Ukufuma 18
18
U Yetulo akumwendela u Mozesi
1Yetulo, uwisevyala uwa Mozesi, sona umuputi uwamu Midiyani akivwa vyosi vivyo u Chala akamubombela u Mozesi naba Izilayeli, bo Mwene akubefyamo mu Ijiputi.
2 #
Ukf. 2.21-22
Po u Yetulo akiza poka nu Zipola umuchi uwa Mozesi, yuyo akamuleka kwa wisevyala u Yetulo. 3#Imbo. 7.29Akiza sona na bana abalumendo babili aba Mozesi, uwakwanda akaba we Gelishomu.#18.3 Gelishomu: Itabwa ili likwivwika ngati ilya mu Chihebeli kokuti, Umuyeni. Pakuti u Mozesi akati, “Name ne muyeni muchisu ichiyeni.” 4Uwabubili akaba we Eliyezeli,#18.4 Eliyezeli: Itabwa ilikung'anamula ukuti, U Chala akunyavwa. pakuti u Mozesi akati, “U Chala uwa tata akanyavwa nukumpoka munyobe izya Falabo.”
5U Yetulo u wisevyala uwa Mozesi poka na bana bache sona nu muchi wache bakiza munkolongo pabuzilo bubo u Mozesi akazengapo ivisakasa pighamba ilya Chala. 6U Yetulo akamutumila amazyu u Mozesi aghakuti, “Ane ne ghusovyala u Yetulo nkwiza pakukwendela. Indi poka nu muchi wako, sona na bana bako babili.”
7U Mozesi akabuka pakukomana nu wisevyala. Akafughamila nukumufyofyonta. Bo balamunkana, bakinjila muchisakasa. 8U Mozesi akamupangila uwisevyala ivintu vivyo u Mwene akamubombela u Falabo naba Ijiputi, pachifukwa icha ba Izilayeli. Akamupangila sona nizya ntamyo zyosi zizyo bakakomana nazyo pabulendo bwabo, sona na mosi mumo u Mwene akabapokela.
9U Yetulo akahoboka pakwivwa ivintu ivyiza vyosi vivyo u Mwene akababombela aba Izilayeli pakubapoka munyobe izya ba Ijiputi. 10Akati, “U Mwene apaliwanje, yuyo akabapoka munyobe izya ba Ijiputi nizya Falabo, sona yuyo akabapoka abantu bache munyobe izya Ijiputi. 11Ilelo namanya ukuti, u Mwene wamaka nkani ukubachila abachala abanji bosi, pachifukwa ichakuti akabapoka aba Izilayeli munyobe izya ba Ijiputi, bo bakubayivya.” 12Po u Yetulo akabika ichakwiyipa ichakocha, poka ni vyakwiyipa ivinji kwa Chala. U Aloni poka na balongozi aba ba Izilayeli bakiza nukulya poka nu wisevyala uwa Mozesi pamaso pa Chala.
Ukwimikiwa ukwa balongi
(Ukk. 1.9-18)
13Indabi yache u Mozesi akikala pabulongelo ubwa nongwa pakulonga inongwa izya bantu. Po abantu bakizagha ninongwa zyabo ukwandila pandabindabi mupaka pachamabwila 14Bo uwisevyala ennya vivyo u Mozesi akababombagha, akalalusya akati, “Nkimba choni chicho ukubabombela abantu? Nkimba choni chicho ukulonga wemwene bulo inongwa zyosi zinizi ukwandila pandabindabi mupaka pachamabwila?”
15U Mozesi akamwamula akati, “Imbaghiye pakubomba bunubu pachifukwa ichakuti abantu bakunyizila ukuti bamanye ubwighane ubwa Chala. 16Nanti abantu babili banangilana bakunyizila, po ane nkulonga inongwa yabo ukuti nennye wewenu atanangite nukubabuzya amalamulo ni indaghilo izya Chala.”
17Po uwisevyala, u Yetulo akamula akati, “Chicho ukubomba te chiza. 18Awe poka na bantu aba babo bakukwizila mukwilitizya bulo mwebene. Imbombo iyi nkafu nkani ukuchila amaka ghako, sona utangayibomba wemwene. 19Ivwa kuno, leka nkulingannye chicho ubaghiye pakubomba, po u Chala akwiza pakuba nawe. Chiza ukuti ubanje we mwimilili uwa bantu pamaso pa Chala nukumwizila ninongwa zyabo. 20Ubamanyisye amalamulo ni ndaghilo izya Chala nukubalingannya namumo babaghiye pakwikalilagha nukubalanjizya imbombo zizyo babaghiye pakubombagha. 21Loli usalepo abanavuli abamahala pakasi pabantu. Abanavuli banaba babanje bakumunyila u Chala, abasubiliwa, sona babo baghabengite amabeko, nukubimika pakuba balongozi ba tubukatila utwa bantu utwa 1,000 nutwa 100 nutwa 50 sona nutwa 10. 22Abanavuli banaba balongaye inongwa izya bantu akabalilo kosi. Inongwa impalapala nkani zyo bizaye nazyo kukwako, loli inongwa impepe bangadumula bene. Ichi chikwiza pakukupepulako, pachifukwa ichakuti mukwiza pakwavwana intamyo zinizi. 23Nanti ukubomba vivyo u Chala akukulamula, utakwiza pakulita, sona abantu bosi banaba bakwiza pakubwela, bo inongwa zyabo zilongiwe.”
24U Mozesi akivwila amazyu agha wisevyala nukubomba zyosi zizyo akanena. 25Akasala abanavuli abamahala pakasi paba Izilayeli nukubimika pakuba balongozi aba tubukatila utwa bantu utwa 1,000 nutwa 100 nutwa 50 sona nutwa 10. 26Abanavuli banaba bakalongagha inongwa izya bantu utubalilo tosi. Inongwa impalapala bakabukagha nazyo kwa Mozesi, loli impepe bakadumulagha bene.
27U Mozesi akalaghana nu wisevyala, po u Yetulo akabwela.
നിലവിൽ തിരഞ്ഞെടുത്തിരിക്കുന്നു:
Ukufuma 18: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
