Matiós 24
24
Yésuse umódógíe gugad guá idúl
(Mál 13.1-4; Lúk 21.5-7)
1Yésuse uwahám uguá idúl gá dɔ́mb, bebinene bég abákilɛn yɔ́ gá gual áneé ubílinsiginye hana bámáhágá idúl. 2Yésuse uwondinye bɔ́ áneé: «Mbuen nuáguánan buá gidigid? Yɔɔ́núɔyɔn buɔ́, búnyɛ meliŋ: Ta nidányɛ nídianándanbá dɔbigina uguá sɔ́gá nidányɛ, buá gidigid búánágadɛg.» 3Hana úmabá dugumine agá ɔŋuɛnyɛ huá bunimɛ́d ubuɔ́ bɔ́dɔ́ŋɔnaá áneé olifié, bebinene bég abákilɛn yɔ́, agá buáyɛ, obóhún yɔ́ áneé: «Diɔ́yídɛ́n ginɛŋ igiɛ́ búánábíalanɔ́ na bugilɛns ubúénédíyenú guól guáhɔ na man guá guísi.»
Magunsa má giɔ́bíga
(Mál 13.5-13; Lúk 21.8-19)
4Yésuse uwɔyidɛn bɔ́ áneé: «Bídédínyénénu áneé mɔndɔ udinúfúmíe. 5Gá giagiá giod gíónólon na ɔhɛ́n huámɛ gínúɔ́yɔn áneé: “Yaŋuá nnyaá Bémeyíde,” bénéfumenye giod giá bandɔ. 6Nuɔnɔ́bɔn bómon bidí na giyɔgɔd giá bidí. Bídédínyénenú! Nudibiá bugádɔ, búánigimanan áneé búésieg, gɔgaá búdianábá búganyɛ guman guá guísi. 7Gá giagiá, buán búmodi búánádigɛn gá bidí na sɔ́gá buán, niguili níónósogidie sɔ́gá niguili gá bidí, nsan yanábá uguá bibéyi biá guísi bímodi, guísi gúénéyiŋkimid. 8Muand umugányɛ gidigid múánábá magunsa má giɔ́bíga giá nubíényi. 9Bónónúgiónon gɔg gá núóbígónye, bɔ́núɔ́na, bindiádába gidigid bíánánúbina gámɛ gá ɔhɛ́n. 10Uguá ginɛŋ igigányɛ, giod giá bandɔ gɔg gíénén guágɔdɛ́m, bénéfudenyinye, bábinanɛn. 11Giod giá babánbán bá bebunebúné gíánáhámanɛn, gífumenye giod giá bandɔ. 12Ginɔ́nɛ́n giá giod giá bandɔ gíónóhog gá giagiá gifal gíénésegidinye. 13Gɔgaá, uwenésímbénú ambanɔ gueneg agá nsúgie wanábá aháŋánɔ. 14Bénésesenye Ginɔ́g giá Nsɔ́m giá Niguili igigányɛ uguísi gidigid.»
