Ukufuma 29
29
Ukupaghuliwa ukwa Aloni na bana bache
(Lev. 8.1-36)
1“Izi zyo zizyo ubombaye nanti ukumupaghula u Aloni na bana bache, pakuba baputi: Senda inkambaku inyana yoka na badubi babili abasita chilema nachimochimo. 2Ubombezye ubusu ubutinye nkani ubwa ngano, loli butakabe ni chilungo. Upiye ivibama ivyakongannya na mafuta agha misyunguti. Ivibama vimo vitakabanje na mafuta, ivinji vibanje vitumbuwa ivipapate nkani ivyakupakiwa na mafuta. 3Uvibike muchidudunga nukwiyipavyo kukwane, poka ni nkambaku inyana na badubi babili bala. 4Wize nu Aloni na bana bache pamulyango uwa Chisakasa icha Mwene, sona ubozye na mizi. 5Po umuvwike u Aloni ilaya ni nkazo nu efodi, ichakuvwala pachifuba, sona nu lamba mumusana wache, yuyo alukiwe akiza. 6Umuvwike impumpu kumutu wache yiyo yilukiwe na mazyu aghakuti, ‘Impaghuliwa kwa Mwene.’ 7Senda amafuta nukumupungulila pamutu wache nukumupakazya. 8Pisinda pache ubasende abana bache abanavuli nukubavwika inkazo. 9Upinye abalamba mumisana yabo nukubavwika ivipewa. U Aloni na bana bache ubimikaye bunubu. Po abene na baluko lwabo bambombelaye imbombo iya buputi bwila na bwila.
10“Wize ni nkambaku inyana pamulyango uwa Chisakasa icha Mwene, po umubuzye u Aloni na bana bache ukuti babike inyobe zyabo pamutu uwa nkambaku yila. 11Uyibole inkambaku yila pamaso pa Mwene pamulyango uwa Chisakasa icha Mwene. 12Usendeko ibanda ilya nkambaku yila nukulipaka pampembe izya chighemo pakubombezya akafingwi kako. Ukupule ibanda lyosi ilyakusyala pabwikalilo ubwa chighemo. 13Pisinda pache usende amafuta ghosi ghagho ghamamatiye amala ni chigaba ichiza nkani icha itima ni figho zyosi zibili, poka na mafuta ghache nukuvyocha vyosi pachighemo. 14Loli uyoche inyama iya nkambaku yila kuzi ukwa visakasa, nikwela lyache ni nyama yache sona na mala ghache. Ichi cho chakwiyipa ichakupepesezya imbibi izya muputi.
15“Usende udubi weka, po u Aloni na bana bache babike inyobe zyabo pamutu uwa dubi yula. 16Umubole udubi yula, po usende ibanda lyache nukulinyafila mumbazu zyosi folo izya chighemo. 17Umudumulannye udubi muvipuzavipuza nukusuka ivya mukasi ni vinama ivya kwisinda. Uvilambalike ivigaba vila pamwanya pamutu ni vigaba ivinji vila. 18#Efe. 5.2; Filp. 4.18Umoche udubi wesi yula pachighemo ukuti chibanje chakwiyipa ichakocha kwa Mwene. Umunusi uwa chakwiyipa chinichi ghukumuhobosya u Mwene.
19“Usende udubi uyunji, po u Aloni na bana bache babike inyobe zyabo pamutu wache. 20Umubole, sona usende ibanda lyache limo nukulipaka kubumalilo ubwa ikutu ilya ndilo ilya Aloni na bana bache, numusumwe uwa nyobe indilo zyabo, sona numusumwe uwa lwayo ulwa ndilo zyabo. Po unyafile ibanda ilyakusyala mumbazu zyosi folo izya chighemo. 21Po usendeko ibanda limo lilyo lili pachighemo, na mafuta aghakupakazya nukumunyafila u Aloni na menda ghache. Ubanyafile sona abana bache poka na menda ghabo. Po u Aloni na bana bache, poka na menda ghabo bakwiza pakuba bapaghuliwa.
22“Pakuti udubi uyu wakubimikila abaputi, usende amafuta agha musinda, na mafuta ghosi ghagho ghamamatiye amala, ni chigaba ichiza nkani icha itima, ni figho zyosi zibili poka na mafuta ghache, sona ni ntapatapa indilo. 23Muchidudunga chicho chili pamaso pa Mwene, usendemo ichibama choka chicho chipakiwe na mafuta, ni chibama choka chicho chite ni chilungo, sona ni chitumbuwa choka ichipapate. 24Uvibike vyosi vinivi munyobe izya Aloni na bana bache, umwakuti vibanje chakwiyipa ichakuzyunguzya mumwanya pamaso pa Mwene. 25Pisinda pache wefyemo munyobe zyabo nukuvyocha pachighemo pamwanya pa chakwiyipa ichakocha chila. Umunusi uwa chakwiyipa chinichi ghukumuhobosya u Mwene.
