Aki 21
21
Upọl a gye he Ujeruselem
1Nyọng li gbe ligye li ngwee kinọng lishọ gbe ligbe-ligbe gye he Ukos. Ashi a taa, li wu he Urodes. Li bo le ha gye he Upatara. 2Li ma nde kinọng ha a shi ki nde ashi gye he Ufonishia he kubọng Usiria. Li le ngwee ashi gbe. 3Li le wu he kipi li naa nde Usaiprus; li gbe he kigie Usaiprus ashi he lizen ndo he kubọng Usiria. Li le shul he Utaya he kipi be ma ndo le fem bigbọ le he afee kinọng. 4Li nde bendi abọng-ale besuso ha. Li ngyọ kwu ha abe ha zi ati adyọng-ifee. Be de Upọl gbe he ikeb Ukatia Kunyọng le u shi gye he Ujeruselem ye. 5Kunyọng kutyan ahwu le li kwu ha abe ha ku mbee, li gbe le ha gye kushu. Befe puu le bengye-bel le bebwaa-bel be teng li. Bel puu li tim anung he itang gwaa ha ungwu lishọ kọng ha Unim. 6Li ha de bende le ki fel mbee ati. Bel li le ngwee kinọng lishọ; befe be tem gye he ushu.
7Li bo le he Utaya he kinọng lishọ le wu he Uptolemais, li shul le kọng le bendi abọng-ale abe be yi ha; li kwu ha abe liti ken. 8Ashi a taa, li bo le ha gye he Usesaria. Li gye he ushu Ufilip angwu a maa bun kisọm kinunung mbee bipi le kwu he ahe ha. A ma yi he liwu bendi bedyọng-ifee abe be ma waa he Ujeruselem le be hwọ lizi ke bendi abọng-ale. 9A ma yi le bebwaa bengingye bende abe be ma yi he libee ye. Bebwaa-ma bemen ana be ma tya ugie kisọm Unim.
10Li kwu ha zi ati. Utye-ugie kisọm Unim angwu be ko le Agabus a be le he Ujudia. 11A be hwaa le bel. A kung ukwob Upọl bwọ kuhwo-ma abwo le abee, u de le, “Ukatia Kunyọng a de le, ‘Kitaa i na Ijuus i be bwọ undi angwu u yi le ukwob angwun he Ujeruselem, be kung he ke bendi abe be yi Ijuus a ye.’ ”
12Nyọng li ma gyo ashin, bel le bendi abe be teng li tim Upọl anung le u gye he Ujeruselem ye. 13A de li le, “Ma sha kibang a? Ma kya nyin le mi wee abwo a? Mi kam le be bwọ mi indii ife-ife a he Ujeruselem ye. Mi kam le be gwu-m le agwu-ale ọ he kuhwo Ada Ujeso.” 14Li kọng na ana a bọng ye. Li tyang he, li de le, “Ki shi nya a na Ada Unim a kee.”
15Li kwu ha gbe kanwaa kigbe, li ha kam biwọm bityan gbe ndo he Ujeruselem. 16Bendi abọng-ale besuso le he Usesaria be te utung ha abel. Be te le bel gye he usha-ale undi angwu be ko le Umnason angwu ki ma yi le li le kwu he ahe. Umnason umen i a ma ba le he Usaiprus a. A bọng ha Ujeso kung le ha ukpi-kikwu a.
Upọl a wu he Ujeruselem
17Li le wu he Ujeruselem. Bendi abọng-ale be kpe li le igọ. 18Ashi a taa, Upọl a gbe utung ha abel le u la nda Ujems. Bekandi bendi abọng-ale ọ be ma yi ha. 19Upọl a kọng le be, u de be biwọm puu abi Unim a shi ha bendi abe be yi Ijuus a ye gbe he aki angi a shi.
