Exodus 29
29
Epongoro lyoArona novana vendi
(Lev 8:1-36)
1“Yokuvarugana pokuvapongora vapristeli, nkumwe ngava kerere nge moyirugana youpristeli, yeyi: Gusa ntwedugona nononzwi donongara mbali da pira sipo, 2nonomboroto dokupira muhahu noyikuhuna yokupira muhahu eyi va duva nomagadi gononzwe, noyikuhuna yepapi yokukwita magadi. Ngo yi ruganesa kousura wokunakuka worukokotwa. 3Makura to yi tura mosikumba, to yi reta, ayo mosikumba. To pitura hena ntwedugona nomakungwe gononzwi gavali yokuzambera Hompa.
4“Makura to ninki mukuroge Arona kumwe novana vendi wovagara va hede pevero lyoNkongoronzugo zaHompa, makura to va kuhu nomema. 5Ono kumana, to gusa nye yikoverero, to dwareke Arona eyerera nerwakani lyosikoverero somapepe nosikoverero somapepe sene nosikoverero soponturo, makura to mu manga ekwamo lyosikoverero somapepe. 6Makura to mu dwareke embare komutwe gwendi, ano oko kembare to tura ko simbarara sokupongoka. 7Makura to gusa magadi gokugwava, to ga tjire komutwe gwendi, makura to mu gwaveke.
8“Vana vendi wovagara nawo to va ninki va hede ko, makura to va dwareke mayerera gawo, 9va manga makwamo gawo, oArona novana vendi wovagara. Makura to va dwareke mambare gawo goupristeli, asi upristeli wawo ngau kare wanarunye. Yimo nye ngoso ngo tungikira oArona novana vendi moupristeli.
10“Twara ntwedu pevero lyoNkongoronzugo, makura oArona novana vendi tava kambeke mawoko gawo pomutwe gwazo. 11Dipagera ntwedu pevero lyoNkongoronzugo komeho zaHompa. 12Tura honde zontwedu konyara zoge, makura o zi kwite konombinga dosizambero. Honde ezi nazi hupa ko to zi tjisire petako lyosizambero. 13Tangununa ko magadi nagenye aga ga kara kweyi yomonda, kehuli nokoruramba‐ramba nokonongera mbali, makura o yi zambere posizambero. 14Ano nyama nosipapa neyi yemezimo, to yi swakererere ponze zorugumbo. Ozo ngoso nzambo zononzo.
15“Gusa nzwi zimwe zekungwe, makura oArona novana vendi va kambeke mawoko gawo komutwe gwalyo. 16Li dipaga, makura honde zalyo to zi sampere kosizambero. 17Li tetagura nontumba‐nontumba, yomonda nomakondo to yi kuhu, makura to yi tura pweyi ono tetagura nopomutwe. 18Swakererera nzwi mudima posizambero. Ozo nzambo zeswakerero zaHompa. Nzambo ezi zomundiro zedumba lyokuhafesa Hompa.
19“Gusa hena ekungwe limwe, makura oArona novana vendi va kambeke mawoko gawo komutwe gwalyo. 20Li dipaga, makura honde zalyo zimwe to zi kwita konondungu domatwi gokorulyo goArona novana vendi nokomapumbwara gawo gokomawoko naga gokonompadi gokorulyo. Honde ezi zina kuhupa po to zi sampere kosizambero mudima. 21Gusa honde zimwe ezi zina kara kosizambero nomagadi gamwe gokugwaveka, makura o yi sampere koyikoverero yaArona. Yimo nye ngoso ngo pongora oArona novana vendi noyikoverero yawo.
22“Gusa magadi gonzwi nomusira gomagadi nomagadi aga ga vavera kweyi yomonda nehuli nonongera nomagadi gado nosirama setako sokorulyo. Yeeyi nzwi zangoso yizo zokuruganesa yokupongoka. 23Gusa hena mboroto za hana muhahu posikumba esi sina kara komeho zaHompa nomboroto zimwe zokuduva nosikuhuna sokukanga. 24Nondya nadinye edi to di tambeke oArona novana vendi momawoko. Di pongora awo kuna di kwaterere, di kare nzambo zaHompa. 25Yina kupwa oyo to di va gusa, makura to di swakererere posizambero zi kare nzambo zeswakerero, pa tunde edumba lyokuhafesa nge.
