လုကာ 11
11
ခရစ်အတာသဘားထောင်
1ဘွေ ယေရှု ဘသား ထောင်ဘုန် အခိန်နူ အငေါ်ပဇာ့တပရာဆိန့်ဝေ ဘွေ ယောဟန်နူ ကသဘါး ဘာကမာအဝေသွန့်နူး အခီးပရာတဟယ်နူလော်။ မကိုက်ကနူဒေါ် သွန့်နူးလောပါတာသဘား လောဘွေ အဝေကွီးကနူလော်။ 2ခါးယိုးဘွေဆိန့် အဝေသူး “သူးကသဘား အခိန်နူ
ဖားဘွေဒူပရာလောနူတဟယ်နူ ဒုံးဘာယက်ဘာ လောဖားဘွေဒူကာ ဒူလောင်ဒေါ်အုတ် ကရူဘာဆော့ ဘာပရာလူဟယ်ခူ ဖေါ့ကာဘွေ။
3ဖီလောင်ဘာဆော့ဘာတာ အယ်တာအိုး ပွန့်နုန်ပွန့်နာ တကင်ကာဘွေ။
4ပရာဒုန်း အမာကမှာပါ တဟယ်နူ ဘာဘလိုင် လွတ်ဝေသူးတာကမှာဒေါ်
ဘလိုင်လွတ်ဘာဆော့ပါတာကမှာ အနူယိုး တဟယ်ကာဘွေ
ဒေါ်မကိုက် တာကမာယိုးတဟယ်နူ ကဇာ့စွီလောင်နူ့ပါနူ မာဒေါင်းနူးဆော့ ပါတကင် သဘားဆော့ ကယိုးကာ”
ဘွေမှာလောင်မွန်းကနူလော်။
ကွီးဆော့ကာ၊ ကွားလာ့ဆော့ကာ၊ ခလောက်ကာဒပ်ကာ
5ဘုန်မယ်ဘွေယေရှု ဆိန့်ထောင်မွန်းခိန်သူး အကားနူ ပရာတပရာလေ ဒုန်းအငေါ်တပရာအော်ဒေါ်ကွီးခယ်အငေါ် တပရာမုန့် သု့မာဘုန်းမုစန်းကုပ်နာအခိန် နူလော်။ 6ခေးငေါ်တူး ဇွတ်ခေးတပရာ ဒေါ်အဝေကလဲအယ်ဇာ့အော်ကိုးနူလော်။ 7ဘုန်နူ နာမာနာငေါ် တပရာ မာဒီးဒေါင်းမာခေးမာ ခေးဒုန်းဘု့ဘုန်လော ကာဒပ်ဟုန်း ခေးကဘာဇိန်မီးဇူးဘာခေးဖေါ့ဒုန်းလာမီးကူးနူလော် ခေးအော်ဒုန့်လာ မီးကူးခေးဆိန့် ဖီကိုင့်ထောင်နာ တမိတမီကိုးအဝေနဲကနူလော်။ 8အဝေနူ အမွက်နာငေါ် တပရာ နဲမယ် အဝေအော်ဒုန်းလာမီးကူးဒေါ် ဇာ့မွက်ကဖင်ကိုက်ထောင်နမုန့်ကိုးနဲမယ် နာနူဇာ့သရာ့သပလား ဒေါ်နကွီးလိန်း ဝေဒေါ် အဝေနူအော်ဒုန်းလာမီးကူးဒေါ်ဆွားသရိုက် ဒေါ်ကလေဖင်မူးနာမုန့် နူလော်။
9မာကနူကခူစား “ကွီးတာဒုန်းဘွေအော်ကာ၊ သူးကနူးဘာလော်။ ပရာကွားလပ်တာနူကအုတ်ဆူလော်။ ကလောက်ကာဒပ်ကာ၊ ပရာကလောက်ကာဒပ်ပူးပရာနူတာကဘောထောင်နူးလော်။ 10ကွီးတာတဟယ်နူ ကနူးဘာလော်၊ ကွားလာ့တဟယ်နူကအုတ်ဆူဘာလော်၊ တကလောက်ကဒပ်တဟယ် တာကဘောထောင်နူးနူလော်။ 11သူးဖော့သူးယူကအော်ဝီးအော်အိုးဒေါ် ကွီးတာ့နူ ပါးပရာအဖါးကဖင် အဝေရူးပရာ။ 12သူ့ဖေါ့သူးယူက ကွီးသူးဆုန်းကျူနူ အဖါးကဖီ ဘာ့ဝေထိုဘောင်း။” 13သူးတဟယ်နူ သူးမယ် ပရာကေးပရာကာ ဘာဆားမယ်သူးဖီသူးဖေါ့ဒုန်းတာအရောက်ဒေါ် ဒုန်းမော့ခူဆူးဂက် ဖါးဘွေဒူနူ ပရာကွီး သာ့စောင်းဆူး အော်ယောင်း လောပွန့် မူး နူလော်။
ယေရှုဒေါ်ဗေလဇေဗုလ
14ဘွေယေရှု နူ မာကိုက်ဒေါ် ပရာတရာ ဇာ့ပရွှီးဇောင့်နူ နာ့ကီးကာတဒူး မာဒီးဒေါင်းအဝေဒေါ် ဘွေယေရှု ခလွန်းဆွား ကေးနာ့ အဝေဇိန်ဒေါ် နာ့ကီးကာ ဆွား ထောင်ဖလောက်ကေး ဘုန်ဒေါ်အဝေပရွှီးဇောင့်ဇိန်ဒေါ် ပရာလောနူးတဟယ် နသု့ထွား တောင်တာတမွတ်တမောင်းဒုန်းအဝေးသူး အနဲခူး နူလော်။ 15နဲမယ် ပရာတဟယ်နူ ပရာယိုး ပရာနူ အဝေခလွန်းကင်း ကိုက်ထောင်နာ့ကီးကာ စဟွာ ဗေလဇေဗုလ အတာပရော်တာ ပရောက်တဟယ် နူဒေါ် အဝေခလွန်းကင်း ကိုက် ထောင်နူလော် အဝေသူးလေနဲရောက်မွန်း နူလော်။ 16ပရာခူးရူတဟယ် နူမယ် သနူးမာအုတ်ဘွေနူလော် ဘုန်ဒေါ်အဝေသူးနဲ ဘွေ ယေရှု ဖိတ်ပြမာပြ ပါတာဒုန်းဖါး ဘွေဒူအော် တာမှတ်နက် တမူးမူး ဒေါ်ပြနူးပါကာအဝေသူး နဲက နူလော်။
17ဘွေ ယေရှုသိုက် ငှါး ပရာတဟယ် အတာနသု့ဒေါ် “ဆူးဂက်တဂက်နူ အသာ့ကိန်သာ့ဆား ဘာရောက် အော်ဒေါ်တာဒို့ ထွားထောင်ဒေါ်ဂက်နူဂက် ကကေးကပြား လောနူလော်။ ကနူဒေါ်ပရာသင်ဖေါ့ တဟယ်နူမယ်တာအင်သွန် ကုသာ့ရောက်အော်ထောင် ဒေါ်ပရာသင်ဖေါ့နူ တသင်ကလောင်ပရီးလောင်ဖရာ့လော နူလော်။ 18နာ့ကီးကာတဟဟယ်နူ အဝေသူးကလေမွေးလေဒုန့်ရောက်နူ အကပရောင်ထောင် အဆူးအဂက်ကမား။ ခါးယိုးခေးခလွန်းကေးတာဆွန်တာနာ့တဟယ်ဒုန်း ဗေလဇေဗုလ အတာပရော်တာပရောက်သူးကနဲနူလော်။ 19မသော်မယ်ခေးကဖိတ်အဝေအတာပရော်တာပရောက်ဒေါ် ခလွန်းဆွားကေးနာ့ကီးကာ တဟယ်ဒုန်း ဗေလဇေဗုလအမီကူးနူဒါမယ် သူးခီးသူးပရာတဟယ်နူ အခလွန်းဆွားတာဆွန်တာနာ့တဟယ်ဒေါ် ပါးပရာအတာပရော်တာပရောက်မီ။ အဝေသူးတဟယ်နူကာစရောင်နူးမွန်းနာနူလော်။ 20နဲမယ်ခေးနူခေးဖိတ် ဖားဘွေတာပရော်တာပရောက်ဒေါ် ခလွန်းဆွားကေးတာဆွန်တာနာ့ဒါနူ ဘွေမော့ခူဆူးဂက်တူးဒုန်းသူးအော်ဟုန်းနူလော်။
