Ujọn 7
7
Ujeso a gye kipam bebuu
1Nyọng ashin ki mbee, Ujeso a ma gye mbee bipi he Ugalili. A ma kee le u gya he kigie Ujudia ye, likọye bekandi Ijuus be maa kee kukwo ahwu be gwu-e. 2Kunyọng ahwu Ijuus i shi kipam kibel ashi be ko le kipam bebuu ku ma fel kpee-kpee. 3He ashin, bebwaa-nam Ujeso be de-e le, “Gbe le he Ugalili gye he Ujudia he bendi-utung bema abe ha be nde bikwole-kuhwo abi wo shi. 4Undi angwu a kee le be ngye-e, u ndyel kuhwo-ma ye. Gbe wo shi bikwole-kuhwo abin, shi abi he kugboo he igye i ngya a.” 5Bebwaa-nam be-gyang ọ be bọng he ahe ye.
6Ujeso a fan bebwaa-nam le, “Kunyọng ahwu Unim a ndọ le mi shi na ku wa fel ye. Ukpọ men ufe, kunyọng kuyang-ayang ku ngbeb amen. 7Bendi abe igye anyin be tel amen a ye, be tel imi a, likọye mi da abe le biwọm abi be shi bi yi bibibi. 8Men ma ndu te ha he kipam, mi ufe mi waa ta ye, likọye kunyọng ahwu mi te ha ku wa fel ye.” 9A ma kọng kitaa ana ngyọ kwu he Ugalili.
10Nyọng bebwaa-nde be gbe puu gye ha kipam, ufe ọ a ha bo. Ukpọ a te ha gboo a ye, a nyia-nyia te. 11Bekandi Ijuus be maa shun he ha he kipam, be bii le, “A be ye a?”
12Bendi gbam be maa kem Ujeso ha he liwu. Besuso be da le, “U yi undi ununung a.” Besuso be de le, “Dia! U mbeb bendi ki go.” 13Ki yi le undi angwu a maa kọng gbe le he gboo ye, likọye be shel bekandi Ijuus.
Ujeso a ke uhwọ-ale he kipam
14Nyọng be shi kipam fel he bedye-bedye, Ujeso a bo gbe he Ushọm Unim, u fel hwọ bendi biwọm ha. 15Ki kwu bekandi Ijuus he kuhwo kaang, be kung bii le, “Ki shi na a, a ngye kiwọm kitel i, gbe a gye kushia ye?”
16Ujeso a fan abe le, “Biwọm abi mi hwọ bi ba le he lingye ligi a ye, Unim angwu a sọm mi na u tyung mi abi. 17Undi uyang-yang angwu a waa kung le u sha nyin Unim kigyang-kigyang a, u ngya le ha abi mi hwọ bi ba le he ugim ugi ugyang ọ, ha bi ba le ha Unim ọ. 18Gbe undi u kọng kiwọm he ikeb ima igyang, ashina ki ze le a kee ipee bendi a. Ukpọ gbe undi a kee le bendi be pee angwu a sọm he a, ashina ki ze le u kọng kigyang a, u ba uman ye.” 19“Nde le Umosis na a ma ke men Iten? Ma na ọ, he liwu limen, ki yi le undi ken ọ angwu a ndọ angi puu ye. Fe kibang a, ma kee kukwo ahwu ma gwu-m?”
20Bendi be kung fan he le, “Ikeb ibibi i ngwee a! Baa ayang be kee le be gwa-a?”
21Ujeso a de be le, “Ki kwu amen puu he kuhwo likọye mi shi kikwole-kuhwo he liti-uwel. 22Ma nde aten-ale, Umosis na a ma ke men uten le ma ten bebwaa-men bengikye. (Umosis na a ma kpi-kikwu de bendi le be ten ye, betie-tyan na be ma kpi-kikwu le liten.) He kuhwo uten umen i, ma ten bebwaa-men he liti-uwel. 23Gbe men ma ten bebwaa-men he liti-uwel he men ma ban Iten Umosis ye, ki shi na a, ma mbu linaa ha ami le gbe mi mbee undi he liti-uwel? 24Ma maa bendi ushe na ma nde be a ye, ma maa ushe he kigyang hwan.”
Atang-ale he abwo he kuhwo undi angwu Ujeso u yi
25He libwo anyin, bendi besuso le he Ujeruselem be keb be fel bii le, “Ungikye angwun na be kaa le be gwa ye a? 26Ma nde-e, a naa u kọng nya gboo, ki yi le undi angwu u fan he ọ ye. Pisoye ki nung bekandi betyan le u yi Ukristi, Undi-likpan angwu Unim a sọm be he igye anyin a kigyang. 27Li ngye le nyọng Ukristi umen i u be be, undi u ngya he kipi a be ye, ukpọ ungikye angwun ufe, li ngye he kipi u be.”
