Mak 14
14
1Ke emi, ọsuhọ usen iba mbemiso usọrọ ube inyañ ye eke uyo emi ibọk unam uyo ọkọri misineke. Mme ikpọ oku ye mme ekpep ibet, ke ekeyom usuñ ndimum Jisọs ke ndibe ñnyuñ ñwot enye.
2Mmọ ema edọhọ ete, “Inaha ñnyin inam emi ke ini usọrọ ube inyañ man mme owo edisin ntime.”
3Ke ini Jisọs okodude ke okpokoro udia ke Betani ke ufọk owo emi ekekerede Saimọn, owo akpa mfia, ñwan kiet ama oduk ye otu nsọñurua enem utebe aran. Enye ama ọkubọde otu oro, onyuñ ọtọhọ aran oro ọduọk Jisọs ke ibuot.
4Ndusuk mmọ emi ekedude do ema eyat esit enyuñ edọhọ ete, “Nsutọ edibiat nsọñurua aran idi emi? 5Utọ aran eke etiede ntre, ekem se ekpenyamde awak ebe bọn ikie ita enyuñ emen okuk oro enọ ubuene.” Mmọ ema esua eti eti enọ enye.
6Edi Jisọs ama ọdọhọ mmọ ete, “Ekpọñ enye, nsinam mbufo ebiomde enye ke ediye ñkpọ emi enye anamde ọnọ Mi? 7Kpukpru ini, mbufo eyenyene mme ubuene ke otu mbufo ndien emekeme ndiñwam mmọ ini ekededi emi mbufo eyomde. Edi Ami ndiduhọ ye mbufo kpukpru ini.
8Enye anam se enye ekemede, onyuñ eyet Mi aran ke idem ebeñe ini emi edibukde Mi. 9Ndien ntiñ emi nnọ mbufo ke ata ofuri akpanikọ nte ebiet ekededi emi edikwọrọde Eti Mbuk emi ke ofuri ererimbot, eyetiñ ebaña edinam emi ñwan emi anamde mi, nte ñkpọ edida nti enye.”
10Ntem ke Judas Iskariọt kiet ke otu mbet Esie ekebine mme ikpọ oku okodiomi abaña usuñ nte enye editapde Jisọs inọ mmọ.
11Ke ini mme ikpọ oku ekekopde ntak emi enye ebinede mmimọ, mmọ ema ekop inemesit eti eti, ema eñwọñọ ndinọ enye ñkpọ eyen utom. Ntre ke enye ọkọtọñọ ndiyom eti ini ye ebiet emi enye editapde Jisọs inọ ñkpa.
12Ke akpa usen usọrọ uyo emi ibọk unam uyo ọkọri misineke, mbet Jisọs ema ebup Enye ete, “Mmọñ ke edima ñnyin ikanam akpatre udia usọrọ ube inyañ?” 13Enye ama osio mbet Esie iba ọdọñ ete, “Eka ke esit obio, ndien mbufo eyesobo ye owo emi obiomde abañ mmọñ, etiene enye. 14Eka ke ufọk emi enye edidukde, enyuñ edọhọ enyene ufọk oro ete, Andikpep ọdọhọ ete: Mmọñ ke ndidia usọrọ ube inyañ ye mbet Mi? 15Enye eyeda mbufo ọdọk aka okowut akamba ubet enyọñ emi ema ekebana ọfọn etim enye ebeñe udia mbubreyo ñnyin.”
16Ntre mme mbet iba oro ema edaha isañ ekeduk ke obio, ema enyuñ ekekut kpukpru ñkpọ ukem ukem kpa nte Jisọs ọkọdọhọde ndien mmọ ema enam ndutim ebeñe idem edidia usọrọ ube inyañ.
17Jisọs ye mbet Esie eken ema ekesim do ke mbubreyo. 18Ndien nte mmọ eketiede ke okpokoro edia ñkpọ, Jisọs ama ọdọhọ ete, “Ke akpanikọ ke ndọhọ mbufo añwa añwa nte ke owo mbufo kiet eyetap Mi, owo mbufo kiet mi emi osuk adiade ñkpọ ye Ami.”
