BIKƆMELI BI BA PƆSOLU 14
14
Polo na Balanabasi ta Ikɔniɔmi
1Ta Ikɔniɔmi Polo na Balanabasi bakwea pongono ta ndako e miɔngɔnɔ e Bayudha ko kɔpi dji bobo djisepedja bato, iboa Bayudha banɛnɛ na bato ba bikomi bikina baimea badhimi. 2Endelo Bayudha ibia balona bodhima bapangoa bato ba bikomi bikina badie binabu malɛno mabe boso bo denga. 3Na nongo boa, Polo na Balanabasi bayeyoa ta Ikɔniɔmi. Babalaka na swueya ko baisaka milema mi bobo ta dii Kumu. Kumu abapaka bokondji bo bokɔ bimbete na bingengo bɛngi ainedje bo mibalo mi ngɔlu e nde milehaka ibo midii mi sooti. 4Bato ba ngando enɛnɛ babɔtɔ: bakina badaaka ta pamba e Bayudha bakina ta pamba e bapɔsɔlu. 5Endelo Bayudha na bato ba bikomi bikina, na bakondji ba bobo, basabwanedjaka bɛngi banɔngedje Polo na Balanabasi ko bɛngi babaowoe na mabɔkɔ. 6Iyana aoka ibo boa, batia ta ngando djinɛnɛ dji Likaoni, Lisitele, Dɛlɛbɛ ko na mbuti na dju. 7Iho balehaka Bwɛndi Bopele.
Polo na Balanabasi ta Lisitele
8Edaka na moto omɔti ta Lisitele adaaka na mobondo , modjɔ mo mako ma nde madaaka makatatake; adaaka etumbɛ donga bobotama bo nde ko aihɔnɔkɔ bodala. 9Ahokamaedjaka mɛko mibalaka Polo. Polo amokokoledja ko aɛnɛ bo adaaka na edhimeli bɛngi ahele. 10Iboa abala na nde na ngulu bo: «Angɔ, saninodja na mako ma wɛ!» Moto omina apimboa na mako ma nde ko oso abanga bodala.
11Ehole eɛnɛ emumu e bato modjɔ mokɔɔ Polo, bagama na monɔkɔ mo ngando mo Likaoni bo: «Ba ndjakomba balwai mikuku mi bato ko batiti ta dii iso#14, 11 Boɛngɛ 28:6.!» 12Babeaka Balanabasi «Djeusi» ko Polo «Helɛmɛsi»#14, 12 Ta ehombeli e ba Gɛlɛkɛ e ba ndjakomba Djeusi adaaka mobanei o ba ndjakomba ko Helɛmɛsi adaaka mwana o elomu o bobo., modjɔ mo Polo adaaka mbaeli. 13Ndako iyena eangɔnɔkɔ bo ndjakomba Djeusi edaka ta modipe mo ngando enɛnɛ, nganga o Djeusi atomba ngɔmbɔ baami babayɔi na bipweya bihɔlɔmɔke na mikpulu na pulɛlɛ: iyo na bimumu bi bato, bapalaka batumbee Polo na Balanabasi mbeka. 14Endelo ehole eoka bapɔsɔlu Balanabasi na Polo modjɔ momina, baala bisendja bi bobo ko bapota ta ndanda e emumu e bato agame bo: 15«Baningani tina ekɔkɔdea na nu iboa nda? Iso lodii bato oko ondingo ino. Loolwɛini Bwɛndi Bopele, na bobeani okineni bikeko bi pɛpɛ sɔngi ko ohombaneni ta dii Ndjakomba o bomɔ oyoa busa na kpɔtɔ, dua ko na midjɔ misusu midii ta tei e dju#14, 15 Boindja ta Boi 20:11; Ndjem 146:6.. 16Ta ehole e boso, akina bikomi bisusu bikimane ndjea dji dju. 17Na boa, aitaka boinedja bopele bo nde: akaodumbeeni mbua bodonga ta odiko, okatswɛni mbuma ta bodidi bo yu#14, 17 Boɛngɛ Ndjem 147:8; Yil 5:24., akaopɛni mia ko akalumedje molema mo bino na mongandi.» 18Na nongo abala ibo iboa, baɛnɛ saya bɛngi basie bimumu badea pɛpɛ bobatumbea mbeka. 19Bayudha badonga ta Atiosi e Pidjidi ko na ta Ikɔniɔmi, ko baso bapangoa emumu e bato. Balaa Polo mabɔkɔ bɛngi bamoowoe, ko bamoimanedja sokolu e ngando enɛnɛ, balɛnɛkɛ bo agwi. 20Endelo ndelo iyena eputoana batingami boso bo nde, asangɔdjɔ ko asɔmbɔ ta ngando enɛnɛ. Aya busa, akɛɛ na Balanabasi ta Dɛlɛbɛ.
Ihule ta Atiosi e Sili
21Polo na Balanabasi batɔndea Bwɛndi Bopele ta ngando enɛnɛ e Dɛlɛbɛ ko baso badia batingami banɛnɛ. Ngɔngɔ djimina baso basɔmbɔ ta Lisitele, Ikɔniɔmi ko na ta Atiosi e Pidjidi. 22Bambimbimedjaka milema mi batingami, ko babapingedjaka badikame ta edhimeli ko babalaka na bu bo: «Lotungi loɛnɛ saya enɛnɛ bɛngi lokwee ta Bokumu bo Ndjakomba.» 23Engi Ekelesa, babahɔeya basuku ko ngɔngɔ dji bokɔ mongilo ko na boangɔnɔ, babakina ta mɔmɔ ma Kumu iyona odhimeaka ibo.
24Ngɔgɔ djimina, balekedja Pidjidi ko baimea ta Papili#14, 24 Pidjidi: boindja ta 13:14. Papili: edii ekenge emokili e Pɛlɛdje (boindja 13:13 ko na nase) ko na Atali (molɔngɔ mo 25).. 25Batɔndea mobalo mo Ndjakomba ta Pɛlɛdje, ko baso bakɛɛ ta Atali. 26Iho, bakwea ta masuwa bɛngi bakɛe ta Atiosi e Sili, ngando enɛnɛ iyena e bakinaka ibo ta mɔmɔ ma Ndjakomba na ngɔlu e nde tina e mosala mokɛkɛdea ibo ahule asala edɛdiyeye. 27Ehole eimea ibo, baputoanedja bato ba Ekelesa ko baso babatubana midjɔ misusu mikɔɔ Ndjakomba na bu, ko na mondumba modipoa na nde ndjea e bodhima ta dii bato ba dii pɛpɛ bodaa Bayudha. 28Bakɔɔ masu manɛnɛ na batingami iyana.
നിലവിൽ തിരഞ്ഞെടുത്തിരിക്കുന്നു:
BIKƆMELI BI BA PƆSOLU 14: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
