اعمال 16
16
تیموتائوس، پولس و سیلاسی همراهی بَکَردی
1پولس شَه دِربِه و لِستْرِه شهرون را. اوآ کا ایلَه شاگِردی زِندگی بَکَردی که چَیی نوم تیموتائوس بَه که چَیی نَنه یَهودی و ایماندار بَه، امّا چَیی دَده یونانی بَه. 2لِستْرِه و قونیه کا بِرااِن چَیی چاکی بَواتین. 3چوم پولس پیستِش بَه تیموتائوس سَفری کا چَیی همراه بِبو، یهودیونی واسی که اَ ناحیه کا زندگی بَکَردین، اَیی خَتنه کَردِشه، چیرا که گِرد بَزنین چَیی دَدَه یونانی یَه. 4وختی اَوِن اِم شَهری نَه بَشین اَ شهری را، اَ قوانینی که رسولِن و مَشایخ اورشلیمی کا نوعَه شون بَه، مردمی نَه بَواتین تا اَوون اَنجام بِدَن. 5بَس، کلیسا اِن ایمانی کا قوّت بَگتین و هَر روز چَوون تعداد وِرتَر بَبی.
پولس مقدونی یَه مِردی رویا بَویندی
6دومله، اَوِن فْریجیه و غَلاطیه منطقه اِم سَر تا اَ سَری کا دَوییَردینَه، چوم روح القدس اِجازه نِدوشَه اَوِن خِدا کلامی آرِساوونِن آسیا ایالتی را. 7وختی آرَستینَه میسیَه ایالتی را، تقّلا کَردِشونَه بِشون بیطینیَه را، امّا عیسی روح، اَوون اِجازه نِدوشَه. 8اِمی واسی، میسیَه ایالتی کا دَوییَردینَه و شینَه تْروآسی شهری را. 9شَویرا، پولس رویاکا ویندِشه که ایلَه مقدونیَه مِردکی چَیی پیشی کا پا مَندَه، بَیی مِنَّت بَکَردی که: «بِری مقدونیه و اَمَه کمک بِکَه.» 10وختی پولس اِم رؤیا ویندِشه، اَلبَحَل مقدونیه را رایی بیمونَه، چوم مطمئن بیمونَه که خِدا اَمَه دَخوندَشه تا اِنجیلی خوشَه خَوَری آدییَم اَوون.
لیدیَه، ایمان وَردِه
11بَس، تْروآسی کا یَکراست کَشتی نَه شیمونَه ساموتْراکی جَزیره را، و صَبایی نَه روز آرَستیمونَه نیاپولیسی شهری را. 12اوآکا فیلیپی را رایی بیمونَه که ایلَه اَ شهرون کا بَه که رومی اِن اوآکا زندگی بَکَردین و مقدونیه خاکی دیلَه کا بَه. و چَن روز اَ شهری کا مَندیمونَه.
13مقدّس شنبه روزی کا، شهری کا شیمونَه بِرون و شیمونَه رِواری وَر، اِم فیکری نَه که اوآ کا جِگایی دعا کَرده را اِستَه. اَمَه نِشتیمونَه و ژِنَکونی نَه که اوآکا جَمع آبَه بینَه، دَمَندیمونَه گف ژَندِه. 14چَوون دیلَه کا ایلَه ژِنی خِداپرست، تیاتیرا شهری کا اِستبَه که چَمَه گفون گوش بَدای. چَیی نوم لیدیَه بَه و اَرغوانَ پارچه اون فروشنده بَه که وِر گِرون بینَه. خِداوند چَیی دیلی آکَردِشه تا پولسی پَیغومی گوش بِدَه. 15وختی لیدیَه اِشتَن خانواده نَه غُسل تعمید گِتِشه، اِصرار کَردِشه و بَمون نَه واتِشه: «اَگَم باوَر کَردَرونَه که خِداوندی ایمان وَردَمه، بایَه و چِمِن کَ کا بومونَه.» آخِرسَر چَیی پیستَه تسلیم بیمونَه.
پولس و سیلاس زندانی کا
16ایی کَرَه که اَمَه کارا بَشیمون جِگایی را که اوآکا دعا بَکَردیمون، ایلَه خاتَکی ویندِمونِه که غیبگویی یَه روح داری و فالگیری نَه اِشتَن اَربابون وِرَه سودی آرِساوونی. 17اَ، پولسی دومله و چَمَه دومله راه دَلَکی و خِلع خِلع بَکَردی بَواتی: «اِم مِردَکِن، خِدای متعالی خِدمتگزاری نَه و نجاتی راه شِمه را اِعلام بَکَردین.» 18اَ خاتَک وِر روزون اِم کاری بَکَردی. آخِرسَر پولسی صبر سَر اومَه و آگَردَه اَ روحی نَه که اَ خاتَکی دیلَه کا بَه واتِشه: «عیسایِ مسیح نومی کا تِه دستور بَدایم که اِم کِلَه کا بِرون بای!» هَ لَحظه، روح اَ کِلَه کا اومَه بِرون.
