Aki 22
22
1“Betyagi le bebuye, ma dang kutyung mi de men gbe le kuhwo-gi.”
2Be gyo he u kọng he igie Aramaik, be kwun atyung shang.
Upọl a gye kushu kọng le, 3“Mi yi undi Ijuus a. Be hwan mi he lishi Usilisia angi be ko le Utaasọs a. Nyin he Ujeruselem na mi ma kaa kpe. Ugamaliyel na a ma hwọ mi Iten betie-tyan kaang. Mi ma yi le kigyọ he ashele aki Unim nya ana men abe ma sho nyin a. 4Mi maa ka bendi abe be pwọm kukwo Ujeso Kristi kingie kpam be gbe hwo. Mi kwu bengikye ọ, bengingye ọ, fe igaadye. 5Usu bekandi bishang Unim le bekandi abe be teng be naa mi ushada le mi kọng kigyang a. Be ma ke-m ashia ọ le mi le ke betyan Ijuus he Udamaskọs. Mi kung bo ndo ha, he mi le kwu abe be pwọm kukwo Ujeso Kristi, mi fe be ashishi-likaa be le be he Ujeruselem be ke be kingie.
6“Nya ana mi ma tan be fel kpee-kpee ha Udamaskọs he libwee kudyan lishi, kikung-gboo le he lifung-atabe ki kung taa imbul-imbul fem kel-kel kpe lishi. 7Mi mbu tyang he itang, mi gyo igie i de-m le, ‘Usọl, Usọl, kibang a, wo teb le mi?’
8“ ‘Mi kung bii le, Ada, wo ayang a?’
“ ‘A kung de-m le, mi Ujeso angwu he Unazaret angwu wo teb le mi a.’ 9Bendi abe be ma yi utung ha ami be nde kikung-gboo kigyang, ukpọ be gyo igie undi angwu a ma kọng ha ami ye.
10“ ‘Mi kung bii le, Ada, mi shi na a?’
“ ‘Ada Ujeso a de-m le, bo kinaa gye he Udamaskọs. Ha na be be da-a biwọm puu abi Unim a kee le wo shi.’ 11Bendi-utung begi be kwu-m abwo gye le mi he Udamaskọs likọye kikungbo kimen a na ki ma hwọ mi ashi.
12“Ungikye ususo a ma yi ha angwu be ko le Ananayas. A ma yi undi angwu u fe Unim, u ndọ Iten ityan a. Ijuus puu he Udamaskọs i ma ka he ife. 13Abe naa gwaa ha ami, u de-m le, ‘Unwaa-ndagi Usọl, fel nde.’ Nya kukwo-kukwo mi fel nda. Mi bel ashi nde-e.
14“A de le, ‘Unim betie-tyan a waa kung a le wo ngye ugim uma, wo nde Unwaama ununung, wo gyo igie ima igyang angi u kọng. 15Wo ba naa he ushada gba he abun-ale de bendi puu biwọm abi wo nde le abi wo gyo. 16Wo mbee kwa nyọng kibang a? Bo kinaa he be wu-a umbwo, he biban bigang bi to taa gbe he ako-ale lizen lima.’
17“Nyọng mi tem gye he Ujeruselem, mi ma yi he Ushọm Unim mi maa kọng ha Unim, Unim a tyung mi le Ada Ujeso a be de-m le, 18‘Gbe le nyin he Ujeruselem akikye likọye bendi be ba bọng kpa ashi wo be bun de be gbe le mi ye.’
19“ ‘Mi kung fan le, Ada, bendi bemen i be ngye dang le mi maa gya he ishọm Unim angi Ijuus i kwu awu la kwa bendi abe be bọng ha awo, mi kpam abe, mi kwu abe fe igaadye. 20He kunyọng ahwu be ma gwu Ustiven angwu a ma bun gbe le wo, mi ọ mi ma yi ha. Mi ma bọng le bendi abe be gwu-e be shi ki ngbeb, mi kpe aliga abel kwu abe.’
21“Ada Unim a kung de-m le, ‘Ndu te, mi sọm a gya le kigbe hwaa le bendi abe be yi Ijuus a ye.’ ”
Upọl undi Urom
22Bendi abena be dang kutyung gyo Upọl kpam a gbe kọng ashin. Be keb aga-ale le, “Ma gwu-e, a kpe le u kwa uwum ye.”
23Nya ana be maa gaa, be waa bigbọ bibel, be teb kumbul-mbul. 24Ukandi umen angwu le he Urom ana a de ishogya ima le be gye le he he afee usha-ale ishogya, a de le be kpam he, u de be atan-lengi angwu Ijuus i gaa fe-e kitaa i. 25Be bwọ he indii le be ndu kpam he. Upọl a bii ukandi ishogya angwu u yi naa ha le, “Uten a bọng le wo kpam undi Urom angwu be wa maa he ushe le a shi kiwọm a ọ ye a?”
26Ukandi ishogya angwuna a gyo ashin, a le bii ukandi le, “Kibang wo la shi nyin? Ungikye angwuna u yi undi Urom a.”
27Ukandi a le bii Upọl le, “De-m, wo yi undi Urom a?”
Upọl a bọng.
28Ukandi umen ana a kung de le, “Mi ma ke unde a go kaang, mi ha fel undi Urom.”
Upọl a de-e le, “Undi Urom na a hwan imi.”
29Bendi abe be ma be le be bii Upọl bibibi be tem item. Ukandi angwu a gyo le Upọl u yi undi Urom a ana, a fel he kushel likọye a fe-e ashishi-likaa.
Upọl he kushu Isanhendrin
30Ukandi umen angwu le he Urom ana a ma kee le u ngya kiwọm kpa-kpa ashi Ijuus i de le Upọl a shi. Ashi a taa, a kọng, be waa Upọl ashishi-likaa, u de bekandi bishang Unim le bikem ukoto abi bi teng le be le kpee ukem. A kpe Upọl le naa abe he kushu.
നിലവിൽ തിരഞ്ഞെടുത്തിരിക്കുന്നു:
Aki 22: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
