Exodus 30
30
Sizambero sokuswakererera nzambo zedumba lyewa
(Ex 37:25-28)
1“Honga hena sizambero sokuswakererera nzambo zedumba lyewa somusu. 2Moure si hure ponosentimeta 45 nomonompatji ponosentimeta 45, si kare sikwambando, ano musika gwaso si hure ponosentimeta 90. Mu tunde nombinga daso va hongerera mumwe naso mositji simwe tupu. 3To si vambaike nongorodo zene‐zene: pombando nokononkenkera daso tadi ka likwata nokonombinga daso. Makura to ruganene ko nkata zongorodo, zi si dingilike. 4To ruganene ko hena nongondo mbali dongorodo konhi zonkata komakovhu nagenye; to di ruganene komaruha gavali. Ado ngadi kara evega lyonomudigo lyoyitji yokusimbisisa. 5Noyitji yonomudigo eyi ngo rugana, nayo yomusu, makura to yi vambaike ngorodo. 6Sizambero esi si tura kesinya oku lyekehe lyonkondwa eli lya teta ko Sikesa soVeta, kesinya oku lyosipundi sonkenda sombando esi sa kara koSikesa soVeta, omu ngatu ya gwanekerera. 7Arona a tutumikidire po yokututumikida yedumba lyewa. Nkenye ngurangura sinene ta wapeke noramba, makura ta yi tutumikida. 8Ano Arona nsene ta hwameke noramba ngurova, a yi hwameke nayo, yi kare yitutumikido yedumba lyewa lyankenye ezuva kosipara saHompa, dogoro komaruvharo geni nagenye. 9Nokureta po si yitutumikido yapeke ndi nzambo zeswakerero ndi nzambo zonondya. One hena nokutjira po si nzambo zoyinwa. 10Rumwe nkenye mumvho Arona a ruganene ukereli wegusiropo konombinga daso. Rumwe nkenye mumvho a ruganese honde zosimuna esi vana zamberere nonzo nedongonono lyononzo asi a divilise nawa epongoro lyosizambero. Eyi yiyo kuyirugana nokomaruvharo gokomeho oko. Esi yiso sizambero sokupongokerera kwaHompa.”
Mutero goNkongoronzugo zoMagwanekerero
11 Hompa kwa tanterere Mosesa asi: 12“Nsene to varura mbunga zaIsraeli, nkenye muntu a futire mwenyo gwendi kwaHompa, neisi si mu horokera simpagwa siruwo esi vana kuvarura vantu. 13Nkenye ogu ana kuwiza kevaruro, yige kufuta sivaro esi va hepa ko kwendi, sokuhura pomutero gontembeli. Nkenye ogu a fute eyi nzambo zakwaHompa. 14Nkenye ogu vana kuvarwira kosivaro somumvho, unene povagara wonomvhura 20 yiwo nye wokufuta mfuto zangoso kwaHompa. 15Vantu navenye, nonongawo novahepwe navenye kuhetakana mokufuta, nsene tomu futire nomwenyo deni kwaHompa. 16Yimaliva eyi mbunga zaIsraeli yizo ngazi yi ku pa, nkumwe ngo yi ruganese moNkongoronzugo. Ayo ngayi diworokesesa Hompa Vaisraeli, ayo hena ngayi kara mfuto zonomwenyo deni.”
Siyaha sokulikuhwira songoporo
17 Hompa ta tantere Mosesa asi: 18“Hambura siyaha songoporo netako lyaso lyongoporo. Si tura pokatji koNkongoronzugo nosizambero, makura o ture mo mema. 19Mema ogo gokulikuhwa oArona novana vendi konompadi nokomawoko. 20Nsene tava hwilire moNkongoronzugo ndi tava heda kosizambero pokurugana yirugana youpristeli, va zambere Hompa nzambo zeswakerero, nokuvadipaga si, nsene vana likuhu. 21Ava kuhwe mawoko gawo nonompadi dawo, ntani va dira kufa. Ezi yizo mpangera nava kwaterera vene nava ngava kwama ko dogoro narunye.”
Magadi gokugwava
22 Hompa ta tantere Mosesa asi: 23“Gusa murora gedumba lyewa, gumwe gomira zonokirogarama murongo, mukwawo gosinamoni zonokirogarama ntano, 24gumwe hena gokasiya gonokirogarama murongo (nagunye heteko zago zi lize nezi zontembeli), gumwe gomagadi gononzwe gokuhura polita zimwe. 25Eyi yiyo nye no rugana magadi gokupongoka. Kugavhonga‐vhonga moomu a rugana murugani gomurora. Ago ngagu kara murora gokupongoka. 26Murora ogo ngo gu gwaveke koNkongoronzugo nokoSikesa sEgwanekero esi sa kara yipango, 27nokositafura noyiruganeso yaso nayinye, nokouzweko noyiruganeso yako nayinye, nokosizambero sokuswakererera yedumba lyewa, 28nokosizambero sokuswakererera nonzambo noyiruganeso yaso nayinye, nokosiyaha sokulikuhwira netako lyaso. 29Yimo nye ngoso ngo pongora yininke oyo. Ayo ngayi pongoka nawa‐nawa. Ano nkenye ogu nga guma ko, nage ta pongoka. 30Makura ntani nye ono kugwaveka oArona novana vendi wovagara, o va pongore, nkumwe ngava ruganene nge yirugana youpristeli. 31Makura nkumwe ngo tantere Vaisraeli asi: ‘Murora ogu kwa pongoka kweni noku kwava ngava kwama ko navenye. 32Nokugugwaveka si nkaramuntu, ndi asi o vhonga-vhonge ko nove yoge yi gu fane. Ago kwa pongoka, ano nove yi diva asi ago kwa pongoka. 33Nkenye ogu nga rugana gokugufana, ndi a gu gwave nkaramuntu ga hana asi mupristeli, ngava mu gusa mo movakwawo.’ ”
Yidumba yoyiwa
34 Hompa ta tantere Mosesa asi: “Gusa yitutumikidiso yokuhetakana yedumba lyewa mweyi: sitakite, onika, galibanumu noyitutumikidiso yene‐yene. 35Yi rugana edumba lyewa, moomu a rugana murugani gomurora. Kuyitova nomungwa, tayi zere, tayi pongoka. 36Yimwe ko kuyikonka, tayi kara usura. Makura umwe to u ruganesa komeho zosikesa soyipango moNkongoronzugo, mevega eli ngatu gwanekerera noge. Sidumba esi diva asi kwa pongoka nawa‐nawa. 37Narumwe si asi nove o rugane sidumba sanyamoge sokufana esi. Esi si diva asi sa pongoka, kwa si pongwera Hompa. 38Nkenye ogu nga rugana sidumba esi asi sokuliswa, nye ngasi mu nuke, yige kumugusa mo movakwawo.”
നിലവിൽ തിരഞ്ഞെടുത്തിരിക്കുന്നു:
Exodus 30: KWN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Egwanekerobibeli Lyanamibia 1987, 2003
© Bible Society of Namibia 1987, 2003