19Ndien kpukpru mmọ ema edu ke ọkpọsọñ mfuhọ, do owo kiet kiet ama obup Enye ete, “Ndi ami ndi owo oro?”
20Enye ama ọbọrọ mmọ ete, “Edi kiet ke otu mbufo owo duopeba emi ediade ñkpọ ye Ami idahaemi, owo emi edebide uyo esie usan kiet ye Ami. 21Eyen owo enyene ndikpa kpa nte ñwed Abasi ama eketetiñ abaña Enye, edi, O akwa ufen emi anade ke iso ọnọ owo emi atapde Enye! Ọkpọfọn ye owo oro edieke enye mikpamanake.”
22Ndien nte mmọ ekediade ñkpọ, Jisọs ama emen ekpri eboho uyo onyuñ ebeñe edidiọñ Abasi ọnọ enye ndien obuñ enye ñkeñe ñkeñe ọnọ mbet Esie ndien etiñ ete, “Eta, emi edi ikpọk idem Mi.”
23Ndien Enye ñko emen kọb mmin emi ekotde wain onyuñ ọnọ Abasi ekọm abaña enye ndien ọnọ mmọ, ndien kpukpru mmọ enyuñ eñwọñ eto kọb oro. 24Ndien Enye ama ọdọhọ mmọ ete, Emi edi iyip Mi emi eduọkde ke abaña ediwak owo, emi edide idiọñọ obufa ediomi ke ufọt Abasi ye owo. 25Ntiñ ata akpanikọ nte ke Ami ndinwoñke wain aba tutu osim usen emi Ami ndiñwọñde obufa wain ke Obio Ubọñ Abasi.
26Ndien mmọ ema ekwọ ikwọ enyuñ ewọñọ eka ke Obot Ọlif.
27Jisọs ama ọdọhọ mmọ ete, “Mbufo kpukpru eyefeñe ekpọñ Mi.” Koro Abasi ama ananam añwaña oto ke uyo mme Asiak Uduak Abasi. “Ñyewot ekpemerọñ, ndien mme erọñ eyesuana. 28Edi Ami mma nset ke ñkpa ñyeka ke Kalili man ndisobo ye mbufo do.”
29Pita ama ọdọhọ Enye ete, Ami ndikpọñke Fi ekpededi mbon eken ekpekpọñ Fi.
30Jisọs ama ọdọhọ Pita ete, “Mbemiso ekikọ ọkpọk ọyọhọ ikaba usen ubọk ñkpọñ, afo eyekañ Mi utim ikata.”
31Pita ama ọsọñọ eyire etiñ ete, “Baba-o, idighe, ekpededi nte ana nte ñkpa ye Afo, ami ndikañke Fi.” Ndien kpukpru mbet eken ema eñwọñọ kpasuk ntre.
32Mmọ edisim ebiet emi ekotde iñwañ Ketsemeni, ndien Enye ama ọdọhọ mbet Esie ete, “Etie mi kadaña emi ñkade ndibọñ akam.”
33Enye ama ada Pita ye Jems ye Jọn. Enye ama onyuñ ọtọñọ ndiyọhọ ye ọkpọsọñ ukut ye mfuhọ. 34Ndien Enye ama ọdọhọ mmọ ete, “Ukpọñ Mi ọfuhọ eti eti tutu ekpere ñkpa; etie mi enyuñ ekpeme ye Ami.”
35Enye ama asaña aka iso esisit ndien ọduọ ọtọñọ edọñ ke isọñ onyuñ ọbọñ akam ete, edieke usuñ odude yak idiọk ini eke etiede ntem ebe ọkpọñ mi.
36Enye ama ofiori ete, “Ete, Ete, kpukpru ñkpọ edi mmem mmem ke ubọk Fo, men kọb emi fep Mi ke iso. Ñyom uduak Fo, yak okudi okim.”