21ပရာအော်ဆွန်အော်မောင် တပရာနူကာအုတ်ပုတ်အုတ်ဒေါ့အသင်ဒါအခူစား ဝေနူအတာလော နူးတဟယ်နူကအော်ဇိန်အော်ဘု့ဒါလော်။ 22နဲနူမယ်ပရာအော်ဆွန်အော်မောင်ဒူးဒေါ်ဝေနူ ကလေဒေါ်မာဘေးဝေမယ် တာဒုန်းအဝေယူးဒေါ် အော်ဟော့ဒိုးဘောင်းတဟယ်နူ တာကဖိတ်ဇိန်ဖယ်ဝေလော်။ ဘုန်နူအဝေလေဟော့တာလောနူးတဟယ်နူ ကဘာဖင်ဘက်ပရာကူးရူးတဟယ်နူလော်။” 23သူးတဟယ်သူးဇာ့အော်ဒုန်း ခေးအော်တဘိုင်းမယ်သူးမွက်ပရာဒုန်း အမာကန်ခေးနူလော်။ သုသူးတဟယ်နူ သူးဇာ့ရိုင်းဘလုန်ခေးဘုတ်ဟွန့်မယ် သူးမယ်ပရာဒုန်းအာဝိန်းကေးဘုတ်ဟွန်းနူလော်။
တာနာ့ကီးကာဒုန်းအဇိန်ဘာ့ဘလယ်
24နာ့ကီးကာတဒူး နူဒေါက်ကလုန်နူးပရာ ဒေါ်ဆွားထောင်ဒုန်း လုန့်မိုက်ဖါဂက်သွန်အလှက်ကဒေါ်ဆွား ကွားဇိန်အကလှက် အော်ရောင်နူလော်။ နဲမယ်ဇာ့အုတ်ဆူအကလှက်ဒေါ် ခေးအော်ကလှက်ဒုန်းပရာအကူးခေးကဇိန်အော် ဘလယ်လော် အဝေနဲက နူလော်။ 25အဝေတူးဇိန်နူဒေါ် အုတ်ဆူမွန်း အကလှက်ဒုန်းပရာနူပရာ အကူးနူ ဒေါ်အဖုတ် ကရာ့ဘာဝေဒေါ်အမာမကိုက်ဒေါ်သင်တမာကူးပရာ ဝီးဘလောင်းခွက်ဘလောင်းနူဒေါ် အဝေ သနူးဇိန်အော်နူးနူလော်။ 26ဘုန်အခိန်နူ နာ့ကီးကာဇိန်ဒေါ် ကန့်ဘာဇိန်လှယ်သားမွန်း အငေါ်အဒါဒူခလုန်းအဝေ နွိုက်ဒူးနူလော်။ အဝေသူးလောနူးလေအော်နူးမွန်း ဒုန်းပရာနူပရာအကူးဒေါ် ပရာနူ ကေးထောင်ကာထောင် ဒူမွန်းနူလော်။
တာဆူရီဒုန်းအမွက်အရောက်
27ယေရှုဒေါထွန့်လောင်နူးမူးပရာလောနူးတဟယ်ဘုန်ပမွန်တပရာ နဲထောင် “ဘွေ ပရာဒုန်းအအော်လောင်ဟော့နာဒေါ် ဖင်အွန်းနာနွန်းဘုန်အုတ်ယူးခွေယူးနာ တပရာနူမယ် ပရာဆောင်း ပရာဆူးလော်ဆိန့်ထောင်ကနူလော်။” 28ဘုန်မယ် ဘွေ ယေရှုနဲ့ မွန်းတာပရွီးယိုး မွက်ဘား နဲနူမယ် ဖားဘွေဒူတာ ဟွားတာငေါ့ဆောင်းဆူးတဟယ် ယိုးနာဟူးလော့ပွန်ပရာ ခလှယ်နူးဘာမွန်းတာ ဆူရီတာသာ့တာယာ့ နူလော်။
ယောနအတာမာလုန်းထောင်တဟယ်