Mesis má buand
(Mál 13.14-23; Lúk 21.20-24)
15Nuanámáan gɔg mesis má buand dugumine agá gidányɛdányɛ giá hɔɔ́m hana ebunebúné Daniyɛ́l úmɔyɛ́d, ánaá uwanunanɔ́ wɔɔ́b! 16Abánábánɔ́ gɔg uguá gibéyi giá guísi giá Yudé, ánaá bɔ́bínɔhɔnɛn gibéyi giá iŋuɛnyɛ. 17Mɔndɔ uwanábánɔ́ agá nubamba, udisɔɔ́s gá guídɔ́nɔgɔ́l buand uguá giansɛ. 18Mɔndɔ uwanábánɔ́ uguá mesíge, udiond na gélém gá guídɔ́nɔgɔ́l gihuya giég. 19Meyú na bagándɔ bá ehum naá ebénéhúŋenyeé uguá mɔɔ́sɛ máguɔ́! 20Ánaá núbísógólonye gá gueleé muand umugányɛ, múdibíal uguá ginɛŋ giá meségeyembé ugúnya ana buɔ́sɛ buá giíndía giá bayúdɛn. 21Uguá mɔɔ́sɛ máguɔ́ bandɔ bɔ́nɔ́bígɔn giod, giɔ́bíga gíánábá giandá hómohómue gudɔ́mb igiɛ́ dímanyaá didilɛns, guanagɔns haná Uhaluá úmaŋánán guísi guesieg dabdab. Giɔ́bíga gímodi gídiánándabá gudɔ́mb igigányɛ. 22Búámábúdibá áneé Uhaluá umenuŋ mɔɔ́sɛ ma giɔ́bíga máguɔ́, késíe ta mɔndɔ omoómi umasábá wa sɔ́d. Gɔgaá, umenuŋ mɔ́ gá busió buá bandɔ ɔbɔɔ́ úmeyíd. 23Mɔndɔ wɔ́nɔ́mɔ́núɔyidɛn gɔg áneé: «Bémeyíde unyɛ aga», ugúnya ana «Unó egéné», nudiádáab guɔyɛd guég. 24Gá giagiá, na babánbán bá bebémeyíde na babánbán bá bebunebúné bánádigan, bála biseyi na melélíe, gá gueleé ala béfumie ta bebémeyíde. 25Ánaá núbídédínye, mménúsílídín.
Guól guá Muɔ́n wa mɔndɔ
(Mál 13.24-31; Lúk 17.23-24; 21.25-31)
26«Mɔndɔ gɔg úmɔ́núɔyidɛn áneé: “Bémeyíde uyɔ agá uhambɛ,” nudiɛ́d hɔ́. “Unó abínámbánɔ egéné,” nudiádáab buɔ́. 27Ɛɛ́ɛ, hana balányá wólonineé ɔmbɔ́g uhuɔ́ ɔhɛ́nyɛ húhámaninaá, wiídanɛn ɔmbɔ́g uhuɔ́ húhúénineé, nɔ́ guól guá Muɔ́n wa mɔndɔ gúánábánɔ́. 28Ŋŋímbíkɔ síánábígúsa hɔɔ́m ɔhɔɔ́ bilɔ́ŋ biánábanɔ. 29Egélém gá ginɛŋ giá giɔ́bíga, ɔhɛ́nyɛ húénédúmbie guhué, ohóli húdianándabunya, muódódi múénétúlúgen ugumɔn múguan eguísi, gúu súsɔ́n maŋaŋa amányá ugumɔn ménélígímineé. 30Guól guá Muɔ́n wa mɔndɔ gɔg gúénébídíye ugumɔn, maán gidigid gɔg má guísi mónóbísómonye, mánaán Muɔ́n wa mɔndɔ guonoólónín uguá gilɔnd, na giandá giá buŋaŋa na giandá giá nigúmi. 31Wanádɔ́m bilúna biég na giandá giá nsɛ́b gá dide bebémeyíde gidigid uguá egéndu ya guísi eŋim éníhi. 32Ɔ́bɔ́nɔ́n nuhuínyihuínyi nuá bufigié: Uguá ginɛŋ igiɛ́ madaáda mándanɔ́ uguá dúgasia, bufigié buónd bútɔsa, nulinsan áneé maándúga máganyɛ mɔdɔg. 33Bilɔŋ bímomi, banuá súsɔ́n, nuánágánán muand umugányɛ gidigid, linsánánɔ áneé Muɔ́n wa mɔndɔ uganyɛ mɔdɔg, uganyɛ agánɔ gá niíd niá giansɛ. 34Uguá meliŋ, yɔɔ́núɔyɔn buɔ́, nunam unuɔ núdianádɔ́mb kandabá áneé búmóbíhónyé. 35Na gumɔn na guísi múánádɔ́mb, gɔgaá, dugálɔ duámɛ dúdianádɔ́mb.»
