BIKƆMELI BI BA PƆSOLU 13
13
Balanabasi na Saulu bahɔɔmi bɛngi bakɛe ta elomu
1Ta Ekelesa e Atsiosi, edaka na batɛli ko na bato ibia badaaka ena tina e boleha: Balanabasi, Simeona iyona obeakabo Moto mohindo, Lusiusi o Silɛne, Manaɛni iyona okandoaka polo emɔti na Elode#13, 1 Edii wɛtoko Elode Atipasi (boindja ta Luka 3:1)., odaledjaka Galileya, ko na Saulu. 2Busa bomɔti badaaka banɔdjɔ ilako di Kumu ko bakiaka boyaka, Mwembo Mosɛnɔke mobala na bu bo: «Kineanini Balanabasi na Saulu bɛngi bakɔe mosala imu mobabeaki na mbi.» 3Iboa, ngɔngɔ dji bokia boyaka ko na boangɔnɔ, babakea mɔmɔ diko di bobo ko babakina bakɛe.
Balanabasi na Saulu ta Sipele
4Abo Balanabasi na Saulu balomama na Mwembo Mosɛnɔke, baimea ta Selisi#13, 4 Selesi edaka ibongu di Atiosi idaka diyɛlɛmɛni na esanga e Sipele. iho bakwea ta masuwa bɛngi bakɛe ta esanga e Sipele. 5Ehole eimea ibo ta Salamine, babanga boleha kɔpi e Ndjakomba ta ndako djimiɔngɔnɔ dji Bayudha. Badaaka na Yoane Malako bɛngi abakɔmedjake. 6Ngɔngɔ dji bobo bodala esanga esusu mbunoko ta Paposi. Iho, basaka na moyudha omɔti nganga o male asaimedjaka motɛli, kombe e nde Bali-Yesu. 7Adikamaka ta dii gupɛlɛnɛlɛ o esanga kombe e nde Sɛlɛdjiusi Paulusi, iyo adaaka moto omɔti o bowɛi. Iyo aso abea Balanabasi na Saulu, modjɔ mo adaaka na posa e booka mobalo mo Ndjakomba. 8Endelo nganga o male Elimasi, kombe emina etingodji bo: nganga; aisanaka na bu kitɛ ko ahombaka mwɛngi mo bobedja edhimeli e gupɛlɛnɛlɛ. 9Iboa Saulu, iyona obeamaka Polo#13, 9 Kombe Saulu ebeamaka wɛtoko ta dii Bayudha, ko tadii ba Loma abeamaka na Polo (boindja ta 22:27-29)., aluma na Mwembo Mosɛnɔke, amotingea miso 10ko abala bo: «Moto oluma na boyɛi bobe ko na bokuta, mwana o djabulu, moloni o mɛko misusu mi bodju! Otakina bobedja ndjea dji bodju dji Kumu? 11Edɛdiyeye hokamedja: Kumu aopadea etumbu, oimedea moto o miso mago ko otaɛnɛdea modaakabusa naikina.» Na mbala emɔti, miso ma Elimasi modimea ko aɛnɛ modidi: abangaka ahombe moto obwanaka bomopea ta ebɔ bɛngi amodaledje. 12Ehole eɛnɛ gupɛlɛnɛlɛ midjɔ imia minɔmɔkɔ, aimea modhimi; akamoaka bobuke mɛnɛ na bileho bi Kumu.
Polo na Balanabasi ta Atiosi e Pisidi
13Polo na binande bakwea ta masuwa bakɛɛ ta Paposi ko bakɛi ta Pɛlɛdje#13, 13 Pɛlɛdje: edii ngando enɛnɛ ta mokula mo satina dji Adjia o Mokɛkɛ. Yoane Malako: bondja ta 12:12, 25; 13:5. e Papili. Yoane Malako abakina iho ko asɔmbɔ ta Yelusalɛmɛ. 14Bakɛɛ mɔɔngɔ mo bobo bakina Pɛlɛdje ko baimea ta Atiosi e Pisidi. Ta busa bo sabata bakwea ta ndako e miɔngɔnɔ e Bayudha ko baso badaa na mobondo. 15Ngɔngɔ dji bolanga mikanda mi mibeko ko na mi batɛli, babanei ba ndako e miɔngɔnɔ babala na bu bo: «Dengani, okadaani na kɔpi e bobala na bato ta tina e bobapindeja, obwanini bobalani edɛdiyeye.» 16Polo aangɔ akɔɔ embete na ebɔ ko abala bo: «Bana ba Isalɛlɛ, ko ino ibia bakasume Ndjakomba, hokamaedjanini! 17Ndjakomba o Isalɛlɛ ahɔɔ bakɔkɔ ba biso. Anɛngedja bato ba biso ehole edaka bo ta ekomi e buki, ta Edjipito, ko na ngulu e nde abaimedja ta ekomi emina. 18Aika molema mo nde tina e bobo bokimana bianga tuku inɛi ta edhu. 19Ngɔngɔ djimina, abedja bikomi sambo ta Kanana ko aso apa mokpɔtɔ mo bobo ta dii bato ba nde bamosangoe#13, 19 Boindja ta Dit 7:1; Yos 14:1., 20ko masu masusu mamina makɔɔ bianga bokimana mikama mi nɛi na tuku itano.
