လုကာ 12
12
တာဖင်သနဲဒုန်းကအော်သနဲနဲဒုန်းပရာမာရီမာရောက်နဲတဟယ်အော်
1အနူဒေါ် ဘွေယေရှုကထိတ် ခွိုက်က်ရိန်နူ ပရာအော်ဒုန်းအထော်တဟယ် လေတွန်းလေတော့ဘာရောင့်ဘုန် ယီးဘာရောင့် နူလော် ဘွေအုတ်ဘာ့ဇိန်အခီးပရာတဟယ်ဒေါ် “အော်သနဲသူးနဲဒုန်း ဖာရိရှဲတဟယ်အမူ#12:1 မူ မူနူမယ် မွက်တာတမူးဒုန်း ဘာတာမာအော်ဘုန်းမုန့်ကား မကိုက်မုန့်ကအော်အာ့ထောင်နဲခူးနူလော်။ ဒုန်းမယ် အထိတ်မာအနဲတဟယ်နူကာနူလော်။ 2ကအုတ်ဆူအလားဟွတ်တာ၊ ဒေါ်အမာဘီမာဘု့ တာတဟယ်နူ သူးကသိုက်ငှားဘာလော်။ 3တာပရွီဒုန်းအအော်ကေးခု့ကေးနာကား တဟယ်နူ သူးကသိုက်ငှားတာမကိုက်မုန်းရှိက် လောင်ကား တာပရွီးနူလော်။ သူးထုန်းဘူးကဒပ်ဒေါ် သူးပရွီးဒယော့ မသောနူမယ် သူးငေါ့ကပရီမကိုက် သူအော်ဒုန်းသင်ခူဒေါ် သူးကာ့ကရီးငေါ့ နူလော်” နူမယ်ဘွေ ဖင်သနဲထောင်တာပရွီး နူလော်။
တာသဘိုက်ဖားဘွေ
4“ငေါ်ပရာဇာ့သဘိုက်ပရာတဟယ်နူကာ၊ အဝေသူးတဟယ်နူ အမာသူးနာဒါမသောမယ်၊ အဇာ့မာဒါတာကူးရွန် တမီးကိုး၊ 5သူးနဲခူး၊ ဘွေကအော် တပရာလော်နူလော်။ ဘွေနူမယ် ပရာဒုန်း အဖိတ်ဇိန်သူးသာ့ သမူးဒါဒေါ် ဇာ့ကာ့ခူနူ အသုန် သူးတုန်းငရဲအုန်းကူးဒါနူလော်။ ဘွေနူမယ်ပရာဒုန်းသူးဘာသဘိုက်အော်နူလော်။ 6တာဆားထူဖရိုက်ဒေါ် ရူးနု့ဘာလော်။ မသော်မယ် ဘွေနူ အဇာ့သားပိန်ထူ ဖရိုက်တဘားတဘာကိုး။ 7သူးကောကော့ခူ ကူးလွန်အော်ဘွေ့ဘောနူ အတွက်နဲယူ့နူလော်။ အခူစားသူးဇာ့သဘိုက်ကာ၊ သူးနူ သူးငူဒူ ပရီဒူဒေါ်ထူဖရိုက်တဟယ်နူလော်။”
တာအုန်းလောင်ဘွေခရစ်
8“သူးတဟယ်နူ သူးကနဲ ပရာတဟယ်ဒုန်း ပါမယ်ဘွေ အခီးအပရာတဟယ်နူလော်၊ ဒေါ် ပရာဖော့ခူး နူဒုန်းတနဲဖော့တဟယ် အလားမောက်နူ ကနဲဒုန်းအဝေသူးမယ် ခေးခီးခေး ပရာတဟယ် နူလော်။ 9နဲမယ် သူးတဟယ်နူဒုန်း အလားကေးခေးနူဒုန်းဘွေအတနဲဖော့အလားမောက်နူ အဝေကဘာတာလားကေးအဝေသူးနူလော်။ 10ပရာဒုန်း အပရွီးထော ပရာဖော့ခူးနူ တာဘလိုင်ဝေ ဒါမသော်မယ်၊ အကပရွှီးကမာသာ့စောင်းဆူးမယ် အဇာ့နူးဘာတာဘလိုဝ်ဘလွတ်။ 11ပရာတဟယ်နူ အကကာ့လေသူးဒုန်း ယုဒတာအော်ဘလုန်အလဲ၊ ပရာခူပရာနက် အလားမောက် ခိန်နူ သူ့ကဘာပရွီးကမားနူဇာ့သဘိုက်ကာ၊ 12တဘလောဖော့နူ ဘွေအသာ့စောင်းဆူးနူ ကသွတ်သူးဒုန်း သူးကဘာနဲ ကမားကမား” တဟယ်နူလော်။
