Mak 13
13
1Nte Enye ọkọkpọñde ufọk ukpono Abasi mmọ (temple) usen oro, kiet ke otu mbet Esie ama ọdọhọ Enye ete, “Andikpep, amakam okut nte mme ufọk emi eyede. Sese itiat ibibene mmọ nte ebanade.”
2Jisọs ama ọbọrọ enye ete, “Omokut mme ikpọ ufọk emi? Baba itiat ndomokiet idisuhọke ke enyọñ itiat efen ibọhọke ndikpọñ enye ke ñwure.”
3Nte Jisọs eketiede ke Obot Ọlif emi asakde iso ese ufọk ukpono Abasi, Pita, Jems, Jọn ye Andru ema ebup Enye ke ndibe ete, 4“Tiñ nọ ñnyin, ini ewe ke kpukpru mme ñkpọ emi editibe inọ Ufọk ukpono Abasi emi? Nso ididi idiọñọ ndiwut nte ke kpukpru ñkpọ emi emọñ ediwọrọ esu?”
5Jisọs ama ọdọhọ mmọ ete, “Ekpeme eti eti, ekuyak owo ada mbufo awaha ọkpọñ usuñ. 6Koro ediwak eyedi ke enyiñ Mi, enyuñ ebiaña ediwak owo ete ke mmimọ idi Andinyaña ndien eyeda ediwak ewaha ekpọñ usuñ. 7Ema ekop ebaña mme ekọñ ye mme etop ekọñ, ekuyomo nsia, koro mme ñkpọ ntre enyene nditibe edi emi iwutke nte ke utit ini edi.
8Koro mme idut eyesiak ekọñ enyuñ eñwana ye kiet eken; ndien unyekisọñ ye akañ eyedu ke nsio nsio idut. Kpukpru emi edi ntọñọ ubiak ye ukut emi edidide ke ini iso.” 9Edi ke ini mme ñkpọ emi editọñọde ndisu, etim ekpeme koro mbufo eyedu ke ata akamba afanikọñ. Eyeduri mbufo eka esop, enyuñ emia mbufo ke itie ukpono Abasi ndien eyetiñ mme nsu nsu ikọ edian mbufo ke iso mme andikara ye mme ndidem ke ntak emi edide mbet Mi. Emi edidi akwa ifet inọ mbufo nditiñ Eti Mbuk emi nnọ mmọ. 10Koro enyene ndinam ofuri ekondo ekop ebaña Eti Mbuk emi mbemiso akpatre usen edi. 11Edi ke ini edimumde mbufo ika ke iso ikpe ekukere ebaña se enyenede nditiñ man enyaña idem mbufo. Edi etiñ se Abasi edidọhọde mbufo etiñ. Koro idighe mbufo editiñ, edi Edisana Spirit editiñ ito ke mbufo.
12Eyen eka eyetap eyen eka ọnọ ñkpa: idem mme ete eyetap idem nditọ mmọ, nditọ eyetap idem mme ete mmọ enọ man ewot 13Ndien kpukpru owo eyesua mbufo koro mbufo edide Okim. Edi mmọ emi edimede ime tutu osim akpatre, inyuñ ikañke Enyiñ Mi eyenyaña mmọ,
14Ke ini mbufo edikutde mbubiam ñkpọ nsobo adade ke esit ufọk itie ukpono Abasi yak okot ñwed, ọfiọk se ọwọrọde. Ndien mbon emi edude ke Judia enyene ndifeñe ñka ke mme obot. 15Yak owo kiet ekededi emi odorode ke enyọñ ọkọm ufọk esie okusuhọde isọñ, mme ndiduk ufọk ñkemen ñkpọ ndomokiet ñwọrọ. 16Yak owo emi odude ke iñwañ okufiak aka ufọk ndimen ọfọñ esie.
