Mateo 21

Vantu vakhomokowela ngilingili Yesu panaa akhwingela Yelusalemu

Maluko 11:1-11; Luka 19:28-40; Yohana 12:12-19

1Yesu ne vahemba vakwe panaa valevatelela Yelusalemu, valevapikha kho khahala la Betifage, kho ketonda cha Mizeituni. Aleavatoma vahemba vakwe vawele, 2akavaweela, “Mopete kho khahala lenaa lepwale paulongolo wenyu. Panaa molaingela omoo, molamowona ndogowe atungagwaa palomwi no mwana ndogowe. Movatungule ne khovaleeta khwaane. 3Mbe muntu yeyensi alavawolya, momowele, ‘Mwene, akhovapooga,’ nanoyo alavagombela movalete khwaane.” 4Mpola eji jensi jalejanojekha ili gadugame egoo ganaa galegapaalwa no molooti kete,

5“Movawele vantu va ihala la Yelusalemu kete,

Mwami wenyu ijilee khwenyu.

Omwene a mopolo, ne ijilee oko atantagaa pachanya ya ndogowe,

ne amotantagaa mwanandogowe, mwanike wa ndogowe.”

6Gechoo, vahemba evoo valevapeta khonojaa kete Yesu venaa aleavalagelelaja. 7Valeeta ndogowe no mwanandogowe, vaala myenda jawe pachanya ya ejoo ndogowe, no Yesu ikhalaa pachanya yawe.

8Vantu vinki valevaala myenda jawe monjela, ne vaange valevadomola vetambe vya mapeke no khovetoola monjela kho nguno ya khomokolya Yesu. 9Vaange angile vamolongola Yesu ne vaange angile vale kho nyuma yakwe, vensi alevajomaa lolii vapalaa, “Akoliwee Mwana wa Daudi. Afunyelagwaa yunaa iijile kho lina la Mwene. Akoliwee Matuunda yunaa apwale khochanya.”

10Ituungo lenaa Yesu akhwingela Yelusalemu, vantu vensi va ihala valevatempokha, vandya khwiwolya, “Oyo a nanuu?”

11Vantu va idale lenaa angile lepwale no Yesu vavaweela, “Oyo a Yesu, wa khopuma kho ihala la Nazaleti wa nse ya Galilaya yunaa a molooti wa Matuunda.”

Yesu apetile kho Nyoomba ya Matuunda

Maluko 11:15-19; Luka 19:45-48; Yohana 2:13-22

12Apenee Yesu ingelaa kho ibololo la Nyoomba ya Matuunda, akavadaga vantu vanaa angile vakhogola no khogolya vento vyawe omoo. Ajependola meja jawe ja evoo vanaa angile vakhogalolya mpia no khovependola vegoda ja vanaa angile vakhogolya njewa. 13Akavaweela, “Yandekhagwa kho Maandekho ga Matuunda, ‘Nyoomba yaane ilaawa ya kholombela.’ Ila onywenywe mwainogaja khowa ipinga la vasuki.”

14Yesu panaa angile apwale okhoo kho ibololo la Nyoomba ya Matuunda, vatulu ne valema, valevamopetela Yesu, nanoyo avapon'ya. 15Ila vapumya matambekho valaala palomwi ne valaangi va njaanga ja Musa, panaa valevawona matuntumu ganaa aleakhonoja Yesu, no khotegeela vana vakhojoma lolii kho Nyoomba ya Matuunda, vakhopalaa, “Akoliwee Mwana wa Daudi.” Valevakilwaa modugo. 16Gechoo vamowolya Yesu, “Mbi okhotegeela venaa vana ewa vakhopaala?”

Yesu akavaweela, “Avyenee nkhotegela. Panaa amba opwale kho owami wakhoo. Mbi mokhasoma Maandekho ga Matuunda ganaa gakhopaala, ‘Vana vado ne vakeke, valakhokolya.’ ”

17Apenee Yesu akavalekha epoo, akapeta khogona kho khahala kha Betania.

Yesu akholigita ipeke la motini

Maluko 11:12-14,20-24

18Igolo lakwe melawo, Yesu panaa alekhotuwaa Yelusalemu, itegelaa njala. 19Apenee alewona ipeke la motini mompelo ya njela, awotelela pepi, ila awopikha otokhola viligi, ila angile otite matiti topo. Papenee agowela, “Okhalele khanke viligi khwandelya leelo mpakha nsiko jensi patokhola odugo.” Apaponye ipeke eloo lanyaala.

20Vahemba panaa valevawona mpola eyoo, vakumyaa modugo. Vamowolya, “Kho kee ipeke ele lanyalaga timpu?”

21Yesu akavaweela, “Nkhovaweela khapanga, mbe mokhomogoomba Matuunda patokhola matungumalo, nanyu molakhowola khonoja kete venaa yaleyanojekha kho motini ogo, ninga mbe molakewela ketonda eke, ‘Okumpoke, wijutele mo ikhwa,’ ne ilanojekha gechoo. 22Ne mbe mokhogomba, chechensi kenaa molalomba Matuunda alavapela.”

Yesu akhowolwa khougela olaala wakwe

Maluko 11:27-33; Luka 20:1-8

23Yesu ingelaa khanke kho ibololo la Nyoomba ya Matuunda, ne panaa angile akholiga, molaala wa vanaa vakhopumya matambekho ne vakoombi va Vayahudi, viija khomowolya, “Okhonojaa mpola eje kho olaala kee? Ananuu yunaa akhopelagaa olaala owo?”