29ပရာလောနူတဟယ် အော်ခွိုက်ရိမ်ဘွေယေရှုကားဒီခိန်ဒေါ် ဘွေယေရှုနဲ “မွက်ဇု့ခါးယိုး ပရာတဟယ်နူ ကေးထောင်ကာထောင် အော်ဒူနူလော် အဝေသူးနူအကွီးမာကိုက်ကအုတ် ဆူတာတလုန်းဒုန်းနူလော်မသော်မယ် မွက်ဇာ့မွက်ဒုန်းဝီးယောနတာတလုန်းနူ ဇာ့မွက်တာကဖင်လောင် အဝေသူးတာတလုန်းဒုန်းအဝေသူးအော်ကိုး။ 30ဒုန်းဝိန်နိနဝေနဲနူယောနဖီးတာတလုန်းကနူ ပရာဖော့ခူးယိုးနူမယ် အကဖီးထောင်တာတလုန်းဒုန်းသူးနဲခူးနူလော်။ 31တာစရောင်မုန်းနုန် တူးလေအခိန်နူ ရှေဘ စဟွာမုန်းနူ ကသိုင်းရိုက်ဒေါ်ကဆွီတောင်မွန်း ပရာတဇု့ယိုးဒုန်းတာမူးကလှက်နူလော်။ အရီနူမယ်ကနာဟူးဘာ စဟွာရှောလမုန်တာသိုက်ငှားဒူနဲခူးနူ အအော်ဒုန်း ကလဲယုန်ဒေါ်တူးလေနူလော်။ ဒေါ်ပရာဒုန်းအဒူဒေါ် စဟွာရှောလမုန်နူ အတူးလေနူလော်။ 32ယောနဟောသရားဒေါ် သွန့်ပေါင်လောင်တာအခူစား သိုက်ငှါးလောင်ဇိန်အနက် ဒေါ်ဇိန်ဘာ့ဘလယ်ဒုန်းဘွေအော်ဝိန်နိနဝေဝိန် ဖေါ့တဟယ်ဒုန်းတာစရောင်မုန်းနုန်တူးလေခိန်နူကဆွီတောင်မွန်းတာမူး ပရာတဇု့ယိုးဒုန်းတာရား နူလော်။ ဘာသရားနဲမယ် ပရာဒုန်းအဒူဒေါ်ယောနနူတူးလေအခူစားနူလော်” အဆိန့်လောင်မွန်းကနူလော်။
နဲကုန်းအမီထုန်း
33ဘုန်ဒေါ် ဘွေနူ “ပရာဇူးခါးမီထုံးဒေါ်လားဟွတ်ဒုန်း ဒေါင်းခူလားတပရာဇာ့အော်။ နဲမယ်ပရာဒုန်းအလေနူးသင်ကူးတဟယ် ကနူးဘာတာရခါးနဲခူး လားထောင်ဒေါ်ဇုန်းဘီးဗျားဒုန်းသင်ထွန်လောင်လော်။ 34သူးမုန်းဖလုန်မယ် သူးနက်ကုံး မီထုံးနူလော်။ နာမလုန်းရောက်မွက်ရောက်နူ နနဲကုန်းကာရခါးတဒေးပရာဒူဘုန် နာမုန်းဖလုန်ဇာ့ရောက်မယ်နနဲကုန်းနူမယ်ကခု့လောနူလော်။ 35ကနူခူစား တာရခါးမွက်လုန်းဘွေးဒုန်း နနက်ကုန်းတဟယ် မကိုက်ဒေါ် အဇာ့ထွားတာခု့နဲခူးနူ မာဘာဒီးဘာဒါဆော့ကာ။ 36အခူစား တာရခါးမွက်လုန်းဘွေဒုန်း နနက်ကုန်းတဒေးပရာနူ ဒေါ်တာခု့မွက်ဇာ့အော်ဒေါ် မွက်ရခါးဒေါ်မီထုံးတာရခါးမကိုက်အလောင်ဘာဒုန်း နလော်ကနူနနက်ကုန်းတဒေးပရာနူမယ် ကရခါးလောနူလော်” ဆိန့်မူးကနူလော်။
တာတပွန်ခါ့ကေးအယ် ပရာဒုန်းအမာရီမာရောက်အနဲတဟယ်
