Aki 5
5
Ananayas le Usafira
1Ungikye ususo angwu be maa ko le Ananayas angwu be maa ko ungye-ma le Usafira, ufe ọ titi a ma ndyeb itang ima zi. 2A waa unde ndọ kuhwo-ma, u te le kigem te le ndọ bebwaa-kisọm Ujeso he bihwọm abee. Ungye-ma a ma ngye gbe le shi.
3Ipita a bii he le, “Ananayas, ki shi na a, wo tyang Usu bibibi a sho he lityam ligang, a sha wo be uman de Ukatia Kunyọng, ki shi le wo waa kigem unde ndọ he item? 4Ma ukpọng wo ha ndyeb itang imen ana zi, i ma yi igang a. Nyọng wo ndyeb angi zi nyin ọ, unde angi u yi ugang a. Ki shi na a, wo gim le hang wo shi kitaa i? Wo be uman de bendi a ye, wo be de Unim a.”
5Nyọng Ananayas a gyo igie anyin gyo-gyo, a mbu he itang hwo. Bendi puu abe be gyo ashi ki shi be fel le kushel kaang. 6Ishọmate isuso i be nii kihwọm fe likwọm lima, ha kung angi gbe le ngi le ngi.
7Ki maa ndu mbee awa akie, ungye-ma a be. A ngye ashi ki shi ha ye. 8Ipita a kung bii he le, “Unde angwu wo le ukye-gang ma ndyeb itang zi puu i nyin a?”
A bọng le ufe a.
9Ipita a kung de-e le, “Ki shi na a, nyọng wo le ukye-gang ma gim le hang ma lam Ukatia Kunyọng Ada? Gyo! Abee bendi abe be ngi ukye-gang a fel he ungwu-lishi. Be ndu kung a awo ọ la gya.”
10Ha kukwo-kukwo a mbu he itang hwo he kushu Ipita. Ishọmate imen ana i be nde-e a hwo, i kung he le ngi gwaa ha ukye-ma. 11Liwu bendi abọng-ale abe be ma yi ha puu le abe be teng abe be gyo igyo ọ be ma fel le kushel kaang.
Bebwaa-kisọm Ujeso be mbee bendi gbam
12Bebwaa-kisọm Ujeso be maa sha bikwole-kuhwo le bitaa abi bi tyung ikeb Unim he ashi bendi. He kunyọng kumen ana bendi abọng-ale be ma kpee he Ushọm Unim he kipi ashi be ko le kigigyo Usolomọn. 13Undi ken ọ u ma die kpee abe ye, ma na be ma nde shob abe ọ. 14Bengikye le bengingye gbam abe be bọng ha Ada Ujeso be ma fel he liwu libel. 15Kiwọm ashi bebwaa-kisọm Ujeso be shi, ki shi bendi be fel ba le bendi-angbam ba kie he igaa he kukwo, le gbe Ipita a be gbe, kushun kuma kufe-kufe ọ ku mbee abe. 16Bendi gbam le he abọng angi gwaa le Ujeruselem, be ma be le bendi-angbam le abe ikeb ibibi i teb le be, a ma mbee abe puu.
Bebwaa-kisọm Ujeso be kpe kingie
17Usu bekandi bishang Unim le Isadusis angi i yi utung he ahe be fel bung ashi ha bebwaa-kisọm Ujeso. Be shi ugim ashi be shi abe. 18Be kwu bebwaa-kisọm le fe he igaadye. 19Nya kusu kumen ana, udengel Ada a be buu ashi igaadye. A kung bebwaa-kisọm Ujeso gye le be he igye. 20A de be le, “Ma gye le naa he Ushọm Unim de bendi gbe le likpan lifufe anyin.”
21Nyọng ashi a ma taa, be gbe gye he Ushọm Unim le hwọ bendi biwọm.
Usu bekandi bishang Unim le bendi-utung bema be ko bikem ukoto he Izwel puu liwu. Be kung bigam-ashi sọm gye ha he igaadye le be le be le Ipita befe le Ujọn. 22He kunyọng ahwu bigam-ashi bi nde bebwaa-kisọm Ujeso ha he igaadye ye, be tem le de bekandi le, 23“Li nde igaadye igyang le ashi ngib-ngib. Bendi puu abe be kang ungwu-likọng be shi ha. Ukpọ li buu lishi, li nde undi ha afee ye.” 24He kunyọng ahwu ukandi bendi abe be kang Ushọm Unim le bekandi bishang Unim be gyo ashin, be fel tyang na bebwaa-kisọm Ujeso be shi.