«Ngɔngɔ djimina, abapa ba djudji tee mbunoko ta ehole e motɛli Samwɛlɛ#13, 20 Boindja ta Djud 2:16 ko na nase. Samwɛlɛ: boindja 1 Sam 3:20.. 21Ko naikina bawadja mokondji ko Ndjakomba aso abapa Saulu, mwana moomi o Kisi, ta ibota di Bendjame, iyona okokedja bianga tuku inɛi. 22Ngɔngɔ dji Ndjakomba bolona Saulu, aimedja Dhapiti ondingo mokondji o bobo. Abala tati ta tina e nde bo: “Nahɔi Dhapiti, mwana o Yese: nasepi na nde bobuke mɛnɛ, akokedjadea midjɔ misusu mipalakadea mbi#13, 22 Molɔngɔ mo21-22: 1 Sam 8:5, 19; 10:21; 13:14; 16:12. Boɛngɛ Ndjem 89:21..” 23Yesu adii omɔti o batitani ba nde iyona ohɔɔ Ndjakomba ondingo Moheledji o bana ba Isalɛlɛ, oko mondumba momaka iyo dikana. 24Boso bo bodoa bo Yesu, Yoane alehaka tadii bana ba Isalɛlɛ basusu bahombedje mida ko botamba batisimo. 25Ta ehole ameaka Yoane ta suka e mosala mo nde, abalaka bo: “Okalɛdjeni bo mbi nadii nda? Nadiiti moto iyona oambakadea ino. Endelo hokamedjani: adoadea ngɔngɔ dji mbi ko nabwaniti nongo bolodja mikpulu mi sapato dji nde#13, 25 Boindja ta Yoane 1:20; Mat 3:11; Malako 1:7; Luka 3:16; Yoane 1:27..”
26«Baningani, ino batitani ba Abalayama ko ino bakina ibia bakasume Ndjakomba: kɔpi iyeye elomami wɛtoko ta dii iso bɛngi lohele. 27Modjɔ mo, bato ba Yelusalɛmɛ ko na babanei ba bobo baidjeba Yesu, ko baisipoa mibalo mi batɛli milangamaka engi sabata. Endelo bakokedja mibalo mimina na bomotitedja na ikambo. 28Na nongo adaa ibo pɛpɛ bodia modjɔ mo bomotitedja ta yogo, bawadja Pilato amoowoe. 29Ngɔngɔ dji bokokedjama bo midjɔ misusu mibalama ta Makomi tina e nde, bamotitedja ta ekulusu ko bamoisa ta ikila#13, 29 Molɔngɔ mo 28-29: boindja ta Mat 27:22-23, 57-61; Malako 15:13-14, 42-47; Luka 23:21-23, 50-56; Yoane 19:15, 38, 42.. 30Endelo Ndjakomba amosisodja ta tei e bato bago. 31Masu manɛnɛ, Yesu aimaneaka ibia baiweaka na nde ta Galileya ko ta Yelusalɛmɛ ko ibia badii edɛdiyeye ba temo ba nde boso bo bana ba Isalɛlɛ#13, 31 Boindja 1:3.. 32Ko iso, loolwɛini Bwɛndi Bopele ibubu: bodikana Ndajakomba ta dii bakɔkɔ ba biso, 33edɛdiyeye Ndjakomba akokedja modjɔ momina tina e biso batitani ba bobo, na bosisodja Yesu ta yogo. Modjɔ mo ekomama ta tei e buku e Ndjembo ekenge enɛnɛ e babae bo:
“Wɛ moto odii Mwana o mbi,
banga busa ibu, nadii Sange e wɛ.”