37အဝေနဲလောင်ဘုန်ကနူဘုန် ဖာရိရှဲတပရာ ကာ့အယ်မွန်းတာအယ်တဟယ် ဒေါ်ကာ့လေးမွန်း ဘွေယေရှုဒုန်း အသင်နူလော်။ 38ဘွေယေရှုတူးလေဒုန်း အဝေသင်ဒေါ်နောင်းလောင်ဒုန်း ဒင်းခုံကဒီ။ ဒေါ် ဘွေဇာ့အယ်ဆာမူးခိန် ဇာ့ဇောင်းဘလောင်းစဓိန်းဒေါ် အနောင်းလောင်ဒုန်းဒင်းခုံအခူစား ဖာရိရှဲတဟယ်နူတမွတ်တမောင်းလောနူလော်။ 39အနူခူးစားဘွေယေရှုဆိန့်မွန် “သူးဖာရိရှဲတဟယ်နူ သူးဇောင်းဘလောင်း ဘဲကွင်ဘုန်သူးသာ့ကူးနူအော်ထဲတာသနူးဒေါ်တာဇာ့ရောက်တဟယ်နူလော်။ 40ပရာနကွန်းဒူးတဟယ်၊ ဖါးဘွေနူဒေါက်လောင် အကူဒေါ်အကုန်း နု့ဘားဒိန်းလောနူလော်။ 41သူးတဟယ်တနူသူးမွက်ဖင်ဘက်ပရာဆီညဲဖေါ့တဟယ်နူ မယ်တာဒုန်းသူးမာတဟယ်နူဘွေကသူအော်သာ့အော်နူလော်။”
42“ဖာရိရှဲသူးတဟယ်နူကအုတ်ဆူဘာတာပေါင့်တာဆား နူလော်။ ဘာသရားနဲမယ်သူးတဟယ်နူ သူးလူးအယ်တာမုတ်တာဘော ဘုတ်ဟွန်း အင်းကလိုင်လံ တဟယ်နူအဖိုးအသံ သူးဖီလောင်မွန်း အမွန်းတဆူးမယ် တမွန်းတာလူနူလော် နဲမယ်သူးတဟယ်နူ လားကေးသူးတာဘာလော တာဇုတ်တာဇွန်ဒေါ်ဘွေနူလော်။ 43ဖာရိရှဲတဟယ်သူးကအုတ်ဆူ ဘာတာဗေါင်းတာဆားလော် တာအော်ဘလုန်လဲနူနောင်းလောင် တာလမောက်နူသူးနူးဘာနူ သူးဘာလော့နူလော် စိန်းတာဆားတာပရီ လှက်နူတာယုတ်ရှုဒေါ် တာလားလုန်း အလှက်သူးဘာလော့ နူလော်။ 44နဲမယ် အုတ်ဆူဘာတာဗေါင်းလော် သူးတဟယ်နူမာ မကိုက်လွန့်ခူ အတာမာ မှတ်နက်ယူ့ဆိန့်အော်နူလော်” ပရာတဟယ် ဆွားဘိုင်းလိုင်ဒေါ်အုတ် တာမှတ်နက်ဇာ့အော်ဒေါ်အဆွားဇွတ်နူလော်။ 45ပရာဒါမောရှေလိုင်ဆောင်းဆူးတပရာလွိုက်ဘွေ “စရာ၊ နနဲတာကယိုးနူမယ် အသားလူနတပွန်အယ်ပါနူလော်” အနဲဇိန်ဘလယ်ကနူဒေါ် 46ဘွေယေရှုနဲမွန်း “ပရာဒါလိုင်ဆောင်းဆူးတဟယ်၊ သူးတဟယ်အုတ်ဆူဘာတဗေါင်းလော်။ သူးတဟယ်နူ တာအထူအကလုန် တဟယ်သူးလာ့ယောင်းကလုန်ပရာတဟယ်နူလော်။ သူးတဟယ်နူမယ် သူးစတော့ဘာတာနူဒေါ် သူးစမုန်းကိုး။”
