Ukufuma 25
25
Ivyakwiyipa ivya Chisakasa ichipaghuliwa
(Ukf. 35.4-9)
1U Mwene akamubuzya u Mozesi akati, 2“Ubabuzye aba Izilayeli ukuti banyizile ni vyakwiyipa. Pokela ichakwiyipa chosi chicho umuntu wesi akulonda pakubika. 3Ivyakwiyipa vivyo ubaghiye pakupokela vyo ivi: Ugolide nu siliva nu mukuba 4na amenda agha buluu na machesamile sona na machesamu, amenda amatonte sona na menda agha meya agha mbuzi 5Amakwela agha dubi amadwibike mu inki inchesamu na amakwela amatonte sona na matabwa agha mungwina 6na amafuta agha nyale na mafuta aghakupakazya aghakununkila sona nu twakufukizya utwakununkila 7na amabwe agha onikisi sona na mabwe agha pa chakuvwala ichabuputi icha efodi sona ni chakuvwala ichapachifuba.
8“Abantu banzengele Ubuzilo Ubuzelu, umwakuti ane nikalaye pakasi papabo. 9Muzenge Ichisakasa chinichi ni vintu vyache vyosi ukuyana bulo namumo nkwiza pakukulanjizya.
Nizya Bokosi ilya Lufingo
(Ukf. 37.1-9)
10“Upange ibokosi ilya matabwa agha mungwina. Mubutali libanje amasentimita 110, mububaba libanje amasentimita 66, sona mumwanya libanje amasentimita 66. 11Ulipake nu golide umwenecho, mukasi na kuzi. Akalilaba nu muzele uwa golide umwakuzyungulila. 12Upange impete folo izya golide, izyakunyamulila, nukuzipinyilila kuvinama vyache folo, impete zibili kulubazu loka, sona zibili kulubazu ulunji. 13Upange sona amakwi mabili aghakunyamulila agha mungwina, nukughapaka nu golide. 14Winjizye amakwi mabili ghala mumpete zizyo zili kumbazu zyosi zibili izya bokosi ukuti zibanje zyakunyamulila. 15Amakwi mabili ghala ghabanje bwila mumpete izya bokosi zila, sona ghatakefiwemo. 16Ubikemo mu bokosi amabwe amapapate mabili agha Malamulo ghagho nkwiza pakukupa.
17 #
Heb. 9.5
“Upange ichikupikizyo icha golide umwenecho, mubutali chibanje amasentimita 110, sona mububaba chibanje amasentimita 66. 18Upange abakelubi babili aba golide abakusyana kumbazu zyosi zibili izya chikupikizyo chila. 19Upange ukelubi weka kulubazu loka, sona uyunji kulubazu ulwamwabo ulwa chikupikizyo chila. Ubamamatizye abakelubi bala kuchikupikizyo. 20Abakelubi bala bakuzulile mumwanya ivipapande vyabo nukuchikupikila ichikupikizyo chila. Abakelubi bala babaghiye benannye, bo bakuchennya ichikupikizyo. 21Ubikemo mukasi mu bokosi amabwe amapapate mabili ghala nukulikupikila. 22Nkwiza pakukomana nawe palapala, sona pamwanya pa chikupikizyo pala, pakasi na pakasi pa bakelubi babili, nkwiza pakukupa amalamulo ghagho aba Izilayeli babaghiye pakughakonka.
Itebulo ilyakwiyipilapo ichibama kwa Chala
(Ukf. 37.10-16)
23“Upange itebulo ilya matabwa agha mungwina. Mubutali libanje amasentimita 88, mububaba libanje amasentimita 44, sona mumwanya libanje amasentimita 66. 24Ulipake nu golide umwenecho nukulilabannya nu muzele uwa golide umwakuzyungulila. 25Upange sona ifulemu ipapate, mububaba likaba amasentimita eyiti, nukulilabannya nu muzele uwa golide umwakuzyungulila. 26Upange impete folo izya golide, nukuzipinyilila ku nkuto folo kuvinama ivya tebulo. 27Impete zibanje kupipi nu tumatabwa utupapate tula ukuti tuleme amakwi aghakunyamulila itebulo. 28Upange amakwi agha matabwa agha mungwina nukughapaka nu golide ukuti ghabanje ghakunyamulila itebulo. 29Upange imbale, ni mbako, ni sonta, sona na mabeseni aghakubikila ichakwiyipa ichakung'wela. Vyosi vinivi uvipange nu golide umwenecho 30#Lev. 24.5-8Ubikayepo pitebulo pala ichibama ichakupeghiwa kukwane akabalilo kosi.
Ichakubikapo inyale
(Ukf. 37.17-24)
31“Upange ichakubikapo inyale icha golide umwenecho. Mubwikalilo bwache na mubulemelo bwache vibanje vya golide uwakusyana bulo. Ubwezya bwache ubwakulabannya, na mani ghache, vibanje vyakulemenkana. 32Isamba sikisi zidobosannye mulubazu ulwa chakubikapo inyale. Isamba zitatu zibanje kulubazu loka, sona zitatu kulubazu ulunji. 33Patusamba tosi pabanje imbako zitatu zizyo zikaba ngati bwezya ubwa mposya, amani nu bwezya bwache vikaba pakasamba koka. Imbako zitatu zibanje patusamba utunji, isamba sikisi zyosi zila zikadobosannya pachakubikapo inyale. 34Pa chakubikapo inyale pabanje imbako folo izyakuyana bulo nu bwezya ubwa mposya sona na mani nu bwezya bwache. 35Ubwezya boka bubanje muntende musamba zibili izyakwanda zizyo zyadobosannya ichakubikapo inyale. Ubwezya ubwabubili bubanje muntende musamba zibili izyabubili, ubwabutatu bubanje muntende musamba zibili izyabutatu. 36Ubwezya poka ni samba zila vibanje vyakulemenkana ni chakubikapo inyale, ichakusyaniwa nu golide umwenecho.
37“Upange inyale seveni nukuzyimika pa chakubikapo inyale, umwakuti zilamilaye kuntazi. 38Utulemelo twache ni vyakuyolela itoyi vibanje vya golide umwenecho. 39Ichakubikapo inyale ni vibombelo vyosi uvipange nu golide umwenecho uwakung'wama amakilogalamu 34. 40#Imbo. 7.44; Heb. 8.5Wenelezye ukuti wavipanga ukuyana namumo nkukulanjizizya pighamba pano.
നിലവിൽ തിരഞ്ഞെടുത്തിരിക്കുന്നു:
Ukufuma 25: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
