Unim ufe-ufe a. Be hwan li he akpla a ye.”
42Ujeso a fan abe le, “Ki be kwu kigyang a le Unim na u yi atyamen, hang ki nyin amen le mi, likọye mi be le ha ufe a be nyin. Mi be he ikeb igi igyang a ye, ufe na a sọm mi. 43Ki shi na a, abi mi kọng bi nung amen ye? Atan-lengi uma u yi le igie igi i kee ha amen ye. 44Usu bibibi, na u yi atyamen. Biwọm abi bi nyin atyamen le ma shi na bi nyin amen ọ titi. U yi undi-kihwu a kung le ha ukpi-kikwu. U kọng kigyang ye, likọye kigyang ki kee he ahe ye gbang-gbang. Nyọng u be uman, u sha ashi ki yi likpe lima a, likọye u yi undi-uman a, u shi usu uman a. 45Gbe mi ufe, mi de men kigyang gbe le biwọm Unim, kife na ki tan le shi ma bọng ha ami ye. 46Ki nya yi le undi he liwu limen angwu u nya tyung kiban ashi mi shi a? Ki yi le undi ye. Gbe mi de men kigyang a, ki shi na a, ma bọng ha ami ye? 47Undi angwu u yi Unwaa Unim a, u dang kutyung gyo igie ima. Atan-lengi angwu men ma dang kutyung gyo angi ye u yi le ma yi bebwaa Unim a ye.”
Ashi Ujeso a de le ufe u yi
48Bekandi Ijuus be bii Ujeso le, “Bel li de le wo yi undi Usameria a, ikeb ibibi i ngwee a, i bel a lishi. Li ba uman a?”
49Ujeso a fan abe le “Ikeb ibibi i yi ha ami ye. Atyagi angwu mi fe-e na u yi ha ami, ukpọ men ma fa-m ye. 50Mi na mi kee le bendi be fem mi ye. Atyagi na u kee le bendi be fe-m mi, ufe na u be tang ushe biwọm puu. 51Mi da amen kigyang, undi uyang-yang angwu u shi igie igi u tem hwa ye ngyọ igye kpam.”
52Be kung de-e le, “Igie igang i shi li li ngye dang le ikeb ibibi i ngwee a, i bel a lishi. Ebraham ugyang ọ a hwo, bitye-ugie kisọm Unim ọ be hwo. Fe, ki shi na a, wo de le undi angwu a shi igie igang u tem hwa ye? 53Atietyan Ebraham a hwo. Wo dyam hwo-e? Bitye-ugie kisọm Unim be hwo. Wo kung kuhwo-gang le wo yi ayang a?”
54Ujeso a fan abe le, “Ki kwu le migyang na mi lem kuhwo-gi, hang ilem igi i yi kididing. Ukpọ Atyagi na u lem mi, ufe umen na men ma de le u yi Unim umen. 55Ma na ma de le ufe u yi Unim umen ọ, ma ngye-e ye. Mi na mi ngye-e. Gbe mi de le mi ngye-e ye, ha mi fel undi-uman nya ana men a. Ukpọ mi da amen le mi ngye-e, mi ke igie ima ife. 56Atiemen Ebraham a ma yi le igọ, nyọng ama gim gbe le andele liti ligi. A ma nde ngi, u yal gọ kaang.”
57Be kung fan he le, “Wo a? Wo angwu wo wa wu aze asi afee le ngi lihwo ọ ye, wo de le wo nde Ebraham!”
58Ujeso a kung de be le, “Kigyang-kigyang mi de men le, ma ukpọng be ha hwan Ebraham, mi yi.” 59Nyọng a kọng ashin, be bung akọ he be maa gwu-e, ukpọ be tem nde-e ye. Ujeso a ma nyia gbe le ha he Ushọm Unim.
നിലവിൽ തിരഞ്ഞെടുത്തിരിക്കുന്നു:
Ujọn 8: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