20Puu ubel be pee Unim he kunyọng ahwu be gyo he. Be de Upọl le, “Unwaa-ndatyan, wogyang wo nde na Ijuus gbam ọ i bọng ha Ujeso. Ki shi le kigyọ le be ndọ Iten Ijuus kaang. 21Be gyo le wo hwọ Ijuus mbee abọng bendi besuso puu mbee kunyọng le be tyang Iten Umosis, be tem ten bebwaa-bel ọ, ngwu be shi akpe angi befe Ijuus be shi ọ ye. 22Ki shi na ana be ba gyo le wo be, li ha sha na a? 23Shi kiwọm ashi li da-a le wo shi. Bendi be yi i nyin bende abe be shi ukyeb ke Unim. 24Te he wo le shi kuhwo-gang wo fel utaa-utaa utung ha abe nya ana itetel ato-ale ityan, bel Ijuus, i kọng. Wo ke unde angwu ki yi le be ke he be be ha hwa abe lishi nya ana bendi be shi nyọng be ke ukyeb angwun. Gbe wo shi na, ma undi uyang-yang u ngya le biwọm abi be gyo gbe le wo bi yi uman a. Undi uyang-yang u ngye le wo ndọ Iten Umosis. 25Bendi abe be yi Ijuus a ye abe be fel bendi abọng-ale befe, li fee kushia de be le li shi ugim le be zi biwọm ukem ye, be zi anung inyia ọ, nyọng inyia angi be ngib gwu he abwo ọ ye, be mbee ndọ kuhwobel betaa-betaa le he akpla atan-ale.”
26Ashi a taa, Upọl a gbe le bendi abena, le to kuhwo-ma he u fel utaa-utaa utung ha abe nya ana Iten ityan Ijuus i kọng. A kung gye he Ushọm Unim, u la da bendi kugii ati angi a teng gye he umbee-likel ati ato-ale taa ma ukpọng be ha shang Unim ke be.
Be kwu Upọl
27He kunyọng ahwu ati amen adyọng-ifee i a ma ndu mbee, bendi Ijuus besuso abe be be le he Eshia be nde Upọl he Ushọm Unim. Be shi bendi puu abe be yi ha be fel he ingyo fe Upọl. Be le shwa kwu-e. 28Be gaa le, “Men bendi Izwel, ma be kpel li. Ungikye angwun na u tan mbee bipi kọng ban bendi betyan le Iten ityan le Ushọm Unim angwun. A mbee be le bendi abe be yi bendi Igrik ọ he Ushọm Unim be ban kiteng ashi ki yi ndọ tata ke Unim!” 29(Be kọng ashin likọye be ma nde Utrofimus angwu u be le he Efesọs ha he lifung-ushu utung ha Upọl. Be kọng le Upọl a gye le he ha he Ushọm Unim.)
30Ki fel ha he kubọng yayaya. Bendi be buu le kwu Upọl, be shwa gbe le he le ha he Ushọm Unim. Nya kukwo-kukwo be shi ashi Ushọm Unim. 31He kunyọng ahwu be maa fel kaa le be gwa Upọl, bendi besuso be sọm undi le u le de ukandi ishogya angi Urom le linaa likandi li yi mbee Ujeruselem puu. 32Nya kukwo-kukwo ukandi angwuna a kpe bekandi besuso le ishogya ibel buu le be gye ha. Bendi be nde ukandi ishogya utung ha ishogya, be tyang Upọl ikwun akpam-ale.
33Ukandi angwuna a le kwu Upọl, u de le be fe-e ashishi-likaa afee. A bii liwu angina le, “Ungikye umen i u yi ayang a, a shi kibang a?” 34Puu abe ha he liwu, undi-undi u maa gaa da he kima, undi-undi u gaa de-e kima. Kihwee ki ma go gbe le ukandi angwuna a gyo kiwọm kpa-kpa ashi Upọl a shi ye. A ha de le be gye le Upọl he usha-ale ishogya. 35Be gye le he le wu he kipi be mbo gye he afee, ishogya i fel kung he ikung likọye liwu bendi li ma yi le ingyo kaang. 36Bendi puu be kwuo pwọm abe, be yii gaa le, “Ma gwu-e!”
Upọl a kọng ha liwu limen ana
37He kunyọng ahwu be maa ndu mbo gye he afee, Upọl a kung de ukandi ishogya le, “Mi nya da-a kiwọm a?”
Ukandi a bii he le, “Wo kọng igie Igrik mbee a? 38Wo na wo yi ungikye Igypt angwu le-iti a ma gbọng bendi asi lisi kugbe lihwo abe be ma naa linaa ha kubọng kam kukye gye he libeb a ye a?”
39Upọl a fan he le, “Mi yi ufe a ye. Mi yi undi Ijuus a. Be hwan mi he lishi Usilisia angi be ko le Utaasọs angi li yi he kukpo a. Kusii ha tyang mi mi kọng ha bendi aben.”
40Ukandi angwuna a bọng. Upọl a bo naa he kipi be mbo naa ha he ungwu-likọng, yọ abwo de be le be kwun atyung. Be kwun atyung. Upọl a kung kọng ha abe he igie Aramaik.
നിലവിൽ തിരഞ്ഞെടുത്തിരിക്കുന്നു:
Aki 21: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