19ولی اَ خاتَکی اَربابِن وختی ویندِشونَه چَوون کار و کاسِبی بِه وا شَه، پولس و سیلاسی گِتِشونَه و اَوون ویسویِه ویسویِه نَه بَردِشونَه شهری میدونی دیلَه رئیسون وَر. 20بَس وختی اَوون وَردِشونَه قاضییون وَر، واتِشونَه: «اِم مِردَکِن یهودی اینَه و چَمَه شهری بِه آشوب کَشَشونَه. 21اَوِن رسم و روسوماتی تبلیغ بَکَردین که چَوون قَبول کَردِه و اَنجام دوعِه، اَمَه را که رومی ایمونَه جایِز نییَه.»
22جماعت نی پولس و سیلاسی سَر هجوم وَردِشونَه و اَوون نَه هَمدَس بینَه و قاضی یِن نی دَستور دوشونَه چَوون خَلا اون بَروَرِن، و اَوون لِس بِژَنِن. 23وختی اَوون وِرَه لِسی ژَندِشونَه، اَوون دَرَفندِشونَه زِندانی دیلَه و زِندانبانی دَستور دوشونَه بَرک چَوون ویرا بِبو. 24وختی زندانبان اِم دَستوری گِتِشه، اَوون دَرَفَندِشه زِندانی دیلَه و چَوون پا اون دارَه کُنده اون کا زِنجیری نَه دَوَستِشه.
فیلیپی یَه زندانبان ایمان بواَردی
25نِصب شَو، پولس و سیلاس دَمنده بینَه دعا کَردِه و سرود خَنده نَه خِدا پرستش بَکَردین و بقیه زِندونی اِن نی اَوون گوش بَداین 26که ایی دفعه بَرکَ زلزله ای اومَه، جوری که زندانی پِی اِن لَرزَه دَلَکینه و اَلبَحَل زندانی بَرِن گِرد آبینَه و گِردِ زِنجیرِن نی پَلَه بینَه. 27زِندانبان پِرِشته، و هِنتَه که زندانی آبییَه بَرون ویندِشه، شَمشیر پِگِتِشه تا اِشتَن بِکِشِه، چوم گمون بَکَردی زِندونی اِن دَوَشته اینَه. 28امّا پولس بِلنده سَسی نَه خِلع ژَندِشَه، واتِشه: «اِشتَن صَدَمَه مَژَن که اَمَه گِرد اییاکا ایمونَه!» 29زِندانبان ایلَه چِرایی پیستِشَه و هول و وَلا نَه دَشَه زندانی دیلَه و هَتَه که تَرسی کا لَرزی پولس و سیلاسی پا دَلَکه. 30دومله، اَوون بِرون وَردِشه و دَفَرسِشه: «آقایِن، چِه بِکَرِم تا نِجات پیدا بِکَرِم؟»
31پولس و سیلاس جَواو دوشونَه: «عیسایِ مسیحِ خِداوندی ایمان بوعَه که تِه و اِشتِه خانواده نِجات پیدا بَکَردیرون.» 32پولس و سیلاس خِداوندی کلامی اَییرا و گِردِ کَسونی را که چَیی کَ کا بینَه، واتِشونَه. 33شَوی هَ ساعتی کا، زندانبان اَوون پِگِتِشه، چَوون زَخمون شوشتِشَه، و اَلبحَل اَ و چَیی خانواده گِرد غُسل تعمید گِتِشونَه. 34زندانبان اَوون بَردِشه اِشتَن کَ و چَوون را سِفرَه جیکَردِشه. اَ و چَیی خانواده اِمی واسی که بِه خِدا ایمان وَردَشون بَه وِر شاد بینَه.
35ولی وختی روز آبَه، قاضی یِن مأمورونی ویسا آکَردِشونَه زندانبانی وَر و واتِشونَه: «اَ مِردکون آزاد آکَه!» 36زندانبان پولسی اِم پیغومی کا خَوَردار کَردِشه و واتِشه: «قاضی یِن دَستور دوعَشونَه که شِمَه آزاد آکَرِم. بَس حِسَه بایَه بِرون و سلامتی نَه بِشه.»
37امّا پولس چَیی جَواوی کا واتِشه: «اَمَه که رومی شهروندی مونَه بیدونِ محاکمه، گِردی پیشی کا اَمَه لِس ژَندِشونَه و دَرَفندِشونَه زندانی کا. حِسَه پیستِشونَه خَلوتَکی اَمَه آزاد آکَرِن؟ نِه هَرگز! بِدا اِشتَن بان و اَمَه اییا نَه بِبَرِن بِرون.»
38مامورِن هِمی قاضییون نَه واتِشونَه، و اَوِن وختی دَرَسِشونَه که پولس و سیلاس رومی شهروندی نَه، بَرکَ واحیمَه ای دَلَکینه 39بَس اومینَه، اَوون کا معذرت خواهی کَردِشونَه و تا زِندانی بِرون اَوون همراهی کَردِشونَه، خواهش کَردِشونَه که شهری کا بِشون. 40پولس و سیلاس زندانی کا بِرون اومِه پَش شینَه لیدیه کَ. اوآ کا بِرااون ویندِشونَه، اَوون تَشویق کَردِشونَه. دومله اوآکا شینَه.
നിലവിൽ തിരഞ്ഞെടുത്തിരിക്കുന്നു:
اعمال 16: ITB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
@ 2024 Korpu Company
