Matiós 22
22
Nsab ya giandá giá budɔ́mb
(Lúk 14.16-24)
1Egélém, Yésuse uwanduguɛ́d gá gálgal uguá nsab wɔya áneé: 2«Niguili niá gumɔn nínyɛ anda mpónyé na ofuŋ uhúmálá budɔ́mb buá nuɔ́ndɔ́n nuá uhaŋ huég. 3Uwadɔ́m bedúmébi bég áneé bénegélídíe bɔdɔ́ŋína gɔgaá, ebéen guól. 4Uwandadɔ́m bedúmébi bómodi gá guɔyidɛn bɔdɔ́ŋína bá budɔ́mb áneé: “Ndénu, mmámánúguaŋanan giansɛ, mmándásúmba biandá biá mélúke na manyam mámɛ, buand gidigid búganyɛ mɔdɔg, ógúnónónu gá budɔ́mb buá nuɔ́ndɔ́n.” 5Gɔgaá, ta mɔndɔ umɔsɔ́gɔ́lɔn gisigɛl. Abídan gɔ́b gá masɔ́m, bómodi bíídan uguá mesíge, ɔbɔ gá nionyi. 6Bódodi ebégimben gɔg bedúmébi, obóbígonye bɔ́ obónd ɔbɔ́na bɔ́. 7Ofuŋ uhúɔ́b ilúnd, uhúádɔ́m ndíd siá nsénsi siég isíɔ́na boónónyi abagányɛ, abágɛ́ɛn gidɔŋ giɔ́b yoógi. 8Gúu, ofuŋ húmɔyídɛ́n bedúmébi bég áneé: “ Gunyá guá budɔ́mb gúganyɛ mɔdɔg. Gɔgaá, bɔdɔ́ŋína básásanigimanan na guɔ́. 9Idánánɔ gɔg agá maándúgana má ŋŋil, nudɔ́ŋɔn bandɔ gidigid ɔbɔɔ́ núgeégégienu.” 10Bedúmébi abagányɛ abɛ́d hana ɔgúnɔ́gɔ́n wɔb úmɔ́yɛd agá maándúgana má ŋŋil, abágúsa bandɔ gidigid ɔbɔɔ́ bémegégíe, na bá beseé na bá gilɔg, giansɛ giá budɔ́mb igíóhón. 11Ofuŋ uhúébíŋín gɔg gá bíyɛg bɔdɔ́ŋína, uhúédémbie eŋís uguá mɔndɔ umaásádibia bisɔn biá budɔ́mb.» 12Uwɔyidɛn yɔ́ áneé: «Ogúl wamɛ, naánanyá ésébíŋín aga kanda bisɔn biá budɔ́mb?» Mɔndɔ ugányɛ umosúguondinye yɔ́. 13Agányɛ gɔg ofuŋ uhúɔ́yidɛn bedúmébi bég áneé: «Ánaá núgɔ́d yɔ́ na dugɔ́nd na imbɔ́g, nunɔh yɔ́ uguá mbíne ya nígadá. Hɔ́ ugaábaŋanɔ́ wond ubíbanda bigelédu.» 14Yésuse uwɔyɛd áneé: «Ɛɛ́ɛ, bɔ́mɔdɔ́ŋɛ́ɛn giod, gɔgaá ebéyid bugídígíd.»
Lampɔ́ wa Sesál
(Mál 12.13-17; Lúk 20.20-26)
15Bafalisiɛ́ŋ abánagɔ́d gɔg idɔg gá gueleé bégusinye Yésuse na ŋŋóhúnín. 16Abádúmɛ́ɛn yɔ́ gɔg bebinene bɔ́b ɔlɔŋ na bandɔ bá gimbi giá Helód, gá guɔyidɛn Yésuse áneé: «Ehuínyihuínyi, diálinsan áneé ɔɔ́guɔya hómohómue, eéhuínyihuinye ŋŋil siá Uhaluá uguá gindényé, ediéguénin súsɔ́n bandɔ eŋís, adiábíyigan bandɔ uguɔ́b guá idényi. 17Díɔ́yídɛ́n gɔg nuáhɔ nugedie gá buónyi ubuɔ: búánigimanan áneé disuanɛn Sesál ofuŋ uhugɔ́n lampɔ́ lí didisuá?» 18Gɔgaá, hana Yésuse úmálɛns mamb mɔ́b, úmuanyɛ gɔ́b gɔg áneé: «Bandɔ bá mamb, gá giagɛ núámbanɔ́ guŋusinye? 19Ánaá núndíye ŋŋúme iyɛɛ́ núsuananaá lampɔ́ na yɛ́.» Ebédíye yɔ́ gikɔ́ŋ giá ŋŋúme gímomi. 20Yésuse uwoóhún bɔ́ áneé: «Gineéŋun igiɛ na ŋŋɔ́ŋɛ isiɛ múnyɛ muányɛ?» 21Obóndinye yɔ́ áneé: «Múnyɛ muá Sesál.» Yésuse uwondinye bɔ́ gɔg áneé: «Ánaá núóndinye Sesál ubúnya buá Sesál, núóndinye Uhaluá ubúnya buá Uhaluá.» 22Bɔ́mɔɔ́mɔ́b ŋŋondínyi igányɛ, abáyíka buɔ́ giod. Abánihɛn yɔ́ abádɔ́mb.