25Ungikye ususo a ha be de be le, bendi abe be fe he igaadye be yi naa he Ushọm Unim, be hwọ bendi. 26Ukandi umen ana a bo le bendi bema le kwu bebwaa-kisọm Ujeso be le be. Be kwu abe he ikeb a ye, likọye be shel le ha bendi be kpe bebwaa-kisọm Ujeso kutyọng maa akọ gwu abe ọ.
27Be de be le be be naa ha he ashi bikem ukoto. Usu bekandi bishang Unim a bii abe bibibi. 28A ha de be le, “Li ma be tye men uteten le ma tem hwọ bendi he lizen ungikye angwun ye. Ma nde ashi ma shi a? Ma tan le he hwọ bendi Ujeruselem puu. Ma kee le ma kung uben lihwu lima swa li bel a?”
29Ipita le bebwaa-kisọm Ujeso abe be teng be kọng le, “Ki yi kpe-kpe le li fe Unim a, li fe bendi a ye. 30Unim betie-tyan na a wum Ujeso angwu men ma ma maa gwu bee he kikpakpa. 31Unim a kpe-e gye he kusi le fem he he ahe kubwo lizen le u kwu Ukandi, u mbee kwu Undi-likpan, he u ke bendi Izwel libwo le be shi beshi le he biban bibel, bel atyam abel le he abi Unim u tyang ke be. 32Bel le Ukatia Kunyọng angwu Unim u ke bendi abe be ke-e ife li yi ushada biwọm abin.”
33He kunyọng ahwu bikem ukoto bi gyo ashin, ki ban abe, be tim le be gwu abe. 34Ki ma yi le undi ken ha he liwu libel angwu be maa ko le Ugamaliyel. Ufe ọ a ma yi he likwu Iferesis. A ma yi undi angwu u hwọ bendi Iten a. Bendi puu be maa ka he ife. A bo kinaa de le, be gye le bebwaa-kisọm Ujeso he igye, be kwu ha kunyọng zang. 35A ha de liwu bikem ukoto le, “Men bendi Izwel, ma baa he kiwọm ashi ma la shi bendi aben. 36Le-iti ungikye angwu be ko le Utyudas a ma be pwọm ungwu le ufe u yi undi ukandi a. Bendi abe be mbee asi lisi be maa fel tan utung he ahe. Bendi besuso be ma gwu-e. Bendi-utung bema puu be ma paa wu mbee bipi. Undi a ma tem gyo gbe le liwu limen ana ye. 37Ashin ki shi gbe, Ujudas angwu a maa be le he Ugalili a mbee fem he kunyọng ahwu be bo bendi. Bendi gbam be maa fel tan utung ha ufe ọ. Bendi besuso be ma gwu-e ufe ọ. Bendi-utung bema puu be paa wu mbee bipi. 38Kanaa-anaa i mi da amen le ma shi bendi aben kiwọm ye. Gbe be shi biwọm abin he ikeb undi a, liwu libel li ba paa. 39Gbe be shi abi he ikeb Unim a, ma yi le ikeb le ma kwọm abe kukwo ye. Ha ma ndo ha Unim a.”
40Bikem ukoto bi bọng ashi Ugamaliyel a kọng, be ko bebwaa-kisọm Ujeso be he afee, be kpam abe. Be tye be uteten le be tem kọng kiwọm he lizen Ujeso ye. Be ha tyang abe abwo.
41Be gbe le ha he ukoto le igọ le Unim a gim le be kpe le bendi be bia abe he kuhwo Ujeso. 42He liti liyang-yang be maa gya kushu kwa he Ushọm Unim le ishaale bendi bun kisọm kinunung le Ujeso u yi Ukristi angwu Unim a waa le u kwu Undi-likpan. Be mbee hwọ abe.
നിലവിൽ തിരഞ്ഞെടുത്തിരിക്കുന്നു:
Aki 5: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
