Mateo 20
20
Vatomami kho mogoonda gwa mizabibu
1“Yesu endelelaa khopaala, Owami wa khochanya pa Matuunda okhwipyana no muntu yunaa atite mogoonda gwa mizabibu, yunaa aleapuma makingilima kho nguno ya khopooga vantu va khomotomamela molemo kho mogoonda gwakwe. 2Panaa aleavapikha, igombya nanevo khovalepa malepo ga nsiko. Apenee akavakenkha kho mogoonda gwakwe gwa mizabibu. 3Panaa yaleyapikha saa jetato ya melaawo, apumaa panji akavawona vantu vaange vimelelaga kho lwande ya magolelyo, vatokhola molemo. 4Akavaweela, ‘Mopete nanyu khotomama molemo kho mogoonda gwaane, nane ndavalepa kete venaa ipogilwe.’ 5Apenee vapeta. Panaa yaleyapikha saa sita ja lyonse ne saa kenda mesee, aleapuma panji khanke, akavapeela vantu melemo ja khotomama momogoonda gwakwe. 6Panaa yaleyapikha ituungo la saa ikomi ne yemwii mesee, akapuma khanke panji apeta kho lwande ya magolelyo, akavapikha vantu vaange vimelelaga vatokhola molemo. Avawolya, ‘Kho kee mwimelelaga epa nsiko yensi ne akhamokhotomama molemo?’ 7Vamoweela, ‘Kho nguno khotopo muntu yunaa atopelagaa molemo.’ Omwene avawelaa, ‘Nanyu petagi motomami molemo kho mogoonda gwaane gwa mizabibu.’
8“Panaa yaleyapikha mesee, oyoo owa mogoonda akamoweela mwimeleli wakwe, ‘Oveete vatomami vensi ne ovalepe malepo gawe, ovalepe taali vanaa angile viijaga paodugo no khomalelya ne evoo va mwandyo.’ 9Apenee vatomami vanaa angile vandya molemo mesee, viija ili valepwe echoo kenaa muntu akhopokela kete malepo gensi ga nsiko. 10Apenee vatomami vanaa valevandya melaawo viija, angile vakhoheewa kete valalepwa malepo makolo khokela vayawe vanaa angile vandya pa odugo. Ila vensi valevalepwa malepo agagoo ga nsiko yemwii. 11Vantu evoo panaa alevapokeela malepo egoo, khomololomela owa mogoonda. 12Vapaala, ‘Vantu evoo vatomamaga molemo khwa saa lemwi topo, ila watolepaga avivyoo nanevo. Nasu khwanojaga molemo mokhamu nsiko yensi kho lyonse ikakha.’
13“Ila owa mogoonda akamoweela yomwii wawe ‘Molaasi,’ ‘Nkhakhopepela, nakholepaga kete venaa angile khwigombya, alewagoomba khotomama molemo gwa malepo ga nsiko yemwii. 14Gechoo, solaa malepo gakhoo, opete khokhaye. Onene nalomaga khomolepa muntu oyoo wa odugo kete venaa nakhopelaga ogwegwe. 15Mbi, nkhapogiwa khotomela mpia jaane kete venaa nkhopooga? Ao otite wiilu kho nguno onene nde mosoga?’ ”
16Yesu amalelya khwa khopaala, “Gechoo, vantu vanaa angile va odugo valaawa va mwandyo, ne vanaa valaawa va mwandyo, valaawa va odugo.”
Yesu akhopaala mala ya otato khougela khofwa kwakwe
Maluko 10:32-34; Luka 18:31-34
17Ituungo lenaa Yesu angile apwale monjela akhotaanta khopeta kho ihala la Yelusalemu, aleavasolaa vahemba vakwe ikomi ne vawele pampelo no khovaweela, 18“Kunaa, khopetile Yelusalemu, no okhoo Mwana wa Muntu alagwelwa no khokenkhwa mo mekhono ya vapumya matambekho valaala ne valaangi va njaanga. Nanevo valamotengemekha awolagwe. 19Nanevo valamokenkha khwa vantu vanaa nkha Vayahudi, evenee valamobyeda, valamofweemba ne nkhome ja ntila no khomonanamola pamosalaba, ila nsiko ya otato alafufolwa.”
Maloombi ga maye
Maluko 10:35-45
20Apenee moliji wa Zebedayo palomwi ne vana vakwe vawele, aleamwijela Yesu akatungama paulongolo wakwe no khomoloomba amwalye kento kemwii.
21Yesu akamowolya, “Okhopooga nkhonojele kee?”
Nanoyo akamoweela, “Nkholoomba ovagombele vanaane ewa vawele, yomwii ikhale kho lwande lwakhoo lwa molyelo no yoonge kho lwande lwakhoo lwa mokege, panaa olaawa opwale kho owami wakhoo.”
22Yesu akavaweela, “Mokhamanya kento kenaa mokholoomba. Mbi molakhowola khong'weela kekhombe cha magayo, kenaa ndang'wela?” Vamoweela, “Avyenee, tokhowile.”
23Yesu akavaweela, “Khapanga molang'wela kho kekhombe chaane cha magayo, ila khwikhala kho lwande lwaane lwa molyelo ao mokege, nkha molemo gwaane khovapeela, lwande ejoo a ja evoo vanaa Daada yaane avandalelaga.”
24Vahemba evoo vaange ikomi panaa valevategeela mpola ejoo, valevawasimbela evoo vadogo vawele. 25Apenee Yesu avetaa vensi palomwi no khovaweela, “Momanyile kete vimeleli va vantu vanaa nkha Vayahudi, vakhovatomekelya kengulu, ne vimeleli vakholageela olaala wawe khwa vantu vawe. 26Ekhawe gechoo khwenyu, ila muntu yeyensi yunaa apogile awee molaala movamoonga venyu, akhopogiwa awee motomami wenyu. 27Yunaa apogile awee wa mwandyo movamoonga venyu, akhopogiwa awee motomami wenyu. 28Kete venaa Mwana wa Muntu aleakhiija ili khotomekelwa, ila aleiijaa khovatomekela vantu no khopumya opanga wakwe ili khovayawola vantu vinki.”
Yesu akhovapon'ya vatulu vawele
Maluko 10:46-52; Luka 18:35-43
29Yesu palomwi ne vahemba vakwe panaa valevakhopuma kho ihala la Yeliko, idale ikolo la vantu lalelamoloonda khonyuma. 30Mompelo mwa njela monaa Yesu angile khokelaa, angile vapwale vatulu vawele. Apenee panaa valevategeela kete Yesu khokelaa epoo, alevajoma vapaala, “Meyaa, Mwana wa Daudi, khowonelee losongo.”
31Vantu evoo vinki, valevavakhakela vapombole, ila evenee vendelela khojoma, “Meyaa, Mwana wa Daudi, khowonelee losongo.”
32Apenee, Yesu akaimelela no khoveeta, avawolyaa, “Mokhopooga nevanojele chanuu?”
33Vakamoweela “Meyaa, tokhopooga miso gisu gawone!”
34Apenee Yesu avawonela losongo, avapalya miso gawe, ne apaponye vandya khowona, nanevo vamoloonda.
നിലവിൽ തിരഞ്ഞെടുത്തിരിക്കുന്നു:
Mateo 20: NTKIBL2025
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Kimbu @The Word for The World International and Kimbu Language translation, 2025. All rights reserved.
