Matiós 21
21
Yésuse umébíŋín Yelusalɛ́m
(Mál 11.1-11; Lúk 19.28-40; Sáŋ 12.12-19)
1Yésuse na bebinene bég bámaágákilan Yelusalɛ́m, ebéneg mɔdɔg na tísɔna wa Bɛdfagé, agá ɔŋuɛnyɛ huá madɛ́ ɔmɔɔ́ bɔ́dɔ́ŋɔnaá áneé olifié. Yésuse uwadɔ́m gɔg bebinene bég báandɛ. 2Úmuanyɛ gɔ́b áneé: «Idánánɔ uguá gidɔŋ igínya uguánɔ guá busió igíné, nugeédúmbie guán gigándɔ giá abaŋabinúhá na muɔ́n weg asugán, sulúnénénu yɔ́, nuŋólín na yɔ́. 3Bómónúóhún, nuondinye áneé: Ɔgúná únyaá nsan na buɔ́, bágánúnihɛn nuɛ́d na bɔ́ hɔ́nɔhɔ́.» 4Ubugányɛ búmabíal gɔg gá gueleé nugálɔ unúmahám uguá niíd niá ebunebúné núbíhónye, unumabá áneé: 5«Ánaá núɔ́yidɛn ŋŋɔndɛ ya Siyɔ́ŋ áneé: Ndé Ofuŋ huáhɔ uhuɔ húóloneé, húdiébíbúlúgenye, húnyɛ dadimina uguá gigándɔ giá abaŋabinúhá na muɔ́n weg.» 6Bebinene abɛ́d abál haná Yésuse úmɔyídɛ́n bɔ́. 7Oból na abaŋabinúhá na muɔ́n weg, ɔbɔ́dɔ́bígɔn bihuya biɔ́b uguá biɛ́, Yésuse uwadadimɛn guɔ́. 8Giandá giá giíŋ igíábanigan bihuya biɔ́b uguá gibala, bómodi básúmba dúgasia biá madɛ́, bábanigan#21.8 Uguá ginɛŋ giá Yésuse bámabá bábana bisɔn na biáŋɔ gá mpínényi. uguá ŋŋil. 9Biíŋ ibímebinén yɔ́ naá ibímandá uguég guá busió bíhehenye bíɔ́ya áneé: «Osána gá busió buá Muɔ́n wa Dáfide, Unyɛ asayán uwoóloneé uguá ɔhɛ́n huá Ɔgúná, Osána naá unyaá hádɛ ugumɔn.» 10Yésuse umeémébíŋín Yelusalɛ́m, tísɔna gidigid uweyiŋkimid, abɛ́d gá guóhon áneé: «Búnyɛ ányá yɔ́ egéné?» 11Biíŋ ibíóndinye áneé: «Búnyɛ ebunebúné Yésuse wa Nasalɛ́d, guonoólín agá tísɔna wa Galilé.»
Yésuse waágúŋa beduísi muand uguá idúl
(Mál 11.15-19; Lúk 19.45-48; Sáŋ 2.13-16)
12Egélém, Yésuse uwebíŋín uguá idúl uwɛɛ́d gá gúŋa beduísi muand naá abámabá bɔ́nda, uwegusenye dubáŋ duá benúgiŋúme na indig siá beduísi mbɛŋ siá nsɔŋ mbúlúa. 13Uwond uwɔyidɛn bɔ́ áneé: «Bɔ́nɔ́dɔ́ŋɔn giansɛ giámɛ áneé giansɛ giá mbísógóli, gɔgaá banuá, nuéyé giɛ́ mpana ya beébi.» 14Beheguhégu na bíŋándúnyá abákilɛn Yésuse uguá idúl, uwoóndúgonye bɔ́. 15Gɔgaá, bedúmbinusámb abagɔ́n na boóŋi, bámaámáan bimué biá muand ibiɛ́ úmalá na biayɔ ibímehéhényé uguá idúl áneé: «Osána gá busió buá Muɔ́n wa Dáfide!» Abɛ́d gá guɔ́búlɔbɔl. 16Ɔbɔ́yidɛn yɔ́ áneé: «Ɔɔ́guɔ́bɔn ubuɔ́ biayɔ bíɔ́yɔnɔ́ a?» Gɔgaá, Yésuse uwondinye bɔ́ áneé: «Ɛɛ́ɛ, numanyɛ nudianɔ́n Ŋŋɔ́ŋɛ iyɔyɔnɔ́ áneé: “Amal áneé ta baán bá biayɔ ta babugadiá bébúlúgenye a?”» 17Egélém uwosió bɔ́ agányɛ, uwahám gá guɛ́d agá tísɔna wa Betaní. Hɔ́ úmabídímɛ́n.