17Edidi ata ñkpọ ndik ye mbọm ke mme usen oro inọ mme iban idibi ye mme akama nsek nditọ. 18Edi ebọñ akam ete yak okudi ke ini ukwọ. 19Koro ukem mme utọ usen ukut oro edi emi akananam miduhọ toto ke ini emi Abasi okobotde ererimbot tutu osim emi, emi mbiet esie midinyuñ iduhọ aba. 20Ndien edieke Ọbọñ mikpọmuhọke mme usen oro, baba ukpọñ ndomokiet ikpoduho uwem ke iso isọñ. Edi ke ntak mme ndimek nditọ Esie, Enye amanam mme usen oro emuhọ.
21Ndien ke ini oro edieke owo ekededi edidọhọde fi ete, “Emi edi Andinyaña, mme oko edi Enye, ekunim ke akpanikọ. 22Koro ediwak mme nsu nsu mme andinyaña ye mme nsu nsu prọfet eyedu emi edinamde ekese mme utibe idiọñọ emi edidide ñkpọ abiaña inọ ediwak mme ndimek ikọt Abasi edieke ekpekemede ndidi ntre. 23Etim ekpeme; mmabak nduri mbufo utọñ.”
24“Ke mme usen ukut oro ema ebe, utin eyeduk ekim, ọfiọñ idinyuñ inọhọ aba uñwana. 25Ndien mme ntantaọfiọñ eyeto ke ikpa enyọñ eduọñọ. Eyenyeñe mme odudu ke ufum enyọñ.”
26“Ntem ke ofuri ubon owo edikut Eyen Owo nte ọsuhọrede edi ke obubit enyọñ, ye akwa odudu, ye ubọñ. 27Ndien Enye eyedọñ mme enjel Esie, onyuñ asat mme ndimek ikọt Esie osioño ke ituñ mbinañ ererimbot, tọñọde ke mme utit ererimbot tutu ke mme utit enyọñ.”
28“Kemi, eda ukpepñkpọ eto eto udari, ke ini emine ñkọk esie editibede ndien ikọñ esie onyuñ ọtọñọ ndisiaha, mbufo efiọk ete ke ndaeyo ekpere. 29Ndien ke ini mbufo edikutde mme ñkpọ emi ññwanade nditiñ nnọ mbufo etibede, mbufo eyekeme ndifiọk ete ke edidi Mi ke ekpere, ndien Ami ke idem enyin usuñ nda.
30Ke akpanikọ ke ndọhọ mbufo nte ke emana enyemi idibehe ifep tutu kpukpru mme ñkpọ emi eda itie. 31Enyọñ ye isọñ eyebe efep, edi mme ikọ Mi eyesọñọ eda ke nsinsi.”
32“Nte ededi baba owo ndomokiet, edide mme asañautom Abasi ke enyọñ mme Eyen ke idem Esie, iduhọ emi ọfiọkde usen mme ini ñkanika emi mme ñkpọ emi editibede, ibọhọke Ete Mi ikpọñ ikpọñ ọdiọñọ. 33Ndien sia mbufo mifiọkke ini emi ñkpọ emi editibede, etie ke mbeñe idem. Etim ekpeme ebeñe edidi Esie.
34Ekeme ndida edidi Mi edomo ye owo emi akade isañ ke anyan idut. Enye ọnọ nditọ ufọk esie utom ndinam ke ini enye edikade isañ, onyuñ ọnọ etieusuñ inua otop itie utom ñko ete etie ekpeme tutu enye ọnyọñ edi.”
35“Ke ntre, etiñ enyin ekpeme, koro mbufo mifiọkke ini emi enyene ufọk edinyọñde, mme edidi ke mbubreyo mme ufọt okoneyo, mme edidi ke ñkpọusen mme ke ata ufọt uwemeyo. 36Edieke Enye edide wap inikiet ke edibabuat, kuyak Enye edikut fi nte edede idap. 37Ekpeme! Se ntiñde emi nnọ mbufo, ntiñ ntre nnọ kpukpru mbon efen.”
നിലവിൽ തിരഞ്ഞെടുത്തിരിക്കുന്നു:
Mak 13: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