တာအဒိုးဒုန်းအမွက်ပရာဒူယောင်းဖော့ခူးဒုန်းအနာကွန်းဒူ
13ပရာပူဒူအကားနူ ပရာအော်တပရာ လွိုက်ဘွေဒုန်း “ဘွေ၊ ဆိန့်နူးပါ့ခေးဝေးခူးဒုန်း ပါဖားကသူးဘုန်နူ အဖင်ဘက်ဆော့ပါ တာကရုတ်တာကရူတဟယ်ဆော့” နူလော်။ 14ဘုန်နူ ဘွေနဲဇိန်ဝေဒုန်း “နာဒေါ်နာဝေးအဘုန်ဇုန် ခေးကဖင်ဘတ်တာကရုတ်တာကရူနူးခူး ပါးဖင်ခေးအခွက်ပရာ” နူလော်။ 15ဘုန်နူ ဘွေနဲထိုက်သားမူး ပရာတဟယ်နူဒုန်း သူးဇာ့သားဂွေးသာဒေါ့ကာ၊ တာဇု့တာလဲဒုန်း အအော်ဒေါ်သူးတကူးနူ အဇာ့မာကွားကိုက်တောင်သူးကိုး နူမယ်ဘွေအတာ ပရွီးနူလော်။ 16ယေရှု ပရွီးဘာ ပရာတဟယ်ဒေါ် ငေါ့စာပရီးတတော်နူလော်၊ ငေါ့စပရီးကူးနူ “ပရာဒူယောင်းတပရာ ဒုန်းအဆုန့်တုန်ကူးနူ နူးဘာ ဘုတ်ဟွန်းသာအော်ကေးနူလော်။ 17အဝေနူ ခေးကဘာမာကမား၊ ခေးကလားရောက်ဘုတ်ဟွန်းနဲခူး အကလဲဇာ့နဲဘေကိုး” နဲလောင်အနဲနူလော်၊ 18ဘုန်ခိန်နူ “ခေးကဘာမာကမားနူမယ် ခေးသိုက်ဟုန်း ဘုတ်ဖောင်းယူတကူးနူ ကပရပ်ကေးဘုန်၊ ကပရောင်ဇိန်ဘုတ်ဖောင်းဒုန်းအဒူ တမာလော်၊ ဘုန်ကလားနူးဘုတ်ဟူးဒေါ် တာကူးရူတဟယ်နူလော်။” 19ဘုန်နူ၊ အနဲလောင်ဇိန်အနဲဒုန်း “ခေးလားရောင့် တာလဲဒုန်းအရောက်တဟယ်ဒုန်းအားနိန်အားလားကူးဟုန်း၊ ခေးကအော်သာ့အော်ယာ့၊ အယ်၊ အွန်း၊ ကအော်ဒုန်းတာသနောင့်သဆူးကူးနူလော်” အဝေနသု့တာနူလော်။ 20နဲမယ် ဘွေနဲဝေဒုန်း “နာနူနဘလွတ်၊ ယိုးဟာ့ယိုးနူနာကသူးလော်၊ အခူစား တာဒုန်းနလားရောင့် တာဇု့တာလဲ၊ တာဒူတာထူးတဟယ် ကတူးပါးပရာအစဓိန်းကူး။ 21ပရာဒုန်းအလားရောင့် တာဇု့တာလဲ တဟယ်နူဒုန်းဘွေအလောက်မောက်နူထွားတာဗေါင်းတာဆားနူလော်” မယ်ဘွေအတာသွတ်တာပေါဝ်နူလော်။
ဇာ့အော်ဒေါ်တာဘာယုန်ဇားဘောင်
22ဘွေယေရှုနဲ အခီးပရာတဟယ်ဒုန်း “သူးဇာ့သတိုက်ဒုန်းသူးကအော်မူးနခူးကာ၊ ဇာ့အော်ဒေါ်တာကူးတာကိုက်ဒုန်းကအယ် ကအွန်းနဲခူးကာ၊ 23သာ့သမူး ငူဒူဒေါ် တာအယ်တာအွန်းလော်။ 24အုတ်စဝါး တဟယ်နူကာ၊ အဝေသူးတဟယ်နူ၊ ဇာ့လူးတာ၊ ဇာ့ရိုင်းတာ ဇာ့လားရောင့်ဘာတာဇာ့အော်၊ နဲမယ် ဘွေနူ အုတ်ဒေါ် ကရူယူးအဝေသူးနူလော်။ သူတဟယ် နူသူးလောဒူပရီဒေါ် ထူတဟယ်နူလော်။ 