Ukufuma 28
28
Amenda agha buputi
(Ukf. 39.1-7)
1“Umwimike uwamwinyu u Aloni poka na bana bache abalumendo pakasi paba Izilayeli pakuba baputi. Banaba bo aba: U Nadabu nu Abihu nu Eleyazala, sona nu Itamali. 2Umusonele uwamwinyu u Aloni amenda amapaghuliwa umwakuti ghamupe umuchizi, sona nukuti abonekaye akiza. 3Ubabuzye abafundi bosi babo nabapa ichabupi pambombo iyakusona umwakuti bamusonele u Aloni inkazo, umwakuti apaghuliwe pakuba muputi. 4Ubalamule ukuti basone ichapachifuba nu efodi, ni nkazo, ni laya lilyo lilabiwe akiza nkani, ni mpumpu, sona nu lamba. Bamusonele amenda ghanagha uwamwinyu u Aloni na bana bache abalumendo pakuba baputi abakumbombela. 5Bombezya umwenda umutonte uwa golide, nuwa buluu nu muchesamile, sona nu muchesamu. 6Bapange u efodi uwa mwenda umutonte umulabannye nu golide nu buzi ubwa buluu nu buchesamile nu buchesamu. 7U efodi yula abanje nu twenda tubili pavipunko, tuto tusoneleliwe munkuto zyache. 8Bapange sona ulamba umulabannye uwa mwenda umutonte uwa buluu nu muchesamile, sona nu muchesamu, yuyo apangiwe akiza nkani ukuti apinyililiwe ku efodi umwakuti ghubanje mwenda ghoka.
9“Usende amabwe mabili aghamutengo agha onikisi, ubizepo amatabwa 12 agha bana aba Izilayeli, 10ukuyana na kapapiliwe kabo. Usimbepo amatabwa sikisi pibwe lyoka, sona pibwe ilinji usimbepo amatabwa aghanji sikisi. 11Ughabize amatabwa agha bana aba Izilayeli pamabwe mabili ghanagha ukuyana namumo umubiza mabwe akubombela. Po ughabike amabwe ghala muvyakubikilamo ivya golide. 12Ughasonelele mutwenda utwa efodi pavipunko pakwimilila inko 12 izya ba Izilayeli. U Aloni aghabaghalaye amatabwa ghala umwakuti ane ne Mwene imbakumbukaye abantu bane. 13Ivyakubikilamo vibili vinivi vibanje vya golide, 14ni minyololo mibili iya golide umwenecho ngati mpote, nukuyipinyilila ku vyakubikilamo amabwe vila.
Akanyambi akakuvwala pachifuba
(Ukf. 39.8-21)
15“Usone akiza nkani akanyambi akakuvwala pachifuba, kako ukwiza pakuvwalagha bo ukulonga inongwa. Usone ukuyana namumo bakusonela u efodi uwa mwenda umutonte uwa golide, nuwa buluu nu muchesamile nu muchesamu, yuyo alukiwe akiza nkani. 16Kanaka ubukulu bwache buyane bulo nu mwenda, ghugho wapetekiwa kabili, mubutali kabanje amasentimita 22, sona mububaba kabanje amasentimita 22. 17Usonelemo imizele folo iya mabwe aghamutengo. Mumuzele uwakwanda ubikemo utumabwe utwamutengo utwa lubi nutwa topazi sona nutwa galaneti. 18Mumuzele uwabubili ubikemo utumabwe utwamutengo utwa emeladi nutwa safile sona nutwa dayimondi. 19Mumuzele uwabutatu ubikemo utumabwe utwamutengo utwa yakinti nutwa agate sona nutwa ametisiti. 20Mumuzele uwafolo ubikemo utumabwe utwamutengo utwa belili, nutwa onikisi, sona nutwa yasipala. Utubike utumabwe tunutu muvyakubikamo ivya golide. 21Utumabwe tunutu tubanjepo 12 ukuyana na matabwa agha bana aba Yakobo. Pibwe lyoka ubizepo itabwa lyoka ilya luko ulwa Izilayeli.