24Yesu akavaweela, “Nane ndavawolya mpola yemwii topo. Mbe molanipalela, nane ndavapalela nkhonojaa mpola eje kho olaala wa ananuu. 25Mbi, olaala wa Yohana wa khobatija alewapuma kwenii? Mbi alewapuma khochanya pa Matuunda ao khwa vantu?”

Apenee vandya khopalana venee kho venee, “Mbe, khomopalele kete alewapuma ‘Khochanya khwa Matuunda,’ alatowolya, ‘Kho kee alemokhamogomba Yohana Mobatiji?’ 26Khanke, mbe khomopalele, kete alewapuma ‘Khwa vantu,’ khokhovogopa vantu kete, vantu valatokhokholanga, kho nguno vensi vakhogoomba kete Yohana angile molooti wa Matuunda.” 27Gechoo vakamoweela, “Khokhamanya.”

Apenee Yesu nanoyo akavaweela, “Nane khotopo nevapalele kete nkhonoja mpola eje kho olaala wa ananuu.”

Mofwano gwa valomyana vawele

28Yesu endelelaa khopaala, “Mokhoheewa kee khougela mofwano ogo? Aleapwale muntu yomwii yunaa angile atite valomyana vawele. Akamoweela molomyana wa mwandyo, ‘Mwanane, leelo petaa onojee molemo kho mogoonda gwa mizabibu.’ 29Molomyana akamoweela, ‘Nsitile.’ Ila paulongolo agalolya maheewo gakwe, apeta khonoja molemo. 30Apenee ise apeta khomoweela molomyana wakwe modo, avivyoo kete venaa aleamowela molomyana wakwe mokolo, nanoyo amowelaa, ‘Ndapeta daada,’ ila angile akhapeta. 31Mbi, ananuu pakhate ya ewa vawele yunaa anojile kete venaa isewe alekhopogaa?”

“Valaala va Vayahudi vamoweela?”

“A molomyana wa mwandyo.” Apenee Yesu akavaweela, Khapanga nkhovaweela, vakungan'ya khodi palomwi ne viketu, valavalongola khwingela kho owami wa Matuunda. 32Kho nguno Yohana aleiija khwenyu ili avalagele njela ya khapanga, nanyu alemokhamogomba. Ila vakungan'ya khodi palomwi ne viketu alevamogoomba. Ninga panaa alemwagawona egoo gensi, alemokhagelokha no khogalekha mabe genyu no khomogomba Yohana.

Mofwano gwa valemi kho mogoonda gwa mizabibu

Maluko 12:1-12; Luka 20:9-19

33Yesu akapaala, “Tegeleli mofwano goonge. Aleapwale muntu yomwii wa mogoonda, yunaa alealemaa mogoonda no khovyaala mizabibu, nanoyo aleajengaa lukiinga khopilima mogoonda, asembaa ileende la khominyela viligi vya mizabibu no khojeenga kedindiga kho nguno ya valindeleli va mogoonda. Apenee akhodishaa mogoonda ogoo khwa valemi, nanoyo andya mosiingi gwa khopeta kho nse ya khotale. 34Ituungo la makongola panaa alelapikha, aleavalagelelya vatomami vakwe khwa valemi evoo, ili vapete vamosolele lwande ya makongola gakwe. 35Ila valemi evoo valevavagweela vatomami evoo, yomwii vamokowa, no yoonge valevamowolaga, no yoonge valevamokowa ne mabwee. 36Owa mogoonda aleavamotoma khanke vatomami vaange vinki khokela evoo va mwandyo. Ila valemi evoo valevavanojela vibe kete venaa valevavanojela evoo va mwandyo. 37Paudugo amotoma mwanakwe khwa valemi evoo, okho khwipalela, Oyo a mwanane, valamokholya. 38Ila valemi evoo panaa alevamowona mwanakwe, viweela, ‘Oyo amwenee mosaali wa mogoonda ogo, seji khomolage ne mogoonda owo olaawa osaali wisu.’ 39Gechoo, vamogweela, vamokenkha panji ya mogoonda, no khomowolaga.”

40Yesu avawolya, “Gechoo owa mogoonda gwa mizabibu panaa aliija, alavanoja mbi evoo valemi?”

41Vakamoweela, “Alavawolaga vibe patopo khovawonela losongo, khanke alavapela mogoonda ogoo vantu vaange vanaa amba vakhomopeela lwande ya makongola khwi ituungo.”

42Apenee Yesu akavaweela, “Mbi, mokhasoma kho Maandekho ga Matuunda?

‘Ibwee lenaa valesitaga vajeengi,

seji lawaaga ibwee ilaala la mosingi

Mwene amwene anogaja mpola eye,

nanelo a mpola ya khotokumya.’

43“Gechoo nkhovaweela, owami wa khochanya pa Matuunda, olawochwa khwenyu no khopeelwa vantu vanaa nkha Vayahudi vanaa vakhokhowola khonoja mpola jenaa Matuunda akhopooga. 44Gechoo, muntu yeyensi mbe alagwela kho ibwee ele, alawunekha, mbe lelamogwela lelamotulanga.”

45Valaala va vapumya matambekho ne Mafalisayo, panaa valevategeela mefwano ja Yesu, valevatembola kete angile akhovapaala venee. 46Gechoo, angile vakhopooga njela ya khomogweela, ila vavatungumula vantu kho nguno evenee valevakhomotembola a molooti wa Matuunda.

നിലവിൽ തിരഞ്ഞെടുത്തിരിക്കുന്നു:

Mateo 21: NTKIBL2025

ഹൈലൈറ്റ് ചെയ്യുക

പങ്ക് വെക്കു

പകർത്തുക