26“Po usende akajimbi aka dubi yula akakumwimikila u Aloni pamaso pa Mwene ukuti chibanje chakwiyipa ichakuzyunguzya mumwanya. Ichigaba chinichi icha nyama yila chikwiza pakuba chako.
27“Umpaghulile akajimbi ni ntapatapa iya dubi yuyo akabombeziwa pakumwimika u Aloni na bana bache ukuti chibanje chakwiyipa ichakuzyunguzya mumwanya. 28Aba Izilayeli babikaye ivyakwiyipa vinivi. Ivi vyo vivyo vibanje vya Aloni na bana bache bwila na bwila, vivyo aba Izilayeli babikaye kwa Mwene ukufuma muvyakwiyipa vyabo ivyabupoka.
29“Amenda amapaghuliwa agha Aloni ghanagha ghakwiza pakupeghiwa ku bana bache abalumendo umwakuti bavwalaye bo bakwimikiwa. 30Umwana uwa Aloni yuyo akumupyana uwise pakuba muputi, avwalaye amenda ghanagha amasiku seveni, bo akwinjila pakubomba imbombo mu Chipinda Ichizelu mu Chisakasa icha Mwene.
31“Usende udubi uwakumwimikila u Aloni nabana bache nukupiya inyama mu Chipinda Ichizelu. 32U Aloni na bana bache balyanje inyama yila pamulyango uwa Chisakasa icha Mwene poka ni vibama vivyo vili muchidudunga. 33Balyanje vyosi vivyo vikabikiwa kwa Mwene pakuba ichakwiyipa ichakupepesezya imbibi, bo bakwimikiwa. Umuntu bulo atakalye ichakulya chinichi, loli umuputi mwene pachifukwa ichakuti chipaghuliwa. 34Nanti inyama iyakumwimikila poka ni vibama vyasyalako mupaka pandabindabi, muvyoche. Mutakavilyanje pachifukwa ichakuti vipaghuliwa.
35“Umu momumo ukwiza pakumwimikila u Aloni na bana bache ukuyana namumo nakulamulila. Ukwiza pakubomba ulwiho ulwakwimikila ukwa amasiku seveni. 36Isiku ni siku ubikaye inkambaku yoka ukuti chibanje chakwiyipa ichakupepesezya imbibi. Ni chakwiyipa chinichi ukwiza pakuchiswefya ichighemo. Po uchipake na mafuta agha musyunguti ukuti chibanje chizelu. 37Ubombe zinizi isiku ni siku, sona amasiku seveni. Po ichighemo chikwiza pakuba chizelu nkani, sona umuntu wesi pamo ichintu chicho chikupalamasya ichighemo chinichi chikwiza pakuba chizelu.
Ivyakwiyipa ivya isiku ni siku
(Ukb. 28.1-8)
38“Isiku ni siku ichi cho chakwiyipa chicho mubikaye pachighemo: Abana babili abang'ozi aba mwaka ghoka. 39Umubike weka pandabindabi, sona uyunji umubike pachamabwila. 40Poka nu mwana uwa ng'ozi uwakwanda yula ikilogalamu lyoka ilya busu ubutinye ubwakongannya ni lita lyoka ilya mafuta agha misyunguti ukuti chibanje chakwiyipa icha vinyo. 41Ubike umwana uwa ng'ozi uwabubili pachamabwila nkani poka ni chakwiyipa icha busu nicha vinyo ukuyana namumo ukubombela pandabindabi. Umunusi uwa chakwiyipa chinichi ghukumuhobosya u Mwene.
42“Ichakwiyipa chinichi chibikiwanje isiku ni siku ukuti chibanje chakwiyipa ichakocha mupaka inkulilo zyosi izya muntazi. Uchibike pamaso pa Mwene pamulyango uwa Chisakasa icha Mwene papo nkwiza pakukomana nabo nukunena nawe. 43Palapala nkwiza pakukomana naba Izilayeli, sona ubuzilo bunubu bukwiza pakuba buzelu pachifukwa icha buchindamu bwane.
44“Nkwiza pakuchipaghula Ichisakasa ni chighemo bulo, sona nkwiza pakumupaghula u Aloni na bana bache pakuba baputi bane. 45Nkwiza pakwikala pakasi paba Izilayeli, po nkwiza pakuba ne Chala wabo. 46Bakwiza pakummanya ukuti ane ne Mwene u Chala wabo, yuyo akabefyamo muchisu icha Ijiputi umwakuti nikale pakasi papabo. Ane ne Mwene u Chala wabo.
നിലവിൽ തിരഞ്ഞെടുത്തിരിക്കുന്നു:
Ukufuma 29: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