Guhám guá bilɔ́ŋ uguá bibɛ́l
(Mál 12.18-27; Lúk 20.27-38)
23Buɔ́sɛ buáguɔ́, nsánsáŋúlía siá basadusiɛ́ŋ isíákilɛn Yésuse. Basadusiɛ́ŋ bádiáguádáaban áneé bilɔ́ŋ bíánáháman uguá bibɛ́l. Obóhún yɔ́ áneé: 24«Ehuínyihuínyi, Mɔ́sɛsa umɔɔ́ŋ áneé mɔndɔ úmégué kanda muɔ́n, gisɔ́nd giég gídɔ́ga gisí giég, gá bíénin yɔ́ baán. 25Henyé, mɔndɔ uguásɔ umabianán baán bátíndádɔ nomue. Wa busió uwɔdɔ́ga ugándɔ, uwegué ta gusió muɔ́n, uwanihinɛn gisɔ́nd giég ugányɛ weg. 26Bilɔŋ bímomi wa gáandɛ, wa gádádɔ, bem bátíndádɔ nomue ebégué. 27Ɔgɔ́b gélém, ugándɔ súsɔ́n uwegué. 28Ahá gɔg, uguá buɔ́sɛ buá hám uguá gibɛ́l wanábá ugándɔ waányɛ uguá ɔlɔŋ huá bisɔ́ndɛ bítíndádɔ nomue? Gá giagiá bim bítíndádɔ nomue bímɔdɔ́gá yɔ́.» 29Yésuse uwɔyidɛn bɔ́ áneé: «Nunyɛ uguá giguá, gá giagiá nudiálinsan ta Bidányɛdányɛ biá Ŋŋɔ́ŋɛ, ta buŋaŋa buá Uhaluá. 30Ɛɛ́ɛ, uguá ginɛŋ giá hám uguá gibɛ́l, bɔ́diɔnɔ́ndɔdɔ́ga bagándɔ, gɔgaá bánábá haná bilúna ibínya ugumɔn. 31Mmába hana gá hám uguá gibɛ́l guá bilɔ́ŋ, numasúguanɔn nugálɔ unuɔ́ Uhaluá únúɔ́yɔnaá: 32“Nnyɛ Uhaluá wa Áblahám, Uhaluá wa Isák, Uhaluá wa Yɔ́kɔba.” Udibá Uhaluá wa bilɔ́ŋ, gɔgaá, unyɛ waá ɔbɔgɔ́sɛ.» 33Biíŋ bímɔɔ́mɔ́b dugálɔ udugányɛ, nuhuínyihuínye nuég unúégimbin bɔ́ agá ɔdɛ́m.
Gigodi igigɔ́n
(Mál 12.28-31; Lúk 10.25-28)
34Bafalisiɛ́ŋ bɔ́mɔɔ́mɔ́b áneé Yésuse umégíd basadusiɛ́ŋ niíd, abábígúsígan. 35Elinsibigodi omodi uguɔ́b guá ɔlɔŋ, uwoóhún Yésuse gá gusinye yɔ́ áneé: 36«Ehuínyhuínyi, uguá bigodi gidigid, gílúm igínya igigɔ́n?» 37Yésuse uwondinye yɔ́ áneé: «Ɔnɔ́ya Ɔgúná Uhaluá wahɔ na ɔdɛ́m huáhɔ gidigid, na bɔndɔ buáhɔ gidigid, na nugedie nuáhɔ gidigid. 38Gígínya gigodi igigɔ́n gímuanyɛ súsɔ́n giá busió.» 39Giá gáandɛ igínya mpónyé naá giá busió gígínya áneé: «Ɔnɔ́ya sɔ́gá mɔndɔ hana aŋuá mbánan.» 40Bigodi ibigányɛ bim bíandɛ, bíbígimbenu nuhɔ́nhɔ́n nuá bebunebúné na bibídína.
Muɔ́n wa Dáfide na Ɔgúná weg
(Mál 12.35-37; Lúk 20.41-44)
41Hana bafalisiɛ́ŋ bámábígúsɛ́d, Yésuse uwoóhún bɔ́ ŋŋóhúnín áneé: 42«Giagɛ igiɛ́ núɔ́yɔnɔ́ gá busió buá Bémeyíde? Unyɛ muɔ́n waányɛ?» Obóndinye yɔ́ áneé: «Unyɛ muɔ́n wa Dáfide.» 43Yésuse gɔ́b áneé: «Naánanyá gɔg Dáfide uyɔɔ́ Gileénde gímendényé, úmɔdɔ́ŋɛ́ɛn yɔ́ áneé “Ɔgúná?” Gá giagiá, Dáfide umɔyɛ́d áneé:
44“Ɔgúná Uhaluá umɔyídɛ́n Ɔgúná wamɛ áneé,
dugúmín ɔmbɔ́g huámɛ uhunɛ́m,
gueneg hana yanálanɔ́ áneé amáníganɛn babɛlɛ́bɛl báhɔ.”
45Dáfide gɔg úmɔ́dɔ́ŋɔn yɔ́ áneé “Ɔgúná,” naánanyá únya wa bá muɔ́n weg?» 46Ta mɔndɔ uguɔ́b guá ɔlɔŋ umosúguondinye yɔ́. Gugɔns buɔ́sɛ ubugányɛ, mɔndɔ umosónduguóhon yɔ́ ŋŋóhúnín.
നിലവിൽ തിരഞ്ഞെടുത്തിരിക്കുന്നു:
Matiós 22: EKM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