47“သူးတဟယ်နူသူးမယ်တာပေါင်းတာဆားဖော့တဟယ်နူလော်။ လာ့အရီးကူးသူးဖူးဖွန်း မာသူး ကေးပရာတာသိုက်ငှါးဒူ ဝီးအနဲခူးသူးလာ့လုံ့ထွန်ဒေါ် သူးလူးလောင် မှတ်နက်နူလော်။ 48တာဖိတ်တာမာငှါးတဟယ်နူ လာ့အရိသူး ဖူးဖွန်းတဟယ်မာတာ မွက်သူးနာသူးကနူလော်။ မွက်ဆိန့်မွက်မယ် သူးတဟယ်နူ ပရာမာသူး ပရောဖက်တာသိုက်ငှါး တဟယ်ဒေါ်အနဲခူး တာမှတ်နက်လုန်းလောင်လုန်းထွန်ယိုး တဟယ်နူ အဇာ့မွက်ကိုးနူလော်။ 49မာကနူအခူစား ဖားဘွေဒူနူတာသိုက်ငှါးတာလီးတာခါးဒေါ် အဝေသူးမာတာဇာ့ရောက်ဇာ့ဒါ တာခေါ်ဝယ်တဟယ်နူ ဖားဘွေဒူမှာလောင် ဝေသူးတဟယ်အော် ပရာတာ သိုက်ငှါးအော် ဝီးတဟယ်ကဘလိုင်လေမွန်းလော်နဲမယ် သူးတဟယ်နူ ပရောဖက်တဟယ်ဒေါ် ကလူဖော့ တဟယ်သူးမာသူး ဒေါ်မာဒေါ့မာလောင် တဟယ်ထွားတောင်” နူလော်။ 50ယိုးနူပရာလူဟယ်ခူဖေ့ါလော့နူးအတာသိုက်ငှါးဒူအော် အခူစား မာသူးမာမှတ်ရောက်ဒေါ်အတာသရွတ် ကမာအော်ဘွေးထောင် လောဟုန်းနူလော်။ 51ပရာတာသိုက်ငှားဒူတဟယ်အကားနူ စထောင်လှအဗေလသွီနူ ဒုန်းစရားကူးတာလမှောက် တူးဒုန်း ဇာခရိဘာတာမာသူးကလှက်နူ မာကနူခူစားတာလောနူး ယိုးတဟယ် သူးပရာလူဟယ်ခူဖေါ့နူ သူးတာကမာ အခူစား သူးကဘာတာ စရောင်ယိုးဒါ့မယ် အော် ဘာဒီးဘာဒါ ဟုန်းနူလော်။
52“ပရာဒါမောရှေလိုင်ဆောင်းဆူးတဟယ် သူလောင်ဂျု့ဒုန်းတာကေးကားနူ လော်။ သူးတဟယ်နူ လားရောက်တာသိုက်ငှားဒုန်းအဘာဇာ့ဒေါ် ဘွေမသော့နူ ဘုန်နာမယ်လေနူးမှာ၊ ပရာကူးရူတဟယ်နူမယ် ဇာ့လားလေနူး” မှာလောင်မွန်းကနူလော်။ 53ဘွေယေရှုနူ အော်ဘုန်းနူဒေါ် ဆွားထောင်ဒေါ် ပရာဒါလိုင်ဆောင်းဆူးတဟယ်ဒေါ် ဖာရိရှဲတဟယ်နူ သနူးဘွေကလေ အော်ဘလုန် အဝေသူးတဟယ်နူလော်။ အဝေသူးသနူး ဘွေကနဲတာရီတာကေးအကူးရူတဟယ်နူလော်။ 54အရီအကေးမယ်ဝေသူးနူတဟယ် နူဘွေမှာလောင်တာပရွီးတဟယ်မွက် ကမာတမူးမူးနူ အဝေသူကးဖူလုပ်တဘလယ် မယ်အနသု့ ကနူလော်။
നിലവിൽ തിരഞ്ഞെടുത്തിരിക്കുന്നു:
လုကာ 11: GHK
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Karen-Geko Bible by Beyond Translation is licensed under Creative Commons Attribution-ShareAlike 4.0 License.