34Ndjakomba atɔndɔkɔ bo amoangɔdjɔbi ta tei e bato bago bɛngi adae pɛpɛ bopɔɔ naikina. Ta tina emina abalaka bo:
“Naopabi midjongoa misɛnɔke ko na mi sooti imia midikanedja mbi Dhapiti.”
35Ta tina emina abalakadea ta ikomi dikina bo: “Otakinadea Mosɛnɔke owɛ apɔe ta ikila#13, 35 Molɔngɔ mo 33: Ndjem 2:7. Molɔngɔ mo34: Isa 55:3, elangama ta mokanda moyou mo monɔkɔ mo gɛlɛki. Molɔngɔ mo 35: Ndjem 16:10.”
36Enakoboa, ta ehole e nde Dhapiti akɔɔ bopala bo Ndjakomba; ko agwa, ko apuseama mbuti na bakɔkɔ ba nde ko aso apɔɔ#13, 36 Boindja ta 1 Bak 2:10.. 37Endelo iyona osisodja Ndjakomba ta bogwa aipɔ. 38Baningani, etungi odjebeni bo: odiakadeani ekutubanedji e pekato wɛtoko na ndjea e Yesu; mibeko mi Mose mibwanaka boimedjani bato ba bodju. 39Ko ta midjɔ mimina misusu, moto omodhimei aimei moto o bodju. 40Na tina emina, toma kebani, midjɔ mikomaka batɛli misaka otaneani:
41“Indjani ino bato bakasɛtodje Ndjakomba,
kamoani ko tiani!
Modjɔ mo ta ehole e bino nakɔdea modjɔ momɔti modadea ino pɛpɛ bodhima na nongo moto omɔti akaotubandeani#13, 41 Abak 1:5, elangama ta mokanda moyou monɔkɔ mo gɛlɛki.!” »
42Ehole eimana Polo na Balanabasi ta ndako e miɔngɔnɔ, bato babawadja basɔmbe naikina ta busa bo sabata e ngɔngɔ bɛngi balehe naikina eleho iyena. 43Ehole enangana ikita, Bayudha banɛnɛ ko na bato baangɔnɔkɔ Ndjakomba o Bayudha bakimana Polo na Balanabasi. Ibo babala na bu ko babapingedja bo badikame ta tei e bwela bobakɔmea Ndjakomba.
44Isu di sabata iyena e ngɔngɔ, bato mbuti na basusu ba ngando enɛnɛ baputoana bɛngi baoke mobalo mo Kumu. 45Ehole eɛnɛ Bayudha bimumu bi bato#13, 45 Bimumu bi bato: ebwani pongono bokoma emumu e bato banɛnɛ., baso baluma na swɛ; baisanaka kitɛ na polo ko bamosingaka. 46Iboa Polo na Balanabasi babala na bu na bhingi bo: «Etungi boso mɛnɛ bo mobalo mo Ndjakomba molehame ta dii ino. Endelo abo ino omodumbakadeani ko otasabwanedjakadeani bɛngi obolodjeni bomɔ bo kɔbili, iboa iso lokɛkɛdea edɛdiyeye ta dii bato ibia badii pɛpɛ bodaa Bayudha. 47Modjɔ mo Kumu aloloma bo:
“Naohɔɔ ondingo bohu bo bikomi,
bɛngi bo olwɛe
ngondo esusu mohelo#13, 47 Isa 49:6.!” »
48Ehole eoka bato ibia badaaka pɛpɛ bodaa Bayudha modjɔ momina, basepa ko babanga bokumedja mobalo mo Kumu. Basusu ibia bahɔɔmɔkɔ tina e bodia bomɔ bo kɔbili baimea badhimi. 49Mobalo mo Kumu monangana ta ekenge e mokili iyena esusu. 50Endelo Bayudha basombanedja bali ibia ba gala na basuku ba ngando enɛnɛ ibia bakumeaka Ndjakomba, ko babanga bonɔngedja Polo na Balanabasi ko bababengana ta telitoale e bobo. 51Ibo baso babhubhola idutu dji bigbota#13, 51 Boindja ta Malako 6:11 ko na nase. bi bobo na kɛlɛ ebobo ko bakɛɛ ta Ikɔniɔmi. 52Enakoboa batingami baluma na mongandi ko na Mwembo Mosɛnɔke.
നിലവിൽ തിരഞ്ഞെടുത്തിരിക്കുന്നു:
BIKƆMELI BI BA PƆSOLU 13: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
