Байбихьи 43
43
Мисриялде кӀиабилеб сапар
1Амма ракъул кутак жеги цӀикӀкӀана ракьалда. 2Мисриялдаса бачӀараб тӀорщел лъугӀараб мехалъ, инсуца васазда абуна:
«Нахъеги доре ун, цодагьабги тӀорщел босун рачӀа», – ян.
3Амма Ягьудаца абуна:
«Дов чияс нижеда цӀакъ кьварун лъазабуна, гьитӀинав вац цадахъ вачинчӀого жинда рихьулеб бакӀалде раккугейилан. 4Дуца гьев нижеда цадахъ виччани, дуе тӀорщел босизе ина ниж. 5Дуца гьев виччачӀони, гьенире иналъул пайда гьечӀо, вац вачинчӀого жинда рихьулеб бакӀалде раккугейилан лъазабун бугелъулха дов чияс».
6«Щайха нужеца гьаб балагь диде бачӀинабураб?! – ин абуна ГӀизраилица. – Нужер цоги вац вугилан щай бицараб?»
7Гьез жаваб кьуна:
«Кинабго цӀехедалха дос: нижерго хӀакъалъулъги нижер гӀагарлъиялъул хӀакъалъулъги. Эмен чӀаго вугищилан гьикъана, нижер цогиги вацал ругищилан цӀехана. Гьес цӀехедалин нижеца гьеб бицараб. Лъидаха лъалеб букӀараб гьитӀинав вацги вачун жиндихъе рачӀайилан гьес амру гьабулеблъи?»
8Цинги Ягьудаца жиндирго эмен ГӀизраилида абуна:
«Виччай гьев нижеда цадахъ, ниж хехго нухда ине ва нижги, мунги, нижер лъималги ракъуца хвечӀого рукӀине. 9БетӀер къотӀизе кьела дица гьев тӀад вуссинчӀони. Дица дидаго тӀаде босила гьелъул гӀайиб: дуда аскӀове гьев тӀадвуссун вачине бажаричӀони, хвезегӀан дуда цеве гӀайибиявлъунги хутӀила дун. 10Гьадин нилъецаго квалквалал гьаричӀелани, некӀого кӀицӀулниги дореги щун тӀадруссинаан!»
11Гьебмехалъ ГӀизраилица абуна:
«Гьедин хъван батани, щибха гьабилеб! Нужеца гьадин гьабе: гьаб нилъер ракьалъул нигӀматаздасан сайгъатал росе досие – бальзамги, гьоцӀоги, ладанги, махӀгьуинал пицӀалги, фисташкабиги, миндальги. 12КӀиго нухалъ цӀикӀкӀун гӀарацги босе цадахъ – доб нужер къандалъабазухъ лъун батарабги нахъ буссинабизе. Доба дозул гъалатӀ ккун буго, дир хӀисабалда. 13Буняминги цадахъ ваче ва нахъеги а дов чиясухъе. 14ХӀалкӀолев Аллагьас дов нужеда гурхӀизавеги, дова тарав вацги Буняминги дос нахъе риччазе! Дунин абуни, лъималаздаса махӀрумлъизе хъван батани, махӀрумлъун вукӀинаха!»
15Вацаз сайгъатал къачӀана, цебе букӀаралдасаги кӀиго нухалъ цӀикӀкӀун гӀарацги босана цадахъ. Цинги, Мисриялде рачӀун, Юсупида цере чӀана – гьаб нухалда Буняминги вукӀана цадахъ. 16Гьезда цадахъ Бунямин вихьараб мехалда, Юсупица жиндирго рукъ-къаялъул бетӀерав хъулухъчиясда абуна:
«Гьал чагӀи дихъе рокъоре раче. Цо жоги хъун, квен гьабе: жакъа къалъуда гьез диргун квен гӀахьал гьабизе буго».
