اعمال 15
15
اورشلیمی شورا
1امّا چَن نفر یهودیه ولایتی نَه اومینَه اَنطاکیَه را. اَوِن بِرا اون تعلیم بَداین و بَواتین که: «اَگم مطابق موسی دَب ختَنه مَبییَه، نیمَشایَه نِجات پِیدا بِکَرَه.» 2وختی پولس و بَرنابا اَوون نَه وِر مخالفَت کَردِشونَه و بحث کَردِشونَه، هِنتَه نی قَرار نوشونَه که اَ دِ نفر چَن نفر دییَری نَه اَوون کا بِشون اورشلیمی شهری را و اِم ماجرا رسولون و شیخون نَه در میان بِنَن. 3بَس کلیسا اَوون رایی کَردِشه؛ و وختی اَوِن فینیقیه و سامِرِه کا کارا دَوییَرین، جزئیاتی نَه تعریف کَردِشونَه که چِنتَه غیریهودیِن ایمان وَردِشونَه و گِردِ بِرا اِن اِم خَوَری کا وِر خوشحال بینَه. 4وختی آرَستینَه اورشلیم، کلیسا و رَسولِن و مشایخ، گرمی نَه اَوون قبول کَردِشونَه. پولس و بَرنابا هَر چی که خِدا چَوون واسطه نَه اَنجام دوعَش بَه، چَوون را واتِشونَه. 5ولی بعضی فریسی فِرقه عُلما که ایمان وَردَشون بَه، پِرِشتینَه، واتِشونَه: «واجِبَه که غیریهودیِن ختَنه بِبون و اَوون دستور دوشونَه که موسی شریعتی غَم بَرِن.»
6رَسولِن و مَشایخ جَمع آبینَه تا اِم قضیه بَررسی بِکَرِن. 7وِر بحث کَردِه پَش، آخِرسَر پطرس پِرِشته و اَوون نَه واتِشه: «اِی بِرا اِن، شِمَه بَزنیرون که اوّلین روزون کا، خِدا شمَه دیلَه کا مِن اِنتخاب کَردِشه تا غیریهودییِن چِمِن زوونی کا اِنجیلی پَیغومی دَرَسِن و ایمان بواَرِن. 8و خِدایی که دیلی کا خَورِش اِستَه اَوون را گواهی دوشَه اِنتَه که روح القدسی اَوون عَطا کَردِشه، هَتَه که بَمون نی عطا کَردَشه. 9خِدا چَمَه و چَوون میانه کا هیچ فرقی نِنوشه، بَلکَم ایمانی واسی، چَوون دیلون پاک آکَردِشه. 10بَس حِسَه چیرا خِدا آزمایش بَکَردیرون و شاگِردون گَردنی کا یوغی پِنَیه که نِه اَمَه بَشایمون اَیی پِگِرَم، نِه چَمه اَجداد؟ 11ولی اَمَه ایمان هِستِمونَه که عیسایِ خِداوندی فیضی کا یَه که اَمَه نِجات پیدا بَکَردیمون، هَتَه که اَوِن نی نجات پیدا بَکَردین.»
12دومله جماعتْ گِرد ساکت آبینَه و بَرنابا و پولسی گفون گوش دوشونَه. اَوِن علامت و معجِزه اونی که خِدا چَوون واسطه نَه غِیریهودیون دیلَه کا کَردش بَه، هَنی بَواتین. 13وختی که چَوون گَفِن تَمون آبینَه، یعقوب واتِشه: «اِی بِرااِن، چِمِن گفون گوش بِدییَه. 14شَمعونِ پطرس واتِشه که چِنتَه خِدا اوّلین کَرَه غِیریهودیون لطف کَردَشه، و چَوون دیلَه کا اِشتَن نومی را ایلَه قومی اِنتخاب کَردَشه. 15اِم پیغمبرون گفون نَه مطابقَه، هَتَه که نیویشتَه بییَه:
16«”چِمی پَش، آگَردِم
و داوود پاُتشا خیمَه که بَلَکَه از نو وَج آکَرِم؛
هَنی چَیی ویرونَه اون بینا بَکَردیم،
و اَیی چَیی اوّلی شیوار وَج آکَرِم،
17تا اَوِنی که اِنسانون نَسلی کا بِجا مَندینَه،
و گِردِ غِیر یهودیونی که چمِن نومی اِشتَن کا هِستِشونَه، خِداوندی طلب بِکَرِن.
خِداوند بَواتی، خِداوندی که،
18اِم چییون قَدیمی کا مَعلوم کَردَشه.“
19«بَس چِمِن حکم اِمَه، کسونی که غِیر یهودیون کا خِدا طَرف آگَردِن، زَحمَت مَدییَم. 20امّا بَسی ایلَه نامه‌ای دیلَه کا اَوون کا بِپییَم که خوراکی کا که بُتون را قِربونی بییَه، زِنا کا، خفه بییَه حَیوونون گوشت و خونی کا دوری بِکَرِن. 21چوم قَدیمی کا موسی هَر شهری دیلَه کا کَسونی داشتَشه که چَیی شریعتی اِعلام بِکَرِن، هَتَه که هَر هفته مقدّس شنبه روزی کا، چَیی نیویشته اون یهودیون عبادتگاه اون کا بَخَندین.»