26“Gusa nkundo zekungwe eli vana pongwesa Arona, makura o zi nunange, zi kare nzambo kosipara saHompa. Ruha oru ronzwi taru kara nye silyo soge.
27“Konzwi ezi vana pongwesa oArona novana vendi, to gusa ko nkundo o zi nunange zi kare nzambo. Sirama esi vana gusa ko naso ngosikwawo si kare sovapristeli. 28Pampangera zange zanarunye, maruha aga yigo ga tumbukira oArona novana vendi. Eyi yiyo yigava yokuhepa ko koVaisraeli. Ogo maruha gokugusira ko vapristeli, ga tunde koyigava yoVaisraeli yombili. Eyi yiyo yigava yawo yakwaHompa.
29“Arona nsene ana fu, mudwaro gwendi gokupongoka tagu kara govana vendi, nkumwe ngava gu va gwavekere tava gu va pongwere. 30MunwaArona ogu ana kumukwama moupristeli, ta gu dwara mazuva gatano‐nagavali a hwilire nago moNkongoronzugo pokukarugana youpristeli mEvega lyoKupongoka.
31“Gusa nzwi ezi vana pongwesa, o terekere nyama ezi zina hupu ko kevega nalyo peke. 32Arona novana vendi wovagara va lire nyama ozo nonomboroto domosikumba pevero lyoNkongoronzugo. 33Velike yiwo wokulya eyi yedongweneso lyononzo pokuvatungika va va pongore. 34Nyama nonomboroto nsene yi hupa po nye dogoro taku si, to yi swakerere po. Va ha yi lya, yeeyi ya pongoka.
35“Arona novana vendi to va rugana nawa‐nawa moomu na yi ku pangera. To va pongora mazuva gatano‐nagavali. 36O dipage nkenye ezuva ntwedu, zi kare nzambo zokudongonona po nonzo. Pokurugana nzambo zedongonono lyononzo, to kuhura nye sizambero. Makura to si gwaveke o si pongore. 37Nzambo zedongonono azi kare po mazuva gatano‐nagavali posizambero o si pongore. Sizambero makura tasi pongokerere nye, ano nkenye ogu ana kuguma ko, nage ta pongoka.
Nonzambo dankenye ezuva
(Num 28:1-8)
38“Ano eyi ngo zambera posizambero yeyi: nonzwi mbali domumvho gumwe nkenye ezuva narunye‐narunye. 39Nzwigona zimwe zokuzamba ngurangura, ano nzwigona zimwe zokuzamba kongurova, 40kumwe nosiumurongo soefa (3,6 l) sousura wokunakuka va runga kumwe nosiune simwe sohini (1,5 l) somagadi gononzwe dokuhopora, ano siune sohini (1,5 l) sonzambo zoyinwa, vhinyu konzwigona zimwe. 41Ano nzwigona zimwe to zi zamba kongurova. To zi zamba moomu azi kara nzambo zonondya nonzambo zoyinwa zongurangura zi gave edumba lyewa. Ozo nzambo zeswakerero kefumano lyaHompa. 42Ozo ngazi kara nzambo zeswakerero zankenye ezuva zomazimo geni gokomeho oko, pevero lyoNkongoronzugo zaHompa, kosipara saHompa. Yipo ngani mu monekera, ngani uyunge noge. 43Opo yipo ngani monekera Vaisraeli, ano Nkongoronzugo zaHompa uyerere wange ngau zi pongora. 44Yimo nye ngani pongora ngoso Nkongoronzugo zaHompa nosizambero sazo. OArona novana vendi nawo ngani va pongora, nkumwe ngava kerere nge moyirugana youpristeli. 45Ano ame ngani tunga mokatji koVaisraeli, ngani kare Karunga gwawo, 46ano awo ngava diva asi ame ni Hompa Karunga gwawo, ogu na va gusa mo mosirongo saEgipite, asi ni kare mokatji kawo. Ame ni Hompa Karunga gwawo.
നിലവിൽ തിരഞ്ഞെടുത്തിരിക്കുന്നു:
Exodus 29: KWN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Egwanekerobibeli Lyanamibia 1987, 2003
© Bible Society of Namibia 1987, 2003