28Nyọng Ujeso a maa hwọ bendi he Ushọm Unim, a gaa kọng kaang le, “Men ma de le ma ngye-m, ma mbee de le ma ngye he kipi mi be a? Nde le ma ngye le mi be he ikeb igi igyang a ye? Mi be he ikeb angwu u yi kigyang, ukpọ men ma ngye-e ye. 29Mi ngye-e likọye mi be le ha ufe a, ufe na a sọm mi be he igye anyin ọ.”
30He ashina be kaa le be kwa he, ukpọ ki yi le undi angwu a tyọ he kubwo ye likọye kunyọng kuma ku ma wa fel ma ye. 31Bendi gbam be bọng he ahe. Be de le, “Kigyang-kigyang u yi Ukristi, Undi-likpan umen angwu Unim a sọm a. Ki nya sha na a, undi ususo u mbee shi bikwole-kuhwo hwo abi u shi i?”
32Bendi Iferesis be gyo kitaa bendi be kem Ujeso. Be le tim ha bekandi bishang Unim sọm bendi abe be kang Ushọm Unim le be le kwu Ujeso.
33Nya he kunyọng kumen ana Ujeso a de le, “Mi mbee kwa ipel ha amen he kanwaa kunyọng zang, mi tem le hwaa le Atyagi angwu a sọm mi. 34Men ma ba shun mi shun-shun kaa likọye mi ba kwa he kipi men ma wu ha mbee ye a.”
35Bekandi Ijuus be ma kọng ha bende le, “Ukyeb ungikye angwun u kọng le u gya kung a, bel li wu ha mbee ye? U ba gya he kubọng Igrik he kipi bendi betyan be yi a, he u le hwọ bendi Igrik a? 36Nyọng a de le li ba shun he kaa, li mbee wu he kipi u yi mbee ye, u kọng kibang a i kọng?”
37Ki ma fel he umbee-likel liti kipam, liti limen ana li ma dyam kindee-kindee. Nya he liti limen ana, Ujeso a bo naa kinaa kung kọng fem he igye gboo le, “Undi uyang-yang angwu umbwo u gyo he, u be hwaa le mi, mi ke-e umbwo he u ngwo. 38Ki yi nya ana be ma fee he kushia Unim le-iti le undi uyang-yang angwu a bọng ha ami, umbwo angwu u ke likpan u ba ko u go kaang le he ahe lityam.” 39Ashi Ujeso a ma kọng ana a maa kọng gba le Ukatia Kunyọng angwu Unim u be sọm ke abe be bọng ha ufe Ujeso a. Nya he kunyọng kumen ana Unim a ma wa ke bendi Ukatia Kunyọng uma ma ye, likọye Ujeso a ma wa ngwee he ifem ima ye.
40Nyọng be gyo igie angina, bendi besuso ha he liwu be de le, “Kigyang-kigyang a, ungikye angwun u yi utye-ugie kisọm Unim angwu li kwu li nyọng a.”
41Bendi besuso be de le, “Eng, ungikye angwun u yi Ukristi, Undi-likpan angwu Unim a sọm a.” Besuso be de le, “Kpaa ye! Ukristi u ha ndu ba le he Ugalili a ye. 42Be fee he kushia Unim le Ukristi u ba kwa igia Usu Udebid a, u ba ba le he Ubetelehem he kipi le-iti Usu Udebid a ma yi.” 43Kitaa ana na bendi be tang he abwo fel akwu-akwu he kuhwo Ujeso. 44Bendi besuso be ma kee le be kwa he, ukpọ undi ken ọ a ma tyọ he kubwo ye.
Bekandi Ijuus be yi faale abọng-ale
45Bendi abe be kang Ushọm Unim abe be ma sọm be tem be hwaa le bekandi bishang Unim le bendi Iferesis. Bekandi ana be ha kung bii abe le, “Ki shi na a, ma be le he ye?”
46Be de bekandi ana le, “Gbe ukọng-ukọng li wa gyo undi a kọng kiwọm na ungikye angwun ye.”
47Bendi Iferesis be de le, “Men aben ọ, a mbee mbeb amen a? 48Ki nya yi le undi ken ọ le he liwu bekandi Ijuus, mbee le ha bendi Iferesis angwu a bọng he ahe a? 49Dia, ukpọ kugam bendi abe be ngye Iten Umosis ye, atye a yi ke be.”
50Unikodemus angwu le-iti a ma gye le hwaa le Ujeso a ma yi he liwu bendi Iferesis limen i. Ufe a kung de bema le, 51“Nya ana Iten ityan i yi, li tang ushe undi faale afa-ale li gyo he igie ye. Li gyo he, saa li ha ngya ashi a shi.”
52Be de le, “Ha ndo wo ọ wo yi kubọng Ugalili a? Shun he kushia Unim lilili, wo nda le be fee kiwọm ha le utye-ugie kisọm Unim u ba le he Ugalili a ye.”
53Bendi puu be gbe ligye.
നിലവിൽ തിരഞ്ഞെടുത്തിരിക്കുന്നു:
Ujọn 7: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