Ta mɔndɔ udiálinsan buɔ́sɛ: Gúlénénu
(Mál 13.32, 35; Lúk 17.26-27, 34-35; 12.39-40)
36«Gɔgaá, na buɔ́sɛ ubugányɛ na gisigɛl igigányɛ, ta mɔndɔ udiálinsan, ta bilúna biá gumɔn, ta Muɔ́n, ta mɔndɔ, esié Síe úmúnyanaá úmuanyɛ omoómi. 37Hana búmabídúmbán uguá mɔɔ́sɛ má Noé, nɔ́ búánábánɔ buɔ́sɛ buá guól guá Muɔ́n wa mɔndɔ. 38Gá giagiá, uguá mɔɔ́sɛ amagányɛ gá gueleé ginenye gíásibá, bandɔ bámabá bányánan bábíhuán, bɔ́dɔ́ga bagándɔ ugúnya ana béduénen ŋŋɔndɛ siɔ́b, gueneg uguá buɔ́sɛ ubuɔ́ Noé úmébíŋín uguá ŋŋumba. 39Bámaságagualimanan ta buand gueneg haná ginenye gímesieg, igíéhúhie bɔ́ wɔ́s. Anagányɛ súsɔ́n guól guá Muɔ́n wa mɔndɔ gúánábánɔ́. 40Bandɔ báandɛ bánábá gɔg uguá mesíge, bɔ́nɔ́dɔ́bɔ́n omoómi, omodi usíen, 41bagándɔ báandɛ bágula agá nidányɛ, bɔ́nɔ́dɔ́bɔ́n omoómi, omodi usíen. 42Gígánánɔ gɔg mpunyá, gá giagiá nudíénye buɔ́sɛ ubuɔ́ Ɔgúná wánɔ wónólonú. 43Nuálinsan áneé, mɔndɔ wa nihiá wámálinsan gisigɛl giá budúg igiɛ́ uŋébi úgoóguólónú, ugaágíga, udigaánihɛn áneé bégús nimásɔ niég niá giansɛ. 44Buand buáguɔ́, banuá súsɔ́n, gígánánɔ gindényé, gá giagiá nuáguanyanyɛ gisigɛl igiɛ́ Muɔ́n wa mɔndɔ wónólonú.
Edúmébi unyaá gilád
(Lúk 12.42-46)
45Edúmébi ulúm unyaá gilád na meéne uyɔɔ́, ɔgúnɔ́gɔ́n úmédénígínyé uguá ɔduá huég huá bandɔ, áneé weéŋen bɔ́ gunyá uguá gisigɛl igiɛ́ bɔ́yɔnɔ́? 46Beseé ubá na edúmébi uyɔɔ́ ɔgúnɔ́gɔ́n wénégégienú wala buóli ubugányɛ. 47Uguá meliŋ, yɔɔ́núɔyɔn buɔ́, wenédéníginye yɔ́ uguég guá bunɛ́m gidigid. 48Gɔgaá, búmabá gilɔg giá edúmébi, gímɔ́yɛd egég gá ɔdɛ́m áneé: “Ɔgúnɔ́gɔ́n wamɛ, udigaásugɔl wa síond,” 49wɛɛ́d gá gide biendinyi biég biá buóli, unyánan wond ubíhuán magɛ́b na bihuɔ́gíba, 50ɔgúnɔ́gɔ́n wa edúmébi ugányɛ wonólésieg buɔ́sɛ ubuɔ́ údiálinsan naá uguá gisigɛl igiɛ́ údiálinsan, 51wonóbígie yɔ́ wond ugúŋɛ́ɛd yɔ́: agányɛ hɔ́, na masiana na bíbanda bigelédu múánábanɔ.»
നിലവിൽ തിരഞ്ഞെടുത്തിരിക്കുന്നു:
Matiós 24: EKM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