شورا نامه غِیر یهودیون ایماندارون را
22بَس رسولِن و مَشایخ، گِردِ کلیسا نَه تَصمیم گِتِشونَه اِشتَن دیلَه کا مِردَکونی اِنتخاب بِکَرِن و اَوون پولس و بَرنابا همراه ویسا آکَرِن اَنطاکیَه شهری را. بَس یهودایِ معروف بِه بَرسابا و سیلاسی، که بِرا اون دیلَه کا رَهبر بینَه، اِنتخاب کَردِشونَه. 23دومله ایلَه نامه چَوون دَسی نَه ویسا آکَردِشونَه، که اَیی کا نیویشته بییَه بَه:
« چَمَه طرفی نَه که شِمَه بِرا ایمونَه، هَم رسولِن و هَم مَشایخ،
غِیر یهودیَه بِرااونی را که اَنطاکیَه، سوریَه و کیلیکیه کا اینَه،
سلام!
24دَرَسَمونَه که کَسونی چَمَه میانه کا، بی اِم که دستوری اَمَه کا بِدارِن، اومَینَه و شِمَه، اِشتَن گفون نَه تَشویش کَردَشونَه، و باعیث بَه اینَه شِمَه فیکر پَریشون آبو. 25اِمی واسی اَمَه یَکدیل اِنتَه صَلاح ویندِمونَه که مِردَکونی اِنتخاب بِکَرَم و اَوون، بَرنابا و پولسی همراه، که چَمَه عزیزی نَه، ویسا آکَرَم شِمَه وَر، 26اَ مِردَکونی همراه که چَمَه خِداوند عیسایِ مسیح نومی واسی، اِشتَن جانی اِشتَن دَسی تونی کا نوعَشونه. 27بَس یهودا و سیلاسی ویسا آکَردِمونَه تا اِشتَن گفون نَه، شِمَه اِم کارون کا خَوَر دار بِکَرِن. 28روح القدس و اَمَه اِنتَه صلاح ویندِمونَه که شِمَه دوشی سَری کا باری مَنییَم، غیر اَز اِم چییون که ضَروری اینَه 29بُتون قِربونی یَه خوراکی کا و خفه بییَه حَیوونون خون و گوشت و زِنا کا دوری بِکَرَه. اَگم اِمون کا دوری بِکَرَه، چاک بَکَردیرون. وَسّلام.»
30بَس اَوِن رایی بینَه، شینَه اَنطاکیَه شهری را و اوآ کا کلیسا آدَمون جَمع آکَردِشونَه، و نامه آرِساووندِشونَه. 31وختی که اَوِن نامه خَندِشوونَه، اَ پَیغومی کا که دیلگرمی باعیث بَه شاد آبینَه. 32یهودا و سیلاس نی که پیغمبر بینَه، وِرَه گَفون نَه، بِرااون تَشویق کَردِشونَه و قوّت دوشونَه. 33یهودا و سیلاس چَن وَخت اوآ کا مَندینَه، و دومله بِرااِنْ، اَوون سلامتی نَه رایی کَردِشونَه تا آگَردِن اِشتَن ویسا آکَردَه کَسون وَر. 34امّا پولس و بَرنابا اَنطاکیه کا مَندینَه 35اَوِن دییَر ایماندارون همراه دَمَندینَه خِداوندی کلامی تعلیم دوشونَه و اِعلام کَردَشونَه.
پولس و بَرنابا میانه اِختلاف دَلَکِه
36چِندی پَش، پولس، بَرنابا نَه واتِشه: «آگَردَم شَهرونی را که خِداوندی کلامی اَوون کا اِعلام کَردَمونَه، و بِرا اون کا دیدار بِکَرَم تا بِوینَم چِه حال و اوضاعی دارِن.» 37بَرنابا پیستِشَه یوحنایی که معروف بِه مَرقُس بَه نی چَوون همراه بِشو، 38امّا پولس صلاح نِویندِشه کسی که پامفیلیه کا اَوون تَنخا نوشه و اِشتَن همکاری اِدامه دوعَش نِبَه، اِشتَن نَه بِبَرِه. 39اوآکا پولس و برنابا میانه کا بَدجوری اِختلاف دَلَکه، اِنتَه که یَندی کا جِدا آبینَه. بَرنابا، مَرقُسی پِگِتشه و دَریا راه نَه قِپرسی را رایی بَه؛ 40امّا پولس، سیلاسی پِگِتِشه و بِرا اون نَه دَس آدوشَه، خِداوندی فیضی نَه سَفری را رایی بَه. 41وختی پولس، سوریه و کیلیکیه کا دَوییَری، اوآ کلیسا اون تقویت بَکَردی.
നിലവിൽ തിരഞ്ഞെടുത്തിരിക്കുന്നു:
اعمال 15: ITB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
@ 2024 Korpu Company