17Юсупил буюрухъ тӀубазабун, хъулухъчияс вацал гьесул бакӀалде рачана. 18Амма гьенире унаго, нухда хӀинкъи рекӀелъе ккун, вацал цоцада гаргадизе лъугьана:
«Доб мехалда нилъер къандалъабазухъ лъун батараб гӀарац сабаблъун рачунел ратила нилъ доре. ТӀаде кӀанцӀун, доз нилъ кквела ва лагъзаллъун гьанир чӀезарила, нилъер хӀамулги рахъила!»
19Юсупил минаялъул рагьдухъе щвараб мехалда, хъулухъчиясда аскӀорегӀанги рилълъун, гьез абуна:
20«БетӀерчӀахъад, цо кӀалъазе изну кье! Цереги цо нухалъ гьанире тӀорщел босизе рачӀун рукӀана ниж. 21Нахъруссун унаго, сордо базе рещтӀараб бакӀалда, нижерго къандалъабазул кӀал бичана нижеца. Нижер щивасда къандалъабазул кӀалалдаго, тӀаса камичӀого, батана жинди-жиндир гӀарац. Нижеца гьеб нахъбуссун гьанибе босун буго. 22ЦӀияб тӀорщалихъ кьезе тӀадеги гӀарацги босун буго. Доб мехалда нижер къандалъабазухъ гьеб гӀарац лъица лъурабалиги лъаларо нижеда».
23«Нужеда ургъел ккоге, нуж хӀинкъизе бакӀ гьечӀо, – ян абуна гьезда хъулухъчияс. – Нужер Аллагьас – нужер инсул Аллагьас – балъго лъун батила гьеб гьениб. Доб мехалда нужеца кьураб гӀарац дихъе тӀаса камичӀого щвана!»
Цинги гьес гьазда аскӀове Шимеон вачун вачӀана. 24Гьел киналго цадахъ гьес Юсупил рокъоре рачана, гьезул хӀатӀал чуризе лъимги кьуна, хӀамузе кӀалцӀиги бана. 25Вацаз жидерго сайгъатал цере рахъана, ва къалъул гӀужалда Юсупида дандчӀвазе хӀадурлъана гьел: гьазда абун букӀана дора къаде кваназе ругин нужилан. 26Юсуп рокъове вачӀараб мехалда, гьаз гьесие сайгъатал кьуна ва, гӀодоб гьумерги цузабун, гьесда цебе сужда гьабуна. 27Цинги гьезулгун салам-каламги гьабун, Юсупица гьикъана:
«Нужеца дида бицун букӀарав, нужер херав эмен кин вугев? Гьев жеги сах-саламат вугищ?» – ан.
28Гьесие бетӀерги къулун, вацаз абуна:
«Дур лагъ, нижер эмен, сах-саламат вуго», – ян.
29Гьебмехалда жиндирго тӀул бикьарав вац Бунямин вихьана Юсупида, ва гьес абуна:
«Гьавищ дов нужер гьитӀинав вац? Аллагьасул цӀоб лъеги дуда, дир вас!» – ин.
30Вацасдехун рекӀелъ гьулчараб хӀеренлъи-недегьлъиялъул карачелалъ, Юсупил гӀодизе бачӀана. Хехго цояб рокъовеги лъугьун, гӀодана гьев. 31Цинги беркӀалги чурун, нахъеги гьалбадерида аскӀове вилълъана Юсуп ва, яхӀ гьабун, квен босейилан буюрана. 32Юсупие батӀаго, гьалбадерие батӀаго, мисриязе батӀаго лъуна квен (мисриязул диналда рекъон, жугьутӀазда цадахъ кваназе гьезие гьукъараб букӀана). 33КӀудиясдаса гьитӀинасде щвезегӀан иргадал Юсупида цере гӀодор чӀезаруна вацал. ХӀикмалъун цоцахъ ралагьана гьел. 34Жиндирго тепсиялдаса квен битӀун бачӀунеб букӀана гьазие Юсупица, ва Буняминие кьолеб бутӀа цогидазулалдаса щуго нухалъ цӀикӀкӀараб букӀана. Гьедин Юсупида цадахъ гӀорцӀизегӀан квана-гьекъана гьел.
നിലവിൽ തിരഞ്ഞെടുത്തിരിക്കുന്നു:
Байбихьи 43: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