Yésuse umɔlɔ́m figié
(Mál 11.12-14, 20-25)
18Yésuse umoógósiond agá tísɔna meémbélénye, nsan iyanúmɛ́d yɔ́. 19Umaámáan budɛ́ ubuɔ́ bɔ́dɔ́ŋɔnaá áneé figié mɔdɔg na ŋŋil, uwakɛl hɔ́ gá guán mmába búgódi bibɔg, gɔgaá búmabíanán pɛ́ŋ biányɛ na biányɛ. Uwɔyidɛn buɔ́ áneé: «Edienéndesíen ehúm.» Hɔ́nɔhɔ́ figié ugányɛ uwagɔ́d. 20Bebinene bámaámáan anagányɛ, abáyíka buɔ́ bɔ́ya áneé: «Naánanyá hɔ́nɔhɔ́ figié úmágɔ́d?» 21Yésuse uwondinye bɔ́ áneé: «Uguá meliŋ, yɔɔ́núɔyɔn númábia guágɔdɛ́m nuond nudiágán mpálɔ, nudienésúgín gá gual ubuɔ́ mmal figié gɔgaá, númɔ́yidɛn ɔŋuɛnyɛ uhuɔ áneé: “Bálɔ́g aga, gónobiómbín uguá máŋ.” Búbíal nɔ́. 22Buá gidigid ubuɔ́ núɔ́nɔ́ŋɔnaá uguá mbísógóli naá uguá guágɔdɛ́m, nuanádáŋáab buɔ́.»
Hanyɛ agaá ihiligine hiá Yésuse híólonineé?
(Mál 11.27-33; Lúk 20.1-8)
23Yésuse umeémébíŋín uguá idúl, bagɔ́n bá bedúmbinusámb na bɔgɔ́ga bá buán abákilɛn yɔ́, uguá ginɛŋ igiɛ́ úmabá uhuínyihuinye, ɔbɔ́yidɛn yɔ́ áneé: «Uguá ihiligine hiányɛ alanɔ́ buɔ́? Ányá uwaáhuá ihiligine hiáguɔ́?» 24Yésuse uwondinye bɔ́ áneé: «Yaŋuá súsɔ́n ŋŋaánúdɔ́d ŋŋóhúnín pɛ́ŋ imoómi, númóŋondinye, yaŋuá súsɔ́n ŋŋɔbɔ́dɔnúɔ́yidɛn uguá ihiligine hiányɛ yalanɔ́ buɔ́. 25Giyuminye giá Sáŋa gímoólónín hanyɛ? Ugumɔn lí uguá bunyɛ bandɔ?» Abɛ́d gá ségenye bámuanyɛ na bámuanyɛ, bɔ́bíɔ́yɔn áneé: «Dímóndinye áneé: “Gíóguólonin agá Uhaluá”, ugɔɔ́díɔ́yidɛn áneé gá giagɛ númásúguág ɔdɛ́m gɔg? 26Dímɔ́yɛd súsɔ́n gɔg áneé: “Gíóguólonin agá bunyɛ bandɔ”, digódi bugádɔ na giíŋ, gá giagiá gíábídága áneé Sáŋa umabá hómohómue ebunebúné.» 27Obóndinye gɔg Yésuse áneé: «Basuá didiényi.» Yésuse uwondinye bɔ́ áneé: «Ahá! Ta yaŋuá súsɔ́n ndigɔɔ́núɔ́yidɛn buhɔɔ́m ubuɔ́ ihiligine hiámɛ híólonineé gá guala muand umugányɛ.»
Nsab ya baán báandɛ
28Banuá nuégedenye áneé giagɛ gá buónyi ubuɔ? Mɔndɔ umabianán baán bég báandɛ, uwanaán múɔn weg wa busió gá guɔyidɛn yɔ́ áneé: «Muɔ́n wamɛ, nsígín hínen analá buóli uguámɛ guá mesíge má fínyi.» 29Uwondinye síe áneé: «Ndiɔ́guɔya.» Egélém, uwesíen úbísómonyé uwɛɛ́d gá buóli. 30Uwanduguɛ́d agá muɔ́n wa gáandɛ, uwɔnduguɔyidɛn yɔ́ buand buáguɔ́ búmomi. Muɔ́n wa gáandɛ uwondinye áneé: «Ŋŋáguɛ́d ɔgúnɔ́gɔ́n.» Gɔgaá umasúguɛ́d. 31Uguá baán abagányɛ báandɛ, ulúm umáal guɔyɛd guá síe? Obóndinye áneé: «Wa busió.» Yésuse uwondinye bɔ́ áneé: «Yɔɔ́núɔyɔn, búnyɛ hómohómue, beduísilampɔ́ na biendéndi biá bagándɔ bénebue guɛ́d uguá Niguili niá Uhaluá gánɔ. 32Ɛɛ́ɛ, Sáŋa eyumínyi umoól gá núdíye ŋŋil ya gindényé numasúguág ɔdɛ́m. Henyé gɔg áneé beduísilampɔ́ na biendéndi biá bagándɔ abádáab guond numaámáan anagányɛ, númesébídun gá guágɔdɛ́m uguég.»
