Ukufuma 17
17
Amizi aghakufuma mwilyalabwe
(Ukb. 20.1-13)
1Ichilundilo chosi icha ba Izilayeli chikepamo munkolongo iya Sini, bakasamaghasamagha bulo ukuyana namumo u Mwene akalamulilagha. Bakazenga ivisakasa vyabo pa Lefidimu, loli kulakula kutakabako amizi aghakung'wela 2Po abantu bala bakadalinkana nu Mozesi ukuti, “Tupe amizi aghakung'wela.”
U Mozesi akabamula akati, “Nkimba choni chicho mukwilumbusya kukwane? Nkimba choni chicho mukumuyela u Mwene?”
3Loli abantu bala bakaba ni nyota nkani, po bakilumbusyanga kwa Mozesi bakati, “Nkimba choni chicho ukatwefyamo muchisu icha Ijiputi? Fwandi ukulonda pakutughogha ni nyota aswe na bana bitu, sona ni vitekwa vyitu?”
4Po u Mozesi akamulilila u Mwene akati, “Nkimba imbombe ichoni na bantu banaba? Abantu banaba biyanizye pakunsumba na mabwe.”
5U Mwene akamwamula u Mozesi akati, “Sendako abalongozi bamo aba Izilayeli nukulongolela kuntazi ukwa bantu banaba. Po senda indisa yiyo ukakomela nayo amizi agha mulusoko ulwa Nayilo, nukubuka. 6Nkwiza pakwima pantazi papako pibwe pighamba ilya Sinayi. Ukome ibwe lila, po amizi ghakwiza pakufuma ukuti abantu bang'wele.” Po u Mozesi akazibomba zinizi pantazi pa balongozi aba ba Izilayeli. 7Ubuzilo bula akabwita ukuti Masa nu Meliba,#17.7Masa nu Meliba: Amatabwa ghanagha mu Chihebeli kokuti, Ukuyela pamo Ukwilumbusya. pachifukwa ichakuti aba Izilayeli bakilumbusya kwa Mozesi nukumuyela u Mwene, bo bamulalusya ukuti, “Nkimba u Mwene ali naswe pamo awe?”
Aba Izilayeli bakulwa ubwite naba Amaleki
8Aba Amaleki bakiza pakulwa ubwite naba Izilayeli pa Lefidimu. 9U Mozesi akamubuzya u Yoshwa akati, “Usale abanavuli bamo ukuti indabi balwe ubwite naba Amaleki. Ane nkwiza pakwimilila pighamba, bo indemite indisa munyobe zyane, yiyo u Chala akampa.”
10Po u Yoshwa akabomba vivyo u Mozesi akamulamula. Akalwa ubwite naba Amaleki bala, bo u Mozesi nu Aloni, sona Huli bimiliye pamwanya pighamba. 11Nanti u Mozesi akwezezya mumwanya inyobe zyache, aba Izilayeli bakapotagha. Loli nanti isya pasi inyobe zyache, aba Amaleki bakapotagha. 12Bo inyobe izya Mozesi zyalita, u Aloni nu Huli bakasenda ibwe nukumwikazyapo u Mozesi, bo abene bimiliye mulubazu, balemeleye inyobe zyache mumwanya, umwakuti bakazilemelela bunubu mupaka izuba likinjila. 13Po bunubu u Yoshwa akabapotela zila aba Amaleki bala.
14 #
Ukk. 25.17-19; 1 Sam. 15.2-9 Po u Mwene akamubuzya u Mozesi akati, “Simba nizya bupoti bunubu mwibuku pakuba chintu chimo ichakukumbukilamo. Umubuzye sona u Yoshwa ukuti nkwiza pakubazimizya aba Amaleki.”
15U Mozesi akazenga ichighemo nukuchita ukuti u Mwene we Ndembela yane. 16Akati, “Kwezya mumwanya indembela iya Mwene. U Mwene akwiza pakulwa ubwite naba Amaleki bwila na bwila.”
നിലവിൽ തിരഞ്ഞെടുത്തിരിക്കുന്നു:
Ukufuma 17: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
