Ukufuma 26
26
Ichisakasa ichizelu icha Mwene
(Ukf. 36.8-38)
1“Uzenge Ichisakasa ichizelu icha menda 10 amatonte agha buluu, na machesamile, na machesamu, sona aghakulukiwa ni chifwani icha bakelubi. 2Amenda ghosi aghakuzighila ghayane bulo, mubutali ghabanje amamita 12, sona mububaba ghabanje amamita mabili. 3Ughasonannye poka amenda fayivi pakuba mwenda ghoka umukulu, sona bomba bunubu na menda aghanji fayivi ghala. 4Muntende mulubazu ulwa mwenda uwakwanda umukulu upange ingulusu izya mwenda uwa buluu, sona bomba bunubu nu mwenda uwabumalilo umukulu ghula. 5Upange ingulusu 50 ku mwenda uwakwanda, sona bomba bunubu nu mwenda uwabumalilo umwakuti zyenannye. 6Po upange utulemelo 50 utwa golide utwakulemenkannya amenda mabili amakulu ghala, umwakuti ghubanje Chisakasa choka.
7“Upange amenda 11 aghakupangiwa na meya agha mbuzi, ukuti ghabanje ghakuvwinka Ichisakasa pamwanya. 8Amenda ghosi 11 ghayane bulo, mubutali ghabanje amamita 13, sona mububaba ghabanje amamita mabili. 9Ughasonannye poka amenda fayivi ukuti ghubanje mwenda ghoka umukulu, sona bomba bunubu na menda aghanji sikisi ghala. Ughupetenkannye kabili umwenda uwasikisi pamulyango uwa Chisakasa. 10Upange sona ingulusu 50 mulubazu ulwa mwenda ghoka umukulu uwabumalilo, nukubika sona ingulusu 50 mulubazu ulwa mwenda ughunji uwabumalilo. 11Upange utulemelo 50 utwa mukuba nukwinjizyamo ingulusu pakughalemenkannya poka amenda mabili amakulu ghala pakuba chisakasa choka. 12Umwenda uwakusyalako pakasi na pakasi welelaye bulo kwisinda ukwa chisakasa. 13Amenda aghakusyalako ghagho ghali na masentimita 50 mubutali ghelelaye bulo nukuchivwinka ichisakasa kumbazu zyosi zibili. 14Uchipangile Ichisakasa ivikupikizyo ivinji vibili, choka chibanje cha makwela agha dubi amadwibike mu inki inchesamu ichinji chibanje cha mwenda umutonte ukuti vibanje vyakuvwinka pamwanya.
15“Uchipangile Ichisakasa amafulemu aghakwima agha matabwa agha mungwina. 16Ifulemu lyosi mubutali libanje amamita folo, sona mububaba libanje amasemita 66. 17Ifulemu lyosi libanje nu tulemelo tubili, umwakuti amafulemu ghalemenkane akiza. Amafulemu ghosi mabili ghabanje nu tulemelo. 18Upange amafulemu 20 agha kulubazu ulwakuntende ukwa Chisakasa chila. 19Upange ubwikalilo 40 ubwa siliva, ifulemu lyoka libanje pabwikalilo bubili, umwakuti ghaleme utulemelo tula. 20Upange amafulemu 20 agha kulubazu ulwa kumitu ukwa Chisakasa chila. 21Sona ni vyakwimapo vyache 40 ivya siliva, vibili kuntende kufulemu yoka. 22Upange amafulemu sikisi ukuti ghabanje kwisinda kubwinjililo bwizuba ubwa Chisakasa. 23Sona upange amafulemu mabili ukuti ghabanje pankuto yosi. 24Amafulemu mabili agha munkuto ghanagha ghamamatiziwe poka ukwandila pasi mupaka pamwanya. Amafulemu mabili ghanagha ghagho ghakapanga inkuto, ghosi mabili ghakwiza pakuba bunubu. 25Po pakwiza ukubapo amafulemu eyiti nu bwikalilo 16 ubwa siliva, ifulemu lyoka likaba nubwikalilo bubili.
26“Upange sona intatikilo 15 izya matabwa agha mungwina: Intatikilo fayivi zibanje kulubazu loka ulwa Chisakasa chila, 27intatikilo izyamwabo fayivi zibanje kulubazu ulwamwabo ulwa chisakasa, sona intatikilo izyamwabo fayivi zibanje kwisinda ukwa chisakasa. 28Ululatikilo ulwa pakasi ludumusannye pakasi pa mafulemu ukwandila kubumalilo mupaka kubumalilo. 29Ughapake amafulemu nu golide nukughinjizya mumpete izya golide ukuti zileme. Zyope intatikilo uzipake nu golide. 30Uchizenge ichisakasa ukuyana na kazengele kache kako nkakulanjizya pighamba.
31“Usone umwenda umutonte uwakuzighila uwa buluu nu muchesamile, sona nu muchesamu, ghugho ghulabiwe akiza nkani ni chifwani icha bakelubi. 32Ughupayike umwenda ghula pampanda folo izya matabwa agha mungwina, ghagho ghapakiwe nu golide, sona ghagho ghali nu tulemelo nu bwikalilo folo ubwa siliva. 33#Heb. 6.19, 9.3-5Ughupayike umwenda uwakuzighila ghula mutulemelo nukubika Ibokosi ilya Lufingo kwisinda kwa mwenda ghulaghula. Umwenda ghula ghukwiza pakulesannya Ichipinda Ichizelu, ni Chipinda Ichizelu nkani. 34Ukupikilepo ni chikupikizyo pamwanya pa Bokosi ilya Lufingo, lilyo lili mu Chipinda Ichizelu nkani. 35Ubike itebulo kuzi ukwa Chipinda Ichizelu nkani kulubazu ulwa kumitu ulwa chisakasa, sona ubike ichakubikapo inyale kulubazu ulwakuntende.
36“Pamulyango uwa Chisakasa ubikepo umwenda umutonte uwa buluu nu muchesamile, sona nu muchesamu uwakuzighila, ghugho ghulabiwe akiza nkani. 37Uchipangile ichisakasa umwenda uwakuzighila impanda fayivi izya matabwa agha mungwina, izyakupakiwa nu golide, zizyo zili nu tulemelo utwa golide. Uzipangile impanda zinizi ubwikalilo fayivi ubwa mukuba.
നിലവിൽ തിരഞ്ഞെടുത്തിരിക്കുന്നു:
Ukufuma 26: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