Nsab ya bilɔg biá belibuóli
(Mál 12.1-12; Lúk 20.9-19)
33Yésuse uwɔnduguɔyidɛn bandɔ nsab iyɛ áneé: «Ánaá núbídɔ́lígɛn nsab iyɛ. Mɔndɔ omodi umal mesíge má budɛ́ ubúhúmenú bibɔg ibiɛ́ bɔ́dɔ́ŋɔnaá áneé fínyi, uwegéŋélidie mɔ́ na ɔmɛnd, uwaduá ɔnɔ́g, uwahág ɔlɛ́ŋ, egélém uweéŋin belibuóli, uwɛɛ́d gá uŋand.»
34Ginɛŋ giá guoge gímeémésieg, uwadúmɛ́n bɔ́ edúmébi weg áneé bádúmɛ́n yɔ́ biég biogoge. 35Gɔgaá, bémi ebégimbin bedúmébi, ebénúbe wa busió, ɔbɔ́n wa gáandɛ, abádúdan wa gádádɔ adányɛ. 36Ta anagányɛ, mɔndɔ wa mesíge uwandadɔ́m bedúmébi bómodi giod gudɔ́mb uŋand huá busió, abándugual nɔɔ́nɔb bilɔŋ bímomi. 37Agá nsúgie uwadúmɛ́n bɔ́ muɔ́n weg na gedenye áneé: «Bágábia bugádɔ na muɔ́n wamɛ.» 38Belibuóli bámaámáan múɔn weg, ɔbɔ́bíɔyidɛn áneé: «Ndénu egíndigínd uyɔ, ánaá diɔ́n yɔ́, bigind bíɔ́bɛ́ɛn naánasɔ.» 39Abádágɔ́n yɔ́ gɔg, ebéselebenye yɔ́ gá hémie yɔ́ uguá ɔmɛnd ɔbɔ́nɔɔ́n yɔ́. 40Ɛɛ́ɛ, uguá ginɛŋ igiɛ́ mɔndɔ wa mesíge wónólonú, wanál naánanyá na bandɔ abagányɛ? 41Obóndinye yɔ́ áneé: «Wonódóŋinye bugaga áneé bɔ́n boónónyi abagányɛ kandabíyɛg gélém, ugɔ́l mesíge még weéŋin bandɔ bódodi abánádáabanaá guéŋin yɔ́ biég biogoge uguá ginɛŋ igiɛ́ wɔ́yɔnɔ́.»
42Yésuse uwɔyidɛn bɔ́ áneé: «Numanyɛ nudianɔ́n Ŋŋɔ́ŋɛ iyɔyɔnɔ́ áneé:
Igɔn ihiɛ́ behégi bómomb,
híhímasiáyɛ igɔn hiá mbímba,
búnyɛ buóli buá Ɔgúná,
búnyɛ bunɔ́g agásɔ gá eŋís.»
43Yésuse uwɔnduguɔyidɛn bɔ́ áneé: «Bɔ́nɔ́núhɔgɛn Niguili niá gumɔn, gá guéŋin buán ubúénéhúmenú binɔ́g biá bibɔg. 44Mɔndɔ uwanáguinaá uguá igɔn ihigányɛ híánágand yɔ́, igɔn gɔg ihigányɛ hímaguɛn mɔndɔ híánágulɛd yɔ́.» 45Bagɔ́n bá bedúmbinusámb bá Uhaluá na bafalisiɛ́ŋ bɔ́mɔɔ́mɔ́b nsab igányɛ, abálɛns áneé buónyi ubugányɛ búábíyigan bɔ́. 46Abɛ́d gɔg gá guamba áneé bégimbin yɔ́, gɔgaá bémedíne giíŋ gá giagiá gímɔgɔ́lɔ́n yɔ́ haná ebunebúné.
നിലവിൽ തിരഞ്ഞെടുത്തിരിക്കുന്നു:
Matiós 21: EKM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