37Ntem ke Enye akafiak ebine mbet Esie ita onyuñ okosobo mmọ nte mmọ edede idap. Enye ama ọdọhọ Pita ete, “Saimọn, ede idap? Nte mbufo ikemeke nditie ñkpeme ye Ami ke ñkpọ nte awa ñkanika kiet?” 38Ekpeme enyuñ ebọñ akam man andidiọk edidomo mbufo. Okposuk edi emi ke akpanikọ Spirit onyimede, edi obukidem edi mmem mmem.
39Ndien Enye ama ọtọñọ ntak afiak ọkọbọñ akam, aka iso osuk ekpe Abasi ubọk ke ukem usuñ emi Enye eketiñde. 40Ekem Enye afiak edi, edikut nte mmọ esuk edede, koro mmọ ekekpade mba. Ndien mmọ ikọfiọkke se mmọ ekpekemede nditiñ nnọ Enye.
41Ke ọyọhọ ikata ke ini Enye akafiakde edikut mmọ, Enye ama ọdọhọ mmọ ete, “Nte mbufo ke edede idap enyuñ ebọ nduọk odudu? Ekem ndien! Ini idap ama okure. Sese! emetap Eyen owo esin mme ndiọi owo ke ubọk. 42Edaha eda, eyak ñnyin ika. Sese, anditap Mi kasaña edi.”
43Ndien idaha oro, ke adaña emi Enye okosuk etiñde ikọ, Judas (kiet ke otu mbet Esie) ama edisim ye otu owo emi ekekamade akañkañ (ofut) ye mbio eto, emi ikpọ oku ye mme ekpep ibet ye mme ikpọ owo mme Ju ekedọñde.
44Judas ama ọdọhọ mmọ ete, “Mbufo eyediọñọ Enye emi mbufo edimumde ke adaña ini emi edikutde nte ntimde Enye inua. Ntem emum Enye eda edaha ke idak ukpeme.” 45Ntre, ke ini emi mmọ ekesimde do, Judas ama asaña ini kiet ebine Jisọs, okot Enye, “Eteufọk!” Ndien otim Enye inua. 46Ntem ke otu owo ekemum Jisọs, ndien emum Enye ubọk ọsọñ 47Edi owo akadade ekpere oduri akañkañ esie osio ke efọk onyuñ adiañade eyen ufọk akwa oku utọñ esie efep.
48Jisọs ama obup mmọ ete, “Nte Ami ndi owo ñwo, emi anamde mbufo ewọñọ edi ntem, esaña ye kpukpru ñkpọ ekọñ emi man emum Mi? 49Ntak emi mbufo mikemumke Mi ke adaña ini emi ñkodude ye mbufo ke itie ukpono Abasi-e? Ñkodu do ñkpep ñkpọ kpukpru usen. Edi kpukpru ñkpọ emi etibe man kpukpru se mme oku Abasi eset eketiñde ebaña Mi ekeme ndisu.”
50Ke ntem mbet Esie ema efeñe ekpọñ Enye. 51Ama odu akparawa kiet do emi ekesinede ñkisi ọfọñidem etiene Jisọs ke edem, ke ini emi mmọ ekemumde Enye. 52Enye ama emen itọk efehe ọkpọñ ọfọñ esie.
53Mmọ ema eda Jisọs eka ufọk Akwa oku ebiet emi ikpọ oku ye mme ekpep ibet ye ikpọ owo mme Ju ekesobode idem ọtọ kiet idaha oro. 54Pita ama asaña etiene mmọ ke ata edem edem onyuñ ebe nnen nnen okoduk esit okure Akwa oku, ndien ọsuhọde etetie ewebe ikañ ye mme nditọ ufọk eken.
55Ke esit okure oro mme ikpọ oku ye ofuri esop mme ebiere ikpe mme Ju ema etie do eñwana ndiyom se ekpetiñde man enye odot isop ñkpa. Edi kpukpru mbufiọk mmọ ọkọwọrọ ikpuikpu. 56Ediwak ntiense nsu ema ewọñọ editiñ nsu nsu ikọ edian Enye, edi kpukpru uyoikọ mmọ ekedi nsio nsio.