25သူးကအော်မူးဒုန်း ဘာဘယုန်ရှောဘော်ဒေါ် သူးသာ့ ကထူးဒါ။ 26တာ ဖိတ်တာမာဒုန်း အဆီအဇာ့တဟယ်ယိုးနူ သူးမာဇာ့ကိုက်ထောင်မယ်၊ သူးကကူးကကိုက်ဒုန်း တာရီကူးရူတဟယ် နဲခူးမာရား 27အုတ် ဖိုးမြုန်ဖိုးမြောက်တဟယ်နူ။ အဝေသူးတဟယ်ဇာ့မာသပရားဒုန်း ကကူးကဟော့ဘာ၊ နဲမယ် တာဒုန်းခေးကနဲသူးတဟယ်နူမယ် ပရာတာ သိုက်ငှားဒူတာဒူတာလုန်း ရှောလမုန် စဟွာနူမယ် ကလားကရူလားကရားကိုက်တောင် ဖိုးတဟယ်ယိုးကိုး။ 28ဘွေမာဖုတ်ဒါ တာဒုန်းအကိုက်တောင်ဒုန်းဆုန့်တုန်ကူးတဟယ်နူလော်။ ယိုးတနူအကအော်ဒုန်ဆုန့်တုန်ကူးဒေါ် အနော်တနုန်တာကတဟွေးထောင်ဒုန်းမီကား နိုင်းသာမုန်းတဟယ်နူ ဘွေမာဖုတ်ဝေသူးကနူ သူးနခူးဘွေကဖင်လောင်တာ ဒူဒေါ်အနူတဟယ်လော်။ သူးတာယူးတာ နာကဘာအော် တကီနူလော်။ 29သူးတဟယ် သူးဇာ့ကူးဇာ့ကိုက်ဒုန်း သူးကအယ်ဘာအွန်းဘာနဲခူးကာ 30ပရာဒုန်း အတာယူးဘွေဇာ့အော်တဟယ်နူ ကကူးကကိုက် ဘာဒုန်းတာယိုးတဟယ် နဲခူးလော်။ သူးဖားဘွေနူ သိုက်ငှားသူးတာလိုဘာ တဟယ်နူလော်။ 31နဲမယ်တာဒုန်းသူးကဘာမာ ရူးကူးတမီနူ မာဘွေတာနူလော်။ သူမွေးမာဘွေတာမာဒေါ် တာဆူရီကဘာသူးနူလော်” နူမယ်ဘွေအတာထုတ် လောင်မှာလောင်နူလော်။ 32ယေရှုနူ “သိုးပူတဟယ် #12:32 သိုးပူတဟယ် သိုးတပူနဲမယ် အသနူးနဲအခီးပရာတဟယ်နူလော်။ သူးဇာ့သဘိုက်ကာ၊ ဖားဘွေကလားသူးဒုန်းအတာဖိတ်တာမာကူးနူလော်။ 33ဆားကေးလော နတာဇု့တာလဲဒေါ် ဖဝ်ပါ့ဆော့ပရာအော်ဗေါင်းအော် ဆားတဟယ်နူ။ အော်ယူးဆော့ စခူးဒုန်းအမွေး တာဇု့တာလဲဒုန်း အဇာ့ပြားဇောင့်နူလော်။ သူးလားရောင့်သူးတာ ငူဒူပရီဒူဒုန်းမော့ခူတဟယ်နူ တာဘလာအယ်ဟူဇာ့ဒါ၊ တာလုန်တာရာ့မားကေးဇာ့ဒါ နူလော်။ 34သူးသာ့ဖလုန်နူ အကသုန်ဘူးဒုန်း မောခူအ တာလုန်းတာဘွေး အလဲနူလော်။”
အော်ယာနဲဒုန်းဘွေကဇိန်ဘလယ်အခိန်နဲခူး
35ဘွေယေရှု မှာလောင်အပရာတဟယ်ဒုန်း “စုန်းကလုန်းသူးငါဓိန်းဒေါ် တွေ့လောင်ယာယာသူးမီထုံး တဟယ်နူကာ။ 36အော်ပုန်းဟော့ သူးဘွေမကိုက်၊ ခူးခီးပရာဇွတ်တဟယ်အော်ဟွီး အဘွေလေအုတ် တာဖလော ဒေါ် ကဇိန်တပရာနူ။ ဘွေပရာနူ ကဇိန်ကလောက်ကဒန့် ဒေါ် ဘောထောင် ခါးယိုးကာ” 37အဘွေနူ ကအုတ်ဆူဘာ အဇွတ်ပရာ အော်ပုန်းဟော့ဝေ ဒုန်း တာသနောင့်ကူး နူလော်။ ဘွေဖင်လောင်အဝေသူး တာအုန်းလော် တမီနူမယ်ဇွတ်ဒုန်း အအော်ပုန်းအဘွေ တဟယ်နူ အဘွေကဖင်နောင်းအဝေသူးဒုန်းတာအယ်အကလဲနောင်းတဟယ်နူလော်။ 38ဇွတ်ဒုန်း အအော်ပုန်း အဘွေဒုန်း အကလောင် မုန်းစကုတ်နာခိန်မရီ၊ မုန်းလင်းခိန်မရီဇာ့သိုက်ဒေါ် အော်ပုတ်တဟယ်နူကဘာ တာဆူရီနူလော်။ 39“သင်ဘွေ နူမွေးသိုက်ငှားလောင်ယာ ပရာအယ်ဟွန်တာဒေါ်ဇာ့မွေး ပရာကအယ်ဟွန်နူးတာ။ 40အခူစား မာလောင်ယာတာကာ။ သူးတဟယ်နူ ပရာဖော့ခူး ယိုးပရာနူ အကလောင် အခိန်မကလောင်ဇာ့မွက်သူးကသိုက်ငှား” နူလော်။
ခီးပရာဒုန်းအလုန်းဘွေဒေါ်တာသာ့ဇုတ်ဒေါ်တာသိုက်ငှား
41ပေတရု နဲယေရှုဒုန်း “တာရီတာကေးတဟယ်နူမယ် ပါနဲခူးဧါဇာ့မွေးမယ် ပရာကူးရူနဲခူးဧါ” နူလော်။ 42ဘုန်းအခိန် ဘွေနူ “ပရာရောဝ့်ဒေါ်အဇုတ်အဇူမယ်ပါးပရာ။” ဘွေတပရာ နသူးဒုန်း အကလားထောဝ် အပရာကား တာမာ အခူအနာ့တပရာ မကိုက်အကအုတ်ကရူ အငေါ် အပရာဇာ့တဟယ်ဒုန့် တာအယ်တာအွန်းဒေါ် တာဖိတ်တာမာလူးခူနူလော်။ 43အဝေသူးတဟယ်ဒုန်းအဘွေတူးဇိန်ခိန်နူ ပရာဒုန်း အမာလုန်းမာဘွေး တာမာတဟယ်နူ ကဘာတာဆူရီလော်။ 44ဘွေနူ ကလားထောင် ပရာဒုန်း အသာ့ဇုတ်ဒေါ်အော်နူ ဒေါ် တာမာခူနာ့လောင်တီးလောင်ရှိုက် နူလော်။ 45မသောနူမယ်ဇွတ်ငါးပရာနူ ကနသု့ဒေါ်အဘွေ ကတူးဇိန်ယောင်း နူဒေါ် ကတိန်းကပုန်ဇွတ်ကူးရူးတဟယ်ဘုန် အယ်အွန်းဒေါ်မူဘလွတ်ခိန်နူ 46အဘွေ နူပရာ တူးဇိန်ခိန်နူ တာကလားဆွား ထောင်ကေးဒုန်းအတာမားကူးနူလော်။ ဘုန်နူဇွတ်ဒုန်းအမာတာဇာ့ဇုတ်စွန်နူ တာကစွီထောင် ဖလောက် ကေးဒုန်းခေါကွန် ဒေါ် တာကဖင်အတာကမှာနူလော်။ 47ဇွတ်ဒုန်း အသိုက်ငှားအဘွေတာသနု့ မသောမယ် ဇာ့မာဇု့နူ ကနူးဘာ တာနဖလိမ်းနကိန်တဟယ်နူလော်။ 48မသောမယ်ဇွတ်ဒုန်းအဇာ့သိုက်ငှား အဘွေအတာ သနူးဒေါ် မာကမှာတာနာဖလိန်း တဟယ်နူ အဇာ့ဘာနဖလိမ်းဒုန်းအဆား။ နဲမယ် မကိုက်ဘွေ သအော့် ဒေါ်မာကွားသူးကနူ သူးတဟယ်မယ် သူးဘာ မာရောဝ့် ဘွေအတာဖိတ်တာ မာဒုန်းသူးဘာမာတဟယ်နူလော်။ ဘွေတာသာ့အော်သူ့ မွက်အော်အာ့ များနူမယ်သူး တဟယ်နူ သူးမာရောဝ့်ဆော့ဘွေ အတာမာကာ။
