انجیلِ مَتّی 19

تعلیم درباره طلاق

1وختی که عیسی اَم لاوش تموم بِکَه جلیل منطقش ترک بکه و اَ دیم اُردن رووارَ دَ، بومه یهودیَه نواحی. 2پِر جماعتی عیسی پَشَ بشنده و اَو بِر اَجونش شفا بداه.

3فَریسی فرقه علما نی چو وَر بومِندِ تا اَجو امتحان بکرنده. اَوه آپرسسنده: «بی که مردک اِشتن زنِگ هر دلیلی را طلاق بدی؟» 4عیسی چُو جواوَ بوات: «مگم توراتَ نِخونتیو که اَ کسی که اجون خلق کرده، اولَ دَ اجون زَنَک و مردَکش خلقش کرده 5و بوات ”چِمه خونَین که مردک اِشتن پِه ما اَدَ جدا بی، و اِشتن زنَگییم پیوند خُرِه و اَ دِ نفر ای بدن بینده؟ 6پس، اَوه دِ بدن نینده بلکم ای بدن اِسنده. پس اَ چی که خدا ایو کردشه، انسان گَوَن جدا مکره.» 7اَوه عیساشون بواتند: «پس چرا موسی پیغمبر حکمِش بدا که مردک اِشتن زَنِگِ طلاقنامَه ای بیدی و اَجو وِل بکره؟» 8عیسی بِوات: «موسی پیغمبر چمه خونَین که شَما دِل سگِ شارینِ اجازِش بدا که شَما اِشتن زَنِگ طلاق بدیا، امّا اول خلقتَ هِمنَه نِبه. 9شَما را وام هر که اِشتن زَنِگ جز زنا را طلاق بیدی و علایدَه زنِگیییم پَیوند بکره، زناش کَرده.»

10شاگردِ عیساشون بواتند: «اَگر همنَه عه، چاکتره هیچ مردکی زنِگ مبره!» 11عیسی بوات: «همَّه نتوننده اَم لاوه عه قبول بکرنده، مگم کسونی که خدا طرفَ اَم لطف اَجون آدایَه بِبی. 12چون بعضی آدمه مادر زادی خواجنده؛ بعضی آدمه نی مردمه دَستییم خواجه بینده و بعضی نی آسمانه پاتشاهی خونین اِشتن خواجه زوننده و پَیوند نکرنده. هر که تونه اَجِم قبول بِکَره، بارز قبول بِکَره.»

عیسی و خوردگون

13اُخُری مردمون اِشتن خوردگونشون بایرد عیسی وَر تا چون سر دس بِنی و دوُعا بِکَره. شاگردِ ام کاره خونَین مردمُنِ را غیضشون بِکَه. 14امّا عیسی بوات: «بارزا وِلِگِ خوردگِ چِمن وَر باینده و چون پیش مَگیرا، چون آسمانه پاتشاهی هِمنَه آدمون را اِسه.» 15عیسی چون سر دس اوناش و اجوشون برکت بدا و بِشه.

ثروتمند جوان

16ای روز مَردکی عیسی وَر بومه و آپرسسشه: «استاد، چه چاکه کاری گَوَن بِکَرم تا اَبدیه زندگی بدارم؟» 17عیسی جواو بدا: «چرا چَمَن کودَ آپرسی که چه چاکه؟ فقط خداعه که چاکه. اگم گَوی اَبدیه زندگی دله بشی، خدا احکامه انجام بده.» 18اَ مردک آپرسسشه: «کومین احکامه؟» عیسی بوات: «‌”قتل مکه، زنا مکه، دزی مکه، دوروغه شهادت مده، 19اِشته پِه و ماعه احترام بنه،“ و ”اِشته قونشییم اِشتن شارین خُش ببه.“ 20اَ جوانه مردک بوات: «همَّه‌ی اَم احکامم انجامِم بدا دِ چه کم دارم؟» 21عیسی جواو بدا: «اگم گَوی کامل بیبی، بِشه و هر چه که داری بِخروش و چو پولِ فقیران آده که آسمان دَ گنجی بداری. اُخُری بوره و چَمَنَ پیرَوی بِکَه.» 22جوانه مردک وختی اَمش بشنَوِس، پِر غمگین ببه و اَ مکانَ دَ بِشه، چون پِر ثروتِش دَ.

23اَ موقع عیسی اِشتن شاگردونش بوات: «حقیقتا، شَما را وام ثروتمندان را پِر سخته که بِشِنده آسمانه پاتشاهی دله بشنده. 24هنی وام که شترِ رد آبییَن، دَرزِنه سولاخَ دَ آسون تره تا ام که ثروتمنده آدمی خدا پاتشاهی دلَه بشی.» 25شاگردان ام لاوَعون اَشنوسَنییم مات ببنده و آپرسسشون: «پس که تونه نجات پیدا بکره؟» 26عیسی اَجون دِدِشت و بِوات: «اَم انسان را غیرممکن اِسه، امّا خدا را همه چی ممکنه.»

27اُخُری پِطرُس بوات: «دِدِس اَما همه چیمون ول کرده و اِشتَ کودَ پِیروی کرام. چه اَجَما آرسه؟» 28عیسی اجون بوات: «حقیقتا، شَما را وام تازه دنیادَ، اَ لحظَه که انسانه زا اِشتن شکوهمند پاتشاهی تخته سَر بِنِشه، شَما که چَمَنَ پِیروی کردِرون، دونزه تخته سر نِشا و خدا قومه دونزه قبیله داوری کرا. 29و هر که چِمن نومه خونین اِشتن کییه یا اِشتن براعه و یا اِشتن خاعه و یا اِشتن په و ما و یا اِشتن خوردگِ و یا اِشتن ملک و ثروته وِل بکره، چُو صد برابره وینه و ابدی زندگی بدست آیره. 30امّا خیلی از آدمون که هَنِنَه اوّلین اِسنده آخرین بینده، و آخرینه اوّلین بینده!

നിലവിൽ തിരഞ്ഞെടുത്തിരിക്കുന്നു:

انجیلِ مَتّی 19: KTT

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

@ 2024 Korpu Company

کتاب مقدس تاتی - منطقه خلخال നെക്കുറിച്ച് കൂടുതലറിയുക