57Ke akpatre, ndusuk mme owo ema edaha eda enyuñ etiñ nsu nsu ikọ edian Enye ete, 58“ñnyin ima ikop nte Enye ọkọdọhọde ete ke Imọ iyewuri itie ukpono Abasi emi ubọk owo ọkọbọpde ndien ke ọyọhọ usen ita iyebọp obufa emi baba ubọk owo ndomokiet midisineke.” 59Edi kpa ye oro ekedide ntre, mmọ ikekemeke ndinyene nnen nnen ikọ.
60Ntem ke Akwa Oku akadaha ada ke enyọñ ke ufọk esop, onyuñ obup Jisọs ete, “Nte Afo unyeneke ibọrọ ka baña kpukpru se etiñde edian Fi emi? Nso ke Afo enyene nditiñ ñnyaña idem Fo?”
61Ke otu kpukpru mme mbume emi, Jisọs ikamaha ndinọ enye ibọrọ. Ntem ke Akwa Oku ọkọtọñọ ntak obup ete, “Nte Afo edi Andinyaña, Eyen Mfọnmma Abasi?”
62Jisọs ama ọbọrọ enye ete, Ami ndi Enye, “Ndien afo eyekut Eyen owo nte etiede ke ubọk nnasia Abasi, andikeme ndinam kpukpru ñkpọ, ye nte edide ke obubit ikpa enyọñ.”
63Ntem ke akwa oku akawai ọfọñ idem esie, onyuñ ọdọhọ ete, “Ufọn ediyom ntiense efen iduhọ.” 64Mbufo emekop nte Enye osuñide Abasi, nso idi ubiere ikpe mbufo? Kpukpru owo ema emenede ubọk enyime ete ke Enye odot ñkpa.
65Ntem ke ndusuk mmọ eketọñọ ndifiari Enye etap ke iso enyuñ efuk Enye iso ndien etọñọ ndituak Enye, ete Enye, “Kere ise, anie owo eketuak Fi?” Mmọ ema esak Enye. Idem mme isuñutom ufọk esop ema etiene emia Enye nte mmọ ekedade Enye ewọrọ ke esop.
66Kaña ke emi, Pita okodu ke ata esit okure esop, kiet ke otu nditọ iban emi ekenamde ñkpọ ke ufọk akwa oku, ama asaña ekpere Pita. 67Ke ini enye okokutde Pita nte ewebede ikañ, onyuñ ọdọhọ enye ete, “Afo ama etiene odu ye Jisọs emi otode Nasaret.”
68Pita ama akañ Jisọs, onyuñ ọdọhọ ete, “Mfiọkke se afo etiñde abaña,” ndien asaña ọwọrọ ke inua otop esit okure. Ke ndo ndo oro ekikọ unen ama ọkpọk.
69Ke ini eyenañwan oro okokutde nte enye adade do, enye ama ọtọñọ nditiñ nnọ mbon efen emi ekedade do ete, “Se enye ko! Enye edi kiet ke otu mmọ oro.”
70Pita ama afiak akañ Enye. Ke ñkpọ nte esisit ini ama ekebe mbon eñwen emi ekedade ekpere do ema etọñọ nditiñ ye Pita ete, “Afo edi kiet ke otu mmọ, koro afo ñko oto Kalili.”
71Enye ama ọtọñọ ndisuñi idem ñnyuñ ññwọñọ ñkpọ ete, “Ami ndiọñọke owo emi mbufo etiñde mi ebaña.”
72Ndien idaha oro ekikọ ama ọkpọk ọyọhọ ikaba. Ndien inikiet, Pita ama eti ikọ emi Jisọs ọkọdọhọde ete, “Mbemiso ekikọ ọkpọk ikaba, afo eyekañ Mi utim ikata.” Ndien enye ama ọtọñọ nditua eyet.
നിലവിൽ തിരഞ്ഞെടുത്തിരിക്കുന്നു:
Mak 14: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
