Lukku Manjililo
Manjililo
Makani Mabotu akalembwa aLukku Ngamwi mumabbuku aane Muchizuminano Chipya apandulula buumi bwaJesu Kkirisitu. Limwi alimwi lyiitwa kuti, “Makani Mabotu.” Akalembwa Jesu kaali wafwa aMateyu, Makko, Lukku aJoni. Lukku takalemba atala abuumi bwaJesu abulikke, pesi wakalemba lubo atala azyoonse eezyo basikwiiya baJesu nzibakachita nakafwa alimwi nakabuka, eli bbuku litegwa Inchito zyabatumwa. Takukwe uzi kasimpe atala achiindi aayo Makani Mabotu akalembwa mukwiinda muli Lukku nikuba ooko nkwaka kwalembela, pesi basikufunkununa bakazuminana kuti akalembwa kumunyaka ilimakumi alimusanu amakumi aabili kuzwa nakafwa Jesu. Mulembi ngu Lukku ooyu wakali musilisyi. Inzila yakwe yakulemba alimwi amulaka ngwabelesya ututondezya kuti wakali mwaalumi uyide. Lukku wakalikuyanda kulemba kasimpe kini atala abuumi bwaJesu, kali kawaamba munzila mbuzyakachitika, kuchitila kuti bamwi bagwasyigwe mukwabala aaya mabbuku (Lukku 1:1-4). Takali muJuda pe (Ba Kkolose 4:10-14). Alimwi wakalemba munzila eeyo baJuda njibatakali kuno konzya pe kumvwisisisya. Ezi zilaliboniya antanganana munzila njapandulula aayo chiyanza chabaJuda (Lukku 1:8). Makani Mabotu mukwiinda muli Lukku akozyaniya abbuku lwaMateyu alwaMakko, nkaambo apandulula zintu zikozyeniye amunzila ikonzyeniye. Akati kamabbuku aatatu, Lukku upa zinikide atala akuzyalwa kwaJoni muBbapatizi. Lukku alubo ulasinizya atala akulekelelwa (chandano Lukku 3:3, 11:4, 17:3-4, 23:34, 24:47) alimwi akukomba (chaandano Lukku 3:21, 5:16, 6:12, 11:1-12, 22:32).
Bwiime:
Manjililo Muchandano (Lukku 1:1-4)
Lukku utalika kunjizya Makani Mabotu alimwi ulabupanduluzi kuti nkaamboonzi nakaawalemba.
Eelyo ulungununa atala akuzyalwa kwa Jesu anzila mbwaakabaambilwa kumulimu (Lukku 1:5—4:13)
Nkaambo chipanzi chipati chaMakani Mabotu (Lukku 4:14—21:38), Lukku utwaambila atala amulimu eeyo Jesu njakachita, kapati zigambyo nzyakachita azintu nzyakayiisya.
Chakumaninizya, muzyandano ziibili zyakumamanino (Lukku 22:1—24:53) ulungununa inzila Jesu njakafwa ayo, akuzikkwa kwakwe, akubuka kuzwa kubafu.
നിലവിൽ തിരഞ്ഞെടുത്തിരിക്കുന്നു:
Lukku Manjililo: TTP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Word for the World International