အတူးလေဇာ့မွက်ဒုန်းတာအော်သာ့အော်ယာ့နဲခူးဒေါ် တာကလောင်ပရီးလောင်ပရာ့နဲခူး
49ခေးနူဇာ့မွက်ဒုန်းခေး ကဆောင်းဘလောင်းဟယ်ခူဒေါ်လောင်ခေါင် နဲမယ်ခါးယိုးနူ သာ့အော်ဒုန်း ကဆောင်းဘလောင်းယူးဒေါ်မီ#12:49 ဆောင်းဘလောင်းယူးဒေါ်မီ တာဆောင်းဘလောင်းဒေါ်မီနဲမယ်မယ်တာစရောင်တာခေါ်ဝယ်တဟယ်ဒေါ်မီဘုန်၊ တာရခါးဒါ့ဒုန်းတာကလားဘာ့ပရာဟယ်ခူဖော့တမူးနူလော်။လော်။ 50ခေးနူ ခေးကအုတ်ဆူဘာ တာဗေါင်းတာဆား အတာမာအုတ်ခေးနူလော်။ သလာ့မွန်းခိန်ကဘလွန်နူ ခေးကကုန်းဘာခေါင်ဘာမူးနူလော်။ 51သူးနသု့မယ် ခေးလောင်ဒုန်းဟယ်ခူယိုးမယ် ခေးလောင်ယူးတာအော်သာ့ အော်ယာ့ နူလော်ဧါးဇာ့မွက်ကယိုးနူခေးလောင်မကိုက် ခေးကလားထောင်ဘွေ အတာမာဖေါ့ နဲခူးနူလော်။ 52ပရာသင်ဖော့ အော် ငိုင်းပရာနူလော်၊ အအော်သာ့နု တစ်ဘိုင်းဒေါ်သာ့သူးတစ်ဘိုင်း ကအော်သားထုန်ရောင့်နူလော်။ 53မူးဖားဒေါ်ဖေါ့မူဖေါ့ခူး ပရာ့ဒေါ်ဒေ တပရာဒေါ် တပရာအကအော်သ ထုန်ရောင့်တဟယ်လော်။
တာနာပူအခိန်အကလောင်
54ဘုန်နူ ဘွေနဲ ပရာတဟယ်ဒုန်း “သူးတဟယ်နူ သူးကအုတ်ဆူ မော့ခူအော့ဒုန်း အကချုန်းဒေါ် သူးနဲရောဝ့်တုန်း ဆွိုက်ကလောင်ကဲနူလော်။ 55ရီးယူကလေမယ် သူးကနဲရောင့်ဒုန်း ကတူးကဲကြိုင်းကူးခိန်” နူလော်။ 56ဝီးဘလာစရာဘလာတဟယ် သူနဲဇောင့် မော့ခူရီးယူတာမာနဲတဟယ်နူဒေါ် သူးဇာ့သိုက်ငှားတာဒုန်းအဖီး ထောင်ယိုးမာရား။ 57သူးနာဇပူဒုန်း သူးကဘာမာအူးမာရောင့်တာ တဟယ်မာရား။
တာနာပူရောက်ဒုန်းတာဇာ့ဇုန်းကလုန်ကူး
58“ပရာကစွီနာဒုန်း တာမူးတာရားအခိန်နူ နဇာ့တူးလေမွန်းတာစရောဝ်အလဲနူ ပရွီးဒူးပရွီးဒွါဇိန်တာကာ။ မာဇာ့မာကနူမယ် နကတူးဒုန့်တာစရောင်အလဲ နူလော်။ ဘုန်နူ ပရာစရောင်တာ ခူနာ့ ကဖင်လောင်ငေါ့ဒုန်း ခူနာ့စဓိန်းကူးဒေါ် နကတူးဒုန်း တာစရောင်ကလဲနူလော်။ 59တာဒုန်းနဖိတ်ခယ် နဖင်ဇိန်ဇာ့နူးတူးသာရေး ဇာ့မွက်တာကဘလိုင်လွတ်နာဒုန်းထော်ကူးကိုး” နဲကနူလော်။
നിലവിൽ തിരഞ്ഞെടുത്തിരിക്കുന്നു:
လုကာ 12: GHK
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Karen-Geko Bible by Beyond Translation is licensed under Creative Commons Attribution-ShareAlike 4.0 License.