22“Uchipangile icha pachifuba iminyololo iya golide umwenecho, yiyo yili ngati mpote. 23Upange impete zibili izya golide nukuzipinyilila kunkuto izya mumwanya izya akakuvwala akapachifuba. 24Upinyilile iminyololo mibili iya golide yila kumpete zibili zila kunkuto izya akakuvwala akapachifuba. 25Upinyilile ubumalilo bubili ubunji ubwa minyololo ku vyakubikilamo amabwe vibili ivya pavipunko vila, vivyo vili kuntazi kwa efodi. 26Upange impete zibili izya golide, nukuzipinyilila muntende kunkuto izya akakuvwala akapachifuba mulubazu ulwa mukasi papipi nu efodi. 27Upange impete izinji zibili izya golide, nukuzipinyilila muntende kuntazi ukwa twenda tubili utwa efodi pavipunko kupipi nu busone pamwanya pa lamba uwakulukiwa akiza nkani yula. 28Pinyilila impete izya akakuvwala akapachifuba kumpete izya efodi ni mpote izya buluu umwakuti akakuvwala akapachifuba kabanje pamwanya palamba ukuti katakazebaye.
29“Bo u Aloni akwinjila mu Chipinda Ichizelu, avwalaye akakuvwala akapachifuba, papo pasimbiwe amatabwa agha inko izya ba Izilayeli, umwakuti ane ne Mwene imbakumbukaye abantu bane akabalilo kosi. 30#Ukb. 27.21; Ukk. 33.8; Neh. 7.65Ubikemo u Ulimu nu Tumimu mukakuvwala akapachifuba, umwakuti u Aloni avinyamule pachifuba chache bo akwiza pamaso papane. Po u Aloni akwiza pakuvinyamula ivintu vibili vinivi ukuti angamanya vivyo nkulonda ukuti abantu bane aba Izilayeli babombaye.
Ivyakuvwala ivinji ivya buputi
(Ukf. 39.22-31)
31“Usone inkazo iya efodi iya mwenda uwa buluu umwenecho. 32Inkazo yiniyi yibanje nu bwazi ubwakwinjizyamo umutu, ghugho ghulabiwe na kamwenda akakupeteka mulubazu mwache umwakuti ghutakazepukaye. 33Ukuzyungulila mubupeteke muntende munkazo yila, ulabemo ni vifwani ivya vikomwa ivya manyele agha buluu, na machesamile, sona na machesamu nu twa belu utwa golide pakasi, 34umwakuzyungulila mubupeteke bosi bula mubekemo amanyele agha buluu na machesamile na machesamu naka belu aka golide. 35U Aloni avwalaye inkazo yiniyi, bo akubomba imbombo iya buputi. Bo akwinjila mu Chipinda Ichizelu pamaso pa Mwene, sona bo akwepamo, ubelu alilaye, po atakwiza pakughoghiwa.
36“Upange imbale iya golide umwenecho, nukubizapo amazyu aghakuti, ‘Yapaghuliliwa kwa Mwene.’ 37Uyipinye kuntazi ukwa mpumpu nu lupote ulwa buluu lubanje pantazi pache. 38U Aloni ayivwalaye imbale yila pacheni chache, ukuti anyamule ukunanga ukwa bantu, umwakuti u Mwene avipokele ivyakwiyipa vyosi vivyo aba Izilayeli bakubika.
39“Umulukile u Aloni amalaya amantonte, sona umupangile impumpu iya mwenda umutonte nu lamba yuyo alabiwe akiza nkani. 40Ubasonele abana aba Aloni inkazo, abalamba sona ni visote, ukuti vibapanje umuchizi, nukuboneka akiza. 41Umuvwike amenda ghanagha uwamwinyu u Aloni na bana bache. Ubapaghule pakubapakazya amafuta gha syunguti umwakuti bambombelaye imbombo iya buputi.
42“Ubasonele abakabuntu aba mwenda umutonte, sona abatali mupaka muntapatapa umwakuti batakabasikulaye abantu. 43U Aloni na bana bache bavwalaye amenda ghanagha akabalilo kosi, bo bakwinjila mu Chisakasa icha Mwene, pamo bo bakupalamila ku chighemo pakumbombela mu Chipinda Ichizelu, umwakuti batakanangaye nukufwa.
“Ulu lo lulaghilo ulwa bwila na bwila ulwa Aloni na baluko lwache.
നിലവിൽ തിരഞ്ഞെടുത്തിരിക്കുന്നു:
Ukufuma 28: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
